Ang Pulong sang Dios Mapuslanon sa Pagpanudlo
1. Ano ang tema sang sirkito nga asembleya sa 2014, kag ano nga pamangkot ang pagasabton sa programa?
1 Ang aton “Daku nga Manunudlo,” si Jehova, amo ang pinakamaayo nga manunudlo sa uniberso. (Isa. 30:20, 21, New World Translation of the Holy Scriptures, NW) Pero, paano kita ginatudluan ni Jehova? Gin-aman niya sa aton ang isa ka libro nga labaw sa tanan—ang iya inspirado nga Pulong, ang Biblia. Paano ang panudlo sang Dios makabenepisyo sa aton sa pisikal, mental, emosyonal, kag espirituwal? Ang sabat sa sini nga pamangkot pagabinagbinagon sa programa sang aton sirkito nga asembleya sa 2014. Ang tema sang programa, “Ang Pulong sang Dios Mapuslanon sa Pagpanudlo,” ginbase sa 2 Timoteo 3:16.
2. Ano nga mga pamangkot ang magapadaku sa panguna nga mga punto sa programa?
2 Bantayi ang Panguna nga mga Punto: Ang panguna nga mga punto sa programa ipadaku paagi sa mga sabat sa masunod nga mga pamangkot:
• Ano ang epekto sang panudlo sang Dios sa aton kabuhi? (Isa. 48:17, 18)
• Kon maghimo kita sing mga pagbag-o sa aton kahimtangan agod maalagad si Jehova sing bug-os tion, ano ang masaligan naton? (Mal. 3:10)
• Ano dapat ang aton mangin reaksion kon makaatubang kita sing “tuhay nga mga panudlo”? (Heb. 13:9)
• Paano naton mailog ang “paagi sang pagpanudlo” ni Jesus? (Mat. 7:28, 29)
• Ngaa dapat tudluan sang mga manunudlo sang kongregasyon ang ila kaugalingon? (Roma 2:21)
• Sa ano mapuslanon ang Pulong sang Dios? (2 Tim. 3:16)
• Ano ang epekto sa mga tawo sang ‘pag-uyog’ sa mga pungsod? (Hag. 2:6, 7)
• Ano ang masaligan sa aton ni Jehova? (Efe. 5:1)
• Ngaa dapat gid kita manikasog agod makapabilin sa panudlo ni Jehova? (Luc. 13:24)
3. Ngaa importante gid nga tambungan naton kag pamatian sing maayo ining suno sa tion nga programa?
3 Sa umpisa sang 2 Timoteo kapitulo 3, antes lang sang pinamulong diin ginbase ang tema sang programa, ginlaragway ni Pablo ang makahalanguyos nga mga tion nga pamatuod sang katapusan nga mga adlaw. Sia nagsulat: “Ang malaut nga mga tawo kag mga impostor magalain kag magalain pa, nga nagapatalang kag ginapatalang.” (2 Tim. 3:13) Agod indi kita mapatalang, importante gid nga pamatian naton kag iaplikar ang panudlo sang Dios! Gani, kabay nga determinado kita nga tambungan kag pamatian sing maayo ining suno sa tion nga programa.