Paano Kita Makahatag sing Maayo nga Laygay?

1. Sin-o ang dapat maghatag sing laygay? Ipaathag.

KON parte sa paghatag sing laygay, nahapusan ka bala ukon nabudlayan? May pila nga nahapusan maghatag sing laygay, kag may pila naman nga nakulbaan ukon nasaw-ahan. Ano man ang aton ginabatyag parte sa sini, obligado kita tanan nga maghatag sing laygay. Ngaa? Bangod nagsiling si Jesus nga makilala ang iya matuod nga mga sumulunod paagi sa ila gugma sa isa kag isa. (Juan 13:35) Kag ang isa ka paagi para mapakita naton ini nga gugma amo ang paghatag sing laygay sa aton mga kauturan nga nagakinahanglan sini. Ang Pulong sang Dios nagasiling nga ‘ang suod nga pag-abyanay resulta sang sinsero nga laygay.’—Hulu. 27:9.

2. Ano ang dapat himuon sang mga gulang, kag ngaa? (Tan-awa ang kahon nga “Laygay sa Tion sang Midweek Miting.”)

² Dapat kabalo maghatag sing maayo nga laygay ang mga gulang. Paagi kay Jesus, gintangdo sila ni Jehova nga bantayan ang kongregasyon. (1 Ped. 5:​2, 3) Ang isa ka paagi nga ginahimo nila ini amo ang paghatag sing laygay nga nabase sa Biblia sa ila mga pamulongpulong. Ginalaygayan man nila ang kada isa sa aton kon kinahanglan naton ini, pati na ang mga nag-untat sa pag-alagad kay Jehova. Ano ang dapat himuon sang mga gulang kag naton tanan para makahatag kita sing maayo nga laygay?

3. (a) Ano ang dapat naton himuon para makahatag kita sing maayo nga laygay? (Isaias 9:6; tan-awa man ang kahon nga “Iluga si Jesus Kon Nagahatag sing Laygay.”) (b) Ano ang binagbinagon naton sa sini nga artikulo?

³ Para makahatag kita sing maayo nga laygay, tun-an naton ang halimbawa sang pila ka karakter sa Biblia, ilabi na ang halimbawa ni Jesus. Gintawag sia sa Biblia nga “Maalam nga Manuglaygay.” (Basaha ang Isaias 9:6.) Sa sini nga artikulo, binagbinagon naton kon ano ang himuon naton kon ginpangayuan kita sing laygay. Dayon binagbinagon naton kon ano ang himuon naton kon kinahanglan naton maglaygay bisan pa wala kita ginpangayuan sing laygay. Binagbinagon man naton kon ngaa importante nga maghatag kita sing laygay sa husto nga tion kag sa husto nga paagi.

KON GINPANGAYUAN KITA SING LAYGAY

4-5. Kon ginpangayuan kita sing laygay sang aton abyan, ano ang dapat naton anay ipamangkot sa aton kaugalingon? Maghatag sing halimbawa.

⁴ Kon ginpangayuan kita sing laygay sang aton abyan, ano dapat ang una naton nga himuon? Posible nalipay kita kay may salig sia sa aton, kag gusto naton dayon sia buligan. Pero dapat naton anay pamangkuton ang aton kaugalingon, ‘Ako gid man bala ang makahatag sing pinakamaayo nga laygay sa iya sitwasyon?’ Kon kaisa, ang pinakamaayo nga mahimo naton indi amo ang laygayan sia, kundi ang buligan sia nga makapangayo sing laygay sa tawo nga mas nakabalo sang iya sitwasyon.

⁵ Binagbinaga ini nga halimbawa. Ibutang ta nga may malala nga balatian ang imo abyan. Ginsilingan ka niya nga nag-research sia parte sa mga paagi sang pagbulong nga ginapilian niya. Ibutang ta nga indi ka doktor, pero ginpamangkot ka niya kon ano sa banta mo ang pinakamaayo nga paagi sang pagbulong para sa iya. Bisan pa may gusto ka irekomendar sa iya nga paagi sang pagbulong, dapat mo dumdumon nga indi ka doktor kag wala ka sing eksperiensia kon paano bulngon ang iya balatian. Gani, ang pinakamaayo nga mahimo mo para sa imo abyan amo ang buligan sia nga makakita sang doktor nga makabulig gid sa iya.

6. Ngaa mas maayo kon indi kita magpadalidali sa paghatag sing laygay?

⁶ Bisan pa pamatyag naton makahatag kita sing maayo nga laygay sa aton abyan, mas maayo kon indi kita magpadalidali sa paghatag sing laygay. Ngaa? Ang Hulubaton 15:28 nagasiling nga ang “matarong nagahunahuna anay antes magsabat.” Ano abi kon sa banta naton kabalo kita sang pinakamaayo nga laygay para sa aton abyan? Mas maayo gihapon kon mag-research kita anay, magpangamuyo, kag magpamalandong. Kon himuon naton ini, mas mangin kumbinsido kita nga ang aton laygay amo ang gusto ni Jehova nga ihambal naton. Binagbinaga ang halimbawa ni manalagna Natan.

