Panikasugi nga Mangamuyo sing Tinagipusuon

1-2. (a) Ngaa may mga tion nga daw indi tinagipusuon ang aton mga pangamuyo? (b) Ngaa makasiling kita nga ginapamatian gid sing maayo ni Jehova ang aton mga pangamuyo?

MAY mga tion bala nga nagabatyag ka nga daw sulitsulit ukon indi tinagipusuon ang imo mga pangamuyo? Kon huo, indi lang ikaw ang nagabatyag sina. Bangod masako kita, posible padali na lang kon kaisa ang aton mga pangamuyo. Ukon posible nabudlayan kita nga isugid kay Jehova kon ano gid ang aton ginabatyag bangod pamatyag naton indi kita takus magpalapit sa iya.

² Pero, dapat bala nga naminami gid ang aton paagi sa pagpabutyag sang aton kaugalingon kon nagapangamuyo kita? Indi. Ang Biblia nagasiling nga ang importante kay Jehova amo ang mangamuyo kita sa iya sing mapainubuson kag tinagipusuon. Kay man, ginapamatian niya “ang pangabay sang mahagop.” (Sal. 10:17) Ginapamatian gid niya sing maayo ang tanan naton nga ginahambal kay nagaulikid gid sia sa aton.​—Sal. 139:1-3.

3. Ano nga mga pamangkot ang binagbinagon naton sa sini nga artikulo?

³ Posible mamangkot kita: Ngaa indi kita dapat matahap mangamuyo kay Jehova? Ano ang himuon naton para mangin tinagipusuon ang aton mga pangamuyo? Ano ang matun-an naton sa sinsero nga pangamuyo sang mga alagad ni Jehova nga mabasa sa Biblia nga makabulig sa aton nga mangamuyo sing tinagipusuon? Kag ano ang himuon naton kon daw indi kita kabalo kon paano ipabutyag kay Jehova ang aton ginabatyag? Binagbinagon naton ang mga sabat sa sini nga mga pamangkot.

INDI MATAHAP MANGAMUYO KAY JEHOVA

4. Ano ang makabulig sa aton para indi kita matahap mangamuyo kay Jehova? (Salmo 119:145)

⁴ Kon tamdon naton si Jehova bilang isa ka mainunungon nga abyan kag gusto niya ang pinakamaayo para sa aton, makabulig ini sa aton nga indi matahap mangamuyo sa iya. Gintinguhaan sang manunulat sang Salmo 119 nga mangin amo sini ang pagtamod niya kay Jehova. Madamo sia sing problema. Ginhimuan sia sing malain sang malimbungon nga mga tawo. (Sal. 119:23, 69, 78) Kag may mga tion nga naluyahan sia bangod sa iya mga sala. (Sal. 119:5) Bisan pa sini, wala sia natahap nga ipabutyag kay Jehova ang iya ginabatyag.​—Basaha ang Salmo 119:145.

5. Kon nakahimo kita sang sala, ngaa indi naton dapat paghunahunaon nga indi na kita puede makapangamuyo? Maghatag sing ilustrasyon.

⁵ Gusto ni Jehova nga mangamuyo sa iya bisan ang mga nakahimo sang serioso nga mga sala. (Isa. 55:6, 7) Gani kon nakahimo kita sang sala, indi naton dapat paghunahunaon nga indi na kita puede makapangamuyo. Binagbinaga ini nga ilustrasyon: Ibutang ta nga nagkadto ka sa lugar nga indi mo sunado kag nagtalang ka. Kon may makita ka nga tumandok sa sina nga lugar, mahuya ka bala magpabulig sa iya? Indi. Kay man, kabalo ka nga mabuligan ka niya. Sing kaanggid, kon daw indi kita kabalo sang dapat naton himuon ukon nakahimo kita sang sala, indi kita dapat matahap mangamuyo kay Jehova.​—Sal. 119:25, 176.

ANO ANG HIMUON MO PARA MANGIN TINAGIPUSUON PA GID ANG IMO MGA PANGAMUYO?

6-7. Paano makabulig ang pagpamalandong sa mga kinaiya ni Jehova para mangin tinagipusuon pa gid ang aton mga pangamuyo? Maghatag sing halimbawa. (Tan-awa man ang footnote.)

⁶ Kon isugid naton kay Jehova kon ano gid ang aton ginahunahuna kag ginabatyag, mangin tinagipusuon pa gid ang aton mga pangamuyo. Ti, ano ang makabulig sa aton nga mahimo ini?

