Palig-unon Ka sang Imo Gugma nga Padayon nga Magbantala

1. Ano ang natun-an naton sa 2023 nga annual meeting?

SA 2023 nga annual meeting,a nakabaton kita sang makalilipay nga mga pagbag-o sa pila naton ka pagpati. Nakabati man kita sang pila ka makalilipay nga mga pahibalo parte sa aton pagbantala kag pagtudlo nga hilikuton. Halimbawa, natun-an naton nga posible may tsansa pa ang pila ka tawo nga mag-upod sa katawhan ni Jehova pagkatapos malaglag ang Babilonia nga Daku. Natun-an man naton nga umpisa sa Nobiembre 2023, indi na naton kinahanglan ireport ang tanan nga detalye parte sa aton pagbantala kag pagtudlo nga hilikuton. Ginapahangop bala sini nga mga pagbag-o nga indi na importante, ukon indi na hilingagawon, ang aton pagbantala kag pagtudlo nga hilikuton? Indi amo sina ang gusto ipahangop sini nga mga pagbag-o.

2. Samtang nagaligad ang inadlaw, ngaa mas hilingagawon pa gid ang aton pagbantala kag pagtudlo nga hilikuton? (Marcos 13:10)

² Samtang nagaligad ang inadlaw, mas hilingagawon pa gid ang aton pagbantala kag pagtudlo nga hilikuton. Ngaa? Bangod malip-ot na lang ang nabilin nga tion antes mag-abot ang katapusan. Binagbinaga ang gintagna ni Jesus parte sa pagbantala nga hilikuton sa katapusan nga mga adlaw. (Basaha ang Marcos 13:10.) Suno sa ginsulat ni Mateo nga kaanggid sa ginsulat ni Marcos, nagsiling si Jesus nga ibantala ang maayong balita sa bug-os nga duta antes mag-abot “ang katapusan.” (Mat. 24:14) Ini nga ekspresyon nagapatuhoy sa katapusan sang malain nga kalibutan ni Satanas. Kon parte sa mga hitabo nga malapit na lang gid matabo, may gintalana na nga “adlaw kag oras” si Jehova para sa sini. (Mat. 24:36; 25:13; Binu. 1:7) Gani samtang nagaligad ang inadlaw, mas nagalapit na gid kita sa sina nga tion. (Roma 13:11) Pero samtang wala pa ang katapusan, dapat padayon kita nga magbantala.

3. Ano ang nagapalig-on sa aton nga magbantala?

³ Ari ang isa ka importante nga pamangkot nga dapat naton pamalandungan: Ngaa nagabantala kita sang maayong balita? Bangod sa aton gugma. Kon nagabantala kita, ginapakita naton ang aton gugma para sa maayong balita, ang aton gugma para sa mga tawo, kag labaw sa tanan, ang aton gugma para kay Jehova kag sa iya ngalan. Binagbinagon naton ang kada isa sa sini.

NAGABANTALA KITA BANGOD SA ATON GUGMA PARA SA MAAYONG BALITA

4. Ano ang reaksion naton kon makabati kita sang maayong balita?

⁴ Imadyina ang imo nabatyagan sang nakabati ka sang maayong balita, pareho sang tion nga nagbata ang imo paryente ukon sang tion nga ginhatagan ka sang obra nga kinahanglan mo gid. Sigurado nga grabe gid ang imo kalipay, gani ginsugid mo ini dayon sa imo pamilya kag mga abyan. Amo man bala sini ang imo nabatyagan sang nabatian mo ang pinakamaayo nga balita nga amo ang maayong balita parte sa Ginharian sang Dios?

5. Ano ang imo nabatyagan sang natun-an mo ang kamatuoran sa Pulong sang Dios? (Tan-awa man ang mga piktyur.)

⁵ Dumduma ang imo nabatyagan sang natun-an mo ang kamatuoran sa Pulong sang Dios. Natun-an mo nga palangga ka sang imo Amay sa langit, gusto niya nga mangin bahin ka sang iya pamilya nga nagasimba sa iya, nagpromisa sia nga dulaon niya ang kasakit kag pag-antos, kag may paglaum nga makita mo liwat ang imo mga pinalangga nga napatay kon banhawon sila sa bag-ong kalibutan. Magluwas sa sini, madamo ka pa gid sang natun-an. (Mar. 10:​29, 30; Juan 5:​28, 29; Roma 8:​38, 39; Bug. 21:​3, 4) Nalipay ka gid sang natun-an mo ini nga mga kamatuoran. (Luc. 24:32) Ginhigugma mo gid ang imo mga natun-an ukon nanamian ka gid sa sini, gani gusto mo gid ini isugid sa iban.​—Ipaanggid ang Jeremias 20:9.

