Makabulig Bala Gihapon sa Imo Subong ang Panguna nga mga Panudlo sang Biblia?

1. Sang natun-an mo ang panguna nga mga panudlo sang Biblia, ano ang epekto sini sa imo kabuhi?

SANG natun-an naton ang panguna nga mga panudlo sang Biblia, nagbag-o gid ang aton kabuhi. Halimbawa, sang natun-an naton nga Jehova ang ngalan sang Dios, nagpanikasog kita para mangin abyan naton sia. (Isa. 42:8) Sang natun-an naton kon ano gid ang nagakatabo kon mapatay ang isa ka tawo, wala na kita nagapalibog nga basi nagaantos ang aton pinalangga nga napatay. (Man. 9:10) Kag sang natun-an naton ang parte sa promisa sang Dios nga Paraiso diri sa duta, wala na kita nabalaka parte sa aton palaabuton. Kumbinsido kita nga magakabuhi kita, indi lang sing 70 ukon 80 ka tuig, kundi sing wala sing katapusan.​—Sal. 37:29; 90:10.

2. Ngaa ginpahanumdom ni Pedro sa madugay na nga mga Cristiano ang pila ka panguna nga panudlo sang Kasulatan? (2 Pedro 1:​12, 13)

² Indi gid naton dapat pagkalimtan kon daw ano ka importante ang panguna nga mga panudlo sang Biblia. Sa ikaduha nga sulat ni apostol Pedro, ginsulatan niya ang mga Cristiano nga ‘malig-on na sa kamatuoran.’ (Basaha ang 2 Pedro 1:​12, 13.) Kay man, sadto nga tion, may pila sa kongregasyon nga posible makahalit sa ila espirituwalidad, pareho sang indi matuod nga mga manunudlo. (2 Ped. 2:​1-3) Gusto palig-unon ni Pedro ang iya mga kauturan para indi sila malimbungan sang mga kabutigan nga ginatudlo sini nga mga tawo. Gani, ginpahanumdom niya sa ila ang pila ka panudlo nga natun-an na nila. Makabulig ini nga mga panudlo para makapabilin sila nga matutom asta sa katapusan.

3. Ngaa dapat padayon naton nga pamalandungan ang panguna nga mga panudlo sang Biblia? Maghatag sing ilustrasyon.

³ Bisan pa madugay na kita nga nagaalagad kay Jehova, may matun-an kita gihapon nga bag-o nga mga leksion sa panguna nga mga panudlo sang Biblia. Binagbinaga ini nga ilustrasyon: Kon nagaluto sang sud-an ang isa ka sagad nga kusinero kag ang isa nga nagatuon pa lang nga magluto, posible nga pareho lang nga mga panakot ang ila ginagamit. Pero bangod mas eksperiensiado ang sagad nga kusinero, may natun-an na sia nga iban pa nga mga putahe nga nagagamit sang amo gihapon nga mga panakot. Sing kaanggid, kon madugay na kita nga nagaalagad kay Jehova, posible nga lain nga leksion ang makita naton sa panguna nga mga panudlo sang Biblia kon ikumparar sa makita sang isa nga nagatuon pa lang sang Biblia. Ngaa? Kay man, posible nagbag-o na ang aton kahimtangan ukon ang aton pribilehiyo sa pag-alagad sugod sang nabawtismuhan kita. Kon pamalandungan naton ang mga panudlo nga natun-an naton sang una, posible gid nga makakita kita sang bag-o nga mga leksion nga makabulig sa aton subong. Binagbinagon naton kon ano ang matun-an sang madugay na nga mga alagad ni Jehova sa tatlo ka panguna nga panudlo sang Biblia.

