Ngaa Dapat Kita Mangayo sing Laygay?

1. Paano kita makahimo sang maayo nga mga desisyon kag mga plano nga magamadinalag-on? (Hulubaton 13:10; 15:22)

GUSTO naton tanan nga makahimo sang maayo nga mga desisyon. Kag gusto man naton nga magmadinalag-on ang aton mga plano. Suno sa Pulong sang Dios, dapat kita magpangayo sing laygay para mahimo naton ini.​—Basaha ang Hulubaton 13:10; 15:22.

2. Ano ang ginpromisa ni Jehova nga himuon niya para sa aton?

² Ang aton Amay nga si Jehova ang makahatag sa aton sang pinakamaayo nga laygay. Gani, dapat kita magpangamuyo sa iya kag magpangayo sa iya sing kaalam. Nagpromisa sia nga buligan niya kita kay nagsiling sia: “Laygayan ko ikaw samtang nagatulok ako sa imo.” (Sal. 32:8) Ginapahangop sini nga magluwas nga hatagan kita ni Jehova sing laygay nga kinahanglan gid naton, buligan man niya kita nga iaplikar ini.

3. Ano ang binagbinagon naton sa sini nga artikulo?

³ Sa sini nga artikulo, gamiton naton ang Pulong sang Dios para sabton ang apat ka pamangkot: (1) Ano nga mga kinaiya ang dapat ko ipakita para makabenepisyo ako sa maayo nga laygay? (2) Sin-o ang makahatag sa akon sing maayo nga laygay? (3) Ano ang himuon ko para mangin bukas ang akon hunahuna kag tagipusuon sa laygay? (4) Ngaa indi ko dapat pagpadesisyunon ang iban para sa akon?

ANO NGA MGA KINAIYA ANG DAPAT KO IPAKITA?

4. Para makabenepisyo kita sa maayo nga laygay, ano nga mga kinaiya ang dapat naton ipakita?

⁴ Para makabenepisyo kita sa maayo nga laygay, dapat mangin mapainubuson kita kag maugdang. Dapat naton batunon nga may mga sitwasyon nga kulang ang aton eksperiensia kag ihibalo para makahimo sang maayo nga desisyon. Kon indi kita mapainubuson kag maugdang, indi kita mabuligan ni Jehova. Kay man, posible balewalaon naton ang laygay nga makita naton sa iya Pulong. (Miq. 6:8; 1 Ped. 5:5) Pero kon mapainubuson kita kag maugdang, mas mahapos sa aton nga batunon ang laygay nga nabase sa Biblia kag ginaaplikar naton ini dayon.

5. Ano ang mga nahimo ni Hari David nga puede kuntani mangin rason para magpabugal sia?

⁵ Binagbinaga kon ano ang matun-an naton sa halimbawa ni Hari David. Madamo sia sing nahimo nga puede kuntani mangin rason para magpabugal sia. Antes pa sia nangin hari, isa na sia ka bantog nga musikero. Ginpatokar pa gani sia sa atubangan sang hari. (1 Sam. 16:​18, 19) Pagkatapos ginhaplasan si David bilang masunod nga hari, ginhatagan sia ni Jehova sang Iya balaan nga espiritu. (1 Sam. 16:​11-13) Gindayaw sia sang mga tawo sa pagpatay niya sa ila mga kaaway, lakip na ang higante nga Filistinhon nga si Goliat. (1 Sam. 17:​37, 50; 18:7) Kon bugalon si David, posible magpensar sia nga bangod nahimo niya ini tanan, indi na niya kinahanglan ang laygay sang iban. Pero mapainubuson si David.

6. Ngaa masiling naton nga handa si David magpamati sa laygay? (Tan-awa man ang piktyur.)

⁶ Sang nangin hari si David, ginpili niya nga abyan ang mga tawo nga makahatag sa iya sing laygay. (1 Cron. 27:​32-34) Wala na kita natingala sa sini kay bisan antes pa sia nangin hari, handa sia pirme magpamati sa laygay. Ginpamatian niya ang laygay sang mga lalaki, kag bisan ang laygay sang isa ka babayi nga si Abigail. Ang bana ni Abigail nga si Nabal isa ka bugalon nga tawo, wala nagapasalamat, kag ginapakanubo niya ang iban. Pero mapainubuson gid si David kay ginpamatian niya ang maayo nga laygay ni Abigail. Bangod sini, nalikawan niya nga makahimo sing serioso nga sala.​—1 Sam. 25:​2, 3, 21-25, 32-34.

