Makabulig Ka Bala sa Pagtudlo sa mga Tawo Para Mangin Disipulo Sila?

1. Ano ang ginhimo ni Jehova para sa imo?

PAANO ka nangin Saksi ni Jehova? Una, nabatian mo “ang maayong balita.” (Mar. 13:10) Posible nga ginsugid ini sang imo mga ginikanan, sang imo upod sa ulubrahan ukon sa eskwelahan, ukon nabantalaan ka sa imo balay. Dayon, may nag-Bible study sa imo. Madamo nga oras ang gingamit niya para tudluan ka kag nagpanikasog gid sia. Natun-an mo nga palangga ka ni Jehova, gani ginpalangga mo man sia. Ginbuyok ka ni Jehova sa kamatuoran. Kag subong, bilang disipulo ni Jesucristo, may paglaum ka nga mabuhi sing wala sing katapusan. (Juan 6:44) Sigurado gid nga nagapasalamat ka kay Jehova nga may gingamit Sia para tudluan ka sang kamatuoran kag ginbaton ka Niya bilang Iya alagad.

2. Ano ang binagbinagon naton sa sini nga artikulo?

² Bangod nabal-an na naton ang kamatuoran, pribilehiyo naton nga buligan ang iban para mangin kaupod naton sila sa dalan nga nagapadulong sa kabuhi. Mahimo nga nahapusan kita nga magbantala sa mga tawo. Pero mahimo nga nagaalang-alang kita nga pamangkuton sila kon gusto nila magpa-Bible study. Kag mahimo nga nabudlayan kita mag-Bible study sa isa ka tawo. Amo man bala sini ang nabatyagan mo? Posible nga makabulig sa imo ang pila ka panugda sa sini nga artikulo. Binagbinagon naton kon ano ang nagapalig-on sa aton para tudluan ang iban para mangin disipulo sila. Binagbinagon man naton kon ano ang puede naton himuon kon nagaalang-alang kita sa pag-Bible study sa iban. Pero binagbinagon anay naton kon ngaa dapat naton tudluan ang mga tawo parte sa maayong balita, indi lang nga bantalaan sila.

GINSUGO KITA NI JESUS NGA MAGBANTALA KAG MAGTUDLO

3. Ngaa nagabantala kita?

³ Sang ari si Jesus sa duta, may ginsugo sia sa iya mga sumulunod. Duha ang dapat nila himuon. Una, ginsugo niya sila nga ibantala ang maayong balita sang Ginharian, kag gintudluan niya sila kon paano ini himuon. (Mat. 10:7; Luc. 8:1) Halimbawa, gintudluan niya ang iya mga disipulo kon ano ang himuon kon mamati ang mga tawo sa mensahe sang Ginharian, kag kon ano naman ang himuon kon indi mamati ang mga tawo. (Luc. 9:2-5) Ginpaathag man ni Jesus nga magabantala ang iya mga disipulo sa madamo nga tawo kag sa madamo nga lugar sang nagsiling sia nga ‘magapanaksi sila sa tanan nga pungsod.’ (Mat. 24:14; Binu. 1:8) Ginsugo ni Jesus ang iya mga disipulo nga sugiran ang mga tawo parte sa Ginharian sang Dios kag sa pagahimuon sini, mamati man ang mga tawo ukon indi.

