Pamalaybalay nga Pagbantala
1. Anong pamangkot ang nagaluntad tuhoy sa pamalaybalay nga ministeryo, kag ngaa?
1 “Yadtong nakaeksperiensia sing nanuhaytuhay nga paagi sa pagpalapnag sang Kamatuoran magaugyon gid nga ang pamalaybalay nga pagbantala sa pagpanagtag sang libro nga MILLENNIAL DAWN, sa sini nga tion, amo gid ang pinakaepektibo nga pamaagi sa pagbantala sang Kamatuoran.” Ginapadaku sini nga dinalan nga ginkutlo sa Hulyo 1, 1893, nga gua sang Zion’s Watch Tower ang kapuslanan sang pamalaybalay nga ministeryo. Ang mga tawo sa bug-os nga kalibutan nagakabig sini subong tanda sang mga Saksi ni Jehova. Epektibo pa bala ini nga pamaagi karon, bangod halos indi na maabtan ang mga tawo sa ila balay sa pila ka kadutaan?
2. Ano ang Makasulatanhon nga sadsaran sang pamalaybalay nga pagbantala?
2 Makasulatanhon kag Importante: Napasad sa Kasulatan ang pamalaybalay nga pagbantala. Ginsilingan ni Jesus ang 70 ka disipulo nga magkadto sa balay sang mga tawo sing tigduhaduha. (Luc. 10:5-7) Wala madugay pagkatapos sang kamatayon ni Jesus, nagsiling ang Biblia tuhoy sa iya mga disipulo: “Adlaw-adlaw sa templo kag sa mga balay padayon sila nga wala nagauntat sa pagpanudlo kag sa pagbantala sing maayong balita.” (Binu. 5:42) Makugi man sa pagtudlo si apostol Pablo sa balay kag balay.—Binu. 20:20.
3. Ano ang pila ka bentaha sa pamalaybalay nga pagbantala?
3 Importante gihapon karon ang pamalaybalay nga pamaagi sa pagpalapnag sang maayong balita. Mahimo naton ‘mapangita’ ang mga takus sa sining sistematiko kag mahim-ong nga paagi. (Mat. 10:11) Ang kalabanan nga tawo mas relaks sa ila balay. Ang pagpakigsugilanon sa ila sing personal—mabatian ang ila tingog, makita ang ekspresyon sang ila guya, kag makita ang ila kahimtangan—magabulig sa aton nga mahantop ang ila mga interes kag ginakabalak-an. Masami ini nagahatag sa aton sang pinakamaayo nga kahigayunan nga makapakigsugilanon sa ila sing madugaydugay.
4. Paano naton mahimo nga mas mabungahon ang pamalaybalay nga pagbantala?
4 Maghimo Sing Personal nga Pagpasibu: Handa si apostol Pablo sa pagpasibu “tungod sa maayong balita.” (1 Cor. 9:23) Ayhan mapasibu man naton ang aton iskedyul sa pagbantala sa tion nga yara ang mas madamo nga tawo sa ila balay, subong abi sang kahapunon, sa talipuspusan nga semana, ukon kon mga piesta opisyal. Ilista ang mga balay nga wala sing tawo, kag nian kadtui ini sa iban nga adlaw sang semana ukon iban nga oras sa amo nga adlaw.
5. Paano ang mga may balatian mahimo mapaupod sa pamalaybalay nga hilikuton?
5 Bisan yadtong mga may balatian mahimo nga makapakigbahin sa pamalaybalay nga pagbantala. Ayhan mahimo naton sila updon sa mga balay nga indi mabudlay kadtuan, nga makapaposible nga makapanghikot sila sing komportable. Ang isa ka utod nga babayi nga nabudlayan sa pagginhawa nakahimo sa pagbantala sa isa lang ka balay kada tunga sa oras. Apang, malipayon kag naayawan gid sia sang nakaupod sia sa grupo!
6. Ngaa dapat naton himuon nga regular nga bahin sang aton ministeryo ang pamalaybalay nga pagbantala?
6 Madamo sing tulad karnero nga mga tawo ang padayon nga masapwan sa pamalaybalay nga hilikuton. Ang isa ka manugbantala nanuktok sa puertahan kag ginsilingan: “Sulod lang. Nakahibalo ako kon sin-o ka. Nangamuyo ako sa Dios nga magpadala sing isa nga magbulig sa akon, kag nian nabatian ko ang pagpanuktok sa puertahan. Ginpamatian niya ako kag ginpadala ka niya.” Nagapamatuod ini nga ginapakamaayo ni Jehova ini nga pamaagi sang pagbantala. (Mat. 11:19) Mangin determinado nga himuon nga regular nga bahin sang imo ministeryo ang pamalaybalay nga pagbantala.