Mga Tion kag mga Panahon nga Ginabuot ni Jehova

“Indi inyo ang paghibalo sang mga tion ukon mga panahon nga ginpat-od sang Amay sa iya kaugalingon nga pagbulut-an.”​—⁠BINUHATAN 1:⁠7.

1. Paano ginsabat ni Jesus ang nagadalahig sing tion nga mga pamangkot sang iya mga apostoles?

ANO pa bala ang makatarunganon nga mahimo sang mga “nagapanghayhay kag nagabakho sa tanan nga kalangil-aran nga ginahimo” sa Cristiandad kag sa bug-os nga duta sangsa mamangkot kon san-o laglagon ining malaut nga sistema kag buslan sang matarong nga bag-ong kalibutan sang Dios? (Ezequiel 9:​4; 2 Pedro 3:13) Ang mga apostoles ni Jesus namangkot sa iya sing nagadalahig sing tion nga mga pamangkot antes sia mapatay kag pagkatapos sang iya pagkabanhaw. (Mateo 24:​3; Binuhatan 1:6) Apang, subong sabat, wala si Jesus maghatag sa ila sing paagi kon paano kalkulahon ang mga petsa. Sang isa ka tion naghatag sia sa ila sing salalakot nga tanda, kag sang isa pa gid ka tion nagsiling sia nga ‘indi ila ang paghibalo sang mga tion ukon mga panahon nga ginpat-od sang Amay sa iya kaugalingon nga pagbulut-an.’​—⁠Binuhatan 1:⁠7.

2. Ngaa masiling nga indi sa tanan nga tion nahibaluan ni Jesus ang tion nga gintalana sang iya Amay para sa mga butang nga mahanabo sa tion sang katapusan?

² Bisan pa si Jesus amo ang bugtong nga Anak ni Jehova, indi sa tanan nga tion nahibaluan niya ang tion nga gintalana sang iya Amay para sa mga butang nga mahanabo. Sa iya tagna tuhoy sa katapusan nga mga adlaw, mapainubuson nga ginkilala ni Jesus: “May kaangtanan sa sinang adlaw kag oras wala sing nakahibalo, bisan pa ang mga anghel sang mga langit ukon ang Anak, kundi ang Amay lamang.” (Mateo 24:36) Handa si Jesus sa paghulat sing mapailubon kon san-o ipahayag sa iya sang iya Amay ang eksakto nga tion agod laglagon ining malaut nga sistema sang mga butang.⁠a

3. Ano ang matun-an naton gikan sa mga sabat ni Jesus sa mga pamangkot tuhoy sa katuyuan sang Dios?

³ Duha ka butang ang mahangpan sa pagsabat ni Jesus sa mga pamangkot nga may kaangtanan sa kon san-o mahanabo ang mga butang subong katumanan sang katuyuan sang Dios. Una, nga si Jehova may natalana nga tion; kag ikaduha, nga sia lamang ang nagatalana sini, kag indi mapaabot sang iya mga alagad nga hatagan sila sing eksakto abanse nga impormasyon tuhoy sa iya mga tion kag mga panahon.

Ang mga Tion kag mga Panahon ni Jehova

4. Ano ang mga kahulugan sang Griegong mga tinaga nga ginbadbad “mga tion” kag “mga panahon” sa Binuhatan 1:7?

⁴ Ano ang buot silingon sang “mga tion” kag “mga panahon”? Ang ginpamulong ni Jesus sa Binuhatan 1:7 nagaunod sing duha ka sahi sang tion. Ang Griegong tinaga nga ginbadbad “mga tion” nagakahulugan sing “kalawigon sang tion,” isa ka hut-ong sang tion (malawig ukon malip-ot). Ang “mga panahon” amo ang badbad sang tinaga nga nagapatuhoy sa isa ka natalana ukon natangdo nga tion, isa ka partikular nga panahon, ukon panag-on, nga ginatandaan sang pila ka butang. Tuhoy sa sining duha ka orihinal nga tinaga, si W. E. Vine nagsiling: “Sa Binuhatan 1:​7, ‘ginpat-od sang Amay sa Iya kaugalingon nga pagbulut-an’ ang mga tion (chronos), ang kalawigon sang tion, kag ang mga panahon (kairos), mga dag-on nga ginatandaan sang pila ka hitabo.”

5. San-o ginpahibalo ni Jehova si Noe sang Iya katuyuan nga laglagon ang malaut nga kalibutan, kag ano ang duha ka misyon nga ginhimo ni Noe?

