Ginatahod Mo Bala ang Dulot sang Dios sa Pagpamuad?

“SAMTANG nagahigda ako sa matig-a kag makitid nga lamesa sa hulot-balataan,” siling ni Joanne, “nabatyagan ko ang tuman nga kasakit.” Ang doktor nagahugas sang iya kamut apang nga daw wala nagadali. ‘Doktor,’ singgit sang nars, ‘nagaguwa na ang bata.’ Dalidali nga nagkadto sa lamesa, nagsiling sia: ‘Bun-a pa.’ Daw indi na maagwanta ang kasakit! Kag pagkatapos?

“‘Nagapanginbulahan ako sa imo,’ siling sang doktor, ‘isa ka matahom nga babayi ang imo bata.’ Ang kasakit nga bag-o ko lang nabatyagan daw nadula sang ang mainit-init pa kag malum-ok nga lawas ginkulan malapit sa akon dughan. Ginauyatan sang akon bana ang akon kamut, gintan-aw namon ining matahom diutay nga milagro nga bunga sang gugma.”

Ang dulot sang Dios nga pagpamuad isa ka butang nga kalatingalahan. Pagkatapos sang mga dekada nga pagkadoktor, si Dr. Joseph Krimsky nagsulat: “Ang pagpanamkon kag pagbun-ag mga milagro nga indi naton mahangpan . . . Ang emosyon nga gugma kag daku nga kalipay nga nagapahanabo sang paghiusa sang germ cells sang lalaki kag babayi isa ka misteryo . . . nga indi mapaathag sang siensia.”—The Doctor’s Soliloquy.

Ang Paathag sang Biblia

‘Ang emosyon nga gugma kag daku nga kalipay’ nga ginaagom sang mag-asawa isa ka dulot halin sa Dios. Para sa minyo nga mga lalaki, ang Biblia nagasiling: “Magkalipay sa asawa sang imo pagkapamatan-on . . . Kag magpabihag ka sa gihapon sa iya gugma.” (Hulubaton 5:18, 19) Sing maathag, gintuyo sang Dios nga ang kaangtanan sa sekso sa ulot sang bana kag asawa magaamot sa mainit kag mapinadayunon nga higut. Ang kabataan nga resulta sa sina nga paghiusa mahimo nga may maayo nga panugod sa kabuhi. Sa amo ang katuyoan sang Dios para sa mga tawo nga pun-on ang duta matuman sa maayong paagi.—Genesis 1:27, 28.

Apang madamo ang wala nagaagom sing maayo nga panugod sa kabuhi. Ang iban nagdaku sa palibot nga malaw-ay sing moral kag ang iban naghalin sa guba nga mga puloy-an. Ano ang sayop? Ang Biblia nagapaathag kon paano ang nahaunang mag-asawa nagrebelde batok sa Dios kag naglapas sa iya sugo. Ang ila mga anak ginpanamkon sa tapos magpakasala yadtong mag-asawa. (Genesis 3:1–4:1) Busa ang ila mga anak nagpanubli sang pagkadihimpit kag pagkanahuyog sa sala. (Roma 5:12) Bangod sini, ang dulot sang Dios nga pagpamuad gin-abusohan.

Ginsakdag bala sang mga Klerigo ang Pagtamod sang Biblia?

Sa karon, ang abuso sa sekso naggrabe na gid. Ngaa? Sang nagligad nga siglo, minilyon ang nagapaabot sa mga iglesia sang Cristiandad sing panuytoy sa moral. Gingamit bala sang klero ang ila impluensia sa pagpauswag sang pagtahod sa pagpamuad?

“Ang Protestante nga mga iglesia sang panguna nga tradisyon—ang Luterano, Reformed, Anglikano, Congregational, Metodista, kag madamong Baptist nga mga komunidad—madali nga nagpasibu sang ila kaugalingon . . . sa ideya sang ebolusyon,” paathag sang The New Encyclopædia Britannica. Apang binagbinaga: Ang ebolusyon bala isa ka butang nga ‘mapasibuan’ sadtong nagarepresentar sa Biblia? Indi, bangod ang ebolusyon isa ka teoriya nga wala sing labot sa moralidad. Ginapanghiwala sini ang pagkamanunuga sang Dios kag ang pagkinahanglan sang tawo sing kaluwasan gikan sa sala kag kamatayon.—Genesis 2:7, 18, 19; 1 Corinto 15:21, 22.

