Paggamit sa Internet—Mangin Alisto sa mga Katalagman!

¹ Ang katawhan ni Jehova nagakalipay sa makapalig-on nga pagpakig-upod sa isa kag isa. Nalipay sila sa pagsugid sing mga eksperiensia sa ministeryo sa latagon kag ginaapresyar ang pagpamati tuhoy sa mga hitabo may kaangtanan sa mga Saksi ni Jehova kag sa hilikuton sang Ginharian sa bug-os nga kalibutan. Luyag nila mahibaluan ang bisan anong tumalagsahon nga mahimo nga natabo sa aton mga kauturan, subong sang isa ka krisis ukon kinaugali nga kalamidad, kag luyag nila mahibaluan kon may mabulig sila. Ini nga interes nagapakita sang paghiusa sang paghiliutod, nagapamatuod nga nagahigugmaanay gid kita.​—⁠Juan 13:​34, 35.

² Sa karon, mabatian naton gilayon ang mga hitabo sa kalibutan. Ang mga palatuntunan sa radyo kag telebisyon nagahatag sing detalyado gid nga live coverage sang mga hitabo sa mga tagpalamati kag tumalan-aw sa bug-os nga kalibutan. Ang telepono nagapaposible man nga masugilanon sa gilayon ang mga tawo sa bug-os nga kalibutan. Sa komunikasyon ang tumalagsahon gid nga butang sa karon nga labi pa nga nagapopular amo ang Internet.​—⁠Tan-awa ang Magmata!, Agosto 8, 1997.

³ Ang pag-imbento sa telepono nagbukas sang dalan padulong sa madasig personal nga komunikasyon sa bug-os nga kalibutan. Bisan pa nga ang telepono mapuslanon kaayo, kinahanglan ang paghalong sa kon paano ini ginagamit, kay mahimo ini mangin kasangkapan para sa di-nagakaigo nga pagpakig-upod ukon mga hilikuton, kag ang sobra nga paggamit sing telepono mahal. Ang telebisyon kag radyo mahimo magamit sa patag sang edukasyon. Apang, sing makapasubo, madamo sang mga programa ang manubo sing moral, kag ang paghatag sing igtalupangod sa sini isa ka pag-uyang sing tion. Ang kaalam nagapahulag sa aton nga mangin mapilion sa paggamit sa telebisyon kag radyo.

⁴ Ang Internet nagapaposible sa isa nga makakomunikar sing barato sa minilyon pa sa bug-os nga kalibutan, kag ginabuksan sini ang dalan padulong sa madamo nga impormasyon. (Awake!, Enero 8, 1998) Apang, ang patarasak nga paggamit sing Internet makapadayag sa isa sa daku nga mga katalagman sa espirituwal kag sa moral. Paano ini matabo?

⁵ Madamo ang interesado sa matigayon gilayon nga impormasyon nga nagapakita kon paano maghimo sing mga hinganiban, lakip na ang mga bomba. Ang industriya nagareklamo sa kadamuon sang tion nga ginauyang sang mga mamumugon sa paggamit sing Internet. Madamo na ang ginsiling sa aton mga publikasyon tuhoy sa maathag nga espirituwal nga mga katalagman nga masumalang sa Internet. Madamong Web site ang nagapresentar sing masingki kag pornograpiko nga mga materyal nga indi gid nagakaigo para sa mga Cristiano. (Sal. 119:37) Dugang sa sining mga katalagman, may yara mas malalangon nga katalagman nga dapat ilabi na nga bantayan sang mga Saksi ni Jehova. Ano ini nga katalagman?

⁶ Pasudlon mo bala sa imo balay ang isa ka estranghero nga wala anay ginausisa kon sin-o sia? Ano abi kon wala sing paagi nga mausisa sia? Pabay-an mo bala ini nga estranghero nga magsilahanon lamang sang imo mga anak? Isa ini ka indi gid maduhaduhaan nga posibilidad sa Internet.

