Naapresyar Nila ang Watchtower ONLINE LIBRARY

Sang Hunyo 28, 2013, may pahibalo sa jw.org nga ang Watchtower ONLINE LIBRARY (WOL) nakalab-ot na sa 100 ka lenguahe. Kon parte sa pag-research, ang WOL daw pareho sa Watchtower Library, nga matigayon sa CD-ROM. Mahimo ini gamiton sa kalabanan nga gadyet nga may Internet, pareho sang kompyuter, laptop, tablet, ukon smartphone. Ang kalabanan nga reperensia sini halin sa tuig 2000 pasaka. Sa madamo nga lenguahe nalakip man ang New World Translation kag Insight on the Scriptures. Maka-research ka man paagi sa pag-type sang isa ka tinaga, prase, ukon kombinasyon sang mga tinaga, kaangay sang mahimo mo sa Watchtower Library. Paagi sa WOL, makapangita ka sing mga teksto ukon impormasyon sa isa ka lenguahe dayon i-synchronize ini sa iban nga lenguahe. Ari ang pila ka ekspresyon sang pagpasalamat sa sining mapuslanon nga galamiton:

“Salamat gid sa WOL. Sang nakita ko ining bag-o nga galamiton sa pagtuon, nalipay gid ako. Wala ako sing hinalung-ong sa computer programming ukon Web design, pero kanami gid sini nga galamiton. Makita gid nga palangga ninyo ang mga tawo, mga kauturan, kag si Jehova. Makita sa desinyo sang WOL nga nagaulikid gid kamo. Wala na ako sing pangayuon pa nga mas maayo nga regalo kag ekspresyon sang gugma kag kaalwan sa akon Amay sa langit, si Jehova. Madamo gid nga salamat.”—A., Argentina.

“Daw indi ako makapati! Sini nga hapon nagbukas ako sing WOL, kag ang Haitian Creole isa sa mga bag-o nga lenguahe diri. Wala gid ako maghunahuna nga matabo ini. Makita man ninyo sa akon sulat nga indi ako makahibalo kon ano ang akon ihambal. Kabay nga pakamaayuhon ni Jehova ang tanan ninyo nga panikasog, kag padayon kamo nga giyahan sang iya balaan nga espiritu.”—D.C., Estados Unidos.