Indi Pagkalimti nga Ipangamuyo ang Iban

1. Ngaa masiling naton nga importante kay Jehova ang aton mga pangamuyo?

ISA gid ka dalayawon nga regalo ang pangamuyo. Hunahunaa ini: May mga hilikuton nga ginhatag si Jehova sa mga anghel. (Sal. 91:11) May importante man nga mga responsibilidad nga ginhatag niya sa iya Anak. (Mat. 28:18) Pero bilang “Manugpamati sang pangamuyo,” nagdesisyon si Jehova nga sia mismo ang mamati sa aton mga pangamuyo.​—Sal. 65:2.

2. Ngaa maayo nga halimbawa si apostol Pablo kon parte sa pagpangamuyo para sa iban?

² Puede gid naton masugid kay Jehova ang tanan naton nga kabalaka, pero dapat man naton ipangamuyo ang iban. Ginhimo ina ni apostol Pablo. Halimbawa, ginsulatan niya ang kongregasyon sa Efeso: “Ginasambit ko kamo pirme sa akon mga pangamuyo.” (Efe. 1:16) Ginpangamuyo man ni Pablo ang mga indibiduwal. Halimbawa, ginsilingan niya si Timoteo: “Nagapasalamat ako sa Dios, . . . [kag] wala ko ikaw ginakalimtan sa akon mga pag-ampo sa adlaw kag gab-i.” (2 Tim. 1:3) May mga problema man si Pablo nga ginpangamuyo niya. (2 Cor. 11:23; 12:7, 8) Pero, nagpain sia sang tion para ipangamuyo ang iban.

3. Ngaa malipatan naton kon kaisa nga ipangamuyo ang iban?

³ Kon kaisa, malipatan naton nga ipangamuyo ang iban. Ngaa? May ginsiling ang isa ka sister nga si Sabrinaa nga isa ka rason. Nagsiling sia: “Tama gid kasako sa aton subong. Ang aton lang mga problema ang aton ginapamensar, gani ang aton lang mga kinahanglanon ang aton ginapangamuyo.” Nagakatabo man bala ini sa imo? Kon huo, mabuligan ka sini nga artikulo. Una, ipaathag sini kon ngaa importante nga ipangamuyo naton ang iban. Kag ikaduha, binagbinagon sini ang mga panugda kon paano naton ini mahimo.

NGAA DAPAT NATON IPANGAMUYO ANG IBAN?

4-5. Ngaa masiling naton nga “may gamhanan nga epekto” ang aton pagpangamuyo para sa iban? (Santiago 5:16)

⁴ Ang pagpangamuyo para sa iban “may gamhanan nga epekto.” (Basaha ang Santiago 5:16.) Kon ipangamuyo naton ang iban, may mabulig gid man bala ini sa ila sitwasyon? Huo. Halimbawa, kabalo si Jesus nga ipanghiwala sia ni apostol Pedro, gani nagsiling sia: “Nag-ampo ako nga kabay nga indi magluya ang imo pagtuo.” (Luc. 22:32) Kabalo man si Pablo nga makabulig gid ang pangamuyo. Sang ginpriso sia sa Roma bisan pa wala sia sing sala, ginsulatan niya si Filemon: “Nagalaum ako nga paagi sa inyo mga pangamuyo ibalik ako sa inyo.” (Filem. 22) Amo gid sina ang natabo. Sang ulihi, ginhilway si Pablo kag nakabantala sia liwat.

⁵ Pero, indi buot silingon sini nga kon nagapangamuyo kita, mapilitan si Jehova nga himuon ang aton gusto. Nakita ni Jehova ang kabalaka sang iya mga alagad para sa iban. Kag kon kaisa, ginahimo niya ang ila ginapangabay. Bangod kabalo kita sini, hanuot kita nga nagapangamuyo kay Jehova parte sa isa ka sitwasyon kag nagasalig kita nga solbaron niya ini sa pinakamaayo nga paagi.​—Sal. 37:5; 2 Cor. 1:11.

