Palambua ang Maayong mga Batasan, Aniha ang Bugana nga Pagpakamaayo
1. Ngaa mapuslanon nga usisaon ninyo ang inyo espirituwal nga rutina?
1 Sang bag-o pa lang kamo nangin Cristiano, mahimo nga gintinguhaan gid ninyo nga mapalambo ang maayong rutina sa espirituwal nga mga hilikuton nga nagalakip sa pagtuon sa Biblia, Cristianong mga miting, ministeryo sa latagon, kag pangamuyo. Nag-uswag kamo sa espirituwal bangod sang pagpakamaayo ni Jehova sa inyo panikasog. Ayhan, pila na ka tuig ang nagligad sugod sang ginbawtismuhan kamo. Nahuptan pa bala ninyo ang maayong espirituwal nga mga batasan nga inyo ginpalambo sa tion nga nangin Cristiano kamo?
2. Ano ang kapuslanan sa aton sang pagbasa sing Biblia kada adlaw?
2 Usisaa ang Inyo Rutina: Kinabatasan bala ninyo nga magbasa sang isa ka bahin sang Pulong sang Dios kada adlaw? Daw ano nga mga pagpakamaayo ang aton matigayon sa paghimo sini! (Jos. 1:8; Sal. 1:2, 3) Sa Israel sang una, dapat magbasa ang tagsa ka hari sang iya kopya sang Kasuguan “sa bug-os nga mga adlaw sang iya kabuhi.” Ano ang kapuslanan sini? Mapalambo niya ang pagkamapainubuson kag magkahadlok kay Jehova agod indi sia magsipak gikan sa Iya mga sugo. (Deut. 17:18-20) Amo man karon, ang pagbasa sing Biblia kada adlaw magabulig sa aton nga magpabilin nga wala sing kasawayan kag kasal-anan sa tunga sining malaut kag garok nga kalibutan. Magabulig man ini sa aton nga masangkapan sing bug-os sa aton ministeryo.—Fil. 2:15; 2 Tim. 3:17.
3. Anong mga pagpakamaayo ang aton matigayon sa tayuyon nga pagtambong sa mga miting?
3 Kinabatasan ni Jesus ang pagsulod sa sinagoga, sa diin ginabinagbinag ang Kasulatan. (Luc. 4:16) Wala duhaduha nga nagpabaskog gid ini sa iya nga atubangon ang mga pagtilaw. Mapalig-on man kita sang espirituwal nga instruksion nga ginahatag paagi sa mga miting sang kongregasyon kag sa ‘pagpalig-unanay.’ (Roma 1:12) Ang pagtipon sing tingob upod sa mga kauturan magabulig sa aton nga mabatas ang mga kabudlayan sa sining katapusan nga mga adlaw. (Heb. 10:24, 25) Kinabatasan pa bala ninyo nga tambungan ang tanan nga miting?
4. Ano ang kapuslanan sang aton pagpakigbahin sa ministeryo kada semana?
4 Ang inspirado nga rekord nagasugid sa aton nga ang mga apostoles nagbantala sang maayong balita sa “adlaw-adlaw sa templo kag sa mga balay.” (Binu 5:42) Bisan pa indi kita makasarang sa pagbantala adlaw-adlaw, masarangan bala naton nga himuon nga kinabatasan ang pagpakigbahin sa pila ka porma sang pagministeryo kada semana? Sa paghimo sini, pat-od gid nga mangin lantip kita sa pagsugid sang Pulong sang Dios, kag makatigayon kita sang makapalig-on nga mga eksperiensia sa pagpaambit sang kamatuoran sa Biblia sa iban.
5. Ngaa importante gid nga mangamuyo sing regular kay Jehova?
5 Bugana nga ginpakamaayo si manalagna Daniel sa iya pag-alagad kay Jehova “sing mapinadayunon” sa bug-os niya nga kabuhi. Nagalakip ini sa batasan nga regular nga nagapangamuyo kay Jehova. (Dan. 6:10, 16, 20) Subong man, kon regular kita nga nagapangamuyo sing tinagipusuon kay Jehova, pakamaayuhon niya kita sang iya balaan nga espiritu. (Luc. 11:9-13) Luwas pa sa sini, magasuod si Jehova sa aton kag tugutan niya nga matigayon naton ang suod nga kaangtanan sa iya. (Sal. 25:14; Sant. 4:8) Daku gid ini nga pagpakamaayo! Kabay pa nga manghikot kita sing mapisan agod mahuptan ang maayong espirituwal nga mga batasan kag anihon ang bugana nga pagpakamaayo gikan kay Jehova.