4. Suno sa Mateo 28:18-20, ano pa ang dapat naton himuon magluwas sa pagbantala sang Ginharian?

⁴ Suno sa ginsugo ni Jesus sa iya mga sumulunod, ano ang ikaduha nga dapat nila himuon? Ginsilingan niya sila nga tudluan nila ang mga tawo nga tumanon ang tanan nga ginsugo niya sa ila. Mahimo nga magsiling ang iban nga ang mga Cristiano lang sang unang siglo ang ginsugo ni Jesus nga magbantala kag magtudlo sa mga tawo. Pero indi ina matuod. Kay man, nagsiling si Jesus nga ining importante gid nga hilikuton magapadayon asta sa aton tion subong, “tubtob sa hingapusan sang sistema sang mga butang.” (Basaha ang Mateo 28:18-20.) Mahimo gid nga ginhambal ni Jesus ini nga sugo sang nagpakita sia sa sobra 500 niya ka disipulo. (1 Cor. 15:6) Sang ulihi, sa palanan-awon ni Juan nga nasulat sa Bugna, mahangpan naton nga gusto gid ni Jesus nga ang tanan niya nga disipulo magtudlo sa iban parte kay Jehova.—Bug. 22:17.

5. Suno sa 1 Corinto 3:6-9, sa ano ginpaanggid ni Pablo ang pagbantala kag pagtudlo sa mga tawo?

⁵ Suno kay apostol Pablo, ang pagtudlo sa mga tawo para mangin disipulo sila daw pareho sa ginahimo sang isa ka mangunguma. Ginapakita sini nga may dapat pa kita himuon magluwas sa pagtanom sang binhi. Ginsilingan niya ang mga taga-Corinto: “Ako ang nagtanom, si Apolos ang nagbunyag . . . Kamo ang duta nga ginauma sang Dios.” (Basaha ang 1 Corinto 3:6-9.) Nagaobra kita sa ‘uma sang Dios.’ Nagatanom kita sang mga binhi kon nagabantala kita, kag nagabunyag kita kon ginatudluan naton ang mga tawo. (Juan 4:35) Pero kabalo kita nga ang Dios ang nagapatubo sang aton gintanom, ukon sia ang nagabuyok sa mga tawo.

6. Kon nagatudlo kita sa mga tawo, dapat naton sila buligan nga himuon ang ano?

⁶ Ginapangita naton ang mga tawo nga “may husto nga panimuot sa pagtigayon sing kabuhi nga wala sing katapusan.” (Binu. 13:48) Para mangin disipulo sila, dapat naton sila buligan nga (1) mahangpan nila ang ila mga ginatun-an sa Biblia, (2) batunon ini, kag (3) iaplikar ini. (Juan 17:3; Col. 2:6, 7; 1 Tes. 2:13) Ang tanan sa kongregasyon makabulig sa mga Bible study paagi sa ila halimbawa. Dapat nila ipabatyag sa sini nga mga bag-uhan nga palangga nila sila kag dapat nila sila abiabihon kon mag-attend sila sa mga miting. (Juan 13:35) Posible nga may mga ginapatihan ukon ginahimo ang Bible study nga daw “natukod sing malig-on,” ukon nabudlayan sia nga bag-uhon. (2 Cor. 10:4, 5) Gani dapat gid magpanikasog ang utod nga naga-study sa iya nga buligan sia, kag mahimo nga nagakinahanglan ini sang malawig nga tion. Posible nga binulan pa ang magligad antes sia maghimo sang mga pagbag-o kag antes sia mangin kalipikado sa bawtismo. Pero malipay gid kita sa aton pagpanikasog.