Ang Iglesia Katolika nag-ugyon man sa teoriya sang ebolusyon. Sang 1950, ginpalig-on ni Papa Pio XII ang ebolusyonaryo nga pagpanalawsaw sang iya ensikliko nga Humani generis. Sang 1982, 11 ka sientipiko ang gin-agda sa Siudad sang Batikano para hambalan ang ebolusyon sa idalom sang pagpanguna sang presidente sang Pontifical Academy of Sciences. Pagkatapos, ang pinakamataas nga sientipikong hubon sang Iglesia Katolika nagbalhag sang libro nga nagaunod sang pangangkon nga “ang linya nga nagapadulong sa tawo, chimpanzee kag gorilya daw naghalin sa isa ka katigulangan . . . 5 tubtob 7 ka milyon ka tuig ang nagligad.”

Ang teoriya sang ebolusyon nagasikway sang Biblia, nga nagasiling nga ang tawo kag mga sapat gintuga sing tuhay ‘suno sa ila mga sahi.’ (Genesis 1:20-27) Kag makawiwili nga ang Biblia nagtagna: “Bangod ang kalautan magabuad, ang gugma sang kalabanan magabugnaw.” (Mateo 24:3, 11, 12, 33) Nakaamot bala ang ebolusyon sa ‘pagmuad sang kalautan’?

Ginsakdag bala sang Ebolusyon ang Malaut nga Moral?

Paagi sa pagbinagbinag sa teoriya sang ebolusyon, madamong mga klerigo ang nagpakadiutay sang pagsalig sa Biblia. ‘Kon ang kasaysayan sa Genesis indi matuod, kamusta naman ang iban pa sa Biblia?’ pamangkot sang mga tawo. Kag bisan ang mga klerigo nagahangkat sa kon ano ang ginasiling sang Biblia nahanungod sa sekso sa wala pa makasal kag homoseksuwalidad, kag subong man ang pagtamod sang Biblia tuhoy sa kabuhi sang wala pa matawo.—Exodo 20:13, 14; 21:22, 23; Levitico 18:22; 1 Corinto 6:9, 10.

May isa pa ka paagi nga sa diin ang teoriya sang ebolusyon nakaamot sa kalautan. Sining karon lang, sa temprano nga programa sang telebisyon sa gab-i, minilyon sa “Cristianong” pungsod ang nakalantaw sa sugilanon tuhoy sa amay nga naglugos sa iya anak nga babayi. Suno sa balasahon nga Science 85, ang pagbantabanta nahimo nga “wala sing tawo ang masumbong nga balasulon sa iya ginhimo sang ang sobra nga kaluyag makusog.” Minilyon ka tawo, siling sang magasin, ang handa nga mag-ugyon sa sining pagtamod. Ngaa? Bangod nagapati sila nga ang “tawo suod katama sa sapat.” Ang mga tawo, siling sining sientipiko nga balasahon, “nagbaton sa pagtamod ni Darwin nga ‘Yara gihapon sa tawo sa dagway sang iya lawas ang indi mapanas nga agi sang iya manubo nga ginhalinan.’”

Ang ebolusyonaryo nga panghunahuna nag-apektar sing serioso sa pagtamod sang tawo nahanungod sa Biblia. Nagdala bala ini sing mga pagpakamaayo? Wala. Ang pagsikway sa maayong mga talaksan sang Biblia nahanungod sa moralidad nagresulta sa makatalagam nga pagdugang sang aborsion kag balatian nga ginapalaton paagi sa sekso. Subong man, dugang kag dugang nga mga tawo ang nabun-ag sa mga ginikanan nga wala makasal, nga wala gid makahibalo sang pagpakamaayo sang malipayon nga pagkabuhi sang pamilya.

Paano Ikaw Mabuligan sang Biblia?