⁵ Antes sang Anaw, nagtalana ang Dios sing 120 ka tuig nga latid sang tion para sa malaut nga kalibutan nga ginpaluntad sang mga tawo kag sang rebelyuso nga mga anghel nga nagpakatawo. (Genesis 6:​1-3) Ang diosnon nga si Noe 480 anyos sadto nga tion. (Genesis 7:6) Wala sia sing anak kag nagpabilin nga subong sini sing 20 ka tuig pa. (Genesis 5:32) Pagligad sang malawig nga tion, sang hamtong na ang mga anak ni Noe kag may mga asawa na, ginpahibalo sang Dios si Noe sang Iya katuyuan nga dulaon ang kalautan sa duta. (Genesis 6:​9-13, 18) Sa gihapon, bisan pa gintulinan si Noe sing duha ka komisyon nga magtukod sing arka kag magbantala sa mga tawo sadto, wala ginpahayag ni Jehova sa iya ang iya iskedyul sang tion.​—⁠Genesis 6:​14; 2 Pedro 2:⁠5.

6. (a) Paano ginpakita ni Noe nga gintugyan niya kay Jehova ang tuhoy sa tion? (b) Paano naton mailog ang huwaran ni Noe?

⁶ Sa sulod sang mga dekada​—⁠ayhan tunga sa siglo​—⁠“ginhimo ni Noe ang suno sa tanan nga ginsugo sang Dios sa iya.” Ginhimo ini ni Noe “bangod sang pagtuo,” nga wala mahibal-i ang eksakto nga petsa. (Genesis 6:​22; Hebreo 11:7) Wala ginsugid sa iya ni Jehova ang eksakto nga tion sang mga butang nga mahanabo tubtob isa ka semana antes magsugod ang Anaw. (Genesis 7:​1-5) Bangod sang bug-os nga pagsalig kag pagtuo ni Noe kay Jehova, gintugyan niya sa Dios ang tuhoy sa tion. Kag pat-od nga nagpasalamat gid si Noe sang mabatyagan niya ang pag-amlig ni Jehova sa tion sang Anaw kag sang ulihi magguwa sa arka sa isa ka natinluan nga duta! Bangod sang kaanggid nga paglaum sa kaluwasan, indi bala kita dapat man magpakita sing pagtuo sa Dios?

7, 8. (a) Paano nagluntad ang mga pungsod kag ang mga kagamhanan sa kalibutan? (b) Sa anong paagi ‘ginatalana [ni Jehova] ang natangdo nga mga tion kag ang mga dulunan sang puluy-an sang mga tawo’?

⁷ Sa tapos sang Anaw, gintalikdan sang kalabanan nga kaliwat ni Noe ang matuod nga pagsimba kay Jehova. Agod magpabilin sila sa isa ka duog lamang, nagsugod sila sa pagtukod sing isa ka siudad kag sing isa ka torre para sa butig nga pagsimba. Nagdesisyon si Jehova nga tion na nga magpahilabot. Gingumon niya ang ila hambal kag “gikan [sa Babel] ginpaaplaag sila sa kadaygan sang bug-os nga duta.” (Genesis 11:⁠4, 8, 9) Sang ulihi, ang grupo sang mga hambal nangin mga pungsod, ang iban sini nagsakop sa iban nga mga pungsod kag naggahom sa mga rehiyon, kag naggahom pa gani sa bug-os nga kalibutan.​—⁠Genesis 10:⁠32.

⁸ Nahisanto sa katumanan sang iya katuyuan, ang Dios kon kaisa nagbutang sing dulunan sa tunga sang mga pungsod kag nagtalana sing tion kon san-o ang isa ka pungsod magagahom sa lokal ukon sa bug-os nga kalibutan. (Genesis 15:​13, 14, 18-21; Exodo 23:​31; Deuteronomio 2:​17-22; Daniel 8:​5-7, 20, 21) Ginpatuhuyan ni apostol Pablo ini nga sahi sang mga tion kag mga panahon ni Jehova sang ginsilingan niya ang Griego nga mga intelihente sa Atenas: ‘Ang Dios nga naghimo sang kalibutan kag sang tanan nga butang nga yara sa sini . . . naghimo gikan sa isa ka tawo sing tagsa ka pungsod sang mga tawo, sa pagpuyo sa bug-os nga nawong sang duta, kag gintalana niya ang natangdo nga mga panag-on kag ang mga dulunan sang puluy-an sang mga tawo.’​—⁠Binuhatan 17:⁠24, 26.

9. Paano ‘ginbag-o [ni Jehova] ang mga tion kag mga panahon’ tuhoy sa mga hari?

⁹ Wala ini nagakahulugan nga si Jehova amo ang may salabton sa tanan politikal nga mga pagpamihag kag mga pagbag-o sa tunga sang mga pungsod. Apang, mahimo sia makapasilabot kon luyag niya agod tumanon ang iya katuyuan. Sa amo, ang manalagna nga si Daniel nga makasaksi sang kalaglagan sang Babilonianhon nga Kagamhanan sa Kalibutan kag sang pagbulos sa sini sang Medo-Persia, nagsiling tuhoy kay Jehova: “Sia nagabag-o sang mga tion kag mga panahon, nagapahalin sing mga hari kag nagapahamtang sing mga hari, nagahatag sing kaalam sa mga maalam kag sing ihibalo sa mga may paghantop.”​—⁠Daniel 2:⁠21; Isaias 44:​24⁠–45:⁠7.

