Pagpakita Sing Personal nga Interes—Paagi sa Paghanda
1 Ang maayo nga paghanda para sa ministeryo magabulig sa aton sa pagpakita sing personal nga interes sa iban. Paano? Kon nakahanda kita sing maayo, indi mangin sobra ang aton kabalaka sa aton presentasyon kag sa amo mahatagan naton sing mas maayo nga igtalupangod ang tagbalay. Luwas pa, makabulig ini nga malandas ang aton kakulba amo nga makapamulong kita sing tinagipusuon. Apang, paano kita makahanda sang epektibo nga presentasyon?
2 Paggamit Sang Nagakabagay nga Presentasyon: Magpili sang isa ka panugda nga presentasyon sa Enero 2006 nga gua sang Ang Aton Ministeryo sa Ginharian nga nagakabagay sa inyo duog, kag tun-i kon paano ini mapabutyag sa imo kaugalingon nga mga tinaga. Ipahisuno ini sa inyo teritoryo. Halimbawa, kon pirme ka makasugilanon sang mga tawo sang pila ka relihioso ukon etniko nga ginhalinan, hunahunaa kon paano ang imo presentasyon makaganyat sa ila. Ang pagpasibu sang imo presentasyon sa mga tawo nga imo masugilanon nagapakita nga interesado ka gid sa ila.—1 Cor. 9:22.
3 Kon nagamit mo na ang isa ka presentasyon, padayon nga pauswaga ini. Sanglit importante gid ang introduksion, talupangda kon ano ang reaksion sang mga tawo sa imo introduksion. Interesado bala sila sa topiko? Nagasabat bala sila sa imo mga pamangkot? Kon wala, maghimo sing mga pagpasibu tubtob makaimbento ka sing epektibo nga presentasyon.
4 Mga Bulig sa Pagdumdom: Madamo ang nagakalipat sang ila presentasyon kon yara na sila sa ganhaan. Kon nagakatabo ini sa imo, natilawan mo na bala ang pag-ensayo sini sing matunog upod sa iban? Makabulig ini sa imo agod nga mangin maathag ini sa imo hunahuna kag mapresentar ini sing maayo, kag sing lohiko. Magahanda man ini sa imo nga magpasibu sa nanuhaytuhay nga reaksion sang tagbalay.
5 Ang isa pa ka bulig agod nga madumduman ini amo ang pagsulat sang malip-ot nga sumaryo sang presentasyon sa isa ka diutay nga papel kag pasiplatan ini antes ka manuktok sa balay. Nasapwan sang iban nga ining malip-ot nga nota makabulig sa ila nga mangin mas relaks kag makapakigsugilanon sing maayo sa mga tawo. Sa sining mga paagi, ang maayong paghanda makabulig sa aton nga mapakita ang personal nga interes sa iban kag magapauswag sang aton pagpresentar sang maayong balita.