Lalaki nga nagauyat sing naputos nga regalo

Ano ang Ginasiling sang Biblia Parte sa Paghatag?

Ang sabat sang Biblia

Ang Biblia nagapalig-on nga maghatag sing kinabubut-on kag may husto nga motibo. Ini nga klase sang paghatag nagapalipay indi lang sa nagabaton kundi sa nagahatag man. (Hulubaton 11:25; Lucas 6:38) Si Jesus nagsiling: “Mas malipayon ang nagahatag sangsa nagabaton.”—Binuhatan 20:35.

San-o ang paghatag makapalipay sa Dios?

Ang paghatag makapalipay kon ginhimo ini sing kinabubut-on. “Maghimo ang kada isa suno sa ginpamat-od niya sa iya tagipusuon,” siling sang Biblia, “indi may pagpangalag-ag ukon napilitan, kay ginahigugma sang Dios ang nagahatag sing malipayon.”—2 Corinto 9:7, footnote.

Ang tinagipusuon nga paghatag bahin sang “porma sang relihion” nga ginabaton sang Dios. (Santiago 1:27, footnote) Ang tawo nga maalwan nga nagabulig sa iban nagapangabudlay upod sa Dios, kag ginatamod Niya ini nga pagpahulam sa iya. (Hulubaton 19:17) Ang Biblia nagatudlo nga ang Dios mismo ang magabalos sa naghatag.—Lucas 14:12-14.

San-o ang paghatag indi makapalipay sa Dios?

Kon sala ang motibo. Ari ang pila ka halimbawa:

Para dayawon sang iban.—Mateo 6:2.
Para makabaton sing balos.—Lucas 14:12-14.
Para baklon ang kaluwasan.—Salmo 49:6, 7.

Kon nagasuporta ini sa mga hilikuton ukon batasan nga ginadumtan sang Dios. Halimbawa, sala nga hatagan sing kuarta ang isa kon gamiton niya ini sa pagsugal, pagdroga, ukon pag-inom. (1 Corinto 6:9, 10; 2 Corinto 7:1) Sala man nga hatagan sing kuarta ang isa nga makasarang sa pagsuporta sa iya kaugalingon pero wala nagatinguha.—2 Tesalonica 3:10.

Kon mapabay-an mo na ang imo pamilya. Ang Biblia nagatudlo nga ang ulo sang pamilya dapat mag-aman sing kinahanglanon sa iya panimalay. (1 Timoteo 5:8) Indi husto nga ang ulo sang pamilya tama kaalwan sa iban pero napabay-an niya ang iya pamilya. Naakig si Jesus sa mga nagapangindi sa pag-aman sa ila tigulang nga mga ginikanan kag nagasiling nga ang ila pagkabutang “isa ka dulot nga ginhalad sa Dios.”—Marcos 7:9-13.

Mga bersikulo sa Biblia parte sa paghatag

Hulubaton 11:25: “Ang tawo nga maalwan mangin hamungaya, kag ang bisan sin-o nga nagapaumpaw sa iban paumpawan man.”

Buot silingon: Ang paghatag makapalipay indi lang sa nagabaton kundi sa nagahatag man.

Hulubaton 19:17: “Ang isa nga nagakaluoy sa kubos nagapahulam kay Jehova, kag bayaran Niya ang iya ginahimo.”

Buot silingon: Para sa Dios, pareho nga daw may utang sia sa mga nagabulig sa mga tawo nga nagakinahanglan, kag nagpromisa sia nga pakamaayuhon niya ini nga kaalwan.

Mateo 6:2: “Kon maghatag kamo sing dulot tungod sa kaluoy, indi kamo magpatunog sing trumpeta kaangay sang ginahimo sang mga salimpapaw . . . agod dayawon sila sang mga tawo.”

Buot silingon: Ang aton paghatag indi para dayawon kita sang iban.

Binuhatan 20:35: “Mas malipayon ang nagahatag sangsa nagabaton.”

Buot silingon: Ang tinagipusuon nga paghatag nagapalipay.

2 Corinto 9:7: “Maghimo ang kada isa suno sa ginpamat-od niya sa iya tagipusuon, indi sing paganot ukon napilitan, kay ginahigugma sang Dios ang nagahatag sing malipayon.”

Buot silingon: Ang kinabubut-on nga paghatag nagapalipay sa Dios.