Dugang nga Kahigayunan sa Pagdayaw kay Jehova

1. Anong bag-o nga kahimusan ang magabulig sa aton nga madayaw si Jehova?

¹ Isa ka bag-o nga kahimusan ang ginsugdan sang Marso sini nga tuig. Ang mga manugbantala may kahigayunan nga mag-auxiliary payunir nga 30 ka oras lang ang ila lab-uton kada Marso kag Abril kag sa bulan sang duaw sang manugtatap sang sirkito. Kon ang duaw sang manugtatap sang sirkito magasugod sa ulihi nga mga adlaw sang bulan asta sa una nga mga adlaw sang masunod nga bulan, ang auxiliary payunir mahimo magpili kon diin nga bulan luyag niya lab-uton ang 30 ka oras. Ang tanan nga auxiliary payunir mahimo magtambong sa bug-os nga miting upod sa mga regular kag espesyal payunir. Buot silingon kon indi naton malab-ot ang 50 ka oras, madayaw gihapon naton si Jehova subong auxiliary payunir sing asta apat ka beses kada tuig nga may 30 ka oras lamang nga lalab-uton!—Sal. 109:30; 119:171.

2. Ngaa mapalig-on ka gid kon mag-auxiliary payunir ka sa duaw sang manugtatap sang sirkito?

² Sa Duaw sang Manugtatap sang Sirkito: Subong, madamo na ang makaauxiliary payunir sa duaw sang manugtatap sang sirkito kag makabayluhanay sing pagpalig-on samtang nagapanghikot sa latagon. (Roma 1:11, 12) Madamo nga auxiliary payunir ang mahimo magbakasyon sa ila obra para makabantala upod sa manugtatap sang sirkito. Ang mga nagaobra halin sa Lunes asta Biernes mahimo makapangabay sa iya nga updan sila sa Sabado ukon Domingo. Isa pa, sigurado nga mapalig-on gid ang mga auxiliary payunir sa pagtambong sa miting upod sa mga regular kag espesyal payunir!

3. Ngaa ang panahon sang Memoryal isa gid ka maayo nga tion sa pag-auxiliary payunir?

³ Sa Marso kag Abril: Sang una, isa lang ka bulan sa panahon sang Memoryal ang may 30 ka oras nga lalab-uton para sa mga auxiliary payunir. Pero subong, mahimo na nila madoble ang ila “halad sang pagdayaw”! (Heb. 13:15) Ang Marso kag Abril maayo gid nga mga bulan para pasangkaron ang aton ministeryo subong auxiliary payunir. Sa sini nga mga bulan, nagapang-imbitar kita sa iban nga magtambong sa Memoryal. Isa pa, bangod madamo ang nagapasangkad sang ila ministeryo sa panahon sang Memoryal, nagkalainlain nga manugbantala ang makaupod naton sa latagon. Pagkatapos sang Memoryal, ang mga nagpakita sing interes ginapalig-on naton nga magtambong sa pinasahi nga pamulongpulong. Kabay nga panginpuslan naton ining dugang nga mga kahigayunan sa pag-auxiliary payunir.—Luc. 6:45.