Ipatalupangod ang “Kapawa sang Kalibutan”

1. Anong daku nga kapawa ang gintagna sa Pulong sang Dios, kag anong okasyon ang pinasahi nga nagapatalupangod sa sini nga kapawa?

¹ Paagi kay manalagna Isaias nagtagna si Jehova: “Ang katawhan nga nagalakat sa kadudulman nakakita sing daku nga kapawa. Kon tuhoy sa mga nagapuyo sa duta nga may daku nga kadulom, ang kapawa nagsilak sa ila.” (Isa. 9:2) Ining “daku nga kapawa” makita sa mga ginhimo sang Anak mismo sang Dios, nga si Jesucristo. Ang iya hilikuton samtang diri sa duta kag ang mga pagpakamaayo nga resulta sang iya pagsakripisyo naghatag sing alibyo sa mga yara sa espirituwal nga kadulom. Ini nga kapawa amo gid ang ginakinahanglan sang mga tawo sa sining madulom nga mga tion. Ang Panihapon sang Ginuo nagahatag sing pinasahi nga kahigayunan sa aton agod ipatalupangod ang “kapawa sang kalibutan.” (Juan 8:12) Sang nagligad nga tuig, minilyon ang nagpakita sang pagtuo paagi sa pagbuylog sa aton sa pagtuman sang sugo ni Jesus: “Padayon ninyo nga himuon ini bilang pagdumdom sa akon.” (Luc. 22:19) Samtang nagahilapit ang pagsaulog sang Memoryal sa sining tuig, paano kita makapakigbahin sa pagpatalupangod sang daku nga kapawa nga ginapaiwag ni Jehova?—⁠Fil. 2:⁠15.

2. Paano naton mapabaskog ang apresasyon sang aton tagipusuon sa halad gawad, kag ano ang epekto sa paghimo sini?

² Palambua ang Tinagipusuon nga Apresasyon: Ang tion sang Memoryal isa ka kahigayunan nga mapamalandungan naton ang daku nga gugma nga ginpakita ni Jehova kag ni Jesus paagi sa pag-aman sang halad gawad para sa katawhan. (Juan 3:16; 2 Cor. 5:14, 15) Ang paghimo sini magapabaskog gid sang aton tinagipusuon nga apresasyon sa sining sagrado nga okasyon. Ang tanan nga katawhan sang Dios mahimo nga luyag maghinguyang sing tion sa pagbasa kag pagpamalandong sa pinasahi nga pagbasa sang Biblia sa Memoryal, nga masapwan sa Pag-usisa sa Kasulatan sa Adlaw-adlaw. Ang pagpamalandong sa walay tupong nga mga kinaiya ni Jehova, nga dalayawon gid nga ginapadayag sa iya pag-aman sang gawad, amo ang rason nga ginapabugal gid naton nga sia ang aton Dios. Ang pagpamalandong kon ano ang kahulugan sang gawad para sa aton mismo nagapabaskog sang aton gugma para sa Dios kag sa iya Anak kag magapahulag sa aton nga himuon ang aton bug-os nga masarangan sa paghimo sang kabubut-on sang Dios.—⁠Gal. 2:⁠20.

3. Paano naton mapakita ang aton apresasyon sa Memoryal?

³ Kon ginaapresyar gid naton ang aman ni Jehova nga kaluwasan, ang aton kalangkag sa Memoryal magapahulag sa mga estudyante sa Biblia, mga pagduaw liwat, himata, kaingod, kabutho, kaupod sa trabaho, kag iban pa nga naagda naton sa sining pinasahi nga okasyon. (Luc. 6:45) Busa, maghimo sing pinasahi nga panikasog sa pag-agda sa ila, nga nagahatag sa ila sing naimprinta nga imbitasyon sa Memoryal bilang pahanumdom sa ila. Gani agod indi malimtan ang bisan sin-o, madamo ang nakasapo nga praktikal ang paghupot sang isa ka listahan sang mga regular nga ginaagda sa Memoryal, nga nagadugang sing mga bag-uhan kada tuig. Ang paghimo sini sa organisado nga paagi kag ang malangkagon nga pag-agda sa mga interesado amo ang isa ka maayong paagi sa pagpabutyag sang aton pasalamat kay Jehova nga Dios “sa iya di-malaragway nga walay bayad nga dulot.”—⁠2 Cor. 9:⁠15.

4. Ano ang makabulig sa aton nga madugangan ang aton pagministeryo sa Marso, Abril kag Mayo?

⁴ Dugangi ang Pagpakigbahin sa Ministeryo: Madugangan mo bala ang imo ministeryo sa Marso, Abril kag Mayo? Ang pagtinguha nga mapaambitan ang iban sang “kapawa sang mahimayaon nga maayong balita tuhoy kay Cristo” pat-od gid nga pakamaayuhon sang Dios. Si Jehova, subong Tuburan sang espirituwal nga kasanagan, nagsugo: “Magsilak ang kapawa gikan sa kadudulman.” (2 Cor. 4:4-6) Kon kinahanglanon, ang mga gulang magahiwat sang miting sa pag-alagad sa latagon sa iban pa nga tion kag lokasyon, nga nagapanguna sa pagsakdag sa mas malawig nga pagpanaksi. Mahimo ini maglakip sa pagbantala sa kaagahon sa kalye ukon mga kahimusan sa pagpanghikot sa duog sang negosyo kag pagpanaksi sa telepono sa kaudtuhon ukon sirom. Agod madugangan ang imo pagministeryo, magpahamtang sing rasonable nga tulumuron sang oras, kag tinguhai nga malab-ot ini. Sa madamo, ang paghatag sing pinakamaayo kay Jehova nagalakip sang pribilehiyo nga makaauxiliary payunir.—⁠Col. 3:23, 24.

