‘Nagpasalamat si Pablo sa Dios kag Nagpakaisog’

Sang nabalitaan sang kongregasyon sa Roma nga maabot si Pablo, may grupo sang kauturan nga naglakbay sing mga 64 kilometros para sugaton sia. Ano ang ginbatyag ni Pablo sa ila masinakripisyuhon nga gugma? “Sang makita sila ni Pablo, nagpasalamat sia sa Dios kag nagpakaisog.” (Bin 28:15) Kilala si Pablo nga nagapalig-on sa mga kongregasyon nga iya ginabisitahan. Pero sa sini nga tion isa sia ka priso, kag sia naman ang ginpalig-on.—2Co 13:10.

Subong, ang mga manugtatap sang sirkito nagalakbay sa kada kongregasyon para palig-unon ang mga kauturan. Pareho sa tanan nga katawhan sang Dios, nagabatyag man sila kon kaisa sang kakapoy, kabalaka, kag pagluya sing buot. Sa masunod nga pagbisita sa inyo kongregasyon sang manugtatap sang sirkito kag sang iya asawa, ano ang mahimo mo para buligan sila nga mangin maisog, kag ‘makapalig-unay kamo’?—Ro 1:11, 12.

• 

  Magtambong sa miting para sa pag-alagad sa latagon. Mapalig-on gid ang manugtatap sang sirkito kon nagasakripisyo ang mga manugbantala para makabenepisyo sing bug-os sa pinasahi nga semana sang pag-alagad. (1Te 1:2, 3; 2:20) Magplano nga mag-auxiliary payunir sa bulan sang iya pagbisita. Puede mo ayhan maupdan sia kag ang iya asawa sa ministeryo ukon mahagad ang isa sa ila nga updan ka sa imo ginatun-an sa Biblia? Nalipay sila nga makaupod ang sarisari nga manugbantala, lakip ang mga bag-uhan ukon ang mga nagabatyag nga indi sila maayo magbantala.

• 

  Mangin maabiabihon. Puede mo bala sila padayunon sa imo balay ukon agdahon sa pagkaon? Paagi sini, ginapakita mo ang imo gugma sa manugtatap sang sirkito kag sa iya asawa. Wala man sila nagapaabot nga damo gid ang imo ihanda.—Lu 10:38-42.

• 

  Pamatii kag sunda ang iya panuytoy kag laygay. Ang manugtatap sang sirkito mahigugmaon nga nagabulig sa aton nga mapauswag ang aton pag-alagad kay Jehova. Kon kaisa, mahimo sia maghatag sing mabaskog nga laygay. (1Co 5:1-5) Malipay gid sia kon nagatuman kita kag nagapasakop.—Heb 13:17.

• 

  Magpasalamat. Pasalamati ang manugtatap sang sirkito kag ang iya asawa sa ila mga panikasog nga nakabulig gid sa imo. Mahambal mo ini sing personal ukon paagi sa isa ka sulat ukon card.—Col 3:15.