Pamangkot

◼ Paano naton mahibaluan kon bala bilinan sing literatura ang isa ka tawo?

Dapat anay naton hibaluon kon interesado gid sia. Kon nagapakita sia sing matuod nga interes, mahimo naton sia bilinan sing duha ka magasin, ukon brosyur, libro, ukon iban pa nga literatura. Himuon man naton ini bisan pa makita naton nga wala sia sing inug-amot para sa bug-os kalibutan nga hilikuton. (Job 34:19; Bug. 22:17) Sa pihak nga bahin, indi naton pag-ibilin ang mga literatura sa mga wala nagaapresyar sini.—Mat. 7:6.

Paano mo mahibaluan nga interesado ang tagbalay? Interesado sia kon nagapakig-istorya sia sa aton, nagapamati kon nagahambal kita, nagasabat sa aton mga pamangkot, kag nagapabutyag sang iya opinyon. Kon ginasundan niya ang aton ginabasa sa Biblia, ginapabaloran niya ang Pulong sang Dios. Sa masami, mas maayo nga pamangkuton naton sia kon basahon niya ang aton ginatanyag nga literatura. Dapat hibaluon gid sang mga manugbantala kon interesado ang indibiduwal. Halimbawa, kon nagapanaksi sa dalan, indi maayo nga magpataka lang kita sa paghatag sing mga magasin, brosyur, ukon libro sa tanan nga nagalabay. Kon indi kita sigurado nga interesado ang tawo, mas maayo nga hatagan naton sia sing handbill ukon tract.

Subong man, ang kadamuon sang literatura nga kuhaon sang manugbantala dapat nabase sa iya kinahanglanon sa ministeryo, indi sa iya ikasarang sa paghatag sing donasyon. Ang mga donasyon indi bayad para sa literatura kundi ginagamit ini para sakdagon ang tanan nga bahin sang aton pagbantala nga hilikuton sa bug-os kalibutan. Bisan ano man ang aton kahimtangan, ang aton apresasyon magapahulag sa aton nga maghatag sing kinabubut-on para sakdagon ang intereses sang Ginharian. (Mar. 12:41-44; 2 Cor. 9:7) Magapahulag man ini sa aton nga magkuha lang sing nagakaigo nga kadamuon sang literatura nga aton gamiton, sa amo wala naton ginauyangan ang mga donasyon para sa aton bug-os kalibutan nga hilikuton.

[Retrato sa pahina 2]

Dapat hibaluon gid sang mga manugbantala kon interesado ang indibiduwal