5. Paano nakabenepisyo ang madamo sa pagpanubo sang oras nga kinahanglanon para sa auxiliary payunir?

⁵ Makaauxiliary Payunir Ka Bala? Kapin na sa pito ka tuig sugod sang ginpanubuan ang kinahanglanon nga oras para sa auxiliary payunir. Nagpaposible ini nga pagbag-o nga mas madamo pa ang makaeksperiensia sang mga pagpakamaayo sang pag-auxiliary payunir. Nakaauxiliary payunir ka na bala? Nangin kinabatasan na ini sang iban kada tuig. Sa madamong kongregasyon dinosena nga manugbantala ang dungan nga nagsulod sa sini nga sahi sang pag-alagad, kag nangin makapaladya ini nga bahin sang hilikuton sang kongregasyon kada tuig. Makapain ka bala sing isa ka bulan sa pag-auxiliary payunir sa sining panag-on sang Memoryal? Ang Abril mahimo nga maayo gid para sa iban, sanglit may lima ini ka Sabado kag Domingo.

6. Anong makakulunyag nga mga aman ang matigayon?

⁶ Nakaiskedyul bala nga duawon sang manugtatap sang sirkito ang inyo kongregasyon sa Marso, Abril kag Mayo? Ang dugang nga pagpakamaayo mahimo nga bukas para sa imo. Subong sang ginpahibalo namon sang nagligad, sa 2006 tuig sang pag-alagad, ginaagda ang tanan nga nag-auxiliary payunir sa mga bulan nga duaw sang manugtatap sang sirkito sa pagtambong sa una nga bahin sang miting nga hiwaton para sa mga payunir sa tion sang duaw. Walay duhaduha nga ang makapalig-on sa espirituwal nga impormasyon sa sining miting magabulig sa madamo nga nag-auxiliary payunir nga magtinguha nga mangin regular payunir. Dugang pa, sa Marso makapribilehiyo kita sa pagbulig sa mga tawo nga makatigayon sang espirituwal nga kasanagan paagi sa bag-o nga tulun-an nga libro nga Ano Gid ang Ginatudlo Sang Biblia? Ngaa indi pagtumuron nga makasugod sa pagtuon sa Biblia sa bag-o nga libro?

7, 8. (a) Ano ang makabulig sa aton nga makaiskedyul agod makaauxiliary payunir? (b) Paano ang kooperasyon sa pamilya makabulig, kag paano makabenepisyo ang bug-os nga pamilya?

⁷ Samtang ginabinagbinag mo ang kinahanglanon para sa auxiliary payunir nga 50 ka oras, hunahunaa kon ano nga iskedyul ang magatugot sa imo nga mapaiwag ang kapawa sang kamatuoran sing mga 12 ka oras kada semana. Ipakigsugilanon ini sa mga nagmadinalag-on, subong man sa iban. Mahimo man ini magpalig-on sa ila nga magbuylog sa imo. Sa maayo nga pagplano, ang bawtismado nga mga pamatan-on kag tigulang, nakasapo nga indi man gid mabudlay nga malab-ot ining dalayawon nga tulumuron. Ipangamuyo ini. Nian, kon posible, planuha ini, kag magkalipay sa pag-auxiliary payunir!—⁠Mal. 3:⁠10.

⁸ Madamo nga pamilya ang nakasapo nga ang pagsinakdaganay sa sulod sang pamilya nagpaposible nga makaalagad ang isa sa ila sa sini nga tulumuron. Ang isa ka pamilya nagdesisyon nga ang tanan nga lima ka bawtismado nga miembro magaauxiliary payunir. Ang duha ka bata nga indi pa bawtismado magapanikasog man nga madugangan ang ila hilikuton. Ano ang nabenepisyuhan sang pamilya sa sining pinasahi nga panikasog? Nagsulat sila: “Makalilipay gid yadto nga bulan, kag nagbatyag gid kami nga napalig-on ang kaangtanan sang pamilya. Nagapasalamat gid kami kay Jehova sa sining dalayawon nga pagpakamaayo!”

9. Paano naton mapaiwag ang aton kapawa sa sining panag-on sang Memoryal?

⁹ Ang aton bala pinasahi nga hilikuton sa Marso, Abril kag Mayo mangin makapahulag kag magapasuod pa gid sa aton sa aton langitnon nga Amay? Nagadepende gid ang aton kadalag-an sa aton personal nga panikasog sa pagpabaskog sang aton gugma sa Dios kag sa iya Anak kag sa pagdugang sang aton pagpakigbahin sa ministeryo. Kabay nga ang aton determinasyon kaangay sang salmista, nga nag-amba: “Dayawon ko gid si Jehova sa akon mga bibig, kag sa tunga sang madamo nga katawhan dayawon ko sia.” (Sal. 109:30) Pakamaayuhon gid ni Jehova ang aton makugi nga hilikuton sa sining panag-on sang Memoryal. Busa kabay pa nga paiwagon naton ang daku nga kapawa agod nga mas madamo ang magagua sa kadudulman kag “makaangkon sing kapawa sang kabuhi.”—⁠Juan 8:⁠12.