Gamita sing Maalamon ang Aton Pasad sa Biblia nga mga Literatura
1, 2. Ano ang ginabatyag sang madamong tawo sa aton mga literatura, kag ano nga pamangkot ang nagautwas?
1 “Nagabasa na ako sang inyo mga publikasyon sugod pa sang 1965. Ginausisa ko ang Biblia kon nagabasa ako sini, kag ang inyo literatura nahisuno gid sa Biblia. Madugay ko na nga luyag mahibaluan ang kamatuoran tuhoy sa Dios kag kay Jesus, kag makasiling ako sing tampad nga nasapwan ko ang matuod nga sabat paagi sa inyo literatura kag sa Biblia.” Amo ina ang ginsulat sang isa ka tawo sa ulong talatapan sang mga Saksi ni Jehova. Sa amo man nga sulat, nangabay sia sing pagtuon sa Biblia.
2 Kaangay sining mapinasalamaton nga tawo, minilyon ka tawo sa bug-os nga kalibutan ang nakaapresyar sa mga bulig sang pagtuon sa Biblia nga gin-aman sang “matutom kag mainandamon nga ulipon.” (Mat. 24:45) Kada tuig, madamo gid nga literatura ang ginabalhag sa pagbulig sa bunayag nga mga tawo nga “makadangat sa sibu nga ihibalo sang kamatuoran.” (1 Tim. 2:4) Paano naton magamit sing maalamon ang aton pasad sa Biblia nga mga literatura?
3. Paano naton malikawan nga mauyangan ang mga literatura?
3 Likawan ang Pagpatarasak: Sa sulod sang mga tinion, makasupot kita sing mga literatura nga mas madamo pa ikomparar sa aton nagamit. Ano ang himuon naton agod malikawan ini? Ang pagkamahinantupon kinahanglan kon nagakuha sang literatura nga gamiton sa ministeryo. Sa baylo nga magkuha sing madamo nga kopya sang publikasyon nga aton inugtanyag, mahimo kita magkuha sing isa ukon duha ka kopya kag magkuha ugaling kon mapahamtang na ini. Sa amo indi matipon ang literatura sa inyo balay. Sing kaanggid, kon madamo kita sing wala napahamtang nga mga magasin, nagakaigo nga buhinan naton ang kadamuon sang aton order.
4. Ano ang himuon kon nagasulobra ang mga literatura sa kongregasyon?
4 Nagasululobra nga Literatura: Kon madamo sing pundo nga publikasyon ang kongregasyon, ang manugpahituhog sang literatura mahimo nga mag-usisa sa iban nga kongregasyon agod mahibaluan kon mahimo nila magamit ang ekstra nga mga literatura. Mahimo matanyag sang mga manugbantala sa di-tumuluo nga miembro sang pamilya, sa mga estudyante sang Biblia, kag sa iban pa ang daan nga mga publikasyon. Ang mga bag-uhan nga nagapakig-upod sa kongregasyon mahimo nga luyag makatigayon sining daan nga publikasyon para sa ila personal nga teokratikong librarya.
5. Paano naton mapakita nga ginaapresyar naton ang aton mga literatura?
5 Luyag naton nga matuman sang aton literatura ang katuyuan sini, nga amo, ang pagbulig sa mga sinsero nga mga tawo nga makatuon sing dugang pa tuhoy sa dalayawon nga mga katuyuan ni Jehova. Subong nga wala gin-usikan ni Jesus ang nabilin nga pagkaon pagkatapos niya nga milagruso nga ginpakaon ang kadam-an, ang aton katuyuan amo nga dapat gamiton sa pinakamaayo nga paagi ang aton bilidhon nga mga literatura nga pasad sa Biblia. (Juan 6:11-13) Ining nagaluwas kabuhi nga mensahe sa aton publikasyon indi makatandog sa tagipusuon sang nahuyog sa pagkamatarong kon yara lang ini sa aton bulutangan ukon sa aton bag. Busa, mangin rasonable kita kon nagakuha sang mga literatura para sa ministeryo kag gamiton ini sing maalamon agod makabenepisyo ang iban.—Fil. 4:5.