Pamangkot sang mga Pamatan-on
Ano ang Himuon Ko Para Manamian Ako sa Pagbasa sing Biblia?
Ano ang imo iskedyul sa pagbasa sing Biblia? (Butangi sing tsek kon san-o)
□ Kada adlaw
□ Kada semana
□ Iban pa ․․․․․
Sugpuni ini nga sentence.
Wala ako nanamian sa pagbasa sing Biblia bangod . . . (Butangi sing tsek ang imo rason)
□ Makatalaka ini
□ Makalilibog ini
□ Indi ko ini maintiendihan
□ Iban pa ․․․․․
WALA ka bala nanamian sa pagbasa sing Biblia? Kon amo, mahimo pareho kamo sang nabatyagan sang 18 anyos nga si Will, nga nagsiling, “Daw makatalaka basahon ang Biblia.” Pero nagdugang sia, “Ina kon indi ka kabalo sang maayo nga paagi sa pagbasa sini.”
Ngaa dapat mo tun-an kon paano ang pagbasa sing Biblia? Bueno, gusto mo bala mahibaluan kon paano
◼ makahimo sing maayo nga mga desisyon?
◼ makakita sing maayo nga mga abyan?
◼ masarangan ang kabudlayan?
Nagaunod ang Biblia sang tulad hiyas nga mga laygay nga mapuslanon sa sini nga mga topiko kag sa iban pa. Matuod, mabudlay ang pagpangita sini nga mga hiyas. Ang pagpangita sini daw pareho lang sa pagpangita sing natago nga manggad: Kon mas mabudlay, mas exciting ang pagpangita!—Hulubaton 2:1-6.
Paano mo makita ang natago nga mga manggad sa Biblia? Hatagan ka sing ideya sang kahon nga guluntingon sa tuo kon paano mo basahon ang Biblia kag, sa likod sini, kon paano mo pasunuron ang pagbasa sini. Tilawi man ang mga suhestyon nga manamian mo sa masunod nga mga pahina.
Ang iban pa nga artikulo sang “Young People Ask” makita sa Web site nga www.watchtower.org/ype
Kon may Internet ka, puede mo mabasa ang Biblia sa www.watchtower.org/e/bible
BINAGBINAGA INI
Ginasiling nga nagadepende sa pagtinguha mo ang kadakuon sang imo makuha.
◼ Daw ano ini ka matuod sa pagbasa sing Biblia?
◼ San-o mo mahimo ang personal nga pagbasa sing Biblia?
[Kahon/Retrato sa pahina 23]
KON PAANO MO BASAHON ANG BIBLIA
Antes ka magbasa . . .
◼ Siguraduha nga malinong ang imo palibot para makakonsentrar ka.
◼ Mangamuyo nga mahangpan mo ini.
Samtang nagabasa ka . . .
◼ Maggamit sang mga mapa kag mga piktyur sang mga hitabo sa Biblia agod mabuligan ka nga masundan kag mapamensar kon ano ang nagakatabo.
◼ Hibalua ang kahimtangan, kag analisaha ang mga detalye.
◼ Tan-awa ang mga footnote kag mga cross-reference.
◼ Pamangkuta ang imo kaugalingon, subong sang:
MGA IMPORMASYON: San-o ini natabo? Sin-o ang naghambal sini? Sin-o ang ginahambalan sini?
KAHULUGAN: Paano ko ini ipaathag sa iban?
KAPUSLANAN: Ngaa ginpasulat ni Jehova nga Dios ini nga hitabo sa Biblia? Ano ang ginapakita sini sa personalidad ukon kon ano ang ginahimo ni Jehova parte sa sini nga kahimtangan? Ano nga mga leksion ang maaplikar ko sa akon kabuhi?
Sa tapos ka magbasa . . .
◼ Mag-research pa gid. Gamita ang mga publikasyon sang mga Saksi ni Jehova, pareho sang Insight on the Scriptures kag “All Scripture Is Inspired of God and Beneficial.”
◼ Mangamuyo liwat. Sugiri si Jehova kon ano ang imo natun-an kag kon paano mo ini gamiton. Pasalamati sia sa iya Pulong, ang Biblia.
[Kahon/Retrato sa pahina 24]
PAANO MO PASUNURON ANG PAGBASA SING BIBLIA?
Mga pililian . . .
□ Basahon halin sa Genesis asta Bugna.
□ Basahon sing pasunod suno sa petsa sang pagsulat ukon sang mga hitabo.
□ Kada adlaw, magbasa sang lainlain nga bahin sang Biblia.