⁷ Ang electronic mail sarang mapadala kag mabaton gikan sa mga tawo nga indi mo kilala. Amo man kon nagapakigsugilanon ka sing elektroniko sa isa ka forum (pagbayluhanay sing opinyon) ukon sa isa ka chat room. Ang mga nagapakigbahin mahimo magapangangkon kon kaisa nga mga Saksi ni Jehova sila, apang sa masami indi gali. Ang isa mahimo magapangangkon nga isa ka pamatan-on samtang indi naman gali. Ukon ang isa ka tawo mahimo pa gani magpangangkon sing binutig nga lalaki ukon babayi sia.

⁸ Ang impormasyon nga ginpasa sa imo mahimo nga sa dagway sang mga eksperiensia ukon mga komento tuhoy sa aton mga pagtuluuhan. Ini nga impormasyon ginapasa sa iban kag ginapasa naman nila ini sa iban pa. Ang impormasyon masunson nga indi mapamatud-an kag mahimo nga indi matuod. Ang mga komento mahimo nga isa ka pakunokuno sa pagpalapnag sang apostata nga pangatarungan.​—⁠2 Tes. 2:​1-3.

⁹ Nagadumdom sini nga katalagman, kon nagagamit ka sing Internet, pamangkuta ang imo kaugalingon: ‘Para sa ano nga ginagamit ko ini? Posible bala nga mahalitan ako sa espirituwal paagi sa kon paano ko ini ginagamit? Ginahalitan ko bala sa espirituwal ang iban?’

¹⁰ Mga Web Site sang “mga Saksi ni Jehova”: Binagbinaga, halimbawa, ang pila ka Internet site nga ginbutang sang mga indibiduwal nga nagapangangkon nga mga Saksi ni Jehova. Ginaagda ka nila nga bisitahan ang ila mga site agod mabasa ang mga eksperiensia nga ginbutang sang iban nga nagapangangkon nga mga Saksi. Ginapalig-on ka nga ipaambit ang imo panghunahuna kag mga pagtamod tuhoy sa mga literatura sang Sosiedad. Ang iban nagahatag sing mga rekomendasyon tuhoy sa mga presentasyon nga sarang magamit sa ministeryo sa latagon. Ining mga site nagatanyag sing mga chat room para sa mga indibiduwal nga mapakig-angutan, nagapahanugot nga masugilanon sing personal ang iban, kaanggid sa pagpakigsugilanon sa telepono. Masunson nila itudlo sa imo ang iban pa nga mga site diin mahimo ka makatigayon sing on-line nga pagpakig-upod sa mga Saksi ni Jehova sa bug-os nga kalibutan. Apang mapat-od mo gid bala nga ining mga koneksion wala ginbutang sing likom sang mga apostata?

¹¹ Ang pagpakig-upod paagi sa Internet mahimo nga wala nagahisanto sa laygay sang Efeso 5:​15-17. Si apostol Pablo nagsulat: “Magpadayon kamo sa pagbantay sing maayo nga ang inyo paglakat indi subong sang di-maalam kundi subong sang mga tawo nga maalamon, nga ginabakal ang nagakaigo nga tion para sa inyo kaugalingon, bangod nga ang mga adlaw malaut. Bangod sini mag-untat kamo nga mangin di-makatarunganon, kundi padayon ninyo nga hangpon kon ano ang kabubut-on ni Jehova.”

