Ang Labing De-kalidad nga Pagbulong—⁠Ano Ini?

“Ang mga pasyente nga wala nagagamit sing dugo sa pagpabulong, sa pagkamatuod, amo ang luyag nga makatigayon sing labing de-kalidad nga operasyon nga matigayon.” Amo sini ang siling ni Dr. Michael Rose, medikal direktor kag manug-anestisya. Anong mga pamaagi kag tal-us sa pagpatughong ang mahimo nalakip sa “wala dugo nga pagbulong”? Dapat mo ini mahibaluan agod makadesisyon ka pasad sa ihibalo tuhoy sa pagbulong kag operasyon. Tan-awa ang video nga No Blood—⁠Medicine Meets the Challenge. Pagkatapos sini, tilawi ang imo ihibalo sa masunod nga mga pamangkot.—⁠Patalupangod: Bangod ang video may malip-ot nga mga danyag sang operasyon, dapat mangin maalamon ang mga ginikanan kon nagatan-aw sini upod sa ila magagmay nga kabataan.

(1) Ano ang panguna nga rason ngaa indi magpatughong sing dugo ang mga Saksi ni Jehova? (2) Kon tuhoy sa pagpabulong, ano ang luyag sang mga Saksi ni Jehova? (3) Ano ang sadsaran nga kinamatarong sang mga pasyente? (4) Ngaa rasonable kag responsable nga tikang ang pagpili sing mga tal-us sa pagtughong sang dugo? (5) Kon madamo katama nga dugo ang nadula, ano ang duha ka butang nga dapat gilayon nga himuon sang mga doktor? (6) Ano ang apat ka prinsipio sa estratehiya sang tal-us sa pagtughong sang dugo? (7) Paano sang mga doktor (a) makontrol ang pagdugo, (b) matipigan ang pula nga selula nga dugo, (c) mapadasig ang pagpatubas sang dugo, kag (d) mapasag-uli ang nadula nga dugo? (8) Ilaragway ang pamaagi nga ginatawag nga (a) hemodilution kag (b) cell salvage. (9) Ano ang dapat mo mahibaluan tuhoy sa mga tal-us sa pagtughong sing dugo? (10) Sarang bala mahimo ang delikado kag komplikado nga mga operasyon bisan wala sing pagtughong sing dugo? (11) Ano nga pag-uswag ang nagakatabo sa patag sang medisina?

Ang pagbaton sang pila sa mga pagbulong nga ginpakita sa video isa ka butang nga dapat desisyunan sang isa suno sa iya nahanas sa Biblia nga konsiensia. Nakadesisyon ka na bala kon ano nga tal-us sa pagtughong sing dugo ang luyag mo batunon kag sang imo kabataan? Dapat mahibaluan man sing bug-os sang mga katapo sang imo pamilya nga di-Saksi ang imo desisyon kag ang mga rason sa sini.—⁠Tan-awa ang “Mga Pamangkot Gikan sa mga Bumalasa” sa Hunyo 15, 2004, kag Oktubre 15, 2000 nga mga gua sang Ang Lalantawan.