6. Kon ginapangamuyo naton ang iban, ano ang mabatyagan naton para sa ila? (1 Pedro 3:8)

⁶ Ang pagpangamuyo para sa iban nagabulig sa aton nga magpakita sing “kaluoy.” (Basaha ang 1 Pedro 3:8.) Kon may kaluoy ang isa ka tawo, kabalo sia nga nagaantos ang iban kag gusto gid niya sila buligan. (Mar. 1:40, 41) Ang isa ka gulang nga si Michael nagsiling: “Kon ginapangamuyo ko ang parte sa mga kinahanglanon sang iban, mas maintiendihan ko ang ila mga kabudlayan kag mas ginapalangga ko pa gid sila. Pamatyag ko mas nagasuod ako sa ila bisan pa wala sila kabalo sa sini.” Ang isa pa ka gulang nga si Richard nagsiling man: “Kon ginapangamuyo naton ang iban, mas mapalig-on kita nga buligan sila.” Nagsiling pa sia: “Kon ginabuligan naton ang tawo nga aton ginpangamuyo, daw pareho lang nga nagabulig kita para masabat ang aton pangamuyo para sa iya.”

7. Ngaa mangin husto ang aton pagtamod sa aton mga problema kon ginapangamuyo naton ang iban? (Filipos 2:3, 4) (Tan-awa man ang mga piktyur.)

⁷ Ang pagpangamuyo para sa iban nagabulig sa aton nga mangin husto ang aton pagtamod sa aton mga problema. (Basaha ang Filipos 2:3, 4.) Bangod ginakontrol sang Yawa ang kalibutan, may mga problema gid ang kada isa sa aton. (1 Juan 5:19; Bug. 12:12) Kon pirme naton ginapangamuyo ang iban, ginapahanumdom kita sini nga ‘naeksperiensiahan man sang tanan naton nga kauturan ang amo man nga sahi sang mga pag-antos.’ (1 Ped. 5:9) Ang isa ka payunir nga si Katherine nagsiling: “Sa kada tion nga ginapangamuyo ko ang iban, ginapahanumdom ako sini nga may mga problema man sila. Gani, wala ako masyado nagapokus sa akon mga problema.”

KINAHANGLAN NILA ANG ATON MGA PANGAMUYO

8. Sin-o ang mga puede naton ilakip sa aton mga pangamuyo?

⁸ Sin-o ang mga puede naton ilakip sa aton mga pangamuyo? Puede naton ipangamuyo ang mga utod nga may pareho nga problema, pareho sang mga utod nga nagamasakit, mga pamatan-on nga ginahikayan sa ila eskwelahan kag ginasulay nga maghimo sing malain, ukon ang mga tigulang nga nabudlayan sa ila sitwasyon. Madamo sa aton mga kauturan ang ginapamatukan sang ila pamilya ukon sang gobierno. (Mat. 10:18, 36; Binu. 12:5) May mga kauturan kita nga ginbayaan nila ang ila balay bangod sa kinagamo sa pulitika. Kag may iban naman nga nahalitan sang mga kalamidad. Posible nga indi naton kilala ini nga mga kauturan. Pero kon ipangamuyo naton sila, ginapakita naton nga ginatuman naton ang sugo ni Jesus nga “maghigugmaanay” kita.​—Juan 13:34.

9. Ngaa dapat naton ilakip sa aton pangamuyo ang mga brother nga nagapanguna sa organisasyon ni Jehova pati ang ila mga asawa?

⁹ Puede man naton ilakip sa aton pangamuyo ang mga brother nga nagapanguna sa organisasyon ni Jehova. Nalakip sa sini ang Nagadumala nga Hubon kag ang ila mga kabulig, mga Branch Committee, mga manugtatap sa mga departamento sa mga branch office, mga manugtatap sang sirkito, mga gulang, kag mga ministeryal nga alagad. Madamo sa sini nga mga brother ang may mga problema man sa ila kabuhi, pero nagapanikasog gid sila para buligan kita. (2 Cor. 12:15) Halimbawa, ang isa ka manugtatap sang sirkito nga si Mark nagsiling: “Tigulang na ang akon mga ginikanan, kag may mga balatian sila. Mabudlay gid para sa akon nga malayo ako sa ila. Ginaatipan man sila sang akon utod nga babayi kag sang iya bana, pero nasubuan gid ako kay diutay lang gid ang akon mahimo para sa ila.” Posible wala kita kabalo sang mga problema sining mapisan nga mga brother, pero maayo gid kon ilakip naton sila sa aton mga pangamuyo. (1 Tes. 5:12, 13) Puede man naton ilakip ang ila mga asawa bangod ginasuportahan gid nila ang ila mga bana para makapadayon sila sa ila mga asaynment.

