‘Nakatuon si Jesus sang Pagkamatinumanon’

Pirme gid ginatuman ni Jesus si Jehova. (Juan 8:29) Ti, ngaa nagsiling ang Biblia nga “nakatuon sia sang pagkamatinumanon sa mga butang nga iya gin-antos”?​—Heb. 5:8.

Sang ari si Jesus sa duta, nakaeksperiensia sia sang mga sitwasyon nga wala sa langit. Halimbawa, palangga sang iya mga ginikanan si Jehova pero indi sila perpekto. (Luc. 2:51) Ginpaantos sia sang malain nga mga lider sang relihion kag mga opisyal sang gobierno. (Mat. 26:59; Mar. 15:15) Kag grabe gid kasakit sang iya kamatayon. Ang Biblia nagasiling: “Nagpaubos sia kag nangin matinumanon tubtob sa kamatayon.”​—Fil. 2:8.

Bangod sa sini nga mga eksperiensia, nakatuon si Jesus sang pagkamatinumanon sa paagi nga wala niya natun-an sa langit. Gani, sia ang perpekto nga Hari kag Mataas nga Saserdote nga makaintiende gid sa aton. (Heb. 4:15; 5:9) Pagkatapos makatuon si Jesus sang pagkamatinumanon sa mga butang nga iya gin-antos, nangin mas hamili pa gid sia kay Jehova. Kon mangin matinumanon kita bisan sa mabudlay nga mga sitwasyon, mangin mas hamili man kita kay Jehova kag magamit niya kita sa bisan ano nga asaynment.​—Sant. 1:4.