“Padayon nga Magsunod sa Akon”
1 Madamo nga tawo ang luyag lamang magpahamuot sang ila kaugalingon, apang sa masami indi sila malipayon. Sa kabaliskaran, ginrekomendar ni Jesus ang isa ka dalanon sang dimakagod nga paghatag nga nagaresulta sa matuod nga kalipay. (Binu. 20:35) Nagsiling sia: “Kon ang bisan sin-o luyag magsunod sa akon, ipanghiwala niya ang iya kaugalingon . . . kag padayon nga magsunod sa akon.” (Mar. 8:34) Nagadalahig ini indi lamang sang panalagsa nga pagdingot sang isa sa iya kaugalingon sang pila ka kalipayan. Nagakahulugan ini nga kada adlaw dapat naton pahamut-an si Jehova, indi ang aton kaugalingon.—Roma 14:8; 15:3.
2 Binagbinaga ang halimbawa ni apostol Pablo. Bangod sang “labaw gid nga kabilihanan sang ihibalo tuhoy kay Cristo Jesus,” gin-untatan ni Pablo ang pagtinguha sang personal nga mga handum kag naghugod sa pagpasangkad sang intereses sang Ginharian. (Fil. 3:7, 8) Nagsiling sia, ‘Sa akon bahin malipay gid ako sa paghinguyang sing bug-os’ sa pag-alagad sa iban. (2 Cor. 12:15) Tanan kita dapat mamangkot: ‘Paano ko ginahinguyang ang akon tion, kusog, ikasarang, kag mga pagkabutang? Nabuyo bala ako sa pagpasangkad sang akon kaugalingon nga mga intereses, ukon nagatinguha bala ako nga pahamut-an si Jehova?’
3 Mga Kahigayunan: Kada tuig, nagahinguyang ang katawhan sang Dios sing kapin sa isa ka bilyon ka oras sa nagaluwas kabuhi nga hilikuton nga pagbantala sing Ginharian. Sa kongregasyon, ang mga pamatan-on kag mga tigulang nagapanghikot sa ila nanuhaytuhay nga asaynment agod makabulig sa iban. Madamo man nga hilikuton ang ginahimo may kaangtanan sa mga asambleya kag mga kombension subong man sa pagpanukod kag pagmentenar sang mga bilding nga ginagamit sa pagpasangkad sang matuod nga pagsimba. Kag hunahunaa ang mahigugmaon nga bulig sang mga kauturan nga nagapangalagad sa mga Hospital Liaison Committee kag mga Patient Visitation Group. Ining tanan nga pagsakripisyo isa ka pagpakamaayo sa aton Cristianong paghiliutod!—Sal. 110:3.
4 Kon may mga kalamidad ukon mga emerhensia, may kahigayunan kita sa pagbulig sa nanuhaytuhay nga paagi. Apang, sa masami mahimo nga kita na lang ang maghantop kon ang aton masigka-Cristiano nagakinahanglan sing bulig ukon pagpalig-on. (Hulu. 17:17) Kon handa kita sa pagbulig sa iban kag sa pagpasangkad sang intereses sang Ginharian, ginailog naton si Jesus. (Fil. 2:5-8) Kabay pa nga ipadayon naton ini.