Nakahibalo Ka Bala Kon Ano ang Imo mga Pililian?

Nagadamo na karon ang mga ospital sa bug-os nga kalibutan nga nagaopera nga wala nagagamit sing dugo. Nahibaluan kag nahangpan mo bala ang mga sahi sang pagpabulong nga wala nagagamit sing dugo? Dapat nahibaluan mo agod makahimo ka sing husto nga desisyon kon magpabulong ka ukon magpaopera. Tan-awa ang video nga No Blood​—Medicine Meets the Challenge. Nian, mapinangamuyuon nga binagbinaga ang imo natun-an paagi sa bulig sang masunod nga mga pamangkot.​—Patalupangod: Bangod ining video nagapakita sing malip-ot nga mga eksena sang pag-opera, dapat pamensaron sing maayo sang mga ginikanan kon bala updon nila ang ila magagmay nga mga anak sa pagtan-aw sini.

(1) Ano ang panguna nga rason ngaa nagadumili sa pagpatughong sing dugo ang mga Saksi ni Jehova? (2) Kon tuhoy sa pagpabulong, ano ang luyag sang mga Saksi ni Jehova? (3) Ano ang sadsaran nga kinamatarong sang mga pasyente? (4) Ngaa rasonable kag responsable nga tikang ang pagpili sing mga tal-us sa pagtughong sing dugo? (5) Kon madamo katama nga dugo ang nadula, ano ang duha ka butang nga dapat gilayon nga himuon sang mga doktor? (6) Ano ang apat ka prinsipio sa estratehiya sang tal-us sa pagtughong sing dugo? (7) Paano sang mga doktor (a) makontrol ang pagdugo, (b) matipigan ang pula nga selula nga dugo, (c) mapadasig ang pagpatubas sing dugo, kag (d) mapasag-uli ang nadula nga dugo? (8) Ilaragway ang pamaagi nga ginatawag nga (a) hemodilution kag (b) cell salvage. (9) Ano ang dapat mo mahibaluan tuhoy sa mga tal-us sa pagtughong sing dugo? (10) Sarang bala mahimo ang delikado kag komplikado nga mga operasyon bisan wala sing pagtughong sing dugo? (11) Ano nga pag-uswag ang nagakatabo sa patag sang medisina?

Ang pila ka pamaagi sang pagbulong nga ginpakita sa video nagadepende sa nahanas sa Biblia nga konsiensia sang kada indibiduwal. Nakahimo ka na bala sing maathag nga panindugan kon ano nga sahi sang pagpabulong ang batunon mo kag sang imo kabataan kag nian nasulat mo na ini sa DPA card? Para sa kompleto nga paghinun-anon tuhoy sa sining mga butang, repasuha sing maayo ang “Mga Pamangkot Gikan sa mga Bumalasa” sa Hunyo 15, 2004, kag Oktubre 15, 2000 nga mga gua sang Ang Lalantawan. Nian gamita ang mga work sheet sa suplemento sang Enero 2007 nga Ang Aton Ministeryo sa Ginharian nga “Paano Ko Tamdon ang mga Bahin Sang Dugo kag ang mga Pagbulong nga Nagagamit Sang Akon Dugo?,” kon nagahimo sing personal nga mga desisyon tuhoy sa sahi sang pagbulong nga imo pilion ukon sikwayon. Pagkatapos sini, pat-ura nga nasaylo mo sing sibu ang imo mga ginpili sa imo DPA card. Dapat pahibaluon mo man sing maayo ang imo mga health-care representative kag ang imo di-Saksi nga mga himata tuhoy sa imo mga desisyon.

[Kahon sa pahina 3]

• Nakadesisyon ka na bala kon ano nga sahi sang pagpabulong ang batunon mo kag sang imo kabataan?

• Dala mo bala pirme ang imo nasulatan nga DPA card kon engkaso may emerhensia?