Buligi Dayon ang mga Interesado sa Kamatuoran

1. Ano ang reaksion sang mga tawo sa maayong balita? (Binuhatan 13:47, 48; 16:14, 15)

SANG unang siglo, madamo nga tawo ang nagbaton dayon sang kamatuoran sang ginbantala ini sa ila sang mga Cristiano. (Basaha ang Binuhatan 13:47, 48; 16:14, 15.) Subong, may mga tawo man nga nalipay gid sang nabatian nila ang maayong balita sa pinakauna nga tion. May pila naman nga indi interesado sa mensahe sang Ginharian sang primero, pero sang ulihi, gusto na nila magtuon parte sa sini. Ano ang himuon naton kon makakita kita sang mga tawo nga “may husto nga panimuot”?

2. Ngaa makumparar naton ang aton pagbantala sa ginahimo sang isa ka mangunguma?

² Binagbinaga ini nga ilustrasyon. Makumparar naton ang aton pagbantala sa ginahimo sang isa ka mangunguma nga madamo sing sarisari nga mga tanom. Kon makita niya nga puede na anihon ang iban sa iya mga tanom, anihon niya ini dayon. Pero, padayon man niya nga atipanon kag bunyagan ang iban pa niya nga tanom. Sing kaanggid, kon makakita kita sang isa ka tawo nga interesado gid magtuon sa Biblia, buligan naton sia dayon nga mangin disipulo sang Cristo. Pero, padayon man naton nga buligan ang iban nga nagpakita sang interes sa aton mensahe para mapalig-on sila nga magtuon sa Biblia. (Juan 4:35, 36) Kon kabalo kita magtan-aw kon bala interesado gid ang aton mga ginabantalaan ukon indi, kabalo man kita kon paano sila buligan sa pinakamaayo nga paagi. Sa sini nga artikulo, binagbinagon naton kon ano ang puede naton himuon sa una nga pag-istoryahanay para mabuligan naton ang mga interesado gid magtuon sa Biblia. Binagbinagon man naton kon paano naton sila mabuligan nga mag-uswag kag mag-alagad kay Jehova.

KON INTERESADO GID MAGTUON SA BIBLIA ANG ISA KA TAWO

3. Ano ang himuon naton kon makakita kita sang interesado? (1 Corinto 9:26)

³ Kon makakita kita sang interesado, gusto naton nga buligan sia dayon nga magtuon parte kay Jehova kag mangin suod sa iya. Gani sa una pa lang naton nga pag-istorya sa iya, tanyagan naton sia dayon sang Bible study kag agdahon naton sia sa aton mga miting.​—Basaha ang 1 Corinto 9:26.

4. Isaysay ang eksperiensia sang isa ka babayi nga gusto dayon magpa-Bible study.

⁴ Tanyagan naton sila sang Bible study. May mga maistorya kita nga gusto dayon magpa-Bible study. Binagbinaga ini nga eksperiensia sa Canada. Huebes sadto nga adlaw. Nagpalapit ang isa ka pamatan-on nga babayi sa cart kag nagkuha sang brosyur nga Magkabuhi sing Wala Katapusan! Ginsilingan sia sang sister nga nagatanyag kita sang Bible study nga ginagamit ang ginkuha niya nga brosyur, kag wala sang bayad ini nga pagtuon. Interesado sa sini ang babayi. Ginhatag niya ang iya cell phone number, kag ginhatag man sang sister ang iya number. Sang ulihi sadto man nga adlaw, ginteksan sang babayi ang sister nga nagapamangkot kon san-o sila masugod study. Nagsiling ang sister nga puede sila kasugod sa Sabado. Nagsiling ang babayi: “Puede man buas kay libre man ’ko.” Gani, nag-study sila dayon pagka-Biernes. Nagtambong dayon ang babayi sa miting pagka-Domingo, kag madasig ang iya pag-uswag.

5. Ano ang himuon naton kon daw indi pa interesado mag-Bible study ang maistorya naton? (Tan-awa man ang mga piktyur.)

⁵ Siempre, indi naton mapaabot nga mapa-Bible study dayon ang tanan nga maistorya naton. May iban nga nagakinahanglan pa sang tion para mangin interesado sila. Sa umpisa, posible nga kinahanglan naton sugdan ang pag-istoryahanay sa topiko nga interesado sila. Dayon, padayon naton nga ipakita nga nagaulikid kita sa ila kag mangin positibo kita. Pagligad sang malip-ot nga tion, posible nga gusto na nila magpa-study. Ano ang ihambal naton kon nagatanyag kita sang Bible study? Binagbinagon naton ang panugda sang pila ka kauturan nga sagad magtanyag sini.