Lunes: Makahalawathawat nga kasaysayan (Genesis asta sa Ester)
Martes: Ang kabuhi kag mga panudlo ni Jesus (Mateo asta sa Juan)
Mierkoles: Mga Cristiano sang una (Binuhatan)
Huebes: Mga tagna kag pagsulundan sa moral (Isaias asta sa Malaquias, kag Bugna)
Biernes: Makapalig-on nga mga binalaybay kag ambahanon (Job, Salmo, Ambahanon ni Solomon)
Sabado: Maalamon nga pagkabuhi (Hulubaton, Manugwali)
Domingo: Mga sulat para sa mga kongregasyon (Roma asta sa Judas)
Ano man ang imo paagi sa pagpasunod sa pagbasa, siguraduha lang nga matandaan mo kon diin ka na nayon! Butangi sang ✔ ang tagsa ka kapitulo nga natapos mo na basa. Ukon puede mo man isulat kon ano na ang nabasa mo.
Guntinga ini, kag ibutang sa imo Biblia!
[Kahon/Diagram sa pahina 24]
HATAGI SING KABUHI ANG IMO GINABASA!
Mangita sing paagi nga mangin makawiwili ang imo pagbasa. Halimbawa:
□ Himui sing family tree ang listahan sang mga ngalan.
□ Maghimo sing mga diagram. Halimbawa, samtang ginabasa mo ang parte sa matutom nga mga karakter, iangot ang ila mga kinaiya kag binuhatan sa kon ano nga mga pagpakamaayo ang ila nabaton.—Hulubaton 28:20.
[Diagram]
Abyan sang Dios
↑ Matinumanon
↑ Matutom
↑ ↑
Abraham
□ Magdrowing sang mga larawan nga nagapakita sang mga hitabo.
□ Magdrowing sang pasunod nga mga larawan parte sa pagpasunod sang mga hitabo. Ipaathag kon ano ang nagakatabo sa tagsa ka larawan.
□ Maghimo sing miniature, kaangay sang gamay nga arka ni Noe.—Kon paano ini himuon, tan-awa ang Enero 2007 nga Magmata!, pahina 22.
□ Magbasa sing matunog upod sa imo mga abyan ukon miembro sang pamilya. Suhestyon: Mag-asayn sang manug-asoy kag ang iban naman amo ang magabasa sang mga ginahambal sang mga karakter sa Biblia.
□ Magpili sing isa ka hitabo kag himua ini nga daw nagabalita ka. Ireport ang mga hitabo sa lainlain nga anggulo paagi sa “pag-interbyu” sa mga karakter kag sa mga nakasaksi sa hitabo.
□ Magpili sing isa ka hitabo kon diin ang karakter nakahimo sing malain nga desisyon kag mamensar sang lain nga katapusan sang istorya! Halimbawa, binagbinaga ang pagpanghiwala ni Pedro kay Jesus. (Marcos 14:66-72) Ano tani ang mas maayo nga ginhimo ni Pedro sang nabutang sia sa alang-alang?
□ Magtan-aw ukon mamati sa mga narekord nga mga drama sa Biblia.
□ Maghimo sang imo kaugalingon nga drama. Ilakip ang mga leksion nga matun-an sa sini.—Roma 15:4.
IDEYA: Idrama ini upod sa pila mo ka abyan.
[Kahon/Retrato sa pahina 25]
AGOD MANAMIAN KA MAGBASA
◼ Maghimo sang goal ukon tulumuron! Isulat sa idalom ang petsa kon san-o mo luyag sugdan ang imo pagbasa sing Biblia.
․․․․․
◼ Magpili sang isa ka bahin sang Biblia nga nanamian mo. (Tan-awa ang kahon nga “Paano Mo Pasunuron ang Pagbasa sing Biblia?”) Dayon, isulat sa idalom kon diin nga bahin sang Biblia ang luyag mo unahon.
․․․․․
◼ Indi kinahanglan nga malawig ang imo pagbasa sa umpisa. Ang 15 minutos nga pagbasa sing Biblia mas maayo sangsa wala ka nagabasa. Isulat sa idalom kon daw ano kalawig nga puede ka magbasa sing Biblia.
․․․․․
Suhestyon: Dapat may Biblia ka nga ginagamit mo lang sa pagtuon. Sulati ini sing mga impormasyon. Markahi ang mga teksto nga nanamian mo gid.
[Kahon/Mga Retrato sa pahina 25]
ANO ANG MASILING SANG IBAN NGA PAMATAN-ON
“Antes ako magtulog, nagabasa ako sing Biblia sing makadali kada gab-i. Bangod sini, may maayo ako nga pamensaron asta nga matulugan ako.”—Megan.
