Iluga ang Kakugi ni Jesus sa Pagbantala

1. Ano ang kinalain sang katawhan ni Jehova sa iban nga nagapangangkon nga mga Cristiano?

ANO ang kinalain sang katawhan ni Jehova sa iban nga nagapangangkon nga mga Cristiano? Ang ila kakugia sa ministeryo. (Tito 2:14) Pero kon kaisa, mahimo nagabatyag ka nga daw wala ka gana magbantala. Mahimo nabatyagan mo man ang ginabatyag sang isa ka mapisan nga gulang nga nagsiling, “May mga tion nga natamaran ako magbantala.”

2. Ngaa nagakadula kon kaisa ang aton kakugi sa pagbantala?

² Mahimo nga mas nanamian kita sa iban nga hilikuton sa pag-alagad kay Jehova sangsa magbantala. Ngaa? Kay man, kon nagapatindog kita ukon nagamentinar sang mga Kingdom Hall, nagabulig sa mga nahalitan sang kalamidad, ukon nagapalig-on sa aton mga kauturan, makita naton dayon ang resulta kag nalipay kita sa sini. Kon may ginahimo kita upod sa aton mga kauturan, mabatyagan naton ang paghidait kag gugma. Kag kabalo kita nga ginaapresyar gid nila ang aton ginahimo para sa ila. Kon parte naman sa aton ministeryo, mahimo nga diutay lang ang interesado sa aton teritoryo bisan pa tinuig na kita nga nagabantala diri. Mahimo nga gin-akigan pa gani kita sang iban sa aton pagbantala. Kabalo man kita nga malapit na gid ang katapusan, gani mapaabot naton nga magadamo pa gid ang magapamatok sa aton mensahe. (Mat. 10:22) Ano ang makabulig sa aton para indi madula ang aton kakugi ukon para mangin mas makugi pa gid kita sa aton pagbantala?

3. Ano ang matun-an naton parte sa kakugi ni Jesus sa iya ilustrasyon sa Lucas 13:​6-9?

³ May matun-an kita sa halimbawa ni Jesus kon paano mangin makugi sa aton pagbantala. Sang ari si Jesus sa duta, wala gid nadula ang iya kakugi sa iya ministeryo. Ang matuod, nangin mas makugi pa gid sia samtang nagaligad ang tion. (Basaha ang Lucas 13:​6-9.) Sa ilustrasyon ni Jesus, ginkumparar niya ang iya hilikuton sa isa ka manug-atipan sang ulubasan nga nagpangabudlay sing tatlo ka tuig para pabungahon ang isa ka kahoy nga higuera. Pero wala ini namunga. Sing kaanggid, mga tatlo ka tuig nga ginbantalaan ni Jesus ang mga Judiyo, pero wala niya nangin disipulo ang kalabanan sa ila. Pareho sa manug-atipan sang ulubasan nga wala nadulaan sang paglaum nga mamunga gid ang higuera, wala man nag-untat si Jesus sa pagbantala sa mga Judiyo. Gindugangan pa gid gani niya ang iya panikasog para batunon nila ang maayong balita.

4. Ano ang apat ka leksion nga matun-an naton sa halimbawa ni Jesus?

⁴ Binagbinagon naton sa sini nga artikulo kon paano ginpakita ni Jesus ang iya kakugi ilabi na sa katapusan nga anom ka bulan sang iya ministeryo. Kon tun-an naton ang iya mga gintudlo kag ilugon ang iya mga ginhimo, makabulig ini sa aton nga padayon nga mangin makugi. Binagbinagon naton ang apat ka leksion nga matun-an naton sa halimbawa ni Jesus: (1) Gin-una niya ang kabubut-on ni Jehova, (2) makita sa iya mga desisyon nga naintiendihan niya ang mga tagna sa Biblia, (3) nagsalig sia nga buligan sia ni Jehova, kag (4) wala sia nadulaan sang paglaum nga may mamati gid sa iya.

GIN-UNA NIYA ANG KABUBUT-ON NI JEHOVA

5. Paano ginpakita ni Jesus nga gin-una niya ang kabubut-on sang Dios?

⁵ Makugi nga ginbantala ni Jesus “ang maayong balita sang Ginharian” bangod ginsugo ini sa iya sang Dios. (Luc. 4:43) Para kay Jesus, ang pagbantala sang maayong balita amo ang pinakaimportante nga hilikuton sa iya kabuhi. Bisan gani pila na lang ka bulan ang nabilin sa iya ministeryo, nagkadto sia “sa mga siudad kag mga baryo” para tudluan ang mga tawo. (Luc. 13:22) Ginhanas man niya ang iya mga disipulo para magbantala man sila.​—Luc. 10:1.