6. Ano ang puede naton isiling para mangin interesado ang isa ka tawo nga mag-istorya liwat sa masunod nga tion?

⁶ May ginpanugda ang mga manugbantala kag mga payunir nga sagad magtanyag sang Bible study. Nagsiling sila nga sa pila ka lugar, mas maayo nga indi ka magsiling sing “tudluan ka namon parte sa Biblia” ukon “tun-an naton ang Biblia.” Natalupangdan nila nga mas maayo nga magsiling ka sing “istoryahan naton ang parte sa Biblia.” Kag para mangin interesado ang isa ka tawo nga padayunon ang inyo pag-istoryahanay sa masunod nga tion, puede ka magsiling, “Kabalo ka bala nga ginasabat sang Biblia ang ginapaligban naton nga mga pamangkot?” ukon “Magluwas nga ginasugiran kita sang Biblia parte sa Dios, makabulig man ini sa aton pagkabuhi subong.” Dayon puede ka magsiling: “Madamo na kita sing matun-an bisan mga 10 asta 15 minutos lang nga pag-istoryahanay.” Maayo man kon likawan mo ang mga termino nga “kada semana” ukon “balikbalikan ta ka diri,” kay basi magbatyag ang imo kaistorya nga obligado sia nga hatagan ka pirme sang tion.

7. San-o narealisar sang iban nga parte sa kamatuoran ang ila ginatun-an? (1 Corinto 14:23-25)

⁷ Agdahon naton sila sa aton miting. Sang panahon ni apostol Pablo, may ginsiling sia nga nagapahangop kon san-o narealisar sang iban nga parte sa kamatuoran ang ila ginatun-an. Narealisar nila ini sang nagtambong sila sa pagtilipon sang mga Cristiano. (Basaha ang 1 Corinto 14:23-25.) Nagakatabo man ina subong. Ang kalabanan nga interesado nga nagatambong sa aton mga miting madasig nga nagauswag. Ti, san-o naton sila dapat agdahon? Ginabinagbinag sa leksion 10 sang libro nga Magkabuhi sing Wala Katapusan! ang parte sa pag-agda sa ila sa miting, pero indi kinahanglan nga hulaton pa naton nga makalab-ot kita sa sina nga leksion. Bisan sa una pa lang naton nga pag-istorya sa ila, puede na naton sila agdahon sa aton miting pagka-Sabado ukon Domingo. Puede naton isugid sa iya ang tema sang pamulongpulong ukon ang isa ka punto nga pagatun-an sa Lalantawan.

8. Ano ang puede naton ipaathag sa isa ka interesado kon ginaagda naton sia sa aton mga miting? (Isaias 54:13)

⁸ Kon ginaagda naton ang isa ka interesado, ipaathag naton sa iya kon ano ang kinalain sang aton mga miting sa posible naandan niya nga ginahimo sa ila relihion. Sang nagtambong ang isa ka Bible study sa Pagtinuon sa Lalantawan, ginpamangkot niya ang sister nga naga-study sa iya, “Kilala kamo tanan sang inyo brother?” Ginpaathag sang sister nga ginatinguhaan gid naton nga makilala ang tanan sa kongregasyon kay isa kita ka pamilya. Nagsiling ang study nga lain gid ini sa ila relihion kay indi nila kilala ang kalabanan nila nga upod. May isa pa gid ka kinalain ang aton mga miting. (Basaha ang Isaias 54:13.) Nagatipon kita para simbahon si Jehova, para tudluan niya, kag para magpalig-unay. (Heb. 2:12; 10:24, 25) Gani organisado ang aton mga miting kay gusto naton nga may matun-an gid kita, kag wala kita sing mga ritwal nga ginahimo. (1 Cor. 14:40) Masanag man ang aton mga Kingdom Hall kay nagatipon kita para magtuon. Kag bangod neutral kita, wala naton ginalakip sa aton mga miting ang parte sa pulitika, wala kita nagadebatihay, kag wala naton ginabaisan ang parte sa personal nga mga opinyon. Puede naton ipatan-aw sa Bible study ang video nga Ano ang Ginahimo sa Kingdom Hall? para may ideya sia kon ano ang nagakatabo sa aton mga miting.

9-10. Kon nagaalang-alang magtambong sa aton miting ang aton gin-agda kay basi piliton sia nga mag-Saksi, ano ang puede naton isiling sa iya? (Tan-awa man ang piktyur.)