6. Ano ang natun-an mo sa eksperiensia ni Ernest kag ni Rose?

⁶ Binagbinaga ini nga eksperiensia. Sang mga dies anyos ang isa ka brother nga si Ernest,b napatay ang iya amay. Nagsiling si Ernest: “Nagpalibog ako: ‘Nagpalangit bala sia? Ukon wala na gid bala sia?’ Nahisa ako sa iban nga mga bata nga may tatay pa.” Nagakadto pirme si Ernest sa patyo para magluhod sa lulubngan sang iya amay. Dayon nagapangamuyo sia: “Palihug, Dios ko, luyag ko mahibaluan kon diin na si Tatay.” Mga 17 ka tuig pagkatapos napatay ang iya amay, ginhambalan si Ernest sang isa ka utod kon gusto niya mag-Bible study kag nagpasugot sia. Nalipay gid sia sang natun-an niya nga wala na sing pangalibutan ang mga patay, nga daw pareho lang nga nagatulog sila sing hamuok, kag nagpromisa ang Biblia nga may ara pagkabanhaw sa palaabuton. (Man. 9:​5, 10; Binu. 24:15) Gani, nakita niya ang mga sabat sa mga pamangkot nga madugay na niya nga ginapaligban. Nanamian gid si Ernest sa mga kamatuoran sa Biblia nga iya natun-an. Nag-upod kay Ernest ang iya asawa nga si Rose sa iya pag-Bible study, kag nanamian man si Rose sa iya mga natun-an. Nabawtismuhan sila sang 1978. Ginsugid nila dayon sa ila pamilya, mga abyan, kag sa iban pa ang hamili nga mga kamatuoran nga ila natun-an. Bangod sini, sobra 70 ka tawo ang nabuligan ni Ernest kag ni Rose nga makilala si Jehova kag nagdesisyon nga magpabawtismo.

7. Ano ang mabatyagan naton kon manggamot sa aton tagipusuon ang aton gugma para sa mga kamatuoran sa Biblia? (Lucas 6:45)

⁷ Kon manggamot sa aton tagipusuon ang aton gugma para sa mga kamatuoran sa Biblia, mabatyagan naton nga dapat gid naton ini isugid sa iban. (Basaha ang Lucas 6:45.) Pareho sa mga disipulo ni Jesus sang unang siglo, makasiling man kita: “Indi kami mag-untat sa paghambal tuhoy sa mga butang nga amon nakita kag nabatian.” (Binu. 4:20) Nanamian gid kita sa kamatuoran, gani gusto naton nga madamo nga tawo ang aton masugiran parte sa sini.

NAGABANTALA KITA BANGOD SA ATON GUGMA PARA SA MGA TAWO

8. Ngaa gusto gid naton isugid sa iban ang parte sa maayong balita? (Tan-awa ang kahon nga “Palanggaa ang mga Tawo—Tudlui Sila.”) (Tan-awa man ang piktyur.)

⁸ Pareho kay Jehova kag sa iya Anak, palangga naton ang mga tawo. (Hulu. 8:31; Juan 3:16) Naluoy gid kita sa mga tawo nga “wala sing Dios” kag “wala . . . sing paglaum.” (Efe. 2:12) Daw malumos na sila sa ila mga problema, pero may salbabida kita nga makabulig sa ila. Kay man, ang maayong balita parte sa Ginharian sang Dios daw pareho sa isa ka salbabida nga makabulig sa ila nga indi malumos sa mga problema. Bangod palangga naton sila kag naluoy kita sa ila, gusto gid naton himuon ang aton bug-os nga masarangan para sugiran sila sang maayong balita. Kon matun-an nila ining hamili nga mensahe, makahatag ini sa ila sang paglaum, makabulig ini sa ila nga mangin malipayon sa ila kabuhi subong, kag makahatag ini sa ila sang kahigayunan nga mabaton ang “matuod nga kabuhi,” ukon ang kabuhi nga wala sing katapusan sa bag-ong kalibutan sang Dios.​—1 Tim. 6:19.

