Himua ang mga Pagpasibu Agod Mapanaksihan ang mga Lalaki
1. Ano gid ang kinahanglan agod maatipan ang intereses sang Ginharian?
1 Samtang padayon nga nagauswag ang hilikuton sang Ginharian sa sining katapusan nga mga adlaw, kinahanglan gid nga may manguna nga kalipikado sa espirituwal nga mga lalaki. (Mar. 4:30-32; Binu. 20:28; 1 Tim. 3:1-13) Apang, sa iban nga lugar diutay lang ang mga lalaki nga nagabaton sang mensahe sang Ginharian sangsa mga babayi. Sa iban nga kultura, ginatugyan sang mga lalaki sa ila asawa ang pagtudlo sa kabataan tuhoy sa relihion. Paano naton mapalig-on ang mas madamo nga lalaki nga mangin mahunahunaon sa ila espirituwal nga kinahanglanon agod magbuylog sa aton sa matuod nga pagsimba?
2. Ano ang maayo nga mga resulta sang pagpanaksi ni Pablo kag ni Pedro sa mga lalaki?
2 Pagpanaksi sa mga Lalaki: Kon magbaton sang kamatuoran ang ulo sang pamilya, masami nga madala man niya ang iban nga miembro sang pamilya sa matuod nga pagsimba. Halimbawa, samtang yara sa bilangguan si Pablo kag si Silas bangod sa ila pagbantala, ginpanaksihan nila ang manugbilanggo. Ini nga tawo kag ang iya bug-os nga panimalay nagpabawtismo. (Binu. 16:25-34) Bangod sang pagbantala ni Pablo sa Corinto, “si Crispo nga nagadumala nga opisyal sang sinagoga nangin tumuluo sa Ginuo, kag subong man ang iya bug-os nga panimalay.” (Binu. 18:8) Gingamit ni Jehova si Pedro nga panaksihan si Cornelio, isa ka opisyal sang hangaway nga ginlaragway subong “isa ka debotado nga tawo kag isa nga nagakahadlok sa Dios.” Nagpabawtismo si Cornelio upod sa iya mga paryente kag suod nga mga abyan.—Binu. 10:1-48.
3. Bilang pag-ilog kay Felipe, sin-o nga “may mataas nga palangakuan” ang mahimo mo mapanaksihan?
3 Ang pagpanaksi sa mga lalaki nga “may mataas nga palangakuan” mahimo may daku gid nga epekto. (1 Tim. 2:1, 2) Halimbawa, ginsugo sang anghel ni Jehova si Felipe nga makighambal sa “isa ka mataas nga opisyal” nga nagadumala sa tanan nga bahandi sang reyna sang Etiopia. Nabatian ni Felipe ang tawo nga “nagabasa sing mabaskog sang libro ni Isaias nga manalagna” kag ginpaathag niya sa Etiopianhon ang maayong balita tuhoy kay Jesus. Ining Etiopianhon nangin isa ka disipulo kag mahimo nagpalapnag man sang maayong balita sa mga tawo nga iya nasumalang sang nagpauli sia sa iya pungsod. Mahimo nga ginpanaksihan man niya ang mga tawo nga mabudlay nga mabantalaan sang maayong balita kaangay sang reyna kag sang mga opisyales sini.—Binu. 8:26-39.
4. Paano mabantalaan sing maayong balita ang mas madamo nga lalaki?
4 Kon Paano Mabantalaan ang Mas Madamo nga Lalaki: Bangod masami nga nagatrabaho sa adlaw ang mga lalaki, maiskedyul mo bala nga mabantalaan sila kon gab-i, kon Sabado kag Domingo, ukon sa tion sang piesta opisyal? Mahimo mapanaksihan mo ang mas madamo nga lalaki nga masami wala sa ila balay kon magbantala ka pirme sa mga duog sang negosyo. Mahimo man tinguhaan sang kauturan nga panaksihan sing di-pormal ang ila mga kaupod nga lalaki sa trabaho. Kon nagapamalaybalay, ilabi na sa pirme ginakobrehan nga teritoryo, ang mga kauturan mahimo mamangkot kon puede sila makighambal sa ulo sang panimalay.
5. Ano ang himuon sang isa ka utod nga babayi kon nakasapo sia sing lalaki nga interesado sa mensahe sang Ginharian?
5 Kon nakasapo sing isa ka lalaki nga interesado ang isa ka utod nga babayi, indi sia dapat nagaisahanon sa pagduaw liwat. Mahimo niya updon ang iya bana ukon ang isa pa ka manugbantala. Kon padayon ang interes sini nga tawo, maayo gid nga itugyan ang pagtuon sa iya sa isa ka kalipikado nga utod nga lalaki.