⁹ May pila nga nagaalang-alang magtambong sa aton miting kay basi piliton sila nga mag-Saksi. Pasaliga sila nga indi sila pagpiliton, kag wala sila sing kinahanglan nga himuon kundi ang magpamati. Puede makatambong ang bilog nga pamilya pati ang gamay pa nga mga bata. Wala naton ginapain ang mga bata, kag wala man sing lain nga impormasyon nga ginatudlo sa ila. Sa baylo, tuparay nga nagapungko ang mga ginikanan kag ang ila mga bata para magtuon. Paagi sini, indi mabalaka ang mga ginikanan kag kabalo sila kon ano ang ginatudlo sa ila mga bata. (Deut. 31:12) Wala man kita nagapangolekta sang kuarta. Sa baylo, ginasunod naton ang sugo ni Jesus: “Nakabaton kamo nga wala sing bayad, gani maghatag kamo nga wala sing bayad.” (Mat. 10:8) Puede mo man sambiton sa imo ginaagda nga indi kinahanglan nga malahalon gid ang iya bayo. Kay man, mas importante sa Dios kon ano ang ara sa aton tagipusuon.​—1 Sam. 16:7.

¹⁰ Kon magtambong ang imo gin-agda, abiabiha sia sing maayo. Ipakilala sia sa mga gulang kag sa iban nga kauturan. Kon mabatyagan niya nga nalipay kita nga nagtambong sia, posible gid nga matambong sia liwat. Sa tion sang miting, i-share sa iya ang imo Biblia kon wala sia dala nga Biblia. Ipakita sa iya ang mga teksto nga ginabinagbinag sang mga may bahin.

ANO ANG HIMUON MO KON MASUGDAN NA ANG BIBLE STUDY?

11. Paano mo mapakita sa imo study nga naintiendihan mo nga masako man sia?

¹¹ Ano ang dapat naton dumdumon kon naga-Bible study kita sa isa ka interesado? Ipakita naton sa iya nga naintiendihan naton nga masako man sia. Halimbawa, kon may ginkasugtan kamo nga oras sa pagtuon, mag-abot sa insakto nga oras. Himua ini bisan pa daw normal na lang sa inyo lugar nga indi mag-abot sa insakto nga oras. Mas maayo man kon lip-ot lang ang inyo una nga pagtuon. Ang pila ka eksperiensiado nga kauturan nagsiling nga bisan daw nanamian pa ang imo study magtuon, mas maayo kon tapuson mo lang ini anay. Likawan mo man nga magsige hambal. Sa baylo, pabay-i ang imo study nga ihambal ang iya ginahunahuna.​—Hulu. 10:19.

12. Ano dapat ang imo tulumuron sa umpisa pa lang sang imo pag-Bible study sa isa ka interesado?

¹² Sa umpisa pa lang, dapat ang imo tulumuron amo nga buligan ang imo study nga makilala si Jehova kag si Jesus kag palanggaon niya sila. Para mahimo ini, gamita pirme ang Biblia imbes nga isugid lang sa iya ang imo nabal-an sa Biblia. (Binu. 10:25, 26) Sa bahin ni apostol Pablo, nakapokus kay Jesucristo ang iya gintudlo sa mga tawo. Kay man, si Jesus ang ginpadala ni Jehova para buligan kita nga makilala Sia kag palanggaon. (1 Cor. 2:1, 2) Ginpaathag man ni Pablo nga importante nga buligan ang bag-o nga mga disipulo para mapakita nila ang maayo nga mga kinaiya. Ini nga mga kinaiya makumparar sa bulawan, pilak, kag malahalon nga mga bato. (1 Cor. 3:11-15) Nalakip sa sini ang pagtuo, kaalam, paghantop, kag kahadlok kay Jehova. (Sal. 19:9, 10; Hulu. 3:13-15; 1 Ped. 1:7) Iluga ang paagi ni Pablo sa pagtudlo sa iban. Paano? Paagi sa pagbulig sa imo study nga magbakod ang iya pagtuo kag mangin suod sa iya mahigugmaon nga Amay sa langit.​—2 Cor. 1:24.

13. Paano naton mapakita nga mapinasensiahon kita sa aton study kag nahangpan naton ang iya sitwasyon? (2 Corinto 10:4, 5) (Tan-awa man ang piktyur.)