7. Ano ang matun-an naton sa halimbawa ni David? (Manugwali 4:13) (Tan-awa man ang mga piktyur.)

⁷ May matun-an kita kay David. Halimbawa, kon mas madamo kita sing talento ukon eksperiensia, indi naton dapat paghunahunaon nga kabalo na kita sang tanan kag indi na naton kinahanglan ang laygay. Kag pareho kay David, dapat handa kita nga pamatian ang maayo nga laygay bisan sin-o pa ang naghatag sini. (Basaha ang Manugwali 4:13.) Kon himuon naton ini, posible gid nga malikawan naton nga makahimo sang daku nga mga sala. Gani, malikawan man naton ang mga problema kag indi naton masakitan ang iban.

SIN-O ANG MAKAHATAG SA AKON SING MAAYO NGA LAYGAY?

8. Ngaa nakahatag si Jonatan sing maayo nga laygay kay David?

⁸ Binagbinaga ang isa pa ka leksion nga matun-an naton sa halimbawa ni David. Ginpamatian niya ang laygay sang mga tawo nga may maayo nga kaangtanan kay Jehova kag nakaintiende sing maayo sa iya sitwasyon. Halimbawa, sang gusto mabal-an ni David kon bala may posibilidad nga mangin maayo liwat ang iya kaangtanan kay Hari Saul, ginpamatian niya ang laygay ni Jonatan nga anak ni Saul. Ngaa nakahatag si Jonatan sing maayo nga laygay sa iya? Bangod magluwas nga maayo ang kaangtanan ni Jonatan kay Jehova, kilala man niya sing maayo si Saul. (1 Sam. 20:​9-13) Ano ang matun-an naton sa sini?

9. Kay sin-o kita dapat mangayo sing laygay? Maghatag sing halimbawa. (Hulubaton 13:20)

⁹ Maayo gid kon mangayo kita sing laygay sa isa ka utod nga may maayo nga kaangtanan kay Jehova kag nakaeksperiensia sang aton sitwasyon.a (Basaha ang Hulubaton 13:20.) Halimbawa, ibutang ta nga gusto magpangasawa sang isa ka brother. Sin-o ang makahatag sa iya sing maayo nga laygay? Kon mangayo sia sing laygay sa iya single nga abyan, mahimo nga makahatag man ini sing maayo nga laygay kon nabase ini sa Biblia. Pero kon mangayo sia sing laygay sa isa ka mag-asawa nga madugay na nga nagaalagad kay Jehova, mas espesipiko kag praktikal ang mahatag nila nga laygay. Makahatag sila sing laygay nga nabase sa Biblia, kag masugid man nila ang ila mga eksperiensia sa ila malipayon nga pag-asawahay.

10. Ano naman ang binagbinagon naton?

¹⁰ Nabinagbinag na naton ang duha ka kinaiya nga dapat naton ipakita kag kon sin-o ang makahatag sa aton sing maayo nga laygay. Binagbinagon naman naton kon ngaa dapat mangin bukas ang aton hunahuna kag tagipusuon sa laygay. Dayon binagbinagon naton kon ngaa indi naton dapat pagpadesisyunon ang iban para sa aton.

ANO ANG HIMUON KO PARA MANGIN BUKAS ANG AKON HUNAHUNA KAG TAGIPUSUON SA LAYGAY?

11-12. (a) Ano ang posible nga ginahimo naton kon kaisa? (b) Ano ang ginhimo ni Hari Rehoboam sang kinahanglan niya maghimo sang importante nga desisyon?

