Gamita sing Maayo ang Aton mga Publikasyon
1. Paano naton mailog ang halimbawa ni Jesus sa pagpabalor sa mga aman ni Jehova?
1 Sa tapos ni Jesus mapakaon ang madamo nga tawo paagi sa milagro, ginsugo niya ang iya mga alagad nga tipunon ang nabilin nga pagkaon. (Mat. 14:19-21) Inang pagpabalor sa mga aman ni Jehova isa gid ka maayo nga halimbawa para sa aton nga ‘ipakita nga mapinasalamaton kita’ paagi sa paggamit sing maayo sang tanan nga gin-aman ni Jehova paagi sa iya “matutom nga tulugyanan.”—Col. 3:15; Luc. 12:42; Mat. 24:45-47.
2. Paano naton malikawan nga magtumpok ang aton mga magasin?
2 Mga magasin: Ang mga magasin madali lang magtumpok. Kon pirme kita may bilin nga mga magasin, dapat naton buhinan ang aton order. Kamusta ang daan nga mga magasin? Ang balor sini wala nagabuhin bisan ligaran sang tion. Kon madamo kita sing daan nga mga magasin, mahimo kita magpabulig sa manugtatap sang pag-alagad ukon sa iban nga gulang kon paano naton ini mapahamtang.
3, 4. Ano ang dapat naton dumdumon kon nagakuha kita sing mga literatura sa Kingdom Hall?
3 Iban pa nga Literatura: Kon lain na nga publikasyon ang tanyag, hibalua anay kon may kopya ka sina nga publikasyon sa inyo puluy-an antes ka magkuha sing dugang nga kopya sang literatura sa Kingdom Hall. Magkuha lamang sing kopya nga kinahanglan mo para sa isa ka semana, kag magkuha ka na lang ugaling sing dugang kon napahamtang mo na ini.
4 Para sa mga publikasyon nga gamiton mo sing personal, mag-order lamang sang kinahanglan mo. Sulati ini sang imo ngalan kag kongregasyon, agod kon madula, mauli ini sa imo. Kon nagagamit ka sing Watchtower Library sa CD-ROM kag naga-file sang imo personal nga kopya sang mga magasin, indi na kinahanglan nga mag-order ka pa sang tomo sang Watchtower kag Awake!
5. Ano ang dapat naton dumdumon kon nagapahamtang kita sang aton mga literatura?
5 Pagpahamtang sang mga Publikasyon: Panikasugan naton nga ipahamtang ang aton mga publikasyon sa mga nagpakita lamang sing matuod nga interes. Dumdumon naton nga kita ang panguna nga responsable sa kagastuhanan sining hamili naton nga mga galamiton sa aton ministeryo. Kon magbilin kita sing mga publikasyon sa mga interesado, indi magpangalag-ag sa pagpahibalo sa ila sang ila pribilehiyo sa pagsakdag sa bug-os kalibutan nga hilikuton paagi sa ila donasyon.
6. Ngaa ginapabaloran gid naton ang aton mga publikasyon, kag ano dapat ang aton himuon sa sini?
6 Gin-amanan ni Jesus sing pisikal nga pagkaon ang iban paagi sa milagro, apang masami nga ginapakaon niya ang mga tawo sa espirituwal. Nagsiling si Jesus: “Ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.” (Mat. 4:4) Ang aton mga publikasyon nagatudlo sang mga kamatuoran sa Biblia nga importante sa pagtigayon sing kabuhi nga walay katapusan. (Juan 17:3) Bilidhon gid ini kag indi naton dapat pag-uyangan!