⁷ Pamalandungi ang mga kinaiya ni Jehova.a Kon pamalandungan naton pirme ang iya mga kinaiya, masugid naton sa iya kon ano gid ang aton ginahunahuna. (Sal. 145:8, 9, 18) Binagbinaga ang halimbawa sang isa ka sister nga si Kristine nga may bayolente nga amay. Nagsiling sia: “Nabudlayan ako nga isugid kay Jehova kon ano gid ang akon ginabatyag. Pamatyag ko indi na ako palangga ni Jehova bangod sa akon mga sala.” Ano nga kinaiya ni Jehova ang nakabulig kay Kristine? Nagsiling sia: “Ginpamalandungan ko ang parte sa mainunungon nga gugma ni Jehova, kag nakabulig ini sa akon nga makumbinsi nga palangga niya ako kag indi gid niya ako pagbiyaan. Sigurado ako nga bisan pa makahimo ako sang sala, palanggaon gihapon niya ako kag buligan. Bangod sini, nasugid ko sa iya ang akon ginabatyag sa mga tion nga grabe ang akon kalipay kag kasubo.”

8-9. Ngaa mas maayo kon hunahunaon anay naton kon ano ang aton isiling antes kita mangamuyo? Maghatag sing halimbawa.

⁸ Hunahunaa anay kon ano ang imo isiling. Antes ka mangamuyo, pamangkuta anay ang imo kaugalingon. Halimbawa: ‘Ano bala ang akon problema subong? May dapat bala ako patawaron? May pagbag-o bala nga natabo sa akon kabuhi kag kinahanglan ko ang bulig ni Jehova?’ (2 Hari 19:15-19) Puede man naton sundon ang gintudlo ni Jesus paagi sa paghunahuna kon ano ang aton ipangamuyo kay Jehova parte sa Iya ngalan, sa Iya Ginharian, kag sa Iya kabubut-on.​—Mat. 6:9, 10.

⁹ Sang nabal-an sang isa ka sister nga si Aliska nga indi na magdugay ang kabuhi sang iya bana bangod sa kanser sa utok, nabudlayan sia mangamuyo. Nagsiling sia: “Naglalain gid ako, kag indi ako makapamensar sing maayo kon ano ang akon ipangamuyo.” Ano ang nakabulig kay Aliska? Nagsiling sia: “Antes ako mangamuyo, ginahunahuna ko anay kon ano ang isiling ko kay Jehova. Paagi sini, nalikawan ko nga magpokus lang sa akon kaugalingon. Gani kon nagapangamuyo ako, mas kalmado ako kag masugid ko kay Jehova ang parte sa madamo nga butang.”

10. Ngaa indi kita dapat magdali sa aton pagpangamuyo? (Tan-awa man ang mga piktyur.)

¹⁰ Indi magdali sa imo pagpangamuyo. Puede kita makapangamuyo sing tinagipusuon bisan pa malip-ot lang ini. Pero kon gusto naton nga ipabutyag kay Jehova kon ano gid ang aton ginahunahuna, indi kita dapat magdali sa aton pagpangamuyo.b Ang bana ni Aliska nga si Elijah nagsiling: “Madamo nga beses ako nga nagapangamuyo kay Jehova sa bilog nga adlaw. Pero nabatyagan ko nga kon mas malawig ang akon pangamuyo kay Jehova, mas nagasuod ako sa iya. Indi gid matak-an si Jehova hulat kon san-o ako matapos pangamuyo, gani makapagusto ako kon daw ano ini kalawig.” Testingi ini: Mag-iskedyul sang oras kon san-o ka mangamuyo kag himua ini sa lugar nga indi ka maisturbo. Mangamuyo sing matunog kag sing malawig. Dayon panikasugi nga himua ini pirme.

PAMALANDUNGI ANG TINAGIPUSUON NGA MGA PANGAMUYO NGA MABASA SA BIBLIA

11. Ano ang benepisyo kon pamalandungan naton ang tinagipusuon nga mga pangamuyo nga mabasa sa Biblia? (Tan-awa man ang kahon nga “Pareho Bala sa Ila ang Imo Sitwasyon?”)

¹¹ Madamo sing mabasa sa Biblia parte sa mga pangamuyo kag ambahanon sang mga alagad ni Jehova. Kon pamalandungan mo ini, madamo ka gid sing matun-an. Kon binagbinagon mo kon paano nila ginpabutyag ang ila ginahunahuna kag ginabatyag, mapalig-on ka nga mangamuyo kay Jehova sing tinagipusuon. Posible nga may makita ka nga bag-o nga mga ekspresyon sang pagdayaw nga puede mo gamiton sa imo mga pangamuyo. Kag posible nga may mabasa ka nga mga pangamuyo nga daw pareho gid sa gusto mo ipangamuyo.

12. Samtang ginapamalandungan naton ang mga pangamuyo nga mabasa sa Biblia, ano ang ipamangkot naton sa aton kaugalingon?