Ang Biblia nagapahayag nga ang Manunuga sang tawo, si Jehova, isa ka Dios sang kaluoy. (Salmo 103:10-13) Luyag niya nga buligan ang mga makasasala nga malab-ot ang iya mga talaksan sa moral. (Isaias 1:18; 55:6-9) Halimbawa, binagbinaga ang dumaan nga siudad sang Colosas, diin kinaandan ang sekso sa wala pa makasal kag ang panglahi. “Sa ila sini kamo anay naggawi sang nagkabuhi kamo sa ila,” siling sang isa ka sulat sa Biblia nga ginpatuhoy sa mga Cristiano sa Colosas. (Colosas 3:5-7) Apang, paagi sa pagpalig-on sang Pulong sang Dios kag paagi sa gahom sang iya balaan nga espiritu, madamong mga taga-Colosas ang naghimo sing maayo nga pagbalhin sa ila estilo sang pagkabuhi. Nangin matuod sila nga mga Cristiano.

Binagbinaga man ang mga pumuluyo sa dumaan nga Corinto. Nagapuyo sila sa imoral nga siudad diin madamo ang mga homoseksuwal kag mga bigaon. “Ang iban sa inyo subong anay sina,” siling sang isa ka sulat sa Biblia nga napatuhoy sa mga Cristiano nga nagapuyo didto. “Apang ginhugasan kamo, ginpakabalaan kamo, ginpakamatarong kamo sa ngalan ni Ginuong Jesucristo kag sa espiritu sang aton Dios.”—1 Corinto 6:9-11; tan-awa man ang Lucas 11:13.

Nagakatabo man bala ining mga butang sa karon? Huo, kay sa tapos mabasa ang nagligad nga mga guwa sining magasin, linibo ang nabuligan sa pagpahisuno sang ila kabuhi sa Biblia. Binagbinaga ang halimbawa sang isa ka tin-edyer sa Aprika nga ginlugos sang bata pa sia. Sang ulihi, nadalahig sia sa tanan nga sahi sang imoral nga pagginawi, lakip ang lesbianismo. “Ang kalibutan mahimo magahatag sing kalipay sa makadali,” siling niya, “apang daw kaangay ini sang droga nga nagaresulta sa walay paglaum kag walay pulos nga balatyagon.” Sa kasubo, nagtinguha sia sa paghikog, apang sa sining ital-ital nga panag-on may butang nga natabo nga nagbalhin sang iya kabuhi. Nagsugod sia sa pagtambong sa mga miting sang mga Saksi ni Jehova kag nagbaton sang laygay nga basahon adlaw-adlaw ang Biblia. Naghatag ini sa iya sing kusog nga malandas ang imoral nga mga buhat. “Maayo na karon katama ang akon pamatyag,” siling niya. “Makatilingala gid kon ano ang mahimo ni Jehova para sa isa ka tawo.”

Ang mga pamatan-on nga nagdaku sa malipayon nga Cristianong pamilya may bentaha. Ang Cristianong mga ginikanan dapat magahimo sang tanan nga masarangan nila sa pagpaathag sa ila kabataan sang mga kalatingalahan sang pagpamuad. (Efeso 6:4) Sa amo ina nga mga kabataan mabuligan sa pagtahod sa ila mga organo sa pagpamuad kag indi magagamit sini subong mga hampanganan. Ang pag-abuso sa kaugalingon amo sing masami ang nahauna nga tikang padulong sa labi pa ka serioso nga dagway sang imoralidad.a

Karon, kinahanglan gid sing hilingagawon nga landason ang imoral nga mga buhat. “Bangod sina nga mga butang,” paandam sang Biblia, “ang kasingkal sang Dios magaabot.” (Colosas 3:5, 6) Huo, ang kaluoy ni Jehova may mga latid. Isa man sia ka Dios sang katarungan. (Deuteronomio 32:4) Sa tapos matagna ang modernong-adlaw nga ‘pagmuad sang kalautan,’ si Jesus nagsiling: “Nian magaabot ang dakung kapipit-an nga wala pa sing subong nga nahanabo kutob sa ginsugoran sang kalibutan tubtob karon, wala, kag indi na gid mahanabo.” (Mateo 24:11, 12, 21) Ini nga buhat sang Dios magatapos sa kalautan kag magapakilala sa matarong nga bag-ong kahimusan.—Salmo 37:9-11, 29.

[Footnote]

[Laragway sa pahina 5]

Ang kabataan nagakinahanglan sing malipayon nga palibot sa pamilya agod makatigayon sing maayong panugod sa kabuhi

[Laragway sa pahina 7]

Ang mahinadlukon-sa-Dios nga mga ginikanan dapat magabulig sa kabataan sa pagkuha sing husto nga pagtamod tuhoy sa pagpamuad