Bag-o nga Iskedyul sang mga Miting sang Kongregasyon
1, 2. Ano ang mga pagbag-o sa mga miting sugod sa Enero 2009?
1 Sang semana sang Abril 21-27, 2008, isa ka makakulunyag nga pahibalo ang nabatian sang mga Saksi sa bug-os nga kalibutan. “Sugod sa Enero 1, 2009, ang Pagtinuon sang Kongregasyon sa Libro hiwaton dungan sa Teokratikong Eskwelahan Para sa Ministeryo kag sa Miting sa Serbisyo. Ang Pagtinuon sang Kongregasyon sa Libro pagatawgon na nga Pagtinuon sang Kongregasyon sa Biblia.”
2 Iskedyul Sining Semanal nga mga Miting: Ang bug-os nga kalawigon sining mga miting, lakip ang mga ambahanon kag mga pangamuyo, 1 ka oras kag 45 minutos. Ang miting magasugod paagi sa ambahanon kag pangamuyo (5 min.) kag pagasundan ini sang Pagtinuon sang Kongregasyon sa Biblia (25 min.). Magasunod dayon ang Teokratikong Eskwelahan Para sa Ministeryo (30 min.). Nian, umpisahan sang ambahanon (5 min.) ang Miting sa Serbisyo (35 min.). Ang Miting magahinakop paagi sa ambahanon kag pangamuyo (5 min.). Agod mabuligan kamo sa paghanda sa sining mga miting, ang iskedyul sang Pagtinuon sang Kongregasyon sa Biblia, Teokratikong Eskwelahan Para sa Ministeryo, kag Miting sa Serbisyo ipagua sa Ang Aton Ministeryo sa Ginharian kada bulan.
3. Paano pagadumalahan ang Pagtinuon sang Kongregasyon sa Biblia?
3 Pagtinuon sang Kongregasyon sa Biblia: Ini nga miting pagadumalahan kaangay sang Pagtinuon sa Ang Lalantawan. Indi na kinahanglan repasuhon pa ang ginbinagbinag sang nagligad nga semana. Sa baylo, ining miting dapat may malip-ot lang nga introduksion agod nga ang tanan nga tumalambong may bastante nga tion sa pagkomento. Ang nagadumala nga manugtatap amo ang magaasayn sa mga gulang nga magabulosbulos sa pagdumala sa sining miting kada semana.
4. Ano ang pila ka pagbag-o sa Miting sa Serbisyo?
4 Miting sa Serbisyo: Wala tanto sing pagbag-o sa Miting sa Serbisyo luwas lang nga mas malip-ot na ang mga bahin. Ang mga pahibalo magalawig sing mga lima ka minuto. Bastante na ini para sa importante nga mga pahibalo kag pila ka sulat gikan sa sanga talatapan. Ang mga pahibalo subong sang mga kahimusan para sa pag-alagad sa latagon, iskedyul sang pagpaninlo, report sa kuenta, kag regular nga mga sulat gikan sa sanga talatapan indi na kinahanglan ipahibalo sa plataporma kundi ipatapik na lang sa information board. Ang mga ginhatagan sing bahin sa programa dapat maghanda sing maayo kag magsunod gid sa gintalana nga oras kag sa mga instruksion.
5. Ano ang mangin iskedyul sang miting sang kongregasyon sa semana sang duaw sang manugtatap sang sirkito?
5 Duaw sang Manugtatap sang Sirkito: Wala sing pagbag-o sa semanal nga iskedyul sang manugtatap sang sirkito. Sa Martes hiwaton ang Teokratikong Eskwelahan Para sa Ministeryo kag Miting sa Serbisyo nga pagasundan sang ambahanon. Nian ang manugtatap sang sirkito magahatag sing 30-minutos nga pamulongpulong. Subong sang kinaandan nga ginahimo sa semana sang duaw, isa pa ka pagtinipon ang pagahiwaton sa lain nga adlaw para sa Pagtinuon sang Kongregasyon sa Biblia nga pagasundan sang ambahanon kag pamulongpulong sa pag-alagad sang manugtatap sang sirkito. Ang miting magahinakop paagi sa ambahanon kag pangamuyo.
6. Ano ang papel sang manugtatap sang grupo?
6 Mga Miting Para sa Pag-alagad sa Latagon: Ang hubon sang mga gulang magatangdo sing mga manugtatap sang grupo agod magtatap sa mga grupo sa pag-alagad sa latagon kag sa pag-shepherding sa mga katapo sang grupo. Kon isa ka ministeryal nga alagad ang kinahanglan magtungod sa sining papel, pagatawgon sia nga “alagad sang grupo.”
7. Ano nga mga benepisyo ang aton mapaabot sa bag-o nga iskedyul sang aton mga miting sang kongregasyon?
7 Bangod sa sining mga pagbag-o, may kahigayunan kita sa pagbinagbinag sa mapuslanon kag makapalig-on nga impormasyon nga magabulig sa aton agod mahuptan nga mabakod ang aton kaangtanan kay Jehova. Makabulig ini sa aton nga mangin epektibo nga mga manugbantala kag mga manunudlo, kag mahanas nga mangin mas mabungahon sa aton ministeryo.—Efe. 4:13, 14; 2 Tim. 3:17.
8. Paano ang abanse nga paghanda makabulig sa aton kag sa iban?
8 Paagi sa pagtuon sing abanse, makakonsentrar kita sing maayo sa panguna nga mga punto nga ginapadaku sa kada miting. May kahigayunan kita tanan nga makapakigbahin sa pagkomento, kag makaamot sa maayo nga pagbayluhanay sing pagpalig-on. (Roma 1:11, 12; Heb. 10:24) Dapat ang tulumuron naton amo ang ‘pagpadayag sang aton pag-uswag’ paagi sa ‘husto nga paggamit sang pulong sang kamatuoran.’—1 Tim. 4:15; 2 Tim. 2:15.
9. Ano ang aton determinasyon, kag ngaa?
9 Makalilipay gid ining daku nga pagbag-o sa aton mga miting. Kabay nga padayon naton nga iaplikar ang panuytoy nga ginaaman sang “matutom kag mainandamon nga ulipon” kag magpabilin nga suod sa aton Dakung Manugbantay samtang ginahanda niya kita sa dakung “kapipit-an” nga tuman na gid kalapit.—Mat. 24:21, 45; Heb. 13:20, 21; Bug. 7:14.