¹² Samtang ginapamalandungan mo ang mga pangamuyo nga mabasa sa Biblia, pamangkuta ang imo kaugalingon: ‘Sin-o ang naghambal sini kag ano ang iya kahimtangan? Daw pareho bala sa iya ang akon kahimtangan? Ano ang matun-an ko sa iya pangamuyo?’ Posible nga kinahanglan mo mag-research para masabat ini nga mga pamangkot, pero makabulig gid ini sa imo. Binagbinagon naton ang pila ka halimbawa.

13. Ano ang matun-an naton sa pangamuyo ni Hana? (1 Samuel 1:10, 11) (Tan-awa man ang piktyur.)

¹³ Basaha ang 1 Samuel 1:10, 11. Sang ginpangamuyo ini ni Hana, may duha sia ka daku nga problema. Baw-as sia, kag ginapabudlayan sia sang isa pa ka asawa sang iya bana. (1 Sam. 1:4-7) Kon nabudlayan ka sa imo problema, ano ang matun-an mo sa pangamuyo ni Hana? Malawig sia nga nangamuyo kay Jehova kag ginsugid niya ang tanan niya nga ginabatyag. Pagkatapos sini, naumpawan sia. (1 Sam. 1:12, 18) Maumpawan man kita kon ‘itugyan naton ang aton lulan kay Jehova’ paagi sa pagsugid sa iya kon ano gid ang aton ginabatyag parte sa aton problema.​—Sal. 55:22.

14. (a) Ano pa ang matun-an naton sa halimbawa ni Hana? (b) Kon pamalandungan naton ang aton mga nabasa sa Biblia, paano ini makabulig para mangin tinagipusuon ang aton mga pangamuyo? (Tan-awa ang footnote.)

¹⁴ Pagligad sang pila ka tuig pagkatapos ginbun-ag ni Hana ang iya bata nga si Samuel, gindala niya sia sa mataas nga saserdote nga si Eli. (1 Sam. 1:24-28) Sa tinagipusuon nga pangamuyo ni Hana, ginpasalamatan niya si Jehova bangod nakita niya kon paano ginaproteksionan kag ginaatipan ni Jehova ang iya matutom nga mga alagad.c (1 Sam. 2:1, 8, 9) Ara gihapon ang mga problema ni Hana, pero nagpokus sia sa mga pagpakamaayo ni Jehova. Ano ang matun-an naton sa sini? Kon magpokus kita sa kon paano kita ginabuligan ni Jehova asta subong, mas mabatas naton ang aton mga problema.

15. Kon makaeksperiensia kita sang inhustisya, ano ang matun-an naton sa pangamuyo ni manalagna Jeremias? (Jeremias 12:1)

¹⁵ Basaha ang Jeremias 12:1. Sang nakita ni manalagna Jeremias nga daw malipayon pa ang malain nga mga tawo, nagluya ang iya buot. Naapektuhan man sia sa indi maayo nga pagtratar sa iya sang pareho niya nga mga Israelinhon. (Jer. 20:7, 8) Naintiendihan naton ang iya ginbatyag bangod ginayaguta man kita kag makita naton nga daw maayo pa ang kabuhi sang malain nga mga tawo. Ginpabutyag ni Jeremias kay Jehova ang iya kalain sang buot, pero wala sia nagsiling nga indi matarong si Jehova. Kag sang nakita niya kon paano gindisiplina ni Jehova ang Iya rebelyuso nga katawhan, posible gid nga nagdugang pa gid ang iya pagsalig nga matarong gid si Jehova. (Jer. 32:19) Puede man naton ipabutyag kay Jehova ang aton kalain sang buot sa nagakatabo nga inhustisya, kag dapat kita magsalig nga may himuon gid sia sa nagakaigo nga tion.

16. Kon limitado na lang ang aton mahimo bangod sa aton kahimtangan, ano ang matun-an naton sa isa ka tinapok nga Levinhon? (Salmo 42:1-4) (Tan-awa man ang mga piktyur.)

¹⁶ Basaha ang Salmo 42:1-4. Ini nga ambahanon ginsulat sang isa ka tinapok nga Levinhon. Indi sia makasimba sa templo upod sa iban nga Israelinhon. Ginapakita sang iya salmo kon ano ang iya ginbatyag. Kon indi kita makahalin sa aton balay bangod nagamasakit kita ukon kon napriso kita bangod sa aton pagtuo, maintiendihan naton ang iya ginbatyag. Mahimo nagabag-obag-o ang aton ginabatyag, pero maayo gid kon isugid naton ini kay Jehova paagi sa pangamuyo. Makabulig ini sa aton nga mas mahangpan sing maayo ang aton ginabatyag kag magpokus sa kon ano ang mas importante. Halimbawa, narealisar sang Levinhon nga madamo sia sing bag-o nga kahigayunan para dayawon si Jehova. (Sal. 42:5) Ginpamalandungan man niya kon paano sia ginaatipan ni Jehova. (Sal. 42:8) Kon tinagipusuon kita nga mangamuyo kay Jehova, mas mahangpan naton sing maayo ang aton ginabatyag, mangin kalmado kita, kag mapabakod kita nga magbatas.