10-11. Nalipay bala si Jehova bisan pa indi espesipiko ang aton mga pangamuyo para sa aton mga kauturan? Ipaathag.

¹⁰ Base sa nabinagbinag naton, masami naton nga ginapangamuyo ang mga utod nga may pareho nga problema. Halimbawa, posible wala kita sing kilala nga utod nga napriso ukon napatyan sang pinalangga, pero ginapangamuyo naton kay Jehova nga buligan kag paumpawan niya ang mga utod nga ara sa sini nga mga sitwasyon. Ang isa ka gulang nga si Donald nagsiling: “Madamo sa aton mga kauturan ang may ginabatas nga mga problema, gani may mga tion nga indi espesipiko ang aton mga pangamuyo kay gusto naton nga malakip naton sila tanan.”

¹¹ Nalipay bala si Jehova sa sini nga mga pangamuyo? Huo. Kay man, wala kita kabalo sang espesipiko nga mga kinahanglanon sang tanan naton nga kauturan. Gani, bisan pa indi espesipiko ang aton mga pangamuyo para sa aton mga kauturan nga nagaantos, nagakaigo ini gihapon. (Juan 17:20; Efe. 6:18) Ginapakita sini nga mga pangamuyo nga ‘ginahigugma naton ang tanan nga kauturan.’—1 Ped. 2:17.

IPANGAMUYO ANG MGA INDIBIDUWAL

12. Paano makabulig ang pag-obserbar para mangin espesipiko ang aton mga pangamuyo?

¹² Mag-obserbar. Magluwas nga puede naton ipangamuyo ang mga kauturan nga may pareho nga problema, puede man naton sambiton sa aton pangamuyo ang ngalan sang mga indibiduwal. May utod bala sa inyo kongregasyon nga may malala nga balatian? May pamatan-on bala nga nagaluya ang buot bangod ginasulay sia sa eskwelahan nga maghimo sing malain? May nagasolo bala nga ginikanan nga nabudlayan sa pagpadaku sa iya bata “sa disiplina kag laygay ni Jehova”? (Efe. 6:4) Kon mag-obserbar ka, mas maintiendihan mo ang sitwasyon sang iban gani mapalig-on ka nga ipangamuyo sila.b—Roma 12:15.

13. Paano naton malakip sa aton mga pangamuyo ang indi naton kilala sa personal?

¹³ Mangamuyo para sa espesipiko nga mga indibiduwal kag sambita ang ila ngalan. Puede naton ini himuon bisan pa indi naton sila kilala sa personal. Halimbawa, may mga utod kita nga napriso sa Crimea, Eritrea, Russia, kag Singapore. Makita mo sa jw.org ang ngalan sang mga utod nga napriso.c Ang manugtatap sang sirkito nga si Brian nagsiling: “Natalupangdan ko nga kon isulat ko ang ngalan sang isa ka utod nga napriso kag sambiton ini sing matunog, madumduman ko sia kag malakip ko sia sa akon mga pangamuyo.”

14-15. Ano ang himuon naton para mangin espesipiko ang aton mga pangabay?

¹⁴ Mangin espesipiko sa imo mga pangabay. Si Michael nga ginsambit kaina nagsiling: “Kon ginabasa ko sa jw.org ang eksperiensia sang mga utod nga napriso, ginaimadyin ko kon ano ayhan ang akon mabatyagan kon ako ang ara sa ila sitwasyon. Sigurado gid nga mabalaka ako sa akon asawa, kag siguraduhon ko nga indi sia pagkulangon sa iya mga kinahanglanon. Paagi sini nga pag-imadyin, makapangamuyo ako sang espesipiko nga mga pangabay para sa mga utod nga napriso nga may asawa.”​—Heb. 13:3, footnote.

