Hatagi sing Paglaum ang mga Imol
1 Ginhatagan gid anay ni Jesus sing pinasahi nga igtalupangod ang mga imol. Bisan pa naghimo sia sing mga milagro agod hatagan sing materyal nga bulig kag ayuhon ang mga masakiton, ang iya igtalupangod nasentro sa pagpahayag sing “maayong balita” sa mga imol. (Mat. 11:5) Ang Cristianong ministeryo karon padayon man nga nagahatag sing benepisyo sa mga imol kag subong man sa iban.—Mat. 24:14; 28:19, 20.
2 Matuod nga Paglaum: Ang mga ministro sang Cristiandad masami nagapangako sa mga imol nga magatin-ad sila kon daku ang ila amot sa simbahan. Apang, ginatudlo sang Biblia nga ang Ginharian sang Dios amo lamang ang makadula sang kaimulon kag makalubad sang tanan nga problema sang tawo. (Sal. 9:18; 145:16; Isa. 65:21-23) Paagi sa pagpakita sa mga imol kon ano ang ginatudlo sang Biblia, mahatagan naton sila sing paglaum kag mabuligan sila nga mabusog ang ila espirituwal nga kinahanglanon.—Mat. 5:3.
3 Gintamay sang mga Fariseo sang panahon ni Jesus ang mga imol, mayagutaon nga ginatawag sila nga ‘am-ha·’aʹrets, ukon “katawhan sang duta.” Apang, ginatamod ni Jesus “ang ila dugo,” ukon ang ila kabuhi, subong ‘bilidhon.’ (Sal. 72:13, 14) Sarang naton mailog si Jesus kag ‘magkalooy’ sa sining mga imol paagi sa pagpakita sing personal nga interes sa ila kag sa ila mga problema. (Hulu. 14:31) Indi naton dapat pagpakanubuon ang mga tawo nga nagapuyo sa imol nga mga lugar kag indi kita dapat magpangalag-ag sa pagpanaksi sa ila. Madamo nga imol ang nagabaton sa mensahe sang Ginharian.
4 Magbulig Karon: Ang pagtudlo naton sing mga prinsipio sang Biblia sa mga imol sa aton teritoryo nagabulig man sa ila nga mapahaganhagan ang epekto sang kaimulon karon. Halimbawa, ginapakamalaut sang Biblia ang pagpahubog, pagpanahor, pagkatamad, pagpanigarilyo, kag iban pa nga mga buhat nga nagadul-ong sa kaimulon. (Hulu. 6:10, 11; 23:21; 2 Cor. 7:1; Efe. 5:5) Ginapalig-on man sang Kasulatan ang pagkabunayag kag pagtrabaho sing “tinagipusuon,” nga amo ang mga kinaiya nga ginapangita sa mga trabahador. (Col. 3:22, 23; Heb. 13:18) Sa katunayan, ginpakita sang isa ka surbe nga ang kalabanan nga mga amo nagsiling nga ang mga bunayag kag may integridad nga mga aplikante amo ang luyag nila batunon sa trabaho.
5 Nagakabalaka si Jehova sa mga imol. Sa dili madugay, luwason ni Jesucristo ang mga “imol nga wala sing manugtabang.” (Sal. 72:12) Apang samtang wala pa ini, may pribilehiyo kita nga lugpayan ang iban, lakip ang mga imol, paagi sa mensahe sang paglaum nga yara sa Biblia.