Bisan Diin May Nagaantos Bangod sa Dumot

Sa mga balita kag sa social media masami nga makita naton ang dumot sang mga tawo. Ginapabutyag nila ini paagi sa masakit nga mga tinaga, sa sulat, sa email, ukon paagi sa paghimo sang krimen sa iban nga ila ginadumtan. Madamo man nga tawo ang biktima sang diskriminasyon, pagpasulabi, pagpakalain, pagpang-insulto, pagpamahog, kag pagpangguba sang propiedad. Gani, bisan diin lang may nagaantos bangod sa dumot.

Ginabinagbinag sini nga magasin ang mga puede himuon para matapos ang wala untat nga pagdumtanay. Indi ini damgo lang, kay subong pa lang may mga tawo na nga nagapanikasog nga madula ang ila dumot. Gani, makasigurado kita nga matabo gid ini sa ulihi.