“Nagahatag Sia sing Gahom sa Ginakapoy”
1 Tanan kita ginakapoy kon kaisa. Mahimo nga indi lamang ini bangod sa trabaho ukon iban pa nga pisikal nga hilikuton kundi bangod man sang aton mga problema sa sining “makahalanguyos nga mga tion nga mabudlay atubangon.” (2 Tim. 3:1) Subong mga alagad ni Jehova, paano kita makatigayon sang espirituwal nga kabakod agod indi kita maghinay sa aton ministeryo? Mahimo naton ini paagi sa pagsalig sa isa nga may ‘mabaskog nga gahom,’ si Jehova. (Isa. 40:26) Nahibaluan niya ang aton mga kinahanglanon kag interesado gid sia sa pagbulig sa aton.—1 Ped. 5:7.
2 Mga Aman ni Jehova: Ginapabakod kita ni Jehova paagi sa iya balaan nga espiritu, ang labing gamhanan nga puersa nga gingamit niya sa pagtuga sang uniberso. Ginabuligan kita sang espiritu sang Dios agod “maulian sing kusog” kon kapuyon kita. (Isa. 40:31) Pamangkuta ang inyo kaugalingon, ‘San-o ang ulihi nga tion nga ginpangamuyo ko sing espesipiko ang balaan nga espiritu agod palig-unon ako sa pagtuman sang akon Cristianong mga obligasyon?’—Luc. 11:11-13.
3 Paagi sa pagbasa kag pagpamalandong sa inspirado nga Pulong sang Dios kada adlaw kag sa pagpabilin nga mapagros sa espirituwal paagi sa regular nga pagtuon sang aton Cristianong mga publikasyon, mangin kaangay kita sang isa ka matambok nga “kahoy nga natanom sa ubay sang mga kasulgan sang tubig, nga nagapamunga sa iya panag-on kag ang iya dahon indi malaya.”—Sal. 1:2, 3.
4 Ginagamit man ni Jehova ang aton mga masigkatumuluo, nga mahimo mangin “nagapabakod nga bulig” sa aton. (Col. 4:10, 11) Ginapabakod nila kita sa mga miting sang kongregasyon paagi sa ila makapalig-on nga pagpakigsugilanon, mga komento, kag mga bahin. (Binu. 15:32) Ilabi na nga nagahatag sing espirituwal nga bulig kag makapaumpaw nga pagpalig-on ang Cristianong mga gulang.—Isa. 32:1, 2.
5 Sa Ministeryo: Kon nagabatyag ka nga ginakapoy ka na, indi mag-untat sa pagbantala! Indi kaangay sang iban nga hilikuton, ang regular nga pagpakigbahin sa ministeryo nagapaumpaw gid sa aton. (Mat. 11:28-30) Ang pagpaambit sang maayong balita magabulig sa aton nga magkonsentrar sa Ginharian sang Dios kag pirme naton mahuptan sa aton hunahuna ang kabuhi nga dayon kag ang malipayon nga paglaum sini.
6 Madamo pa gid kita sing hilikuton antes laglagon ining malauton nga sistema. May madamo gid kita nga rason sa pagpabilin nga mapag-on sa aton pag-alagad, nga “nagasandig sa kusog nga ginahatag sang Dios.” (1 Ped. 4:11) Sa bulig ni Jehova matapos naton ang aton hilikuton, bangod “nagahatag sia sing gahom sa ginakapoy.”—Isa. 40:29.