SI JEHOVA ANG MANUNUGA

4. Sang nabal-an naton nga si Jehova ang Manunuga, ano ang nangin epekto sini sa aton?

⁴ Kabalo kita nga gintuga sang pinakamaalam kag labing gamhanan nga Manunuga ang duta kag ang tanan nga ara sa sini. Ang Biblia nagasiling: “Ang nagtukod sang tanan nga butang amo ang Dios.” (Heb. 3:4) Pero, madamo pa gid kita sing matun-an sa sini nga kamatuoran. Halimbawa, bangod gintuga kita ni Jehova, kabalo sia sang tanan parte sa aton. Nagaulikid man sia sa aton, kag kabalo sia sang pinakamaayo para sa aton. Sang nabal-an naton nga si Jehova ang Manunuga, daku ang nangin epekto sini sa aton. Naghimo kita sang dalayawon nga mga pagbag-o kag may direksion na ang aton kabuhi.

5. Ano nga kamatuoran ang makabulig sa aton nga mangin mapainubuson? (Isaias 45:​9-12)

⁵ Ang kamatuoran nga si Jehova ang Manunuga nagatudlo man sa aton nga dapat kita mangin mapainubuson. Halimbawa, sang nagpokus si Job sa iya kaugalingon kag sa iban nga tawo, ginpahanumdom sa iya ni Jehova nga Sia ang labing gamhanan nga Manunuga. (Job 38:​1-4) Nakabulig ini kay Job nga marealisar nga mas labaw ang panghunahuna sang Dios sangsa panghunahuna sang tawo. Parte sa sini nga kamatuoran, nagsulat si manalagna Isaias sang ulihi: “Magasiling bala ang daga sa Maninihon: ‘Ano ang ginahimo mo?’”—Basaha ang Isaias 45:​9-12.

6. Sa ano nga sitwasyon dapat naton pamalandungan ang parte sa indi matupungan nga kaalam kag gahom sang aton Manunuga? (Tan-awa man ang mga piktyur.)

⁶ Kon madugay na nga nagaalagad kay Jehova ang isa ka utod, may mga sitwasyon nga posible indi sia magpagiya kay Jehova kag sa Iya Pulong kag mas magasalig sia sa iya kaugalingon. (Job 37:​23, 24) Pero kon pamalandungan niya ang parte sa indi matupungan nga kaalam kag gahom sang iya Manunuga, ano ayhan ang mangin epekto sini sa iya? (Isa. 40:22; 55:​8, 9) Makabulig ini sa iya nga mangin mapainubuson, kag marealisar niya nga ang panghunahuna ni Jehova amo pirme ang husto.

7. Ano ang ginhimo ni Rahela para mabaton niya ang mga pagbag-o sa organisasyon?

⁷ Binagbinaga ang isa ka sister sa Slovenia nga si Rahela. Bangod ginpamalandungan niya ang kamatuoran nga si Jehova ang Manunuga, nakabulig ini sa iya nga batunon ang mga pagbag-o sa organisasyon. Nagsiling sia: “May mga tion nga nabudlayan ako nga batunon ang mga pagbag-o nga ginahimo sang nagapanguna nga mga utod. Halimbawa, bisan pa natan-aw ko na ang 2023 Update sang Nagadumala nga Hubon #8, nasaw-ahan gihapon ako sang may nakita ako nga isa ka brother nga may burangos nga nagapamulongpulong. Gani nangamuyo ako kay Jehova nga buligan niya ako nga batunon ini nga pagbag-o.” Narealisar ni Rahela nga bangod si Jehova ang Manunuga sang langit kag duta, kabalo Sia kon paano giyahan ang Iya organisasyon sa pinakamaayo nga paagi. Kon nabudlayan ka nga batunon ang bag-o nga paghangop ukon instruksion, pamalandungi ang parte sa indi matupungan nga kaalam kag gahom sang aton Manunuga.​—Roma 11:​33-36.