9. Ano ang ginasiling naton nga matabo sa palaabuton bilang paandam sa mga tawo, kag ngaa ginapaandaman naton sila? (Ezequiel 33:​7, 8)

⁹ Bangod palangga naton ang mga tawo, ginasugiran man naton sila nga malapit na lang gid laglagon ining malain nga kalibutan. (Basaha ang Ezequiel 33:​7, 8.) Naluoy kita sa aton isigkatawo kag sa mga miembro sang aton pamilya nga indi Saksi. Madamo nga tawo ang nagakabuhi lang sing normal, kag wala sila kabalo sa malapit na lang gid matabo. Wala sila kabalo nga “magaabot ang dakung kapipit-an nga wala pa gid matabo halin sa ginsuguran sang kalibutan tubtob karon, kag indi na gid ini matabo liwat.” (Mat. 24:21) Gusto naton nga mabal-an nila kon ano ang matabo sa “dakung kapipit-an” nga isa ka tion sang paghukom. Una, laglagon ang butig nga relihion. Dayon, laglagon sa Armageddon ining malain nga kalibutan. (Bug. 16:​14, 16; 17:​16, 17; 19:​11, 19, 20) Nagapangamuyo kita nga kabay pa nga madamo nga tawo ang mamati sa aton paandam kag magdesisyon sila nga mag-upod sa aton sa pagsimba kay Jehova. Pero ano ang matabo sa mga tawo, lakip na ang mga miembro sang aton pamilya, nga wala nagapamati sa aton paandam subong?

10. Ngaa importante gid nga padayon naton nga paandaman ang mga tawo?

¹⁰ Base sa ginpaathag sa nagligad nga artikulo, posible nga kabubut-on ni Jehova nga luwason ang mga tawo nga magatuo sa iya kon makita nila ang paglaglag sa Babilonia nga Daku. Gani, importante gid nga padayon naton nga paandaman ang mga tawo parte sa sini. Binagbinaga ini: Posible may madumduman sila sa ulihi parte sa mga ginasugid naton sa ila subong. (Ipaanggid ang Ezequiel 33:33.) Posible madumduman nila ang paandam nga ginsugid naton sa ila kag mapalig-on sila nga mag-upod sa aton sa pagsimba kay Jehova antes mangin ulihi ang tanan. Pareho sa manugbilanggo sa Filipos nga nagtuo sa Dios pagkatapos sang ‘mabaskog nga linog,’ posible may pila nga wala nagapamati sa aton subong ang magatuo sa Dios pagkatapos malaglag ang Babilonia nga Daku.​—Binu. 16:​25-34.

NAGABANTALA KITA BANGOD SA ATON GUGMA PARA KAY JEHOVA KAG SA IYA NGALAN

11. Paano naton mahatag kay Jehova ang himaya, dungog, kag gahom? (Bugna 4:11) (Tan-awa man ang mga piktyur.)

¹¹ Ang pinakaimportante nga rason kon ngaa ginabantala naton ang maayong balita amo ang aton gugma para kay Jehova nga Dios kag sa iya balaan nga ngalan. Ginakabig naton ang aton pagbantala nga isa ka paagi para madayaw naton ang aton Dios nga palangga gid naton. (Basaha ang Bugna 4:11.) Tinagipusuon kita nga nagaugyon nga takus si Jehova nga Dios nga magbaton sang himaya kag dungog kag gahom. Ginahatagan naton sia sang himaya kag dungog kon ginasugid naton sa iban ang makapakumbinsi nga ebidensia nga “gintuga [niya] ang tanan nga butang” kag utang naton sa iya ang aton kabuhi. Ginahatag naton sa iya ang aton gahom kon ginagamit naton ang aton tion, kusog, kag mga pagkabutang para makabantala kita sa bug-os naton nga masarangan. (Mat. 6:33; Luc. 13:24; Col. 3:23) Sa simple nga hambal, nanamian gid kita nga isugid sa iban ang parte sa aton Dios nga palangga gid naton. Pero, ngaa ginasugid man naton sa iban ang parte sa iya ngalan kag kon ano sia nga klase sang Dios?

