Nagapamangkot Ka Bala Kon May Mapatigayon Sila?

Kon may ginadumalahan ka subong nga isa ka pagtuon sa Biblia, ngaa indi mo pagpamangkuton ang imo estudyante kon bala may mga abyan, himata, ukon kakilala sia nga basi luyag makahibalo kon ano ang ginatudlo sang Biblia? Masami nga may ihatag sia nga mga ngalan. Kon magpasugot ang estudyante, mahimo hinambitan mo ang iya ngalan kon magduaw ka sa iya mga ginpatigayon agod magtanyag sing pagtuon sa Biblia. Mahimo ka magsiling, “Si [ngalan sang estudyante] nalipay sa pagtuon sa Biblia, kag nagahunahuna sia nga luyag mo man nga makabenepisyo sa amon walay bayad nga programa sang pagtuon sa Biblia.” Nian ipasundayag sing malip-ot kon paano ginahiwat ang pagtuon, nga nagagamit sang Ginatudlo Sang Biblia nga libro.

Kon may estudyante ka nga madasig nga nagauswag, mahimo palig-unon mo sia nga ilaragway ang kahimusan sa pagtuon sa iya mga abyan kag mga himata nga interesado. Mahimo niya sila agdahon sa tion sang iya pagtuon. Ukon kon indi ini kombeniente, mahimo niya patigayunon nga masugilanon mo sila agod ipasundayag kon paano ginahiwat ang pagtuon. Sa paghimo sini, mapalig-on ang estudyante nga isugid sa iban ang iya nahibaluan sa Biblia.

Ang regular mo nga mga ginaduaw mahimo man magpatigayon sa iban, bisan pa nga sila mismo wala pa magbaton sang regular nga pagtuon sa Biblia. Kon nagatanyag ka sa ila sang Ginatudlo Sang Biblia nga libro, mahimo ka mamangkot, “May kilala ka bala nga luyag makaangkon sining publikasyon?”

Bangod sa pagkahilingagawon sang tion, luyag naton gamiton ang tanan nga pamaagi agod mabuligan ang mga tawo nga mabatian kag mabaton ang maayong balita. Nagapamangkot ka bala kon may mapatigayon sila?