“Sa sulod sang 15 minutos, ginapamensaran ko sing maayo ang isa ka bersikulo. Ginabasa ko ang tanan nga footnote, ginapangita ang tanan nga cross-reference, kag naga-research man ako. Kon kaisa indi ko ini matapos sa sulod sang 15 minutos, pero madamo gid ako sing matun-an sa sini nga paagi!”—Corey.
“Isa ka bes, nabasa ko ang Biblia sa sulod lang sang 10 ka bulan. Bangod sini, naalalangot ko ang iban nga mga bahin sang Biblia nga wala ko gid mahimo sadto.”—John.
[Kahon sa pahina 25]
PUEDE KA MAKAPILI!
□ Magpili sang isa ka hitabo. Nagaunod ang Biblia sing matuod nga mga hitabo. Magpili sang isa ka hitabo nga nanamian mo, kag basaha ini halin sa puno asta matapos.
Suhestyon: Agod madugangan ang imo matun-an sa hitabo, tan-awa ang pahina 292 sang Questions Young People Ask—Answers That Work, Volume 2, nga libro nga ginhimo sang mga Saksi ni Jehova.
□ Magpili sing isa ka Ebanghelyo. Basaha ang Mateo (ang pinakauna nga Ebanghelyo), Marcos (nga nagaunod sang madamong makahalawathawat nga mga eksena), Lucas, (nga nagatalupangod sa pangamuyo kag mga babayi), ukon ang Juan (nga diutay lang ang ginkobrehan kon ikumparar sa iban nga Ebanghelyo).
Suhestyon: Antes ka magbasa, tan-awa sing makadali ang mga impormasyon parte sa tulun-an sang Biblia kag sa manunulat sini agod mas maintiendihan mo kon ngaa pinasahi ini sangsa iban nga Ebanghelyo.
□ Magpili sang isa ka salmo. Halimbawa:
Kon nagabatyag ka nga nagaisahanon ukon wala sing abyan, basaha ang Salmo 142.
Kon naluyahan ka sing buot bangod sa imo mga kaluyahon, basaha ang Salmo 51.
Kon parte naman sa kapuslanan sang mga pagsulundan sang Dios, basaha ang Salmo 73.
Suhestyon: Maghimo sing listahan sang mga salmo nga nakapalig-on gid sa imo.
[Kahon sa pahina 26]
TINGUHAI PA GID
◼ Hibalua ang kahimtangan. Hibalua kon san-o, sa diin, kag kon ano ang mga kahimtangan sang mga hitabo sa teksto nga imo ginabasa.
Halimbawa: Basaha ang Ezequiel 14:14. Mga pila ang edad ni Daniel sang ginsambit sia ni Jehova nga maayo nga halimbawa upod nanday Noe kag Job?
Clue: Ginrekord ang kapitulo 14 sang Ezequiel mga lima ka tuig sa tapos madala si Daniel sa Babilonia, nga mahimo gid nga tin-edyer pa sia.
Importante nga leksion: Bata pa bala katama si Daniel para matalupangdan ni Jehova ang iya katutom? Ano ang rason ngaa ginpakamaayo sia sang Dios? (Daniel 1:8-17) Paano ka mabuligan sang halimbawa ni Daniel sa paghimo sing maayo nga mga desisyon?
◼ Analisaha ang mga detalye. Kon kaisa, importante ang isa ukon duha lang ka tinaga.
Halimbawa: Ipaanggid ang Mateo 28:7 sa Marcos 16:7. Ngaa nalakip ni Marcos ang detalye nga sa indi madugay mapakita si Jesus sa mga disipulo ‘kag kay Pedro’?
Clue: Ini nga hitabo wala masaksihan ni Marcos, ginsugiran lang sia ni Pedro.
Importante nga leksion: Ngaa napalig-on gid si Pedro sang mahibaluan niya nga luyag sia makita liwat ni Jesus? (Marcos 14:66-72) Paano ginpakita ni Jesus nga matuod sia nga abyan ni Pedro? Paano mo mailog si Jesus kag mangin matuod nga abyan?
◼ Mag-research pa gid. Basaha ang mga paathag sang aton mga literatura sa Biblia.
Halimbawa: Basaha ang Mateo 2:7-15. San-o ginbisita sang mga astrologo si Jesus?
Clue: Tan-awa ang pahina 31 sang Enero 1, 2008, nga Ang Lalantawan nga balasahon sang mga Saksi ni Jehova.
Importante nga leksion: Paano ginhatagan ni Jehova sing materyal nga mga kinahanglanon ang pamilya ni Jesus sang ara sila sa Egipto? Paano ang imo pagsalig sa Dios makabulig sa imo sa tion sang kabudlayan?—Mateo 6:33, 34.