Mabuligan Mo Bala ang Di-tumuluo nga Tiayon?
1. Ngaa indi lamang ang mga Cristiano ang interesado sa pagbulig sa ila di-tumuluo nga tiayon sa pagbaton sa kamatuoran?
1 May mga manugbantala bala sa inyo kongregasyon nga may di-tumuluo nga tiayon? Kon amo, gusto gid sini nga mga manugbantala nga makaupod ang ila tiayon sa matuod nga pagsimba. Pero indi lamang sila ang may gusto sa sini. Ginapakita man sang bug-os nga kongregasyon ang handum sang Dios nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.” (1 Tim. 2:4) Paano naton mabuligan ang di-tumuluo nga mga tiayon sang mga manugbantala sa aton kongregasyon?
2. Ano ang mabulig sang paghangop sa pagpakig-angot sa di-tumuluo nga tiayon?
2 Una, dapat naton tamdon ang mga butang suno sa pagtamod sang di-tumuluo. Madamo sa di-tumuluo nga mga tiayon ang nagahigugma gid sa ila pamilya kag ginatinguhaan nila nga mangin maayo nga tiayon kag ginikanan. Ayhan may tudok sila nga relihioso nga mga pagpati nga tuhay sangsa aton. Diutay lang ang ila nahibaluan parte sa mga Saksi ni Jehova, luwas sa sayop ukon indi makatarunganon nga ginsiling sang ila mga kaupod. Ang iban naakig sa tion nga ginahinguyang sang ila tiayon sa pagsimba nga ginahinguyang nila sadto sa ila pamilya. Ang paghangop makabulig sa aton sa pagpakig-angot sing mainayuhon kag matinahuron sa isa ka di-tumuluo kag mangin kalmado sa tion nga kaupod naton sia.—Hulu. 16:20-23.
3. Ano ang pinakamaayo nga paagi para makumbinsi ang isa ka di-tumuluo?
3 Personal nga Interes: Ang pinakamaayo nga paagi para makumbinsi sa kamatuoran ang di-tumuluo nga tiayon, mahimo magsugod paagi sa aton batasan, indi paagi sa Biblia. (1 Ped. 3:1, 2) Importante sa sini nga bahin ang pagpakita sing personal nga interes. Ang mga utod nga babayi sa kongregasyon mahimo magpakita sing interes sa di-tumuluo nga asawa, kag ang mga utod nga lalaki sa di-tumuluo nga bana. Paano?
4. Paano naton mapakita ang personal interes?
4 Kon wala mo pa nakilala ina nga tiayon, mas maayo kon istoryahon mo anay ang Cristianong tiayon. Indi maluyahan sing buot kon sa umpisa indi maayo ang reaksion sina nga di-tumuluo. Ang aton pagpakig-abyan kag personal nga interes mahimo magpahulag sa iya nga mangin mas maayo sa mga Saksi ni Jehova. (Roma 12:20) Ang pila ka hamtong nga Cristiano nagaagda sa isa ka di-tumuluo nga tiayon kag sa iya pamilya sa isa ka panihapon, para makilala pa gid naton sia sing maayo kag madula ang iya indi maayo nga pagtamod sa aton. Istoryahan nila ang iya mga naluyagan, imbes piliton nga istoryahan ang espirituwal nga mga butang. Sang ulihi, kon mapahamtang na ang di-tumuluo, mahimo na binagbinagon sa iya ang Makasulatanhon nga mga butang. Ukon mahimo nga batunon niya ang pangagda nga matambong sa aton mga miting para mahibaluan kon ano ang ginatun-an sang iya asawa, ilabi na kay kilala na niya ang iban sa kongregasyon. Bisan pa indi sia handa sa pagpangusisa sa kamatuoran, mahimo sia hatagan sing komendasyon sa iya pagsuporta sa iya tumuluo nga tiayon.
5. Paano mabuligan sang mga gulang ang isa ka di-tumuluo?
5 Ilabi na nga dapat tinguhaan sang mga gulang nga buligan ang di-tumuluo nga mga tiayon kag mangin alisto sa kahigayunan para mapanaksihan sila. Ang isa ka di-tumuluo nga indi luyag maghinun-anon sa Biblia mahimo mamati sa Makasulatanhon nga pagpalig-on kon maospital sia ukon magbalatian sing serioso. Kon makaatubang sila sing kabudlayan, kaangay sa kamatayon sang miembro sang pamilya, mahimo sia agdahon sang mga gulang nga matambong sa tion nga ginalugpayan nila ang iya pamilya.
6. Ngaa dapat naton buligan ang mga di-tumuluo nga tiayon?
6 Handurawa ang kalipay sang isa ka Cristiano sa aton kongregasyon kon batunon sang ila tiayon ang kamatuoran! Mangin daku man ini nga kalipay kay Jehova, sa mga anghel, kag sa iban nga katapo sang kongregasyon. (Luc. 15:7, 10) Pero, kon indi dayon magbaton ang di-tumuluo, malipayon gihapon kita kay ang aton padayon nga panikasog nagapahamuot kay Jehova, kay “indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.”—2 Ped. 3:9.
[Blurb sa pahina 6]
Ang pinakamaayo nga paagi para makumbinsi sa kamatuoran ang di-tumuluo nga tiayon, mahimo magsugod paagi sa aton batasan, indi paagi sa Biblia