¹¹ Kon kaisa, daw nagapangayo ang isa ka tawo sang laygay. Pero ang matuod, may nahimo na sia nga desisyon kag gusto lang niya mabal-an kon bala nagaugyon man sa sini ang iban. Ginapakita sini nga indi bukas ang iya hunahuna kag tagipusuon sa laygay. May matun-an gid ini nga tawo sa natabo kay Hari Rehoboam.

¹² Si Rehoboam ang nagbulos kay Hari Solomon bilang hari sang Israel. Sang nangin hari sia, isa na ka manggaranon nga pungsod ang Israel, pero nagbatyag ang mga Israelinhon nga ginpabug-atan sila ni Solomon. Gani nagkadto sila kay Rehoboam kag ginpangabay nila sia nga pamag-anon ang ila mabug-at nga obra. Ginsilingan sila ni Rehoboam nga hatagan sia sing tion nga pamensaran ang ila pangabay. Maayo ang iya ginhimo sa umpisa kay nangayo sia sing laygay sa mga tigulang nga lalaki nga nagbulig kay Solomon. (1 Hari 12:​2-7) Pero, wala niya ginsunod ang ila laygay. Ngaa? Posible ayhan nga nakadesisyon na si Rehoboam kon ano ang iya himuon kag nagapangita lang sia sang maugyon sa iya? Kon nakadesisyon na gid man sia, posible nga nanamian sia sa ginlaygay sang iya pamatan-on nga mga abyan kay pareho ini sa gusto niya nga himuon. (1 Hari 12:​8-14) Gani ang laygay sini nga mga pamatan-on ang ginsiling niya sa iya mga sakop. Bangod sini, nagrebelde ang madamo nga Israelinhon kag nagpili sila sang lain nga hari. Sugod sadto, pirme lang may problema ang paggahom ni Rehoboam.​—1 Hari 12:​16-19.

13. Paano naton mabal-an kon bala bukas ang aton hunahuna kag tagipusuon sa laygay?

¹³ Ano ang matun-an naton sa halimbawa ni Rehoboam? Kon nagapangayo kita sing laygay, dapat bukas ang aton hunahuna kag tagipusuon. Paano naton ini mabal-an? Pamangkuton naton ang aton kaugalingon, ‘Kon nagapangayo ako sing laygay, ginabalewala ko bala ini dayon kon indi ini pareho sa gusto ko nga himuon?’ Binagbinagon naton ang isa ka halimbawa.

14. Kon makabaton kita sing laygay, ano ang dapat naton dumdumon? Maghatag sing halimbawa. (Tan-awa man ang piktyur.)

¹⁴ Ibutang ta nga gintanyagan ang isa ka brother sang obra nga daku ang sueldo. Gani, nangayo sia sing laygay sa isa ka gulang. Nagsiling ang brother nga kon batunon niya ini nga obra, mapalayo sia sa iya pamilya sa malawig nga tion. Ginpahanumdom sa iya sang gulang ang isa ka prinsipio sa Biblia. Ginapakita sini nga ang panguna niya nga responsibilidad amo ang pag-aman sa iya pamilya sang ila espirituwal nga kinahanglanon. (Efe. 6:4; 1 Tim. 5:8) Indi ugyon ang brother sa ginlaygay sang gulang, gani nangayo sia sing laygay sa iban asta nga may maglaygay sa iya nga batunon niya ang obra. Nagapangayo gid man bala ang brother sing laygay, ukon nakadesisyon na sia kag nagapangita lang sia sang maugyon sa iya? Dapat naton dumdumon nga ang aton tagipusuon madaya. (Jer. 17:9) Kon kaisa, ang laygay nga kinahanglan gid naton amo ang laygay nga indi naton gusto.

NGAA INDI KO DAPAT PAGPADESISYUNON ANG IBAN PARA SA AKON?

15. Ano ang indi naton dapat paghimuon, kag ngaa?

¹⁵ Kon parte sa paghimo sang desisyon, responsibilidad ini sang kada isa sa aton. (Gal. 6:​4, 5) Nabinagbinag naton nga antes kita maghimo sang desisyon, importante gid nga mangita anay kita sing laygay sa Pulong sang Dios kag mangayo sing laygay sa hamtong nga mga Cristiano. Pero, indi naton dapat pagpadesisyunon ang iban para sa aton. May pila nga direkta nga nagapamangkot sa iban, “Ano ang himuon mo kon ikaw ang ara sa akon sitwasyon?” May pila naman nga wala na nagapamensar kag ginailog lang nila ang desisyon sang iban.