¹² Ang Cristianong kongregasyon amo ang teokratiko nga paagi nga sa sini ginapakaon kita sa espirituwal sang “matutom kag mainandamon nga ulipon.” (Mat. 24:​45-47) Sa sulod sang organisasyon sang Dios, masapwan naton ang panuytoy kag pangamlig nga magahupot sa aton nga nahamulag gikan sa kalibutan kag magapahulag man sa aton nga magmasako sa hilikuton sang Ginuo. (1 Cor. 15:58) Ginpakita sang salmista nga naagom niya ang kalipay kag ang kalig-unan sa tunga sang nagtipon nga katawhan sang Dios. (Sal. 27:​4, 5; 55:​14; 122:1) Ang kongregasyon nagaaman man sing espirituwal nga suporta kag bulig sa mga nagapakig-upod sa sini. Sa sini, masapwan mo ang isa ka grupo sang mahigugmaon, mabinalak-on, kag mainulikdon nga mga abyan​—⁠mga tawo nga nakilala mo sing personal nga handa kag kinabubut-on nga magabulig kag magalugpay sa iban sa mga tion sang kasisit-an. (2 Cor. 7:​5-7) Ang mga katapo sang kongregasyon ginaamligan sang Makasulatanhon nga kahimusan sang pag-disfellowship sa mga nakasala sing di-mahinulsulon ukon nagapauswag sing apostata nga panghunahuha. (1 Cor. 5:​9-13; Tito 3:​10, 11) Mapaabot bala naton nga makita ini man nga mahigugmaon nga mga kahimusan kon nagapakig-upod sa iban paagi sa Internet?

¹³ Nangin maathag nga kabaliskaran ang nagakatabo. Ang pila ka Web site maathag nga mga kasangkapan para sa apostata nga propaganda. Ining mga Web site mahimo magpangangkon sing tuhay, kag ang mga apostata nga nagasakdag sang isa ka site mahimo maghatag sing detalyado nga paathag sa pagpamatuod nga sila mga Saksi ni Jehova gid. Mahimo pa gani sila magpangayo sing impormasyon gikan sa imo agod pamatud-an nga ikaw isa sang mga Saksi ni Jehova.

¹⁴ Luyag ni Jehova nga magpakita ka sing paghantop. Ngaa? Bangod nahibaluan niya nga magaamlig ini sa imo gikan sa lainlain nga mga katalagman. Ang Hulubaton 2:​10-19 tampad nga nagasiling: “Kon ang kaalam magsulod sa imo tagipusuon kag ang ihibalo mangin kalahamut-an sa imo kalag, ang ikasarang sa paghunahuna magabantay sa imo, ang paghantop magaamlig sa imo.” Magaamlig sa imo gikan sa ano? Gikan sa mga butang subong sang “malaut nga dalanon,” sa mga nagbiya sa matadlong nga mga banas, kag sa mga tawo nga imoral kag malimbungon sa ila dalanon.

¹⁵ Kon magkadto kita sa Kingdom Hall, wala duhaduha nga kaupod gid kita sang aton mga kauturan. Kilala naton sila. Wala sing isa ang nagakinahanglan sing pamatuod sa sini bangod maathag ini sa ginapakita nga utudnon nga gugma. Wala kita ginapangayuan sing personal nga maghatag sing mga pamatuod nga isa gid kita sang mga Saksi ni Jehova. Diri naton masapwan ang matuod nga pagbayluhanay sing pagpalig-on nga ginhambal ni Pablo sa Hebreo 10:​24, 25. Ang mga Web site nga nagapalig-on sang on-line nga pagpakig-upod indi masaligan nga maghatag sini. Ang pagdumdom sa ginasiling sang Salmo 26:​4, 5 magapaandam sa aton sa mga katalagman nga mahimo madali masumalang kon nagagamit sing mga Web site sa Internet.

¹⁶ Wala sing mga limitasyon ukon mga pagpugong sa sahi sang impormasyon nga ginahuptan kag matigayon sang mga nagagamit sing Internet. Sa masami, ang mga kabataan kag mga tin-edyer mahapos nga mga puntariya sang krimen kag paghingalit sa sining palibot. Ang mga kabataan masinaligon, mausisaon, kag malangkagon sa paglagulad sa bag-o nga kalibutan sang cyberspace. Busa dapat bantayan sang mga ginikanan ang ila mga kabataan kag hatagan sila sing maayong panuytoy sa Kasulatan tuhoy sa paggamit sing Internet, subong sang pagtuytoy nila sa ila sa pagpili nila sing musika ukon mga sine.​—⁠1 Cor. 15:⁠33.