KON NGAA GINATUGUTAN SANG DIOS NGA MAG-ANTOS ANG MGA TAWO

8. Ano ang benepisyo bangod natun-an naton kon ngaa ginatugutan sang Dios nga mag-antos ang mga tawo?

⁸ Ngaa ginatugutan sang Dios nga mag-antos ang mga tawo? Bangod wala kabalo ang iban sang sabat sa sini nga pamangkot, naakig sila sa Dios ukon nagapati sila nga wala sing Dios. (Hulu. 19:3) Pero, natun-an naton nga indi si Jehova ang rason kon ngaa nagaantos ang mga tawo. Sa baylo, bangod ini sa napanubli naton nga sala kag sa aton indi perpekto nga kahimtangan. Natun-an man naton nga bangod mapailubon si Jehova ukon nagahulat sia sing mapinasensiahon, madamo pa nga tawo ang puede makatuon parte sa iya kag makita nila kon paano niya dulaon ang pag-antos. (2 Ped. 3:​9, 15) Bangod kabalo kita sini nga mga kamatuoran, nagapaumpaw ini sa aton kag nagasuod pa gid kita kay Jehova.

9. Sa ano nga mga sitwasyon dapat naton pamalandungan ang mga rason kon ngaa ginatugutan ni Jehova nga mag-antos ang mga tawo?

⁹ Samtang ginahulat naton ang tion nga dulaon na ni Jehova ang pag-antos, dapat kita mangin mapinasensiahon. Pero kon mapatyan kita sang pinalangga, ukon makaeksperiensia kita ukon ang aton pamilya sang kabudlayan ukon inhustisya, posible magpalibog kita kon ngaa wala pa gindula ni Jehova ang pag-antos. (Hab. 1:​2, 3) Sa sini nga mga sitwasyon, maayo gid kon pamalandungan naton ang mga rason kon ngaa ginatugutan ni Jehova nga mag-antos ang matarong nga mga tawo.a (Sal. 34:19) Pamalandungan man naton ang iya promisa nga dulaon gid niya ang pag-antos.

10. Ano ang nakabulig kay Anne nga mabatas ang kasubo sang napatay ang iya iloy?

¹⁰ Bangod kabalo kita kon ngaa ginatugutan sang Dios nga mag-antos ang mga tawo, nagabulig ini sa aton nga makabatas. Binagbinaga si Anne nga nagaistar sa isla sang Mayotte sa Indian Ocean. Nagsiling sia: “Sang napatay ang akon iloy mga pila ka tuig na ang nagligad, nasubuan gid ako. Pero, pirme ko ginadumdom nga indi si Jehova ang balasulon sa aton pag-antos. Gusto pa gani niya dulaon ang tanan nga pag-antos kag banhawon ang aton mga pinalangga. Gani bisan pa grabe ang akon kasubo, nagatawhay ang akon hunahuna kon ginapamalandungan ko ini nga mga kamatuoran.”

11. Bangod kabalo kita kon ngaa ginatugutan sang Dios nga mag-antos ang mga tawo, paano ini makabulig sa aton nga padayon nga magbantala?

¹¹ Bangod kabalo kita kon ngaa ginatugutan sang Dios nga mag-antos ang mga tawo, nagabulig ini sa aton nga padayon nga magbantala. Nagsiling si Pedro nga mapailubon si Jehova bangod gusto Niya nga maghinulsol ang mga tawo para maluwas sila. Dayon nagsiling sia: “Dapat talupangdon ninyo kon ano kamo nga sahi sang mga tawo may kaangtanan sa balaan nga paggawi kag sa mga buhat sang diosnon nga debosyon.” (2 Ped. 3:11) Nalakip sa “mga buhat sang diosnon nga debosyon” ang aton pagbantala. Pareho sa aton Amay, palangga man naton ang mga tawo. Gusto naton nga makaistar man sila sa matarong nga bag-ong kalibutan sang Dios. Mapailubon nga ginahatagan ni Jehova sing tsansa ang mga tawo sa aton teritoryo nga simbahon sia. Pribilehiyo gid naton nga mangin masigkamanugpangabudlay sang Dios sa pagbulig sa madamo nga tawo nga makatuon parte sa iya antes mag-abot ang katapusan.​—1 Cor. 3:9.