16. Ano ang sitwasyon sa Corinto parte sa karne nga ginhalad sa mga diosdios, kag sin-o ang dapat magdesisyon kon bala makaon sia sang sini nga karne ukon indi? (1 Corinto 8:7; 10:​25, 26)

¹⁶ Binagbinaga ang sitwasyon sa kongregasyon sa Corinto sang unang siglo parte sa karne nga posible ginhalad sa mga diosdios. Ginsilingan sila ni Pablo: “Nakahibalo kita nga ang diosdios wala sing pulos, kag may isa lang ka Dios.” (1 Cor. 8:4) Bangod sini, nagdesisyon ang pila ka utod nga puede nila kaunon ang karne nga ginabaligya sa balaligyaan bisan pa posible nga ginhalad ini sa diosdios. Ang iban naman nagdesisyon nga indi magkaon sini nga karne bangod konsiensiahon sila. (Basaha ang 1 Corinto 8:7; 10:​25, 26.) Ang kada isa ang dapat magdesisyon sa sini nga sitwasyon. Wala ginsilingan ni Pablo ang mga taga-Corinto nga dapat sila magdesisyon para sa iban ukon ilugon lang nila ang desisyon sang iban. Kay man, “ang kada isa sa [ila] manabat sa Dios.”​—Roma 14:​10-12.

17. Ano ang posible nga matabo kon ilugon lang naton ang desisyon sang iban? Maghatag sing halimbawa. (Tan-awa man ang mga piktyur.)

¹⁷ Ano nga mga sitwasyon subong ang daw pareho sa sitwasyon sadto sa Corinto? Binagbinaga ang parte sa mga blood fraction ukon magagmay nga bahin sang dugo. Kon parte sa paagi sang pagbulong nga nagagamit sini nga bahin sang dugo, ang kada isa amo ang magadesisyon kon bala batunon niya ini ukon indi.b Mahimo nga nabudlayan kita nga maintiendihan sing maayo ang mga instruksion parte sa sini, pero isa ini sa mga butang nga dapat desisyunan sang kada isa sa aton. (Roma 14:4) Kon ilugon lang naton ang desisyon sang iban, posible nga magluya ang aton konsiensia. Pero kon gamiton naton ang aton konsiensia, mahanas naton ini kag mangin maalamon kita. (Heb. 5:14) Ti, san-o kita mangayo sing laygay sa isa ka hamtong nga utod? Kon nakatapos na kita research pero indi gihapon naton maintiendihan sing maayo kon paano naton iaplikar sa aton sitwasyon ang mga prinsipio sa Biblia.

PADAYON NGA MANGAYO SING LAYGAY

18. Ano ang ginhimo ni Jehova para sa aton?

¹⁸ Ginpakita ni Jehova nga daku ang pagsalig niya sa aton bangod ginatugutan niya kita nga maghimo sang desisyon. Gin-amanan niya kita sang iya Pulong, ang Biblia. Kag ginhatagan niya kita sang hamtong nga mga abyan nga makabulig sa aton nga maintiendihan ang mga prinsipio sa Biblia. Gintuman gid ni Jehova ang iya responsibilidad bilang aton Amay. (Hulu. 3:​21-23) Paano naton mapakita nga ginapasalamatan naton sia?

19. Ano ang himuon naton para padayon nga malipay si Jehova sa aton?

¹⁹ Binagbinaga ini: Nalipay gid ang mga ginikanan kon ang ila kabataan mangin hamtong nga alagad ni Jehova, kag kon nagaulikid sila kag nagabulig sa iban. Sing kaanggid, nalipay man si Jehova kon padayon kita nga nagahamtong sa espirituwal, nagapangayo sing laygay, kag nagahimo sang mga desisyon nga nagapadungog sa iya.