Magtuon sa Mas Eksperiensiado nga mga Manugbantala

Ginapabaloran gid naton ang eksperiensiado nga mga manugbantala sa kongregasyon. Ang iban madamo nga tuig na nga nagaalagad kay Jehova sing matutom. Ang iban naman mahimo nga sining karon nag-uswag ang ila ikasarang sa ministeryo. Nakita sini nga mga manugbantala ang pag-uswag sang pagbantala kag paghimo sing disipulo nga hilikuton nga nagapamatuod sang pagtuytoy ni Jesus sa Cristianong kongregasyon sa sining katapusan nga mga adlaw. (Mat. 28:19, 20) Paagi sa pagpakigbahin sa sini nga ministeryo, nabaton nila “ang gahom nga labaw sa kinaandan” kon nagaatubang sang mga problema kag mga pagtilaw. (2 Cor. 4:7) Madamo kita sing matun-an sa sining eksperiensiado nga mga manugbantala. Kon may kahigayunan, nalipay sila sa pagtudlo sa iban sang ila natun-an. (Sal. 71:18) Gani, dapat kita mangita sing paagi nga makatuon sa ila. Paano?

Sa Ministeryo. Ang mga bag-uhan ukon ang mga indi eksperiensiado nga mga manugbantala dapat hanason agod mangin epektibo sila sa ministeryo. Madamo kita sing matun-an sa pag-obserbar kon paano ginahimo sang hamtong nga mga manugbantala ang ila ministeryo. (Tan-awa ang artikulo sa Pebrero 15, 2015 nga Lalantawan, nga “Magpabilin nga Makugi sa Ministeryo,” ang ikatlo nga parapo sa idalom sang “Buligi ang mga Bag-uhan.”) Paano ka nakabenepisyo sa imo pag-upod sa ila sa ministeryo?

Puede mo bala pangabayon ang isa ka eksperiensiado nga manugbantala nga updan ka sa ministeryo? Kon maluya na sia, mahimo mo dalhon ang isa sa imo ginatun-an sa Biblia sa iya balay kag didto hiwaton ang pagtuon. Pagkatapos sang pagtuon, pamangkuta ang manugbantala sa iya mga obserbasyon kag panugda.

Maghinguyang sing Tion Kaupod Nila: Kilalaha pa gid ang eksperiensiado nga mga manugbantala paagi sa paghinguyang sing tion kaupod nila. Imbitaha ang isa sa ila sa inyo pangpamilya nga pagsimba kag interbyuha sia. Kon maluya na sia, mahimo mo bala hiwaton ang inyo pangpamilya nga pagsimba sa iya balay. Hibalua kon paano niya natun-an ang kamatuoran. Ano nga mga pagpakamaayo ang natigayon niya? Ano nga pag-uswag ang nakita niya sa kongregasyon? Ano ang nagahatag sa iya sing kalipay sa pag-alagad kay Jehova?

Mangin mahinangpanon kag makatarunganon sa aton ginapaabot. Pareho sa aton, ang eksperiensiado nga mga manugbantala may nanuhaytuhay nga mga dulot sa ministeryo. (Roma 12:6-8) Ang iban tigulang na, gani mahimo nga limitado na lang ang ila tion nga makapakig-upod sa aton. Pero, madamo kita sing matun-an sa ila bangod sang ila eksperiensia sa pag-alagad kay Jehova sing matutom.