Amligi ang Imo Hunahuna
1. Ano ang tema sang sirkito nga asembleya para sa 2013, kag ano ang katuyuan sini nga programa?
1 Gintudluan ni Jesus ang iya mga disipulo nga higugmaon si Jehova sing bug-os tagipusuon, kalag, kag hunahuna. (Mat. 22:37, 38) Ang kombension kag mga asembleya sa sini nga tuig gindesinyo para buligan kita nga mapabakod ang aton nasulod nga pagkatawo. Kon madumduman pa naton, ang aton distrito nga kombension may tema nga “Bantayi ang Imo Tagipusuon!” Ang aton adlaw sang pinasahi nga asembleya naman sa 2013 may tema nga “Amligi ang Imo Konsiensia.” Kag ang serye sang aton sirkito nga asembleya nga magasugod sa masunod nga bulan may tema nga “Amligi ang Imo Hunahuna,” pasad sa Mateo 22:37. Ini nga programa gindesinyo para buligan kita nga mausisa ang aton panghunahuna agod mangin mas kalahamut-an ini kay Jehova.
2. Ano nga mga pamangkot ang sabton sa tion sang programa?
2 Kon Ano ang Binagbinagon: Samtang nagapamati kita sa sirkito nga asembleya, bantayan naton ang sabat sa sini nga mga pamangkot, nga amo ang panguna nga mga punto:
• Paano naton malikawan nga hunahunaon ang ‘tawhanon nga panghunahuna’?
• Paano kita makabulig nga makuha ang tabon nga nagabulag sa hunahuna sang mga di-tumuluo?
• Kay sin-o nga panimuot sang hunahuna ang luyag naton ilugon?
• Ano ang mga benepisyo sang nagakaigo nga pagpamalandong?
• Paano naton tugutan si Jehova nga magdihon sang aton panghunahuna?
• Paano ang mga bana, asawa, ginikanan, kag mga kabataan makaamot sa kalipay sang pamilya?
• Paano kita mangin handa sa adlaw ni Jehova?
• Ano ang buot silingon sang paghanda sang aton hunahuna para sa hilikuton?
• Ano nga pagpakamaayo ang matigayon sang mga nagaaplikar sang ila natun-an?
3. Ngaa importante nga makatambong kita sa duha ka adlaw nga programa, mamati sing maayo, kag iaplikar ang aton matun-an?
3 Si Satanas nagatinguha gid nga halitan ang aton hunahuna. (2 Cor. 11:3) Gani, kinahanglan nga amligan naton ini kag kontrolon. Dapat padayon naton nga ipabanaag ang hunahuna ni Cristo kag pakigbatuan ang mga impluwensia sang malaut nga kalibutan. (1 Cor. 2:16) Gani planuha nga makatambong sa duha ka adlaw nga sirkito nga asembleya. Mamati sing maayo. Ang pag-aplikar sa aton matun-an magabulig agod mahanda ang aton hunahuna para sa makugi nga pag-alagad sa Ginharian. —1 Ped. 1:13.