7. Ano ang natun-an mo sa halimbawa ni manalagna Natan?

⁷ Sang ginsilingan ni Hari David si manalagna Natan nga gusto niya magpatindog sang templo para kay Jehova, nagsabat dayon si Natan nga dapat niya ini himuon. Pero mas maayo kuntani kon namangkot anay si Natan kay Jehova. Ngaa? Bangod indi gusto ni Jehova nga si David ang magpatindog sang templo. (1 Cron. 17:​1-4) Ginapakita sini nga halimbawa nga kon ginpangayuan kita sing laygay, mas maayo gid kon ‘mahinay kita sa paghambal’ ukon indi kita magpadalidali sa paghatag sing laygay.​—Sant. 1:19.

8. Ano ang isa pa ka rason kon ngaa dapat kita maghalong kon nagahatag kita sing laygay?

⁸ Binagbinaga ang isa pa ka rason kon ngaa dapat kita maghalong kon nagahatag kita sing laygay: May salabton kita kon indi maayo ang resulta sang aton ginlaygay. Gani, importante gid nga pamensaran anay naton sing maayo ang aton ilaygay.

KON WALA KITA GINPANGAYUAN SING LAYGAY

9. Antes maglaygay ang mga gulang, ano ang dapat nila siguraduhon? (Galacia 6:1)

⁹ May mga tion nga dapat laygayan sang mga gulang ang isa ka utod nga nakahimo sang “sayop nga tikang.” (Basaha ang Galacia 6:1.) Posible indi maayo ang ginhimo niya nga mga desisyon nga mahimo magresulta sa serioso nga sala. Gusto sang mga gulang nga buligan sia nga magpabilin sa dalan nga nagapakadto sa kabuhi nga wala sing katapusan. (Sant. 5:​19, 20) Pero para makabulig gid ang ila laygay, dapat anay nila siguraduhon kon bala nakahimo gid man ang utod sang sayop nga tikang. Kay man, kabalo sila nga ginatugutan kita ni Jehova nga magdesisyon base sa aton konsiensia. Gani bisan pa lain ang desisyon sang utod sa isa ka sitwasyon, indi buot silingon nga sala na ini. (Roma 14:​1-4) Pero, ibutang ta nga sigurado ang mga gulang nga nakahimo gid man ang utod sang sayop nga tikang. Paano nila sia laygayan?

10-12. Ano ang dapat himuon sang mga gulang kon dapat nila laygayan ang isa ka utod nga wala nangayo sing laygay? Maghatag sing ilustrasyon. (Tan-awa man ang mga piktyur.)

¹⁰ Indi mahapos para sa mga gulang nga maghatag sing laygay sa isa ka utod nga wala nangayo sini. Ngaa? Nagsiling si apostol Pablo nga posible makahimo sang sayop nga tikang ang isa ka utod antes niya matalupangdan ini. Gani antes laygayan sang mga gulang ina nga utod, may mga dapat anay sila himuon para mahapos batunon sang utod ang laygay.

¹¹ Binagbinaga ini nga ilustrasyon: Ibutang ta nga matig-a ang duta nga tamnan sang isa ka mangunguma. Antes sia magtanom, dapat niya anay ihanda ang duta. Puede niya sadulon ang duta para maghumok ini. Pagkatapos sini, puede na sia magtanom sang binhi. Dayon, bunyagan niya ini para magtubo. Sing kaanggid, antes laygayan sang gulang ang isa ka utod nga wala nangayo sing laygay, may dapat anay sia himuon para mahapos batunon sang utod ang laygay. Halimbawa, sa nagakaigo nga tion, puede niya istoryahon ang utod para isiling sa iya nga nabalaka gid sia sa iya. Kon ang gulang kilala na nga daan nga mahigugmaon kag mabuot, mas mahapos para sa utod nga batunon ang laygay.

¹² Samtang ginaistorya sang gulang ang utod, may puede pa sia himuon para mahapos batunon sang utod ang laygay. Puede niya ipahanumdom sa utod nga may mga tion gid nga makahimo kita sang sala kag kinahanglan naton ang laygay. (Roma 3:23) Dayon, gamiton sang gulang ang Biblia para ipakita sa utod nga nakahimo sia sang sayop nga tikang. Dapat kalmado lang ang tingog sang gulang kag indi niya dapat pagpakanubuon ang utod. Kon akuon sang utod nga nakasala sia, puede na ‘itanom sang gulang ang binhi.’ Buot silingon, ipaathag sing maayo sang gulang sa utod kon ano ang dapat niya bag-uhon. Dayon, ‘bunyagan sang gulang ang binhi.’ Buot silingon, sinsero nga komendahan sang gulang ang utod kag mangamuyo sia upod sa iya.​—Sant. 5:15.