6. Ano ang kaangtanan sang aton pagbantala sa iban pa naton nga hilikuton? (Tan-awa man ang piktyur.)

⁶ Subong, ang pagbantala sang maayong balita amo man ang pinakaimportante nga hilikuton nga gusto ni Jehova kag ni Jesus nga himuon naton. (Mat. 24:14; 28:​19, 20) May direkta nga kaangtanan ang aton pagbantala sa iban pa naton nga hilikuton sa pag-alagad. Halimbawa, ang pagpatindog sang mga Kingdom Hall ukon ang pag-alagad sa Bethel nagasakdag sang pagbantala nga hilikuton. Kon may kalamidad, ginabuligan naton ang aton mga kauturan para makapadayon sila sa ila pag-alagad, lakip na ang pagbantala. Kon dumdumon naton nga ang pagbantala amo ang pinakaimportante nga hilikuton nga gusto ni Jehova nga himuon naton, mapalig-on kita sini nga magbantala sa bug-os naton nga masarangan. Si János, nga isa ka gulang sa Hungary, nagsiling: “Ginadumdom ko gid pirme nga bisan pa ginahimo ko ang iban pa naton nga hilikuton, indi ko ini puede irason nga indi ko na kinahanglan magbantala. Ang pagbantala amo ang aton pinakaimportante nga asaynment.”

7. Ngaa gusto ni Jehova nga padayon kita nga magbantala? (1 Timoteo 2:​3, 4)

⁷ Madugangan pa gid naton ang aton kakugi sa ministeryo kon ilugon naton ang pagtamod ni Jehova sa mga tawo. Gusto niya nga madamo pa nga tawo ang makabati sang maayong balita kag batunon ini. (Basaha ang 1 Timoteo 2:​3, 4.) Gani, ginahanas niya kita nga mangin epektibo pa gid sa pagbantala kay makaluwas ini sang kabuhi. Halimbawa, ang brosyur nga Palanggaa ang mga Tawo—Tudlui Sila nagatudlo sa aton kon paano sugdan ang pag-istorya sa mga tawo. Gusto naton nga mapalig-on sila nga magtuon sang Biblia para mangin disipulo sila ni Jesus. Bisan pa indi sila mag-alagad kay Jehova subong, posible may kahigayunan sila nga himuon ini antes matapos ang dakung kapipit-an. Mahimo madumduman nila sa ulihi ang ginasugid naton sa ila subong, kag magadesisyon sila nga mag-alagad kay Jehova. Pero matabo lang ini kon padayon kita nga magbantala.

MAKITA SA IYA MGA DESISYON NGA NAINTIENDIHAN NIYA ANG MGA TAGNA SA BIBLIA

8. Ano nga mga tagna sa Biblia ang nakabulig kay Jesus nga gamiton sing maayo ang iya tion?

⁸ Naintiendihan ni Jesus kon paano matuman ang mga tagna sa Biblia. Kabalo sia nga tatlo ka tuig kag tunga lang ang iya ministeryo. (Dan. 9:​26, 27) Kabalo man sia sang mga tagna parte sa kon san-o kag paano sia mapatay. (Luc. 18:​31-34) Bangod naintiendihan ni Jesus ini nga mga tagna, gingamit niya sing maayo ang iya tion. Gani nangin makugi sia sa pagbantala para matapos niya ang hilikuton nga ginhatag sa iya.

9. Ngaa mapalig-on kita nga mangin makugi sa pagbantala kon naintiendihan naton ang mga tagna sa Biblia?

⁹ Kon naintiendihan naton ang mga tagna sa Biblia, magapalig-on ini sa aton nga mangin makugi sa pagbantala. Kabalo kita nga malapit na lang gid matapos ini nga sistema. Gintagna sa Biblia kon ano ang matabo kag ang mangin pamatasan sang mga tawo sa katapusan nga mga adlaw, kag makita naton nga nagakatuman na ini subong. Nagtagna man ang Biblia nga magakontrahanay ang hari sang bagatnan kag ang hari sang aminhan “sa tion sang katapusan.” Naintiendihan naton nga ang hari sang bagatnan amo ang Britain kag ang United States, kag ang hari sang aminhan amo ang Russia kag ang mga kaalyado sini. (Dan. 11:40) Naintiendihan man naton nga ang mga tiil sang estatwa nga ginlaragway sa Daniel 2:​43-45 amo ang Britain kag ang United States. Base sa mga tagna, kumbinsido kita nga malapit na lang gid laglagon sang Ginharian sang Dios ang mga gobierno sang tawo. Ginapakita sini nga mga tagna nga malapit na lang gid ang katapusan, gani dapat naton gamiton sing maayo ang aton tion sa pagbantala sang maayong balita.

