Pamangkot

◼ Ano ang mga katalagman sa paggamit sang Internet sa pagpakig-angot sa mga indi naton kakilala?

Madamo nga mga Web site sa Internet ang gindesinyo agod makapakig-angutay ang mga tawo. Madamo sa sini nga mga Web site ang nagatugot sa mga indibiduwal nga magbutang sang mga impormasyon tuhoy sa ila kaugalingon, nga mahimo magalakip sang ila mga retrato kag iban pa. Ini nga mga impormasyon mahimo nga makita sang iban kag sarang sila makapakig-angot sa ila. Ini nga mga Web site makawiwili gid sa mga pamatan-on, kag ang pila ka pamatan-on sa kongregasyon nagagamit sa sini agod nga makapakig-angot sa mga tawo nga nagasiling nga mga Saksi ni Jehova sila.

Mahapos lang magbinutig ang mga tawo nga aton makilala sa Internet tuhoy sa ila pagkatawo, sa ila kaangtanan kay Jehova, ukon sa ila mga motibo. (Sal. 26:4) Ang isa ka tawo nga nagasiling nga Saksi ni Jehova sia mahimo nga di-tumuluo gali, isa nga ginsikway sa kongregasyon, ukon isa pa gani ka apostata. (Gal. 2:4) Isa pa, madamo nga pedopilya ukon mga mahingaliton sa mga bata, ang nagagamit sa sini nga mga Web site agod mangita sang ila biktimahon.

Bisan pa kumbinsido kita nga ang aton ginapakig-angutan may maayo nga tindog sa kongregasyon, ang pagpakigsugilanon paagi sa Internet mahapos lang magdul-ong sa malaw-ay nga mga topiko. Ang rason sini amo nga masami nga wala nagakatahap ang mga tawo sa mga indibiduwal nga wala nila makilala sing personal. Mahimo nga nagahunahuna sila nga indi mahibaluan sang iban, subong sang ila mga ginikanan ukon sang mga gulang, ang bisan ano nga ila himuon sa ila pagpakig-angot paagi sa Internet. Makapasubo nga madamo nga kabataan sang mga Cristiano ang nasiod kag nadalahig sa malaw-ay nga mga sugilanon. (Efe. 5:3, 4; Col. 3:8) Ginalakip sang iban sa ila Web site ang ila makapulukaw sa sekso nga mga retrato kag binastos nga mga hayo ukon ginalakipan nila ini sang mga musika nga may video nga nagapadayag sa sekso.

Bangod sini, dapat gid bantayan sang mga ginikanan ang mga ginahimo sang ila kabataan sa kompyuter. (Hulu. 29:15) Makatalagam gid ang pagpasulod sang mga indi naton kakilala sa aton puluy-an ukon tugutan sila nga silahanon lang sang aton kabataan. Sing kaanggid, makatalagam man para sa aton ukon sa aton mga kabataan nga makig-abyan sa mga indi kakilala sa Internet, bisan pa nagapangangkon sila nga mga Saksi ni Jehova.—Hulu. 22:3.