GINAPALIG-ON KITA SANG GUGMA NGA TUDLUAN ANG MGA TAWO

7. Ano ang nagapalig-on sa aton nga magbantala kag magtudlo sa mga tawo para mangin disipulo sila?

⁷ Ngaa nagabantala kita kag nagatudlo sa mga tawo para mangin disipulo sila? Una, bangod palangga naton si Jehova. Kon ginahimo mo ang imo bug-os nga masarangan nga tumanon ang sugo nga magbantala kag tudluan ang mga tawo para mangin disipulo sila, ginapakita mo nga palangga mo ang Dios. (1 Juan 5:3) Binagbinaga ini: Nagabantala ka sa mga tawo bangod palangga mo si Jehova. Mahapos bala tumanon ini nga sugo? Posible nga nabudlayan ka. Sang nagbantala ka sa pinakauna nga tion, ginkulbaan ka bala? Sigurado gid nga ginkulbaan ka. Pero kabalo ka nga ginsugo ini ni Jesus, gani nagtuman ka. Kag sang pirme ka na nagabantala, posible gid nga wala ka na masyado nakulbaan. Ti, ano naman ang ginabatyag mo parte sa pag-Bible study sa mga tawo? Nakulbaan ka bala kon ginahunahuna mo ini? Posible nga nakulbaan ka. Pero kon mangamuyo ka kay Jehova nga kabay pa nga madula ang imo kulba kag mangin maisog ka sa pagpangita sang Bible study, buligan ka niya nga mahimo ini.

8. Suno sa Marcos 6:34, ano pa ang nagapalig-on sa aton nga tudluan ang iban?

⁸ Ikaduha, palangga naton ang aton mga isigkatawo, gani gusto naton tudluan sila sang kamatuoran. Isa ka bes, kinapoy gid si Jesus kag ang iya mga disipulo pagkatapos nila magbantala. Nagkadto sila sa isa ka lugar para magpahuway, pero nakita sila sang madamo nga tawo. Naluoy si Jesus sa ila, gani gintudluan niya sila sing “madamo nga butang.” (Basaha ang Marcos 6:34.) Bisan pa kapoy na si Jesus, nagpanikasog gid sia. Ngaa? Ginhunahuna ni Jesus ang sitwasyon sang mga tawo. Gusto niya sila buligan kay nakita niya nga nagaantos sila kag kinahanglan nila ang bulig para indi sila madulaan sang paglaum. Amo man sini ang sitwasyon sang mga tawo subong. Daw malipayon sila, pero ang matuod, may mga problema man sila. Daw pareho sila sang mga karnero nga nagtalang, kag wala sing manugbantay nga nagagiya sa ila. Nagsiling si apostol Pablo nga wala sila makakilala sa Dios kag wala sila sing paglaum. (Efe. 2:12) Ara sila sa “dalan nga nagapadulong sa kalaglagan.” (Mat. 7:13) Kon hunahunaon naton nga kinahanglan gid sang mga tawo sa aton teritoryo nga makilala ang Dios, mapalig-on kita sini nga buligan sila bangod palangga naton sila kag naluoy kita sa ila. Kag ang pinakamaayo nga paagi nga mabuligan naton sila amo ang pag-Bible study sa ila.

9. Suno sa Filipos 2:13, paano ka mabuligan ni Jehova?

⁹ Mahimo nga nakulbaan ka nga mangita sang Bible study. Ngaa? Bangod kabalo ka nga kinahanglan ang daku nga tiempo para handaan ang pagtuon kag para sa pag-Bible study mismo. Kon amo sini ang imo nabatyagan, isugid ini kay Jehova. Pangabaya sia nga buligan ka nga handumon nga mangita kag makadumala sang Bible study. (Basaha ang Filipos 2:13.) Nagsiling si apostol Juan nga makasalig kita nga sabton gid sang Dios ang aton mga pangamuyo nga suno sa Iya kabubut-on. (1 Juan 5:14, 15) Gani makasalig ka nga buligan ka ni Jehova nga handumon ang pagtudlo sa mga tawo para mangin disipulo sila.

ANG IBAN PA NGA MGA KABUDLAYAN KAG ANG MGA DAPAT NATON HIMUON

10-11. Ano ang posible nga rason kon ngaa nagaalang-alang kita sa pag-Bible study sa iban?

¹⁰ Kabalo kita nga importante gid nga tudluan ang mga tawo para mangin disipulo sila. Pero mahimo nga nabudlayan kita nga himuon ini sa bug-os naton nga masarangan. Binagbinagon naton ang pila ka mga kabudlayan kag ang mga dapat naton himuon.