¹⁷ Sing makapasubo, ang pila nga mga kauturan anay naton gindisfellowship bangod sang pagpakig-upod nga nagsugod paagi sa pagpangilala sa kalibutanon nga mga indibiduwal sa mga chat room sa Internet kag nagdul-ong sang ulihi sa imoralidad. Daw indi gid makapati, ang mga gulang nagsulat nga ang iban aktuwal nga nagbiya sang ila mga bana ukon mga asawa agod padayunon ang isa ka relasyon nga nagsugod sa Internet. (2 Tim. 3:6) Gintalikdan sang iban nga mga indibiduwal ang kamatuoran bangod sang pagpati sa impormasyon nga ginhatag sang mga apostata. (1 Tim. 4:​1, 2) Sa pagbinagbinag sa sining malubha gid nga mga katalagman, daw indi bala makatarunganon nga magmainandamon tuhoy sa pagpakigbahin sa mga chat session sa Internet? Sa pagkamatuod, ang pagpakita sing kaalam, ihibalo, ikasarang sa paghunahuna, kag paghantop nga ginhambal sa Hulubaton 2:​10-19 dapat mag-amlig sa aton sa sini.

¹⁸ Sing talalupangdon, may pila ka indibiduwal nga nagtukod sing mga Web site sa tuyo nga ibantala ang maayong balita. Madamo sining mga site ang ginasakdag sang indi mainandamon nga mga kauturan. Ang iban nga mga site mahimo nga ginasakdag sang mga apostata nga luyag sa pagbuyok sa mga wala nagasuspetsa. (2 Juan 9-11) Nagakomento sa kon bala kinahanglan nga magtukod sining mga Web site ang aton mga kauturan, Ang Aton Ministeryo sa Ginharian, Nobiembre 1997, pahina 7, nagsiling: “Indi na kinahanglan para kay bisan sin-o nga indibiduwal nga maghanda sing Internet nga mga pahina tuhoy sa mga Saksi ni Jehova, sa aton mga hilikuton, ukon sa aton mga pagtuluuhan. Ang aton opisyal nga site [www.watchtower.org] nagahatag sing sibu nga impormasyon kay bisan-o nga maluyag sini.”

¹⁹ Mga Bulig sa Pagtuon Paagi sa Internet? Nagabatyag ang iban nga nagaserbisyo sila sa mga kauturan paagi sa pagbutang sing ginpanalawsaw nga impormasyon may kaangtanan sa lainlain nga teokratikong mga hilikuton. Halimbawa, ang isa ka tawo mahimo magpanalawsaw pasad sa balayan sang isa ka pamulongpulong publiko kag nian ibutang ini, sa paghunahuna nga ini nga impormasyon magabulig sa sadtong nagakinahanglan sa paghanda sini man nga balayan. Ang iban nagabutang sing tanan nga kasulatan para sa palaabuton nga Pagtinuon sa Lalantawan ukon nagaaman sing reperensia para sa Teokratikong Eskwelahan sa Pagministro ukon sa Pagtinuon Sang Kongregasyon sa Libro. Ang iban mahimo maghatag sing mga panugda para sa mga presentasyon sa ministeryo sa latagon. Mabuligon gid bala ini?

²⁰ Ang mga publikasyon nga ginaaman sang organisasyon ni Jehova nagapapagsik sang aton hunahuna paagi sa makapalig-on nga mga hunahuna kag nagahanas sa aton nga “makilala ang husto kag sayop.” (Heb. 5:14) Masiling bala naton nga matigayon ini kon iban ang magapanalawsaw para sa aton?

²¹ Ang mga Cristiano sa Berea ginapatuhuyan subong “mas dungganon sing panghunahuna sangsa mga didto sa Tesalonica.” Ngaa? Bangod “ginbaton nila ang pulong nga may daku gid nga kalangkag sing hunahuna, nga ginausisa sing maayo ang Kasulatan adlaw-adlaw kon bala matuod gid ini nga mga butang.” (Binu. 17:11) Walay sapayan nga ginbantalaan sila nanday Pablo kag Silas, indi nila mahimo nga mangin ila ang kamatuoran kon indi sila madalahig sing personal.

