Maggamit Sing mga Visual Aid sa Pagtudlo
1. Paano naggamit si Jehova sang mga visual aid sa pagtudlo sa iya mga alagad sang una, kag ano ang nangin resulta?
1 Sa pagpaalinton sang importante nga impormasyon sa iya mga alagad sang una, naggamit kon kaisa si Jehova sing mga palanan-awon kag mga damgo. Binagbinaga ang palanan-awon ni Ezequiel tuhoy sa langitnon nga kangga ni Jehova. (Ezeq. 1:1-28) Hunahunaa lamang kon ano ang ginbatyag ni Daniel sang nagdamgo sia tuhoy sa matagnaon nga pagmartsa sang mga kagamhanan sa kalibutan. (Dan. 7:1-15, 28) Kag kamusta naman ang makakulunyag nga pagpahayag kay apostol Juan “paagi sa mga tanda” tuhoy sa mga butang nga mahanabo sa “adlaw sang Ginuo”? (Bug. 1:1, 10) Gintudluan sila ni Jehova paagi sa maduagon nga butang kag gamhanan nga buhat, kag nagpabilin gid ini sa ila hunahuna.
2. Ano nga mga visual aid ang aton magamit sa pagtudlo sa iban sang mga kamatuoran sa Biblia?
2 Kon luyag naton nga indi madali malipatan ang aton ginapaalinton nga mga kamatuoran sa Biblia sa iban, mahimo man naton magamit ang aton mga video sa pagtudlo. May nanuhaytuhay nga topiko ang aton mga video kag ginapalig-on sini ang pagsalig sa Biblia, sa organisasyon ni Jehova, kag sa mga prinsipio nga nagapauswag sang Cristianong pagkabuhi. Binagbinaga ang pila ka paagi nga magamit naton ang aton mga video sa pagtudlo. Ang masunod amo ang sampol nga mga video nga mahimo gamiton.
3. Ano ang magamit mo agod matuytuyan mo ang estudyante sa Biblia sa organisasyon?
3 Sa Ministeryo: Nasugiran mo na bala ang imo estudyante sa Biblia tuhoy sa aton bug-os kalibutan nga Cristianong paghiliutod? Ipakita ini sa iya paagi sa video nga Our Whole Association of Brothers. Mahimo mo ini mapahulam sa iya agod malantaw niya antes sang inyo masunod nga pagtuon ukon lantawon ninyo nga duha sa inyo pagtuon. Nian binagbinaga ang mga pamangkot para sa repaso nga masapwan sa Hunyo 2002 sang Ang Aton Ministeryo sa Ginharian.
4. Anong mga kagamitan sa pagtudlo ang magamit sang mga pamatan-on nga Saksi sa eskwelahan?
4 Mga pamatan-on, mahimo ninyo maistorya ang inyo manunudlo tuhoy sa pagpasalida sa klase sang dokumentaryo nga video nga Jehovah’s Witnesses Stand Firm Against Nazi Assault ukon Faithful Under Trials—Jehovah’s Witnesses in the Soviet Union. Magtanyag nga maghimo ka sang mga pamangkot, ibagay sa paghinun-anon sa klase ang mga pamangkot sa Hunyo 2001 ukon Pebrero 2003 sang Ang Aton Ministeryo sa Ginharian.
5. Ano ang matigayon sang mga ginikanan agod magamit nila sa pagtuon sang pamilya?
5 Upod sa Pamilya kag mga Abyan: Mga ginikanan, binagbinaga kon ano na ang pag-uswag sang inyo mga kabataan sugod sang ginpagua ang video nga Young People Ask—How Can I Make Real Friends? Ngaa indi ini pagtan-awon liwat sa inyo masunod nga pagtuon sang pamilya? Ginbalay sa Abril 2002 sang Ang Aton Ministeryo sa Ginharian ang mga pamangkot para sa mapagsik kag maathag nga paghinun-anon.
6. Paano mangin makapalig-on ang inyo pag-updanay sa inyo mga abyan?
6 May mga abyan ka bala sa kongregasyon nga luyag mo agdahon sa inyo balay? Ang pagtan-aw upod sa ila sang video nga Respect Jehovah’s Authority mahimo nga makapalig-on gid nga gab-i, ilabi na kon pagkatapos sini repasuhon mo ang mga leksion nga matun-an, nga nagagamit sang mga pamangkot sa Septiembre 2004 sang Ang Aton Ministeryo sa Ginharian.
7. Anong iban pa nga higayon ang imo nahunahunaan nga magamit ang aton mga video?
7 Iban Pa nga Kahigayunan: Paano mo pa magamit ang aton 20 ka video? Mahimo bala nga ang pagpasalida sang isa ukon duha sa sini sa imo regular nga ginaduaw makabulig sa iya nga mag-uswag sa espirituwal? Mahimo mo bala matanyag nga pasalidahon ang video sa mga nursing home ukon sa sentro para sa mga tigulang sa inyo lugar? Makabulig bala ang mga video agod tahuron ka sang imo di-Saksi nga mga himata, kaingod, kag kaupod sa trabaho? Matahom, makatudlo, kag epektibo nga mga visual aid ang aton mga video. Gamita ini sa pagtudlo.