Pagpanaksi sing Epektibo sa Publiko nga mga Duog
1. Bilang pag-ilog sa unang siglo nga mga Cristiano, paano nagapanaksi ang mga Cristiano karon sa publiko nga mga duog, kag ano ang mga resulta?
1 Kaangay sang una nga mga disipulo ni Jesus, ginatinguhaan sang mga Cristiano karon nga ipaambit ang maayong balita sa mga tawo bisan diin. (Binu. 16:13; 17:17; 20:20, 21) Bilang resulta sang ila mga panikasog nga manaksi sa publiko nga mga duog, nasapwan nila ang interesado nga mga tawo nga mahimo indi mapakig-angutan sa pamalaybalay nga ministeryo.
2. Ngaa kinahanglan ang paghantop kon nagapanaksi sa publiko nga mga duog, kag paano kita makaamot sa kahim-ong?
2 Kinahanglan ang paghantop kon nagapanaksi sa publiko. Sa masami, mas maayo kon manghikot nga di-hilmunon. Halimbawa, kon madamo katama nga manugbantala ang manaksi sing dungan sa isa ka duog ukon sa isa ka balaligyaan, mahimo nga makulbaan ang madamo nga tawo sa aton. Mahimo ini magapanubo sa dignidad sang aton hilikuton kag magaupang sa aton pagkaepektibo. Ano ang himuon agod indi ini matabo? Nasapwan sang pila ka kongregasyon nga may madamo sing pangpubliko nga teritoryo nga mas maayo kon tungatungaon ini sa indibiduwal nga mga teritoryo. (1 Cor. 14:40) Dugang pa, makaamot kita sa maayong kahim-ong kon mangabudlay lamang kita sa teritoryo nga gin-asayn para sa aton kongregasyon magluwas kon may espesipiko nga mga kahimusan nga ginhimo sang Komite Sang Kongregasyon sa Pag-alagad agod buligan ang iban nga kongregasyon.—Tan-awa ang Enero 1999 nga Ang Aton Ministeryo sa Ginharian, p. 5, par. 18-19.
3. Ano nga paagi ang nasapwan sang iban nga epektibo sa pagpanaksi sa publiko nga mga duog?
3 Pagpalapit sa mga Tawo: Sang nakighambal si Jesus sa babayi sa bubon, nagsugod sia paagi sa malip-ot nga komento kag amat-amat nga ginpasangkad ang paghambalanay sang makita ang iya interes. (Juan 4:7-26) Ini nga paagi epektibo man karon. Nasapwan sang pila ka manugbantala nga agod mangin epektibo sa pagpanaksi sa publiko, makabulig kon maghinguyang anay sing pila ka minuto sa pagtamyaw sa mga tawo kag pagpakita sing personal nga interes sa ila antes ipresentar ang mensahe sang Ginharian. Nagakomento sila sa topiko nga makawiwili sa ila duog, nga masami nagadul-ong sa paghambalanay. Samtang ang iban nagapabutyag sang ila mga kabalaka, nagapamati sila sing maayo. Dugaydugay, nagapaambit na sila sing lugpay gikan sa Pulong sang Dios.—Roma 15:4.
4. Paano naton mapalambo ang masapwan naton nga interes?
4 Pagpalambo sang Interes: Kada may maayo kita nga paghambalanay, dapat panikasugan naton nga magpahamtang sing mga kahimusan agod mapalambo ang interes. Paano naton ini mahimo? Kon manugtapos na ang aton paghambalanay, mahimo nga kuhaon mo ang imo nga kuwaderno kag magsiling: “Nalipay ako sa aton paghambalanay. May paagi bala nga mapadayon naton ini sa masunod?” Ukon magsiling: “Luyag ko nga ipabasa sa imo ang isa ka artikulo nga napat-od ko nga maluyagan mo gid. Sarang ko bala madala ini sa imo puluy-an ukon opisina?” Ang pila ka manugbantala nagapamangkot lamang: “Puede ko bala mahibaluan ang imo telepono?” Masami nga may maayo ini nga resulta.
5. Ano ang dapat nga tulumuron naton samtang nagapanaksi sa publiko nga mga duog?
5 Madamo nga tawo nga napakig-angutan una sa publiko nga mga duog ang nagbaton sing pagtuon sa Biblia. Ini nga mga pagtuon sarang madumalahan sa iya balay, sa iya ginatrabahuan, ukon sa duog publiko kon puede, ukon paagi sa telepono. Kabay nga tulumuron naton nga makasugod sing mga pagtuon sa Biblia samtang nagapanaksi kita sa publiko nga mga duog.