Ano ang Nagadumala nga Hubon sang mga Saksi ni Jehova?

Ang Nagadumala nga Hubon isa ka gamay nga grupo sang hamtong nga mga Cristiano nga nagahatag sing direksion sa mga Saksi ni Jehova sa bilog nga kalibutan. May duha sila ka hilikuton:

• Ginadumalahan nila ang paghanda sang base sa Biblia nga instruksion paagi sa mga publikasyon, miting, kag eskwelahan sang mga Saksi ni Jehova.—Lucas 12:42.

• Ginaatipan nila ang mga hilikuton sang mga Saksi ni Jehova sa bilog nga kalibutan paagi sa pagdumala sang amon pagwali sa publiko kag pagdesisyon kon diin gamiton ang mga donasyon.

Ginasunod sang Nagadumala nga Hubon ang halimbawa sang ‘mga apostoles kag mga gulang sa Jerusalem’ sang unang siglo, nga naghimo sing importante nga mga desisyon para sa tanan nga kongregasyon sang mga Cristiano. (Binuhatan 15:2) Pareho sining matutom nga mga lalaki, ang mga miembro sang Nagadumala nga Hubon indi mga lider sang amon organisasyon. Ginasunod nila ang Biblia kag ginakilala nila nga si Jesucristo amo ang gintangdo ni Jehova nga Dios nga Ulo sang kongregasyon.—1 Corinto 11:3; Efeso 5:23.

Sin-o ang mga miembro sang Nagadumala nga Hubon?

Ang mga miembro sang Nagadumala nga Hubon amo sanday Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, kag Jeffrey Winder. Nagaalagad sila sa amon ulong talatapan sa Warwick, New York, U.S.A.

Paano naorganisar ang Nagadumala nga Hubon?

Ang Nagadumala nga Hubon nagporma sang anom ka komite para pangunahan ang lainlain nga bahin sang amon hilikuton, kag ang tagsa ka miembro nagaalagad sa isa ukon pila ka komite.

• Coordinators’ Committee: Nagatatap sang legal nga mga butang kag nagahulag kon may mga trahedya, kon may mga miembro kami nga ginahingabot bangod sang ila pagtuluuhan, kag kon may iban pa nga emerhensia nga nagaapektar sa mga Saksi ni Jehova.

• Personnel Committee: Nagadumala sa mga kahimusan para sa mga miembro sang pamilya Bethel.

• Publishing Committee: Nagadumala sang pag-imprinta kag pagpadala sang mga literatura sang Biblia kag pagtukod sang mga tilipunan sang pagsimba, opisina sang translation, kag mga pasilidad sang sanga.

• Service Committee: Nagatatap sang amon pagwali sang “maayong balita sang Ginharian.”—Mateo 24:14.

• Teaching Committee: Nagapanguna sa paghanda sang mga instruksion parte sa pagsimba nga ginahatag paagi sa mga miting, eskwelahan, kag mga audio kag video program.

• Writing Committee: Nagapanguna sa paghanda sang mga instruksion parte sa pagsimba nga ginahatag paagi sa nasulat nga pormat kag sa amon website, kag pagdumala sang translation.

Luwas sa sini nga mga komite, ang Nagadumala nga Hubon nagamiting man kada semana para hambalan ang mga kinahanglanon sang organisasyon. Sa sini nga mga miting, ginaistoryahan nila ang ginasiling sang Biblia, kag ginatuman ang giya sang balaan nga espiritu sang Dios, kag ginatinguhaan nga mag-isa sa ila desisyon.—Binuhatan 15:25.

Sin-o ang kabulig sang Nagadumala nga Hubon?

Masaligan sila nga mga Cristiano nga nagabulig sa mga komite sang Nagadumala nga Hubon. (1 Corinto 4:2) Gin-asayn sila sa komite nga bagay gid sa ila ikasarang kag eksperiensia, kag nagatambong sila sa miting sang komite kada semana. Bisan pa wala sila nagahimo sing mga desisyon, ang mga kabulig nagahatag sing importante nga laygay kag impormasyon, nagapatuman sang desisyon sang komite, kag regular nga naga-monitor sang resulta sini. Ginaasayn man sila sang Nagadumala nga Hubon nga magbisita sa mga kauturan sa lainlain nga bahin sang kalibutan ukon maghatag sing bahin sa mga okasyon pareho sang annual meeting ukon gradwasyon sang Gilead.