²² Ang paggamit sa ginpanalawsaw sang iban sa isa ka pamulongpulong ukon sa paghanda sa iban pa nga mga miting nagapawalay pulos sang katuyuan sang personal nga pagtuon. Indi bala handum mo nga pabakuron ang imo personal nga pagtuo sa Pulong sang Dios? Pasad sa personal nga pagpati, nian mapabutyag mo sing dayag ang imo pagtuo​—⁠sa imo mga pamulongpulong, sa mga komento sa mga miting, kag sa ministeryo sa latagon. (Roma 10:10) Ang paggamit sa ginpanalawsaw sang iban wala nagahisanto sa paglaragway sang Hulubaton 2:​4, 5 nga personal nga ‘padayon nga pangitaon kag usisaon ang ihibalo gid sang Dios subong sang natago nga mga bahandi.’

²³ Halimbawa, kon nagapangita sing mga kasulatan sa imo mismo kopya sang Biblia, marepaso mo sing malip-ot ang konteksto sang tagsa ka kasulatan. ‘Mausoy [mo] ang tanan nga butang sing sibu,’ subong sang ginhimo ni Lucas sang ginsulat niya ang iya Ebanghelyo. (Luc. 1:3) Ang dugang pa nga panikasog magabulig man sa imo nga mangin malantipon sa pagpangita sing mga kasulatan sa ministeryo kag kon nagahatag sing mga pamulongpulong. Madamo ang nagsiling nga nagadayaw sila sa mga Saksi ni Jehova bangod makahibalo sila maggamit sang ila mga Biblia. Ang lamang nga paagi nga maaplikar ini sa aton amo kon ginahimo naton sing personal nga batasan ang pagpangita sing mga kasulatan sa aton mismo mga Biblia.

²⁴ Paggamit Sing Maalamon Sang Aton Tion: Ang isa pa nga binagbinagon may kaangtanan sini amo ang kadamuon sang tion nga ginahinguyang sa paghimo, pagbasa, kag pagsabat sa impormasyon nga ginbutang sa Internet. Ang Salmo 90:​12 nagapalig-on sa aton sa pagpangamuyo: “Tudlui kami sa pag-isip sang amon mga adlaw sa paagi nga makaagom kami sing tagipusuon nga may kaalam.” Si Pablo nagsiling: “Ang tion nga nabilin ginpalip-ot.” (1 Cor. 7:29) Kag dugang pa: “Sa pagkamatuod, nian, samtang may kahigayunan kita para sa sini, magbuhat kita sing maayo ayon sa tanan, apang labi na gid sa mga may labot sa aton sa pagtuo.”​—⁠Gal. 6:⁠10.

²⁵ Ining laygay nagapadaku sang kinahanglanon nga magmaalamon kita sa paggamit sang aton tion. Daw ano pa kaayo nga maghinguyang sing tion sa pagbasa sa Pulong sang Dios! (Sal. 1:​1, 2) Amo ina ang labing maayo nga pagpakig-upod nga matigayon naton. (2 Tim. 3:​16, 17) Mga ginikanan, ginatudluan bala ninyo ang inyo mga anak sang kabilihanan sang paggamit sing maalamon sang ila tion sa mga hilikuton sang Ginharian? (Manugw. 12:1) Ang tion nga ginhinguyang sa personal kag pamilya nga pagtuon sa Biblia, pagtambong sa mga miting, kag ministeryo sa latagon labaw pa sa tion nga ginahinguyang sa pagtan-aw sa Internet, sa pagpaabot nga makatigayon sing mga benepisyo.