¹¹ Posible nga nagabatyag kita nga limitado na lang ang aton mahimo. Halimbawa, ang pila ka utod tigulang na ukon nagamasakit. Amo bala sini ang imo sitwasyon? Makabulig sa aton ang mga natun-an naton sa tion sang COVID-19 nga pandemic. Binagbinaga ang isa sa sini. Natun-an naton nga puede kita maka-Bible study sa iban paagi sa telepono ukon gadyet. Gani mahimo ka gihapon maka-Bible study sa iban bisan ara ka lang sa imo balay. May isa pa ka bentaha kon ara ka sa imo balay. May pila nga gusto magpa-Bible study, pero indi sila puede sa oras nga sa masami amo ang ginagamit sang aton mga kauturan sa pagbantala. Pero puede sila kon aga pa ukon gab-i na gid. Puede mo bala sila ma-Bible study? Gab-i sadto sang gintudluan ni Jesus si Nicodemo, kay amo ini ang oras nga gusto ni Nicodemo.—Juan 3:1, 2.

12. Ano ang makabulig sa aton nga makumbinsi nga masarangan naton nga magtudlo sa iban?

¹² Posible nga nagahunahuna kita nga indi naton masarangan nga mag-Bible study sa iban. Basi nagabatyag kita nga kulang pa ang aton nabal-an ukon ikasarang para makatudlo kita sa iban. Kon amo sini ang imo ginabatyag, binagbinaga ang makabulig sa imo nga makumbinsi nga masarangan mo ini. Una, para kay Jehova, kalipikado ka nga magtudlo sa iban. (2 Cor. 3:5) Ikaduha, ang nagsugo sa imo nga tudluan ang iban amo si Jesus, nga may “bug-os nga awtoridad sa langit kag sa duta.” (Mat. 28:18) Kag ikatlo, makasalig ka nga may magabulig sa imo. Ginbuligan si Jesus sang iya Amay nga mabal-an kon ano ang iya isiling, gani buligan ka man ni Jehova. (Juan 8:28; 12:49) Puede ka man magpabulig kon paano mangita sang Bible study kag umpisahan ini. Puede ka magpabulig sa manugtatap sang inyo grupo sang pag-alagad sa latagon ukon sa isa ka eksperiensiado nga payunir ukon manugbantala. Ang isa ka paagi para madugangan ang imo kompiansa amo ang pag-upod sa sini nga mga utod sa ila pag-Bible study.

13. Ngaa dapat kita mag-adjust sa bag-o nga mga paagi?

¹³ Posible nga nabudlayan kita sa bag-o nga mga paagi kag sa bag-o nga mga gamit. Bag-o na ang paagi naton sa pag-Bible study sa mga interesado. Ang publikasyon nga ginagamit naton sa pagtudlo sa iban amo ang libro nga Magkabuhi sing Wala Katapusan! Lain na subong ang aton paagi sang paghanda kag pagdumala sang Bible study. Diutay na lang nga parapo ang aton ginabasa kag mas makaistoryahanay kita sing maayo sa aton Bible study. Ginagamit naton sa pagtudlo ang mas madamo nga video kag mga artikulo sa aton website kag sa JW Library^®. Kon indi ka pa kabalo kon paano gamiton ini nga mga gamit, magpabulig sa iban nga kabalo sini. Mas nahapusan kita nga himuon ang naandan na naton kag indi kita dayon maka-adjust sa bag-o nga mga paagi. Pero sa bulig ni Jehova kag sang iban, madali ka nga maka-adjust kag mas malipay ka sa pag-Bible study sa mga tawo. Ang isa ka payunir nagsiling nga ini nga paagi sang pagtuon “makalilipay gid para sa Bible study kag sa utod nga nagatudlo sa iya.”

14. Ano ang dapat naton tandaan kon nabudlayan kita nga makakita sang Bible study sa aton teritoryo, kag paano kita mapalig-on sang 1 Corinto 3:6, 7?