¹⁵ Kon panikasugan naton nga imadyinon ang sitwasyon sang aton mga utod nga napriso, makabulig man ini sa aton nga mangin espesipiko sa aton mga pangamuyo. Halimbawa, puede naton ipangamuyo nga kabay pa nga mangin mabuot sa ila ang mga guardia kag tugutan sila sang mga opisyal nga makasimba sing hilway. (1 Tim. 2:1, 2) Puede naton ipangamuyo ang mga kauturan sa kongregasyon sang utod nga napriso, kag sambiton naton nga kabay pa nga mapalig-on sila sa iya halimbawa sang katutom. Puede man naton ipangamuyo nga kabay pa nga makita sang mga indi Saksi ang maayo nga paggawi sang utod kag mangin interesado sila sa kamatuoran. (1 Ped. 2:12) Panikasugan man naton nga imadyinon ang sitwasyon sang aton mga kauturan nga nagabatas sang iban nga problema para mangin espesipiko ang aton mga pangabay para sa ila. Kon mag-obserbar kita, kon sambiton naton ang ngalan sang espesipiko nga mga indibiduwal, kag kon espesipiko ang aton mga pangabay, mapakita naton nga ‘bugana ang aton gugma para sa isa kag isa.’—1 Tes. 3:12.

BALANSE NGA PAGTAMOD SA ATON MGA PANGAMUYO

16. Ano ang balanse nga pagtamod sa aton mga pangamuyo? (Mateo 6:8)

¹⁶ Natun-an naton nga makabulig ang pangamuyo sa sitwasyon sang isa nga ginapangamuyo naton. Pero, dapat mangin balanse ang aton pagtamod sa sini. Kon nagapangamuyo kita, wala naton ginapabalo kay Jehova ang isa ka butang nga wala niya nahibaluan, kag wala naton sia ginahambalan kon paano niya solbaron ang isa ka sitwasyon. Kabalo si Jehova kon ano ang kinahanglan sang iya mga alagad antes pa nila mahibaluan nga kinahanglan gali nila ini ukon antes pa naton ini mahibaluan. (Basaha ang Mateo 6:8.) Ti, ngaa dapat pa naton ipangamuyo ang iban? Magluwas sa mga rason nga ginsambit sa sini nga artikulo, ginahimo naton ini kay gusto naton ipakita nga nagaulikid kita sa iban. Ginapangamuyo naton sila bangod palangga naton sila. Kag nalipay si Jehova kon ginailog sang iya mga alagad ang iya gugma.

17-18. Maghatag sing ilustrasyon nga nagalaragway sang aton mga pangamuyo para sa aton mga kauturan.

¹⁷ Kon kaisa, posible pamatyag naton daw wala man nakabulig ang aton mga pangamuyo. Pero ginapakita sini nga palangga gid naton ang aton mga kauturan, kag ginapabaloran ini ni Jehova. Binagbinaga ini nga ilustrasyon: Imadyina ang isa ka pamilya nga may isa ka bata nga lalaki kag isa ka bata nga babayi. Nagmasakit ang bata nga lalaki, gani nakitluoy ang bata nga babayi sa iya tatay: “Tay, buligi si Toto kay nagalain iya pamatyag.” Palangga sang tatay ang iya bata kag ginaatipan niya sia sing maayo. Gani, may ginahimo na sia para mag-ayo ang iya bata. Pero, sigurado nga nalipay ang tatay nga makita nga palangga gid sang iya bata nga babayi ang iya utod.

¹⁸ Amo gid sina ang gusto ni Jehova nga himuon naton. Gusto niya nga ulikdan naton ang isa kag isa kag ipangamuyo naton ang isa kag isa. Kon himuon naton ini, ginapakita naton nga palangga gid naton ang aton mga kauturan kag ginapabaloran gid ini ni Jehova. (2 Tes. 1:3; Heb. 6:10) Kag suno sa nabinagbinag naton, may mga tion nga makabulig gid sa sitwasyon sang iban ang aton mga pangamuyo para sa ila. Gani, panikasugan gid naton nga ipangamuyo ang isa kag isa.