²⁶ May kaangtanan sini, maalamon nga ituon naton ang aton igtalupangod sa espirituwal nga mga butang kag sa mga butang nga importante kag kinahanglanon sa aton mga kabuhi subong mga Cristiano. Nagakinahanglan ini sang paghimo sing nabinagbinag-sing-maayo nga mga pagpili may kaangtanan sa impormasyon nga nagakabagay sang aton tion kag panghunahuna. Subong mga Cristiano, ginsumaryo ni Cristo ang importante sa aton kabuhi, nga nagsiling: “Padayon, nian, nga pangitaa anay ang ginharian kag ang iya pagkamatarong, kag ining tanan iban pa nga mga butang idugang sa inyo.” (Mat. 6:33) Indi bala nga mas malipayon ka kon ang imo kabuhi puno sing mga hilikuton sang Ginharian sa baylo sang iban pa nga hilikuton?

²⁷ Internet E-Mail: Bisan pa nga ang pagsugid sing personal nga mga eksperiensia kag mga panghunahuna sa tunga sang pamilya ukon mga abyan nga nagapuyo sa malayo nagakaigo, mahigugmaon gid bala nga ipaalinton ini sa iban nga mahimo nga wala makakilala sang imo pamilya ukon mga abyan? Ukon dapat bala ini ibutang sa Web page para mabasa ni bisan sin-o lang? Dapat bala kopyahon kag ipadala ining personal nga mga mensahe kay bisan sin-o lang nga mahimo nga kilala mo ukon indi? Subong man, kon makabaton ka sing mga mensahe halin sa iban nga maathag nga indi gid para sa imo, mahigugmaon bala nga ipasa mo ini sa iban pa?

²⁸ Ano abi kon ang eksperiensia nga ginpasa mo indi gali matuod? Indi bala ini pagpakigbahin nga magpadayon ang indi matuod? (Hulu. 12:​19; 21:​28; 30:​8; Col. 3:9) Sa pagkamatuod, ang padayon nga “pagbantay sing maayo nga ang [aton] paglakat indi subong sang di-maalam kundi subong sang mga tawo nga maalamon” magapahulag sa aton nga binagbinagon ini. (Efe. 5:15) Malipayon gid kita nga ang Yearbook, Ang Lalantawan, kag Magmata! puno sing mapamatud-an nga mga eksperiensia nga nagapalig-on sa aton kag nagapahulag sa aton nga padayon nga maglakat sa “dalan”!​—⁠Isa. 30:​20, 21.

²⁹ May isa pa ka katalagman. Si apostol Pablo nagsiling may kaangtanan sa iban: “Nagatuon man sila sa paglandolando, nga nagapamalaybalay; huo, indi lamang landolando, kundi mga kutsokutsera kag mga mahilabtunon sa pangabuhi sang iban nga tawo, nagapamulong sang mga butang nga indi dapat.” (1 Tim. 5:13) Nagapangatarungan ini batok sa paghinguyang sing tion kag panikasog sa pagpasa sing indi tanto ka importante nga impormasyon sa aton mga kauturan.

³⁰ Hunahunaa, man, ang kadamuon sang tion nga ginakinahanglan agod masabat ang madamo nga E-mail. Sing makawiwili, ang libro nga Data Smog nagsiling: “Samtang ang isa nagahinguyang sing dugang kag dugang nga tion sa kompyuter, ang e-mail madasig nga nagabalhin halin sa makakulunyag nga bag-o nga butang padulong sa nagakonsumo-sing-tion nga lulan, bangod sang madamo nga mensahe nga dapat basahon kag sabton kada adlaw gikan sa mga kaupdanan, mga abyan, pamilya, . . . kag wala ginapangabay nga mga pasayod sang baratilyo.” Dugang pa, ini nagasiling: “Madamong elektroniko nga glutizen (nga nagapaulan ukon ginapaulanan sang impormasyon) ang nakatigayon sang malain gid nga batasan sang pagpasa sang tagsa ka makalilingaw nga impormasyon nga mabaton nila​—⁠mga lahog, patupato nga mga sugilanon, elektroniko nga mga chain letter, kag madamo pa​—⁠sa tanan nga yara sa ila elektroniko nga libro sang mga direksion.”