12. Paano naton mapakabalaan ang ngalan ni Jehova kon nagabantala kita?

¹² Bangod palangga naton si Jehova, gusto naton pakabalaanon ang iya ngalan. (Mat. 6:9) Gusto naton sugiran ang iban nga indi matuod ang mga kabutigan nga ginsiling ni Satanas parte kay Jehova. (Gen. 3:​1-5; Job 2:4; Juan 8:44) Kon nagabantala kita, gusto gid naton isugid sa mga interesado mamati sa aton kon sin-o si Jehova kag kon ano sia nga klase sang Dios. Halimbawa, gusto gid naton isugid nga ang pinakadalayawon sa iya mga kinaiya amo ang iya gugma, matarong kag patas ang iya paagi sang paggahom, kag malapit na dulaon sang iya Ginharian ang tanan nga pag-antos nga magaresulta sa malinong kag malipayon nga kabuhi para sa mga tawo. (Sal. 37:​10, 11, 29; 1 Juan 4:8) Kon nagabantala kita kag ginasugid naton ini nga mga kamatuoran sa mga tawo, ginapakabalaan naton ang ngalan ni Jehova. Nagahatag man ini sa aton sang kalipay bangod ginahimo naton ang dapat naton himuon bilang mga Saksi ni Jehova. Ngaa masiling naton ini?

13. Ngaa nalipay kita nga tawgon nga mga Saksi ni Jehova? (Isaias 43:​10-12)

¹³ Gintawag kita ni Jehova bilang iya “mga saksi.” (Basaha ang Isaias 43:​10-12.) Pila ka tuig na ang nagligad, amo ini ang ginsiling sang isa ka sulat halin sa Nagadumala nga Hubon: “Ang labing daku nga kadungganan nga mahimo naton matigayon amo ang pagtawag sa aton nga isa sa mga Saksi ni Jehova.”c Ngaa masiling naton ini? Binagbinaga ini nga ilustrasyon. Ibutang ta nga may nag-akusar sa imo sa korte parte sa sala nga wala mo nahimo. Sin-o ang pilion mo nga magsugid sa korte nga isa ikaw ka maayo nga tawo kag indi mo gid mahimo ang ginaakusar sa imo? Sigurado nga pilion mo ang isa ka tawo nga kilala mo gid, masaligan mo, kag may maayo nga reputasyon para mapatihan gid ang iya testimonya. Bangod ginpili kita ni Jehova bilang iya mga Saksi, ginapakita niya nga kilala gid niya kita kag may salig sia sa aton. Kabalo sia nga isugid naton sa iban nga sia lang ang matuod nga Dios. Nalipay gid kita nga mangin iya mga Saksi, gani ginagamit naton ang tanan nga kahigayunan para ipakilala ang iya ngalan kag para pamatud-an sa mga tawo nga indi matuod ang mga kabutigan nga ginasugid parte sa iya. Paagi sa sini, ginahimo naton ang dapat naton himuon bilang mga Saksi ni Jehova kag nalipay kita nga tawgon sa sini nga ngalan.​—Sal. 83:18; Roma 10:​13-15.

PADAYON KITA NGA MAGABANTALA ASTA SA KATAPUSAN

14. Ano ang mga posible matabo sa palaabuton nga excited kita nga makita?

¹⁴ Excited kita nga makita ang mga posible matabo sa palaabuton. Paagi sa bulig ni Jehova, nagalaum kita nga madamo pa nga tawo ang magabaton sang kamatuoran antes mag-umpisa ang dakung kapipit-an. Excited man kita sa posible matabo sa tion sang dakung kapipit-an nga amo ang pinakamabudlay nga tion sa kasaysayan sang tawo. Sa sina nga tion, posible nga madamo pa nga tawo ang magagua sa kalibutan ni Satanas kag magaupod sa aton sa pagdayaw kay Jehova.​—Binu. 13:48.

15-16. Ano ang dapat padayon naton nga himuon, kag asta san-o naton ini himuon?

¹⁵ Samtang wala pa ang katapusan, may importante kita nga hilikuton nga dapat himuon. Isa ini ka hilikuton nga indi na gid maliwat. Amo ini ang pribilehiyo nga ibantala ang maayong balita parte sa Ginharian sang Dios sa bilog nga kalibutan. Kag dapat padayon man naton nga paandaman ang mga tawo. Dapat mabal-an nila nga malapit na lang gid ang katapusan sining malain nga kalibutan. Kag kon mag-abot na ang tion sang paghukom, marealisar nila nga naghalin kay Jehova nga Dios ang mensahe nga aton ginbantala.​—Ezeq. 38:23.

¹⁶ Gani, ano ang dapat naton himuon? Bangod sa aton gugma para sa maayong balita, sa aton gugma para sa mga tawo, kag labaw sa tanan, sa aton gugma kay Jehova nga Dios kag sa iya ngalan, padayon kita nga magabantala sing mapisan. Gusto gid naton magbantala bangod hilingagawon ini nga hilikuton. Padayon naton ini nga himuon asta nga magsiling si Jehova sing, “Tama na.”