Pamangkot

◼ Paano dapat ipakilala ang nagabukas nga ambahanon sa Teokratikong Eskwelahan Para sa Ministeryo, Miting sa Serbisyo, Miting Publiko, kag Pagtinuon sa Ang Lalantawan, kag ni sin-o?

Ang pinili nga nagabukas nga mga ambahanon sa Teokratikong Eskwelahan Para sa Ministeryo kada semana nalista sa Iskedyul Sang Teokratikong Eskwelahan Para sa Ministeryo nga amo ang suplemento sa Nobiembre nga Ang Aton Ministeryo sa Ginharian. Ang nagabukas kag nagatakop nga mga ambahanon para sa tagsa ka semana sa Miting sa Serbisyo yara sa pahina 2 sang Ang Aton Ministeryo sa Ginharian. Subong man, ang mga ambahanon sa semana sang Pagtinuon sa Ang Lalantawan masapwan sa pahina 2 sang tagsa ka gua sang Ang Lalantawan. Ang naasayn nga mga ambahanon nalakip sa kabug-usan nga miting kag dapat ipakilala sang utod nga nagadumala sang miting sa baylo nga sang tsirman sang nagligad nga miting.

Halimbawa, ang manugtatap sang Teokratikong Eskwelahan Para sa Ministeryo amo ang magaabiabi sa tumalambong, magapakilala sang nagabukas nga ambahanon, magadumala sang eskwelahan, kag nian tawgon niya ang una nga may bahin sa Miting sa Serbisyo. Ang utod nga may bahin sa Miting sa Serbisyo amo ang magapakilala sang ambahanon bilang pagbukas sa Miting sa Serbisyo.

Sa amo man nga paagi, buksan sang tsirman ang Miting Publiko. Mainit niya nga abiabihon ang tanan nga tumalambong kag agdahon sila sa pag-amba sa nagabukas nga ambahanon nga ginpili sang humalambal. Ang tsirman (ukon ang iban pa nga kalipikado nga utod nga lalaki nga gin-asayn sing abanse) amo ang magapangamuyo sa pagbukas sang miting. Ipakilala niya ang humalambal kag ipahibalo ang tema sang pamulongpulong. Pagkatapos sang pamulongpulong, indi pagsumaryuhon sang tsirman ang mga ginpanghambal sang humalambal, sa baylo, pasalamatan niya sia sing malip-ot tungod sa instruksion. Ipahibalo niya ang tig-ulo sang pamulongpulong publiko sa masunod nga semana, kag nian agdahon niya ang tanan nga tumalambong nga magpabilin para sa Pagtinuon sa Ang Lalantawan. Indi na kinahanglan nga pamangkuton pa sang tsirman kon bala luyag sang tumalambong nga ipadala ang ila gugma kag mga pangamusta sa kongregasyon sang gin-agda nga humalambal. Nian, tawgon sang tsirman ang konduktor sang Pagtinuon sa Ang Lalantawan.

Ang konduktor sang Pagtinuon sa Ang Lalantawan amo ang magapakilala sa una nga ambahanon nga pagagamiton sa pagtinuon. Dumalahan niya ang pagtinuon nahisuno sa ginbalhag nga mga instruksion kag nian ipahibalo ang nagatakop nga ambahanon. Sa kinaandan, ang konduktor sang Pagtinuon sa Ang Lalantawan amo ang magatawag sa utod nga namulongpulong publiko para sa nagatakop nga pangamuyo.

Ang pagsunod sa sini nga panuytoy magabulig agod mapat-od nga ginadumalahan ang mga miting sa kongregasyon sa nahiusa nga paagi.