Ang Tanan Makapakigbahin sa Paghimo sing Bag-o nga mga Disipulo
1 Ang bag-o nga disipulo indi resulta sang panikasog sang isa lamang ka tawo. Mahimo gamiton ni Jehova ang tanan niya nga “mga masigkamanugpangabudlay” agod buligan ang mga estudyante sa Biblia nga mag-uswag sa espirituwal. (1 Cor. 3:6-9) Ginabuligan naton ang mga bag-uhan indi lamang paagi sa aton tinagipusuon nga mga komento sa Cristianong mga miting kundi paagi man sa aton maayong paggawi, nga nagapakita sing talalupangdon nga pamatuod nga nagapanghikot ang espiritu sang Dios sa aton kabuhi. (Juan 13:35; Gal. 5:22, 23; Efe. 4:22, 23) Ano pa gid ang sarang mahimo agod mabuligan ang mga bag-uhan?
2 Subong Kongregasyon: Mapakita naton tanan ang interes sa mga nagasugod sa pagtambong sa mga miting paagi sa paghimo sang una nga tikang sa pagtamyaw sa ila sing tinagipusuon kag sa pagpakigsugilanon sa ila antes kag pagkatapos sang miting. Naghinumdom sang iya una nga pagpakig-angot sa kongregasyon, ang isa ka tawo nagsiling: “Mas madamo nga tawo ang nakilala ko nga matuod gid nga mahigugmaon, bug-os nga estranghero, sa sulod sang isa ka adlaw sangsa nakilala ko sa simbahan nga gindak-an ko. Maathag nga nakita ko ang kamatuoran.” Pito ka bulan sugod sang iya una nga pagtambong sa miting, nabawtismuhan sia.
3 Hatagi sia sing hanuot nga komendasyon samtang nagauswag ang estudyante sa Biblia sa espirituwal. Nagabatas bala sia sing pagpamatok? Regular bala sia nga nagatambong sa mga miting? Nagakomento na bala sia? Nagpalista na bala sia sa Teokratikong Eskwelahan Para sa Ministeryo ukon nagsugod na sa pagpakigbahin sa ministeryo? Hatagi sia sing komendasyon sa iya pag-uswag. Makapaumpaw kag makapalig-on ini sa iya.—Hulu. 25:11.
4 Subong Nagadumala Sing Pagtuon sa Biblia: Nabuligan sang pila ka manugbantala ang ila estudyante sa Biblia nga makilala ang mga katapo sang kongregasyon paagi sa pag-agda sa iban nga manugbantala sa pag-upod sa ila sa pagtuon. Agdaha gilayon kon posible ang estudyante sa pagtambong sa mga miting sang kongregasyon. Kon magtambong na sia sa mga miting, ipakilala gid sia sa iban. Nagapanikasog bala sia nga malandas ang malain nga bisyo, subong sang pagpanigarilyo? May katapo bala sang iya panimalay nga nagapamatok sa iya pagtuon? Mahimo nga makabenepisyo sia sa pagpakigsugilanon sa isa ka manugbantala nga nakaatubang kag nakalandas na sang kaangay sini nga kabudlayan.—1 Ped. 5:9.
5 Kinahanglan sang mga bag-uhan ang espirituwal nga suporta gikan sa kongregasyon. Ang tanan makabulig sa ila agod mag-uswag paagi sa pagpabutyag sang hanuot personal nga interes sa ila.