Ang Daku Pa nga Kalipay sa Paghatag—Naeksperiensiahan Mo Bala Ini?

ANG mga suga sa hulot nga ginhiwatan sing sinalusalo nagdulomdulom diutay. Ang musika naghipos. Ang mga nagasaot nag-untat. Ang kapawa sang spot­light gintuon sa tangkas sang naputos nga mga kahon. May dalagku nga mga kahon kag may diutay nga mga kahon. May kuwadrado kag may tipulon, may rosas kag may asul, may duag-pilak kag may duag-bulawan. Ang matahom nga mga laso nagapuni sini tanan. Ang ginanerbios nga mga kamot sang ginakunyag nga nobya mahalungon nga nagabukas sang putos sang tagsa ka regalo, samtang ang nobyo hipos nga nagabulig.

May mga toaster kag mga ­blender para sa kusina; china nga mga pinggan kag mga kubyertos, mga mantil sa lamesa kag terno nga mga napkin para sa hulot-kalan-an. Madamo sing tuwalya kag seben, kag sing mga putos sa katre kag mga punda sang ulunan nga magadugay tubtob nagakabuhi sila. May bastante nga mga relo para sa tagsa ka hulot sa balay kag may mga libro para sa pangluto nga madamo sing resipe sa pagbusog sa panabor sang tagsa ka mahuyugon sa manamit nga mga kalan-on.

Samtang ginabuksan ang mga regalo may mga “ooh” kag mga “aah” kag ang bag-ong kasal tinagipusuon nga nagapabutyag sing pasalamat. Nabatyagan nila ang kalipay sa pagbaton gikan sa ila nga nakahibalo sang kalipay sa paghatag.

Ang mga kasal, mga anibersaryo, mga Krismas, mga kaadlawan, kag ang madamo pa nga selebrasyon mga kinabatasan tanan sang katilingban nga sa diin ang paghatag sing regalo ginapaabot kag isa ka ginabaton nga bahin sang mga rito. Apang bangod ginapaabot ini sa madamo nga pungsod, masami nga nangin lulan ini sa manughatag nga nagalikaw sa kalipay sa paghatag. Apang, may yara kinaugali nga paghatag, ang paghatag sang wala ginapaabot. Nagapahalipay ini sa ginahatagan, diutay man ukon daku ang regalo, kag ang nagahatag makabatyag sing labing daku nga kalipay.

Matuod, ang may kapin amo ang may ikasarang sa paghatag sing kapin. Halimbawa, si An­drew Car­negie nga industriyalista sang Amerika sa ika-19 nga siglo amo kuntani ang una nga bilyonaryo sang iya pungsod. Sa baylo, ginpanghatag niya ang 90 porsiento sang iya manggad sa sulod sang 18 ka tuig nga panahon. Sang ginpaandaman sia sang iya sekretaryo nga malapit na maubos ang iya personal nga kapital, sia malipayon nga nagsabat, “Nalipay ako nga mabatian ina toto, sige lang.” Sa amo sadto nga panahon, si ­John D. Rock­e­fel­ler nagpanghatag sing $750 milyones sa iya bug-os nga kabuhi. Ginsulat man nga ang manugkanta nga si Elvis Pres­ley “nanghatag sing dinosena nga Cadil­lac” kag nalipay gid sa paghimo sini.

Indi Bag-o nga Kinabatasan

Ang pagregalo isa ka kinabatasan nga halos subong ka dugay sa tawo. Kutob sang una gid nga panahon nangin importante ini sa kabuhi sang mga tawo. Ang tigulang nga alagad ni Abraham nagregalo sing mga huluyason kay Rebecca sa tapos makita ang pamatuod nga napili sia ni Jehova nga mangin asawa ni Isaac. Ang iban pa nga ginpanghatag amo ang ‘bilidhon nga mga inugpuni sa iya utod nga lalaki kag sa iya iloy.’ (Genesis 24:13-22, 50-53) Sa tapos sang pag-antos ni Job ginregalohan sia sang iya mga utod nga mga lalaki kag mga babayi kag sang iya mga abyan—ang tagsatagsa naghatag “sing isa ka bilog nga kuwarta kag ang tagsatagsa sing isa ka singsing nga bulawan.”—Job 42:10, 11.

