Importante Pa Bala ang Kamatuoran?

Natalupangdan mo bala nga daw nagabudlay kag nagabudlay pa gid nga mahibaluan kon ano ang matuod kag kon ano ang indi? Ang mga tawo subong mas dasig magpati base lang sa ila nabatyagan kag sa ila ginapensar imbes nga base sa kon ano gid ang matuod. Sa bilog nga kalibutan subong, madamo nga tawo ang nagapati nga wala sing kamatuoran.

Ini nga pagpati indi na bag-o. Mga 2,000 ka tuig na ang nagligad, ang Romano nga gobernador nga si Poncio Pilato namangkot kay Jesus: “Ano ang kamatuoran?” (Juan 18:38) Bisan nga wala na ginhulat ni Pilato nga makasabat si Jesus, importante gid ang iya pamangkot. May sabat ang Biblia para mabuligan ka nga mabal-an kon ano ang kamatuoran kag kon ano ang indi. Bangod sa sini nga kalibutan nabudlayan na ang mga tawo nga mabal-an kon ano ang kamatuoran.

May kamatuoran gid bala?

Huo. Gingamit sang Biblia ang tinaga nga “kamatuoran” sa kon ano ang matuod kag pati man sa kon ano ang insakto sa moral. Ginatudlo sini nga si Jehovaa nga Dios amo ang Ginhalinan sang kamatuoran, kag gintawag sia nga “ang Dios sang kamatuoran.” (Salmo 31:5) Ang Biblia nagaunod sang kamatuoran halin sa Dios, kag ginkumparar ini nga kamatuoran sa kapawa, kay makagiya ini sa aton bisan pa sa sarisari nga ginapatihan sang mga tawo sa kalibutan subong.—Salmo 43:3; Juan 17:17.

Paano mo mabal-an ang kamatuoran?

Indi gusto sang Dios nga batunon lang naton ang kamatuoran sa Biblia kag wala na ginapamensaran. Ginaagda niya kita nga usisaon naton ini gamit ang aton ikasarang sa pagpangatarungan imbes nga base sa aton nabatyagan. (Roma 12:1) Gusto niya nga makilala naton sia kag higugmaon gamit ang aton ‘bug-os nga hunahuna,’ kag ginapalig-on niya kita nga pamatud-an nga ang mga natun-an naton sa Biblia amo ang kamatuoran.—Mateo 22:37, 38; Binuhatan 17:11.

Diin naghalin ang pagbinutig?

Ginasugid sang Biblia nga ang pagbinutig nagsugod sa kaaway sang Dios, kay Satanas nga Yawa, nga gintawag sang Biblia nga “amay sang kabutigan.” (Juan 8:44) Ginbutigan niya ang una nga mga tawo parte sa Dios. (Genesis 3:1-6, 13, 17-19; 5:5) Sugod sadto, padayon nga ginapalapta ni Satanas ang kabutigan kag ginatago ang kamatuoran parte sa Dios.—Bugna 12:9.

Ngaa kinaandan na lang ang pagbinutig subong?

Sa aton tion subong, nga ginatawag sang Biblia nga “katapusan nga mga adlaw,” mas naimpluwensiahan kag napatalang pa gid ni Satanas ang mga tawo. Kinaandan nga nagabutig ang mga tawo para mamentaha kag patalangon ang iban. (2 Timoteo 3:1, 13) Kinaandan man ang pagbinutig sa mga relihion subong. Gintagna sang Biblia nga sa aton tion subong, ‘palibutan sang mga tawo ang ila kaugalingon sang mga manunudlo nga nagapakalam sang ila mga dulunggan,’ kag “indi sila magpamati sa kamatuoran.”—2 Timoteo 4:3, 4.

Ngaa importante ang kamatuoran?

Kinahanglan sang mga tawo ang kamatuoran para saligan ang isa kag isa. Kon wala sang pagsalig, indi makapabilin nga mabakod ang pag-abyanay kag komunidad. Ginasiling sang Biblia nga gusto sang Dios nga ang aton pagsimba nabase sa kamatuoran. Nagasiling ini: “Ang mga nagasimba sa [Dios] dapat magsimba sa espiritu kag kamatuoran.” (Juan 4:24) Para mabal-an kon paano makabulig sa imo ang kamatuoran sa Biblia nga mahibaluan ang kabutigan kag indi ka maimpluwensiahan sa sini, basaha ang serye sang mga artikulo nga may tig-ulo “Ngaa Nabudlayan ang Iban nga Higugmaon ang Dios?”

Ngaa gusto sang Dios nga mahibaluan ko ang kamatuoran?

Gusto sang Dios nga mabuhi ka sing wala katapusan, kag kinahanglan mo matun-an ang kamatuoran parte sa iya para mabaton mo ina. (1 Timoteo 2:4) Kon matun-an mo kon ano ang insakto kag sala sa pagtan-aw sang Dios kag sundon mo ini, mangin suod kamo nga mag-abyan. (Salmo 15:1, 2) Para mabuligan ang mga tawo nga matun-an ang kamatuoran, ginpadala sang Dios si Jesus sa duta. Gusto sang Dios nga mamati kita sa panudlo ni Jesus.—Mateo 17:5; Juan 18:37.

Dulaon gid bala sang Dios ang kabutigan?

Huo. Naakig gid ang Dios kon nagabutig ang mga tawo para mamentaha sa iban. Nagpromisa sia nga dulaon ang mga tawo nga padayon nga nagabinutig. (Salmo 5:6) Kon himuon ina sang Dios, tumanon man niya ang iya promisa: “Ang maminatud-on nga mga bibig magapabilin sa wala sing katubtuban.”—Hulubaton 12:19.