10. Paano pa gid kita mapalig-on sang mga tagna sa Biblia nga mangin makugi sa pagbantala?

¹⁰ May mga tagna man sa Biblia nga gusto gid naton isugid sa iban. Si Carrie, nga isa ka sister sa Dominican Republic, nagsiling, “Gusto ko gid isugid sa iban ang manami nga palaabuton nga ginpromisa ni Jehova.” Nagsiling pa sia, “Kon makita ko ang mga problema sang mga tawo subong, nagapahanumdom ini sa akon nga dapat man nila mabal-an ini nga mga promisa.” Ginapalig-on kita sang mga tagna sa Biblia nga indi mag-untat sa pagbantala bangod kabalo kita nga ginabuligan kita ni Jehova. Si Leila, nga taga-Hungary, nagsiling: “Ang Isaias 11:​6-9 nagapalig-on sa akon nga isugid ang maayong balita bisan sa mga tawo nga pamatyag ko daw indi interesado sa sini. Kabalo ako nga sa bulig ni Jehova, puede magbag-o ang bisan sin-o.” Si Christopher, nga taga-Zambia, nagsiling: “Nagakatuman na subong ang gintagna sa Marcos 13:10 parte sa pagbantala sang maayong balita sa bilog nga kalibutan, kag nalipay gid ako nga mangin bahin sang katumanan sini.” Ano nga mga tagna sa Biblia ang nagapalig-on sa imo nga padayon nga magbantala?

NAGSALIG SIA NGA BULIGAN SIA NI JEHOVA

11. Ngaa dapat magsalig si Jesus nga buligan sia ni Jehova para padayon sia nga makabantala sing makugi? (Lucas 12:​49, 53)

¹¹ Nagsalig si Jesus nga buligan sia ni Jehova para makapadayon sia sa pagbantala sing makugi. Bisan pa matinahuron si Jesus sa iya pagbantala sa mga tawo, kabalo sia nga may maakig ukon mamatok sa maayong balita sang Ginharian. (Basaha ang Lucas 12:​49, 53.) Wala nanamian ang mga lider sang relihion sa ginbantala ni Jesus, gani pila ka beses nga gusto nila sia patyon. (Juan 8:59; 10:​31, 39) Pero padayon nga nagbantala si Jesus bangod kabalo sia nga kaupod niya si Jehova. Nagsiling sia: “Wala ako nagaisahanon, kundi kaupod ko ang Amay nga nagpadala sa akon. . . . Wala niya ako ginapabay-an, bangod pirme ko ginahimo ang kalahamut-an sa iya.”​—Juan 8:​16, 29.

12. Paano ginbuligan ni Jesus ang iya mga disipulo para padayon sila nga magbantala bisan pa pamatukan sila?

¹² Ginpahanumdom ni Jesus ang iya mga disipulo nga makasalig sila nga buligan sila ni Jehova. Madamo nga beses niya sila nga ginpasalig nga buligan sila ni Jehova bisan pa pamatukan sila. (Mat. 10:​18-20; Luc. 12:​11, 12) Bangod kabalo si Jesus nga madamo ang magapamatok sa maayong balita, ginsilingan niya sila nga mangin mainandamon. (Mat. 10:16; Luc. 10:3) Ginsilingan man niya sila nga indi nila dapat pagpiliton ang mga tawo nga indi gusto mamati sa ila. (Luc. 10:​10, 11) Kag ginsilingan man niya sila nga dapat sila magpalagyo kon hingabuton sila. (Mat. 10:23) Makugi si Jesus kag nagsalig sia kay Jehova, pero ginlikawan niya ang delikado nga mga sitwasyon.​—Juan 11:​53, 54.

13. Ngaa makasalig ka nga buligan ka ni Jehova?

¹³ Madamo ang nagapamatok sa aton subong, gani kinahanglan naton ang bulig ni Jehova para padayon kita nga makabantala sing makugi. (Bug. 12:17) Ngaa makasalig ka nga buligan ka ni Jehova? Binagbinaga ang pangamuyo ni Jesus nga mabasa sa Juan kapitulo 17. Ginpangabay niya si Jehova nga bantayan ang iya mga apostoles, kag ginsabat ni Jehova ang iya pangabay. Ginasugid sang libro sang Binuhatan kon paano ginbuligan ni Jehova ang mga apostoles para padayon sila nga makabantala sing makugi bisan pa ginhingabot sila. Sa pangamuyo ni Jesus, ginpangabay man niya si Jehova nga bantayan ang mga magatuo sa mensahe nga ginbantala sang mga apostoles kag mangin disipulo niya sa ulihi. Subong, nalakip ka sa sini nga mga disipulo. Padayon nga ginasabat ni Jehova asta subong ang pangamuyo ni Jesus. Gani buligan ka ni Jehova pareho sang pagbulig niya sa mga apostoles.​—Juan 17:​11, 15, 20.