NAGAKABUHI NA KITA “SA KATAPUSAN NGA MGA ADLAW”

12. Bangod makita naton nga nagakatuman ang tagna parte “sa katapusan nga mga adlaw,” sa ano kita kumbinsido?

¹² Ginasugid sa aton sang Biblia kon ano ang mangin pamatasan sang mga tawo “sa katapusan nga mga adlaw.” (2 Tim. 3:​1-5) Maathag nga nagakatuman gid ini nga tagna sa aton tion subong. Kag bangod makita naton nga nagalain pa gid ang pamatasan sang mga tawo, mas kumbinsido pa gid kita nga masaligan gid ang Pulong sang Dios.​—2 Tim. 3:​13-15.

13. Base sa ilustrasyon ni Jesus sa Lucas 12:​15-21, ano ang dapat naton ipamangkot sa aton kaugalingon?

¹³ Bangod kabalo kita nga nagakabuhi na kita sa katapusan nga mga adlaw, dapat kita magpokus sa pinakaimportante nga mga butang. Parte sa sini, binagbinaga ang ilustrasyon ni Jesus sa Lucas 12:​15-21. (Basaha.) Ngaa gintawag ang manggaranon nga tawo nga “indi makatarunganon”? Indi bangod madamo sia sing manggad, kundi bangod gin-una niya sa iya kabuhi ang indi importante nga mga butang. ‘Nagtipon sia sang bahandi para sa iya kaugalingon apang indi sia manggaranon sa Dios.’ Ngaa indi husto ang iya prioridad? Kay man, ginsilingan sang Dios ini nga tawo: “Karon nga gab-i kuhaon nila ang imo kabuhi.” Ano ang matun-an naton sa sini? Malip-ot na lang ang tion nga nabilin antes mag-abot ang katapusan, gani pamangkuton naton ang aton kaugalingon: ‘Makita bala sa akon mga tulumuron nga ginagamit ko sing maayo ang akon tion? Ano nga mga tulumuron ang gusto ko nga panikasugan sang akon kabataan? Ginagamit ko bala ang akon kusog, tion, kag kuarta para magtipon sang bahandi para sa akon kaugalingon ukon para magtipon sang bahandi sa langit?’

14. Base sa eksperiensia ni Miki, ngaa maayo gid nga dumdumon naton nga nagakabuhi na kita sa katapusan nga mga adlaw?

¹⁴ Kon dumdumon naton nga nagakabuhi na kita sa katapusan nga mga adlaw, makabulig ini sa aton nga makahimo sang maayo nga mga desisyon. Binagbinaga ang eksperiensia sang isa ka sister nga si Miki. Nagsiling sia: “Sang naggradweyt ako sa high school, ang gusto ko gid nga obra sa ulihi amo ang pagtuon parte sa mga sapat. Pero gusto ko man magregular payunir kag magsaylo sa lugar nga nagakinahanglan sang dugang nga manugbantala. Ginhambalan ako sang hamtong nga mga utod nga pamensaran ko sing maayo kon bala madungan ko ang akon gusto nga obra kag ang akon mga tulumuron sa pag-alagad. Ginpahanumdom nila sa akon nga nagakabuhi na kita sa katapusan nga mga adlaw. Pero sa bag-ong kalibutan, matun-an ko ang parte sa mga sapat asta sa wala sing katapusan. Gani, nagdesisyon ako nga magkuha sang vocational nga kurso. Nakabulig ini sa akon nga makakita sang obra para masuportahan ang akon pagpayunir. Sang ulihi, nakabulig man ini sa akon sang nagsaylo ako sa Ecuador nga nagakinahanglan sang dugang nga manugbantala.” Nagaalagad na subong sa sirkito sa sini nga pungsod si Miki kag iya bana.