¹⁴ Posible nga nabudlayan kita sa pagpangita sang mga Bible study sa aton teritoryo. May pila ka tawo nga indi interesado sa aton mensahe ukon nagapamatok pa gani sa aton. Ano ang makabulig sa aton para indi kita mag-untat sa pagbantala sa ila? Tandai nga posible nga magbag-o ang sitwasyon sang mga tawo sa sining magamo nga kalibutan, kag posible nga marealisar sang mga tawo nga indi anay interesado nga kinahanglan nila ang bulig sang Dios. (Mat. 5:3) May pila nga sang una wala gid nagabaton sang aton mga publikasyon, pero sang ulihi gusto na nila magpa-Bible study. Kabalo man kita nga si Jehova ang Agalon sang alanyon. (Mat. 9:38) Gusto niya nga padayon kita nga magtanom kag magbunyag, pero sia gid ang nagapatubo sini. (1 Cor. 3:6, 7) Makapalig-on man nga dumdumon nga bisan pa wala kita sing Bible study subong, indi ang resulta sang aton pagbantala ang ginalantaw ni Jehova, kundi ang aton pagpanikasog.b

MAKALILIPAY ANG PAGTUDLO SA MGA TAWO PARA MANGIN DISIPULO SILA

15. Ano ang ginabatyag ni Jehova kon gusto magpa-Bible study sang isa ka tawo kag ginaaplikar niya ang iya mga natun-an?

¹⁵ Nalipay si Jehova kon ginabaton sang isa ka tawo ang kamatuoran sa Biblia kag ginasugid niya ini sa iban. (Hulu. 23:15, 16) Nalipay gid si Jehova sa ginahimo sang iya katawhan nga mapisan nga nagabantala kag nagatudlo sa iban. Halimbawa, bisan pa may pandemic sa bilog nga kalibutan sang 2020 nga tuig sang pag-alagad, nakadumala kita sang 7,705,765 ka Bible study. Gani nabuligan ang 241,994 nga magdedikar kay Jehova kag magpabawtismo. Kag ining bag-o nga mga disipulo maga-Bible study man sa iban, gani magadamo pa gid ang mga disipulo. (Luc. 6:40) Sigurado gid nga nalipay si Jehova kon nagatudlo kita sa mga tawo para mangin disipulo sila.

16. Ano ang panikasugan naton nga himuon?

¹⁶ Kinahanglan ang pagpanikasog para tudluan ang iban para mangin disipulo sila. Pero masarangan naton nga tudluan ining mga bag-uhan nga palanggaon ang aton Amay sa langit kay buligan kita ni Jehova. Panikasugan naton nga mangita kag makadumala sang bisan isa lang ka Bible study. Kon panikasugan naton nga pamangkuton ang tanan nga maistorya naton kon bala gusto nila magpa-Bible study, malipay gid kita sa resulta. Sigurado kita nga pakamaayuhon gid ni Jehova ang aton pagpanikasog.

17. Ano ang mabatyagan naton kon may Bible study kita?

¹⁷ Pribilehiyo gid naton nga magbantala kag tudluan ang iban sang kamatuoran. Nagapahalipay gid ini sa aton. Nabatyagan ini ni apostol Pablo. Madamo sia sang nabuligan nga mangin disipulo sa Tesalonica. Nagsiling sia: “Ano ang amon paglaum, kalipay, ukon purongpurong sang paghugyaw sa atubangan sang aton Ginuong Jesus sa tion sang iya presensia? Indi bala nga kamo? Huo, kamo ang amon himaya kag kalipay.” (1 Tes. 2:19, 20; Binu. 17:1-4) Amo man sini ang nabatyagan sang madamo subong. Halimbawa, madamo nga tawo ang nabuligan ni Stéphanie kag sang iya bana para magpabawtismo. Nagsiling sia: “Makalilipay gid nga mabuligan ang mga tawo nga magdedikar kay Jehova. Wala na sing makalabaw sa sini nga kalipay.”