³¹ Makita gid ini sa E-mail nga ginsirkular sa madamo nga kauturan​—⁠mga butang subong sang mga lahog ukon makahalam-ot nga mga sugilanon tuhoy sa ministeryo; binalaybay nga ayhan pasad sa aton mga pagtuluuhan; mga ilustrasyon gikan sa lainlain nga mga pamulongpulong nga nabatian sa mga asambleya, mga kombension, ukon sa Kingdom Hall; mga eksperiensia gikan sa ministeryo sa latagon; kag iban pa​—⁠mga butang nga daw indi gid makahalalit. Kinabatasan na nga ginapasa sang kalabanan ini nga E-mail nga wala ginausisa ang ginhalinan, nga sa amo nagapabudlay nga mahibaluan kon sin-o gid ang ginhalinan, nga dapat magpatingala sa isa kon bala ang impormasyon matuod gid.​—⁠Hulu. 22:​20, 21.

³² Ining mga mensahe nga, sa masami, indi gid man tanto ka importante indi ang sahi sang makapapagros nga mga pulong nga ginahunahuna ni Pablo sang nagsulat sia kay Timoteo, sa pagsiling: “Padayon ka nga manguyapot sa sulundan sang makapapagros nga mga pulong nga nabatian mo sa akon nga may pagtuo kag gugma nga may kaangtanan kay Cristo Jesus.” (2 Tim. 1:13) Ang “putli nga hambal” sang Makasulatanhon nga kamatuoran may “sulundan sang makapapagros nga mga pulong” nga pasad gid sa tema sang Biblia sa pagbindikar sa pagkasoberano ni Jehova paagi sa Ginharian. (Sof. 3:9) Dapat kita manikasog nga ihugod ang aton tanan matigayon nga tion kag enerhiya sa pagsakdag sini nga pagbindikar sa pagkasoberano ni Jehova.

³³ Sanglit madugay na nga yari kita sa tion sang katapusan sining sistema sang mga butang, dapat kita magbantay. Ang Biblia nagapaandam sa aton: “Hupti ang inyo kaligdong, magmabinantayon. Ang inyo kaaway, ang Yawa, nagaluyong subong sang isa ka nagangurob nga leon, nga nagapangita sing bisan sin-o man nga matukob.” (1 Ped. 5:8) Ini nagasiling pa: “Isuklob ang kompleto nga panapton sa inaway gikan sa Dios agod makatindog kamo sing malig-on batok sa mga padugi sang Yawa.”​—⁠Efe. 6:⁠11.

³⁴ Kon wala ginagamit sing husto, ang Internet mahimo mangin paagi nga sa sini madaug ni Satanas ang mga nasulay sang gahom sini. Bisan pa ini mahimo nga may limitado nga kapuslanan, may katalagman kon indi naton ini pagtamdon sing mainandamon. Ang mga ginikanan ilabi na nga dapat magkabalaka sa paggamit sing Internet sang ila mga anak.

³⁵ Ang paghupot sing balanse nga pagtamod sa Internet isa ka pangamlig. Ginaapresyar naton ang suno-sa-tion nga pahanumdom ni Pablo: “Ang mga nagagamit sa kalibutan [mangin] subong sang mga wala nagagamit sini sing bug-os; kay ang danyag sining kalibutan nagabalhin.” (1 Cor. 7:​29-31) Ang pagdumdom sini nga mga butang magabulig sa aton nga indi kita kag ang aton pamilya matublag sang tanan nga ginatanyag sang kalibutan, lakip na ang matigayon sa Internet.

³⁶ Kinahanglan gid nga magpabilin kita nga malapit sa aton mga kauturan sa kongregasyon kag gamiton ang nabilin nga tion sing maalamon, sa amo nagahimo sang aton kaugalingon nga handa nga magamit para sa pagpauswag sang mga intereses sang Ginharian. Samtang malapit na matapos ining sistema, “indi na [kita] magpadayon sa paglakat subong sang paglakat man sang mga pungsod sa pagpawalay pulos sang ila hunahuna,” kundi “padayon [naton] nga hangpon kon ano ang kabubut-on ni Jehova.”​—⁠Efe. 4:​17; 5:⁠17.