14. Ngaa makasigurado kita nga makapadayon kita sa pagbantala sing makugi? (Tan-awa man ang piktyur.)

¹⁴ Samtang nagalapit na gid ang katapusan, mahimo mabudlayan pa gid kita sa pagbantala sing makugi. Pero ginapasalig kita ni Jesus nga may mabaton kita nga bulig. (Luc. 21:​12-15) Pareho kay Jesus kag sa iya mga disipulo, wala naton ginapilit ang mga tawo nga mamati sa aton kag wala kita nagapakigbais. Bisan sa mga pungsod nga ginadumilian ang aton hilikuton, padayon nga nagabantala ang aton mga kauturan bangod nagasalig sila kay Jehova, indi sa ila kaugalingon. Ginhatagan ni Jehova sang balaan nga espiritu ang iya mga alagad sang unang siglo. Gani hatagan man niya kita sang balaan nga espiritu para “matuman sing bug-os ang pagbantala” asta magsiling sia nga tapos na ini nga hilikuton. (2 Tim. 4:17) Makasigurado ka nga kon magsalig ka kay Jehova, padayon ka nga makabantala sing makugi.

WALA SIA NADULAAN SANG PAGLAUM

15. Paano ginpakita ni Jesus nga wala sia nadulaan sang paglaum sa iya ministeryo?

¹⁵ Wala nadulaan sang paglaum si Jesus nga may mga tawo gid nga magapamati sang maayong balita. Nakabulig ini sa iya nga padayon nga mangin malipayon sa iya pagbantala. Halimbawa, pagligad sang isa ka tuig pagkatapos ginsugdan ni Jesus ang iya pagbantala, nakita niya nga madamo nga tawo ang gusto mamati sang maayong balita, kag ginpaanggid niya sila sa kaumhan nga alanihon na. (Juan 4:35) Pagligad sang mga isa ka tuig, ginsilingan niya ang iya mga disipulo: “Madamo ang alanyon.” (Mat. 9:​37, 38) Kag sang ulihi, nagsiling pa gid sia: “Madamo ang alanyon . . . Gani, pakiluoy kamo sa Agalon sang alanyon nga magpadala sia sang mga mangangani sa iya alanyon.” (Luc. 10:2) Kumbinsido gid si Jesus nga may mga tawo nga magapamati sa maayong balita, kag nalipay gid sia kon may nagabaton sang iya mensahe.​—Luc. 10:21.

16. Paano ginpakita ni Jesus sa iya mga ilustrasyon nga may maayo gid nga resulta ang aton ministeryo? (Lucas 13:​18-21) (Tan-awa man ang piktyur.)

¹⁶ Ginbuligan ni Jesus ang iya mga disipulo nga padayon nga mangin makugi paagi sa pagpahanumdom sa ila nga may maayo gid nga resulta ang mensahe nga ila ginabantala. Halimbawa, binagbinaga ang duha niya ka ilustrasyon. (Basaha ang Lucas 13:​18-21.) Nagsiling si Jesus nga pareho sa binhi sang mustasa, dalayawon man ang pagtubo sang mensahe sang Ginharian kag indi ini mapunggan. Kag nagsiling sia nga pareho sa lebadura, magalapnag man ang mensahe sang Ginharian kag daw indi matalupangdan nga nagapabag-o na gali ini sa mga tawo. Gani, ginpasalig ni Jesus ang iya mga disipulo nga madamo nga tawo ang mabuligan sang mensahe nga ila ginabantala.

17. Ngaa dapat padayon gid kita nga magbantala?

¹⁷ Kon binagbinagon naton ang maayo nga resulta sang aton pagbantala sa bilog nga kalibutan subong, mapalig-on kita sini nga padayon nga mangin makugi. Kada tuig, minilyon ka interesado ang nagatambong sa Memoryal kag nagapa-Bible study. Ginatos ka libo ang nagapabawtismo kag nagaupod sa aton sa pagbantala. Wala kita kabalo kon daw ano pa kadamo ang magabaton sang aton mensahe, pero kabalo kita nga ginatipon ni Jehova ang daku nga kadam-an nga makalampuwas sa dakung kapipit-an. (Bug. 7:​9, 14) Si Jehova ang Agalon sang alanyon, kag kabalo sia nga madamo pa nga tawo ang magabaton sang maayong balita. Gani, dapat padayon gid kita nga magbantala.

18. Ano ang gusto naton nga marealisar sang mga tawo sa aton pagbantala?

¹⁸ Halin pa sang una, makugi gid nga nagabantala ang mga disipulo ni Jesus. Sang makita sang mga tawo ang kaisog sang mga apostoles, “narealisar nila nga kaupod sila anay ni Jesus.” (Binu. 4:13) Kabay pa nga kon makita kita sang mga tawo sa aton pagbantala, marealisar man nila nga ginailog naton ang kakugi ni Jesus.