15. Ano ang posible nga reaksion sang mga tawo sa maayong balita? Maghatag sing halimbawa. (Tan-awa man ang mga piktyur.)

¹⁵ Indi kita dapat maluyahan kon indi pagbatunon sang mga tawo ang maayong balita. Ngaa? Kay man, nagabag-o ang kahimtangan sang mga tawo. Binagbinaga ang halimbawa ni Santiago nga utod ni Jesus sa iloy. Kaupod na niya si Jesus halin sang gamay pa sila. Nakita niya nga natuman kay Jesus ang mga tagna parte sa Mesias, kag kon paano gintudluan ni Jesus ang mga tawo sa dalayawon nga paagi. Pero nangin disipulo lang si Santiago sang ginbanhaw na si Jesus. Ang matuod, nangin matutom gid nga disipulo si Santiago.b (Juan 7:5; Gal. 2:9) Importante gid nga indi kita mag-untat sa pagsugid sang mensahe sang Ginharian sa aton mga paryente ukon sa aton mga ginbantalaan nga wala nagbaton. Dumdumon naton nga nagakabuhi na kita sa katapusan nga mga adlaw. Gani, hilingagawon gid ang aton pagbantala nga hilikuton. Sa ulihi, posible madumduman nila ang aton ginabantala sa ila subong kag magahimo sila sang pagbag-o. Kag posible ini matabo bisan sa tion sang dakung kapipit-an.c

PABALORI PIRME ANG PANGUNA NGA MGA PANUDLO SANG BIBLIA

16. Paano kita nagabenepisyo sa panguna nga mga panudlo sang Biblia? (Tan-awa man ang kahon nga “Gamita ang mga Kamatuoran sa Biblia Para Buligan ang Iban.”)

¹⁶ Nagaaman ang aton organisasyon sang nabase sa Biblia nga mga impormasyon. Ang pila sa sini ginhimo para sa mga tawo nga diutay lang ang nahibaluan sa Biblia ukon para sa mga indi Saksi. Ang halimbawa sa sini amo ang pamulongpulong kada semana, ang pila ka mga artikulo kag mga video sa jw.org, kag ang aton pangpubliko nga mga magasin. Pero bisan pa para ini sa mga indi Saksi, nagabenepisyo man kita sa sini nga mga impormasyon. Nagabulig ini para mas higugmaon pa gid naton si Jehova, magbakod ang aton pagtuo sa Iya Pulong, kag mangin mas epektibo pa gid kita sa aton pagtudlo sang Biblia sa iban.​—Sal. 19:7.

17. Sa ano nga mga sitwasyon makabulig sa imo ang pagdumdom sa panguna nga mga panudlo sang Biblia?

¹⁷ Bilang mga Saksi ni Jehova, nalipay gid kita kon makabaton kita sang bag-o nga paathag sa mga kamatuoran sa Biblia. Pero, nagapasalamat man kita sa panguna nga mga panudlo sang Biblia kay nakabulig ini sa aton nga mangin suod kay Jehova. Gani kon pamatyag naton mas maayo ang aton opinyon sangsa nabaton naton nga instruksion halin sa organisasyon ni Jehova, dumdumon naton nga ang aton pinakamaalam kag labing gamhanan nga Manunuga amo ang nagagiya sa iya organisasyon. Kon may ginabatas kita nga mga kabudlayan ukon ang aton mga pinalangga, mangin mapinasensiahon kita kag dumdumon naton kon ngaa ginatugutan ni Jehova nga mag-antos ang mga tawo. Kag kon nagadesisyon kita kon paano naton gamiton ang aton tion, kusog, kag kuarta, dumdumon naton nga ara na kita sa katapusan nga mga adlaw. Kabay nga padayon kita nga mapalig-on sang panguna nga mga panudlo sang Biblia kag buligan kita sini nga magpabilin nga matutom kay Jehova.