13. Paano masigurado sang mga gulang nga naintiendihan sang utod ang ginlaygay sa iya?

¹³ Kon kaisa, lain ang pag-intiende sang isa ka utod sa ginlaygay sa iya sang mga gulang. Ano ang puede himuon sang mga gulang para masigurado nila nga naintiendihan sang utod ang ginlaygay sa iya? Puede nila sia pamangkuton kon bala naintiendihan niya ang laygay sa iya. Dapat mangin mainayuhon ang mga gulang sa pagpamangkot sa iya. (Man. 12:11) Mabal-an sang mga gulang sa sabat sang utod kon bala kabalo sia kon paano niya iaplikar ang ginlaygay sa iya.

MAGHATAG SING LAYGAY SA HUSTO NGA TION KAG SA HUSTO NGA PAAGI

14. Ngaa indi kita dapat maghatag sing laygay kon akig kita?

¹⁴ Indi kita tanan perpekto, gani may mga tion gid nga may mahimo kita ukon masiling nga makapalain sang buot sang iban. (Col. 3:13) Ang Pulong sang Dios nagasiling nga posible may mga tion pa gani nga mapaakig naton ang iban ukon maakig kita sa ila. (Efe. 4:26) Pero indi kita dapat maghatag sing laygay kon akig kita. Ngaa? Bangod “ang kaakig sang tawo wala nagaresulta sa paghimo sing matarong sa panulok sang Dios.” (Sant. 1:20) Kon maglaygay kita nga akig kita, posible gid nga magalala lang ang sitwasyon. Indi buot silingon sini nga indi gid naton dapat pag-ihambal sa nakasakit sa aton ang aton ginahunahuna kag ginabatyag. Pero, dapat anay naton hulaton nga magkalma kita antes naton ini ihambal. Parte sa sini, makatuon kita kay Elihu nga naghatag sing maayo nga laygay kay Job.

15. Ano ang natun-an naton sa halimbawa ni Elihu? (Tan-awa man ang piktyur.)

¹⁵ Sa sulod sang madamo nga adlaw, ginpangapinan ni Job ang iya kaugalingon sa ginsiling sang iya indi matuod nga mga abyan parte sa iya. Nagapamati sadto si Elihu, kag naluoy sia kay Job. Pero sang may ginsiling si Job nga indi husto parte kay Jehova para pamatud-an nga wala sia sing sala, naakig si Elihu. Ginlaygayan bala dayon ni Elihu si Job? Wala. Naghulat anay si Elihu, gani kalmado kag matinahuron ang iya paagi sa paglaygay kay Job. (Job 32:2; 33:​1-7) Ari ang importante nga leksion nga matun-an naton kay Elihu: Mas maayo gid kon kalmado kita, matinahuron, kag mahigugmaon kon nagahatag kita sing laygay.​—Man. 3:​1, 7.

PADAYON NGA MAGHATAG SING LAYGAY KAG BATUNA INI

16. Ano ang natun-an mo sa Salmo 32:8?

¹⁶ Ang teksto nga ginbasihan sini nga artikulo nagasiling nga ‘nagalaygay si Jehova samtang nagatulok sia sa aton.’ (Basaha ang Salmo 32:8.) Ginapakita sini nga padayon niya kita nga ginabuligan. Magluwas nga nagahatag sia sing laygay, ginabuligan man niya kita nga maaplikar ini. Maayo gid sia nga halimbawa para sa aton. Kon nagahatag kita sing laygay sa iban, ilugon naton si Jehova paagi sa padayon nga pagpalig-on sa ila kag pagbulig sa ila nga makahimo sang maayo nga mga desisyon.

17. Sa ano mapaanggid ang mga gulang nga nagahatag sing espesipiko kag nabase sa Biblia nga laygay? Ipaathag. (Isaias 32:​1, 2)

¹⁷ Sa aton tion subong, kinahanglan gid naton maghatag sing laygay kag magbaton sini. (2 Tim. 3:1) Ang mga gulang nga nagahatag sing espesipiko kag nabase sa Biblia nga laygay makabulig sa aton nga padayon nga mag-alagad kay Jehova. Daw “kaangay [sila] sang sapa nga nagailig sa desyerto” nga makapaumpaw sa isa ka tawo. (Basaha ang Isaias 32:​1, 2.) Nagapasalamat gid kita sa aton mga abyan nga nagahatag sa aton sing laygay nga kinahanglan gid naton bisan pa indi ini ang laygay nga gusto naton. Ang ila laygay daw pareho sa “mga mansanas nga bulawan sa pilak nga suludlan.” (Hulu. 25:11) Kabay nga padayon naton nga tinguhaan nga maghatag sing maayo nga laygay kag mangin handa pirme sa pagbaton sini.