Sang ang wala mahingadli nga rayna sang Sheba naglakbay pa Jerusalem agod magduaw kay Hari Solomon napahulag sia bangod sang kaalam nga ginhatag sang Dios kay Solomon kag nagsiling sia nga ang iya mga alagad malipayon bangod makabati sila kag makabenepisyo gikan sa sining pinakamaalam nga tawo. Napahulag gid sia sa bagay nga ginregalohan niya si Solomon sing 120 ka talento nga bulawan (nagabili sing $50,000,000) subong man sing bilidhon nga mga bato kag malahalon nga mga balsamo. Mahimo nga naubos niya ang bahandian sa iya diutay nga ginharian bangod sadtong daku nga kantidad, apang wala sing duhaduha nga nabatyagan sang rayna ang kalipay sa paghatag. Si Solomon nakabatyag man sing kalipay sa paghatag kay ginhatagan man niya ang rayna sing regalo nga labaw pa sa kantidad sang mga bahandi nga ginhatag sang rayna sa iya.—2 Cronica 9:12; American Translation, Moffatt.

Ang unang mga Cristiano naghatag sing mga regalo ukon mga amot para sa ila imol nga kauturan. Si apostol Pablo nagsulat tuhoy sa mga Cristiano sa Macedonia kag Acaya, nga, bisan pa imol sila, gingamit nila ang ila kaugalingon labaw sa ila masarangan sa paghatag sa ila mga kauturan nga nagakinahanglan sa Judea. “Nahamuot sila sa paghimo sang amo,” siling ni Pablo.—Roma 15:26, 27.

Mga Regalo nga “Nagahambal”

Sa karon, maathag nga ang paghatag sing regalo isa gihapon ka sadsaran nga tawhanon nga paagi sa pagtukod kag sa pagpalig-on sa higot sang gugma kag pag-abyanay agod pahibaluon ang iban nga kita nagaulikid.

May yara mga regalo nga ginahatag sang tiayon sa iya tiayon, agod magsiling lamang sing, “Ginahigugma ko ikaw”—isa ka kahon sang dulse ukon isa ka pongpong sang mga bulak. May yara mga regalo nga ginahatag sang mga anak sa ila mga ginikanan. Kag sin-o nga mahigugmaon nga mga ginikanan ang wala nagahatag pirme sing regalo sa ila mga anak? May yara mga regalo agod lugpayan ang nagabakho nga tagipusuon, agod lipayon ang ginapung-awan nga kalag, agod magsiling “mag-ayo ka na kuntani,” agod magpabutyag sing apresasyon sa kaluoy nga ginpakita kag sa pagkamaabiabihon nga ginpakita, ukon agod magsiling lamang, “Nalipay gid ako sa tion nga ginhinguyang ko upod sa inyo.”

May yara mga regalo sa mga imol, sa mga biktima sang kalamidad nga mahimo wala gid naton makita kag mahimo nga gikan sa ila wala gid kita makabaton sing pasalamat. Isa ka basket sang prutas para sa nagamasakit, tanom para sa mga nagaistar sa mga balay sang mga tigulang, isa ka alahas para sa palangga nga abyan—diutay nga mga butang nga nagakahulugan sing daku. Ang paghatag nga may kalipay nagagikan sa tagipusuon. Amo ini ang mga regalo nga sa masami ginapakamahal gid.

Sa tanan nga okasyon sa paghatag, wala na sing kitaon pa sang sa panahon sang Krismas sa bug-os nga kalibutan. Isa ini ka kinasadya sang paghatag sing mga regalo nga naghalin man sa malayo nga nagligad. Isa ini ka selebrasyon nga ginakahadlukan sang madamo kag malangkagon nga ginapaabot sang iban. Mahimo ini magkahulugan sing kinatuhayan sa ulot sang kapahamakan sa pinansial kag sang kabuganaan. Bisan pa nagabayluhanay sing mga regalo ang mga mag-abyanay, ang rito mahimo nga magpasuod pa sa ila ukon magabulag sa ila. Ining wala nagakasinanto nga bahin sang paghatag sing regalo sa panahon sang Krismas pagabinagbinagon sa masunod nga artikulo.

[Laragway sa pahina 2]

Ang mga Hampanganan Makalilingaw, APANG IKAW ANG PINAKAMATAHOM NGA REGALO SANG IMO ANAK!