17. (a) Ano ang matun-an naton sa pangamuyo ni manalagna Jonas? (Jonas 2:1, 2) (b)  Kon ara kita sa mabudlay nga mga sitwasyon, paano makabulig sa aton ang pila ka ekspresyon sa mga Salmo? (Tan-awa ang footnote.)

¹⁷ Basaha ang Jonas 2:1, 2. Ginpangamuyo ini ni manalagna Jonas sang ara sia sa tiyan sang daku nga isda. Bisan pa wala gintuman ni Jonas si Jehova, sigurado sia nga pamatian sia ni Jehova. Sa iya pangamuyo, gingamit niya ang madamo nga ekspresyon nga makita sa mga Salmo.d Posible gid nga pamilyar sia sa sini nga mga Salmo. Bangod ginpamalandungan niya ini, nakabulig ini sa iya nga makumbinsi nga buligan sia ni Jehova. Sing kaanggid, kon panikasugan naton nga magsaulo sang pila ka teksto sa Biblia, posible gid nga madumduman naton ini kon mangamuyo kita kay Jehova. Paumpawan kita sini kon ara kita sa mabudlay nga mga sitwasyon.

MAGASUOD KA PA GID KAY JEHOVA PAAGI SA PAGPANGAMUYO SA IYA

18-19. Kon daw indi kita kabalo kon ano ang aton ipangamuyo, ano ang ginapasalig sa aton sang Roma 8:26, 27? Maghatag sing halimbawa.

¹⁸ Basaha ang Roma 8:26, 27. Kon grabe gid ang aton kabalaka, may mga tion nga daw indi kita kabalo kon paano ipabutyag kay Jehova ang aton ginabatyag. Pero may makabulig sa aton. Sa sini nga mga tion, ang balaan nga espiritu sang Dios amo ang “nagapangabay” para sa aton. Paano? Gingamit ni Jehova ang iya espiritu para tuytuyan ang mga manunulat sang Biblia nga isulat ang madamo nga pangamuyo. Puede naton gamiton ang mga ekspresyon sa sini nga mga pangamuyo kon daw indi kita kabalo kon paano ipabutyag kay Jehova ang aton ginahunahuna. Tamdon ini ni Jehova nga daw aton ini pangamuyo, kag sabton niya ini.

¹⁹ Amo ini ang nakabulig sa isa ka sister sa Russia nga si Yelena. Gin-aresto sia sa kaso nga pagpangamuyo kag pagbasa sang Biblia. Grabe gid ang iya stress, gani nabudlayan sia mangamuyo. Nagsiling sia: “Nadumduman ko nga kon nabudlayan gid ako kag indi ako kabalo kon ano ang akon ipangamuyo, puede ko basahon ang mga pangamuyo sang mga alagad sang Dios sadto kag tamdon ini ni Jehova nga akon pangamuyo. . . . Nagpaumpaw gid ini sa akon sa tion nga nabudlayan ako.”

20. Kon grabe ang aton stress, paano naton mahanda ang aton hunahuna antes kita mangamuyo?

²⁰ Kon grabe ang aton stress, mabudlay magpokus kon nagapangamuyo kita. Para mahanda naton ang aton hunahuna, puede naton pamatian ang audio recording sang mga Salmo ukon basahon ini sing matunog. Puede man naton isulat kon ano gid ang aton ginabatyag, pareho sa ginhimo ni Hari David. (Sal. 18, 34, 142; mga superskripsion.) Siempre, wala sing estrikto nga paagi kon paano naton mahanda ang aton kaugalingon antes kita mangamuyo. (Sal. 141:2) Ang importante, himua ang paagi nga epektibo para sa imo.

21. Ngaa puede gid kita makapangamuyo sing bug-os tagipusuon?

²¹ Makapaumpaw gid mahibaluan nga bisan wala pa naton nasugid kay Jehova ang aton ginabatyag, naintiendihan na niya kita. (Sal. 139:4) Pero, gusto niya nga isugid naton sa iya ang aton ginabatyag kag nagasalig kita sa iya. Gani, indi ka dapat matahap mangamuyo sa imo Amay sa langit. Gamita ang mga ekspresyon sa mga pangamuyo nga mabasa sa iya Pulong. Mangamuyo sing bug-os tagipusuon. Isugid sa iya kon ngaa nalipay ka ukon nasubuan. Buligan ka gid pirme ni Jehova kay sia ang imo matuod nga Abyan.