6. Paano naton mailog si apostol Pablo agod ‘madaug man naton ang madamo pa gid nga mga tawo’?
6 Pilia ang mga Topiko nga Makapainteres sa mga Lalaki: Ginhunahuna ni apostol Pablo ang iya manugpalamati kag ginpasibu ang iya presentasyon agod ‘madaug niya ang madamo pa gid nga mga tawo.’ (1 Cor. 9:19-23) Subong man, dapat naton pilion kag handaan ang mga topiko nga makapainteres sa mga lalaki nga aton mapanaksihan. Halimbawa, masami nga nagakabalaka ang mga lalaki tuhoy sa problema sa ekonomiya, pagdumalahan sang gobierno, kag kaayuhan sang ila pamilya. Interesado man sila sa katuyuan sang kabuhi, sa palaabuton sang duta, kag kon ngaa ginatugutan sang Dios ang pag-antos. Kon hunahunaon naton ini nga mga topiko, mahimo mas mahapos nila batunon ang mensahe sang Ginharian.—Hulu. 16:23.
7. Paano makabulig ang tanan sa kongregasyon kon magtambong sa miting ang isa ka di-tumuluo nga bana?
7 Buligi ang Di-tumuluo nga mga Bana: Ang maayo nga pagginawi sang asawa may daku gid nga impluwensia sa iya di-tumuluo nga bana, apang may mabulig man ang mga miembro sang kongregasyon sa sini. (1 Ped. 3:1-4) Kon magtambong sa miting ang di-tumuluo nga bana upod sa iya asawa, mangin epektibo gid nga pagpanaksi sa iya ang mainit nga pag-abiabi sang mga kauturan sa kongregasyon. Ang iya pagtambong mahimo nagapakita sang iya interes sa kamatuoran, kag mahimo nga magbaton sia sang pagtuon sa Biblia.
8. Paano mabuligan sang utod nga mga lalaki ang di-tumuluo nga mga bana nga may diutay nga interes sa kamatuoran?
8 Ang iban naman nga bana daw indi interesado sa primero apang sang may utod nga lalaki nga napahamtangan nila sing buot, luyag na nila nga hambalan ang Biblia. Ginpanikasugan sang mga utod nga lalaki sa isa ka kongregasyon nga duawon kon kaisa ang nabahinbahin sa relihion nga panimalay, kag nakighambal sila sa di-tumuluo nga bana tuhoy sa mga butang nga nakapainteres sa iya. Nagdul-ong ini sa ulihi sa paghambalanay tuhoy sa Biblia, kag karon nabawtismuhan na ini nga bana. Sa isa naman ka bahin, ginbuligan sang isa ka utod nga lalaki ang mainabyanon kag di-tumuluo nga bana sa pagkudal sang ila balay. Nasugdan ang isa ka pagtuon sa Biblia bangod sa pagpakita sing personal nga interes. (Gal. 6:10; Fil. 2:4) Kon isa ikaw ka Cristiano nga lalaki, ngaa indi mo tinguhaan nga mabuligan ang di-tumuluo nga mga bana?
9. Ano ang mangin resulta sa paghanas sa Cristiano nga mga lalaki?
9 Paghanas Para sa Palaabuton: Ang mga lalaki nga nagbaton sang mensahe sang Ginharian kag nagtinguha nga malab-ot ang mga pribilehiyo sa pag-alagad kay Jehova mahimo mangin “dulot nga mga lalaki.” Cristiano sila nga mga gulang nga naggamit sang ila ikasarang kag kusog para sa kongregasyon sang katawhan ni Jehova. (Efe. 4:8; Sal. 68:18) Handa sila kag luyag gid mag-atipan sa kongregasyon. (1 Ped. 5:2, 3) Daku gid sila nga pagpakamaayo sa tanan nga kauturan!
10. Paano nakabenepisyo ang madamo sa panikasog ni Ananias nga buligan si Pablo?
10 Halimbawa, si Saulo nangin “apostol sa mga pungsod,” bisan isa anay sia ka manughingabot sang mga Cristiano. (Roma 11:13) Bangod sini, nangalag-ag sang primero si disipulo Ananias nga bantalaan si Saulo. Walay sapayan sini, gintuman ni Ananias ang sugo sang Ginuo kag nakighambal sa tawo nga nangin si apostol Pablo. Pagligad sang pila ka tuig, nabuligan ni Pablo ang linibo nga nagpamati sang iya pagbantala kag ang minilyon pa nga padayon nga nagabenepisyo sa iya inspirado nga sinulatan nga narekord sa Pulong sang Dios.—Binu. 9:3-19; 2 Tim. 3:16, 17.
11. Ngaa dapat naton himuon ang ano man nga mga pagpasibu agod mapanaksihan ang mga lalaki?
11 Kabay nga himuon naton ang ano man nga mga pagpasibu agod mapanaksihan ang mga lalaki. Kon himuon naton ini, makasalig kita sang mga pagpakamaayo ni Jehova sa aton mga panikasog nga himuon ang iya kabubut-on kag atipanon sing maayo ang intereses sang Ginharian.