¹³ Sunda ang paagi ni Jesus sa pagtudlo sa iban. Paano? Mangin mapinasensiahon sa imo study kag hangpa ang iya sitwasyon. Likawi ang mga pamangkot nga masaw-ahan sia nga sabton. Kag kon nabudlayan sia nga maintiendihan ang isa ka punto, laktawi lang ini anay. Baliki ninyo ini pagkatapos ninyo mabinagbinag ang pila ka punto. Indi sia pagpilita nga batunon dayon ang isa ka panudlo. Sa baylo, hatagi sia sang tion nga pamensaran ang iya ginatun-an kag pabaloran ini. (Juan 16:12; Col. 2:6, 7) Suno sa Biblia, ang butig nga mga panudlo daw pareho sa “butang nga natukod sing malig-on” nga dapat naton ‘tumbahon.’ Sa orihinal nga lenguahe, ginalaragway diri sang Biblia ang isa ka torre nga dapat rumpagon. (Basaha ang 2 Corinto 10:4, 5.) Gani imbes nga tumbahon dayon ang torre nga ginasaligan sang imo study, buligi sia anay nga himuon si Jehova nga iya Dalangpan.​—Sal. 91:9.

KON MAGTAMBONG NA SA MITING ANG MGA INTERESADO

14. Paano naton dapat trataron ang mga interesado nga nagatambong sa aton mga miting?

¹⁴ Gusto ni Jehova nga pakitaan naton sing kaayo ang tanan nga interesado ano man ang ila kultura, rasa, ukon estado sa kabuhi. (Sant. 2:1-4, 9) Paano naton mapakita ang aton gugma sa mga interesado nga nagatambong sa aton mga miting?

15-16. Paano naton mapabatyag sa mga bag-uhan nga nalipay kita nga nagtambong sila sa aton mga miting?

¹⁵ May pila nga nagatambong sa aton mga miting bangod gusto nila makita kon paano kita nagasimba, ukon posible may kilala sila sa iban nga lugar nga nagpalig-on sa ila nga magtambong. Gani kon may mga bag-uhan nga magtambong sa aton miting, palapitan naton sila. Pero, indi man naton pagpatam-an ang aton pag-abiabi sa ila. Tupari sila sa pulungkuan. I-share naton sa ila ang aton Biblia kag ang mga publikasyon nga aton ginatun-an, ukon hatagan naton sila sang Biblia kag mga publikasyon. Hangpon man naton ang ila ginabatyag. Binagbinaga ini nga eksperiensia. Sang nagkadto sa Kingdom Hall ang isa ka lalaki, gin-abiabi sia sang isa ka brother. Ginsilingan niya ang brother nga nahuya sia kay indi pormal ang iya bayo. Ginpaathag sa iya sang brother nga bisan pa pormal ang pamayo sang mga Saksi ni Jehova, ordinaryo lang kita nga mga tawo. Wala gid niya nalipatan kon paano sia ginbuligan sang brother nga mangin komportable sa miting. Sang ulihi, nabawtismuhan sia. Pero, ari ang dapat naton dumdumon: Kon ginaistorya naton ang aton mga bisita antes ukon pagkatapos sang miting, likawan naton ang sobra ka personal nga mga pamangkot.​—1 Ped. 4:15.

¹⁶ May iban pa nga paagi nga mapabatyag naton sa aton mga bisita nga nalipay kita nga nagtambong sila. Halimbawa, kon nagaistoryahanay kita, kon nagakomento kita, ukon kon may bahin kita, indi naton dapat pagpakalainon ang mga indi Saksi ukon ang ila mga ginapatihan. Likawan naton ang mga ekspresyon nga makapasandad sa ila. (Tito 2:8; 3:2) Halimbawa, indi naton dapat pag-insultuhon ang ila mga ginapatihan. (2 Cor. 6:3) Dapat gid ini tandaan sang mga brother nga nagapresentar sang pamulongpulong publiko. Dapat man ipaathag sini nga mga brother ang mga tinaga nga indi pamilyar sa mga indi Saksi. Paagi sini, mapakita nila nga ginapabaloran nila ang mga bag-uhan nga nagatambong sa miting.

17. Kon makakita kita sang tawo nga “may husto nga panimuot,” ano ang aton himuon?

¹⁷ Samtang nagaligad ang inadlaw, mas hilingagawon na gid ang aton hilikuton nga pagtudlo sa mga tawo para mangin disipulo sila. Gani, padayon naton nga pangitaon ang mga tawo nga “may husto nga panimuot sa pagtigayon sing kabuhi nga wala sing katapusan.” (Binu. 13:48) Kon makita naton sila, tanyagan naton sila sang Bible study kag agdahon naton sila sa aton mga miting. Paagi sini, mabuligan naton sila nga maglakat sa “dalan nga nagapadulong sa kabuhi.”​—Mat. 7:14.