“Nagahilapit Na ang Tion”

10, 11. (a) Daw ano ka abanse gintalana ni Jehova ang tion kon san-o niya hilwayon ang mga kaliwat ni Abraham gikan sa pagkaulipon? (b) Ano ang nagapahangop nga wala mahibaluan sang mga Israelinhon kon san-o gid sila hilwayon?

¹⁰ Kapin sa apat ka siglo sa wala pa, gintalana ni Jehova ang eksakto nga tion kon san-o niya pakahuy-an ang hari sang Egiptohanon nga Kagamhanan sa Kalibutan kag hilwayon ang mga kaliwat ni Abraham gikan sa pagkaulipon. Sa pagpahayag sang iya katuyuan kay Abraham, ang Dios nanaad: “Kilalaha sing matuod nga ang imo binhi mangin isa ka dumuluong sa duta nga indi ila, kag sila magaalagad sa ila, kag sakiton sila sa sulod sang apat ka gatos ka tuig. Apang hukman ko ang pungsod nga alagdon nila, kag sa tapos sina magaguwa sila nga may madamo nga pagkabutang.” (Genesis 15:⁠13, 14) Sa iya pagsumaryo sang maragtas sang Israel, nga gin-asoy sa atubangan sang Sanhedrin, ginpatuhuyan ni Esteban ining 400-ka-tuig nga panahon kag nagsiling: “Sang nagahilapit na ang tion nga matuman ang saad nga dayag nga ginpamulong sang Dios kay Abraham, ang katawhan nagdamo kag nagbuad sa Egipto, tubtob nga nagtindog sa Egipto ang isa pa ka hari, nga wala makakilala kay Jose.”​—⁠Binuhatan 7:⁠6, 17, 18.

¹¹ Gin-ulipon sining bag-o nga Paraon ang mga Israelinhon. Ang tulun-an sang Genesis wala pa sadto masulat ni Moises, apang mahimo gid nga ang mga saad ni Jehova kay Abraham ginpaliton paagi sa hambal ukon sa nasulat nga porma. Walay sapayan sini, wala sing nagapakita nga ang mga Israelinhon sadto may nahibaluan nga impormasyon agod makalkular nila ang eksakto nga petsa kon san-o sila hilwayon gikan sa pagpigos. Nahibaluan sang Dios kon san-o niya hilwayon sila, apang maathag nga wala ini ginpahibalo sa nagaantos nga mga Israelinhon. Aton mabasa: “Natabo sa sulod sadtong madamo nga mga adlaw nga ang hari sang Egipto napatay sang ulihi, apang ang mga anak sang Israel padayon nga nagpanghayhay bangod sang kahiulipnan kag nagtuaw sing reklamo, kag ang ila pagpangayo sing bulig nakalambot sa matuod nga Dios bangod sang kahiulipnan. Ginpamatian sang ulihi sang Dios ang ila pag-ugayong kag gindumdom sang Dios ang iya katipan kay Abraham, kay Isaac kag kay Jacob. Gani gintan-aw sang Dios ang mga anak sang Israel kag ang Dios naghatag sing igtalupangod.”​—⁠Exodo 2:⁠23-25.

12. Paano ginpakita ni Esteban nga si Moises naghikot abanse sa tion nga gintalana ni Jehova?

¹² Ining indi pagkahibalo sang eksakto nga tion kon san-o hilwayon ang Israel makita man sa pag-asoy ni Esteban. Nagahambal tuhoy kay Moises, sia nagsiling: “Sang sia kap-atan ka tuig, nag-abot sa iya tagipusuon nga duawon ang iya mga kauturan, ang mga anak sang Israel. Kag sang nakita niya ang isa sa ila nga ginalupig, gin-apinan niya sia kag gintimalos niya ang ginlupig paagi sa paglampos sa Egiptohanon. Naghunahuna sia nga mahangpan sang iya mga kauturan nga ang Dios nagahatag sa ila sing kaluwasan paagi sa iya kamot, apang wala nila mahangpan ini.” (Binuhatan 7:​23-25) Naghikot diri si Moises nga abanse sing 40 ka tuig sa gintalana nga tion sang Dios. Ginpakita ni Esteban nga si Moises naghulat sing 40 ka tuig pa antes ‘ginhatag [sang Dios] sa mga Israelinhon ang kaluwasan paagi sa iya kamot.’​—⁠Binuhatan 7:​30-36.

13. Paano ang aton kahimtangan nagaanggid sa kahimtangan anay sang mga Israelinhon antes sila ginhilway gikan sa Egipto?

¹³ Bisan pa “nagahilapit na ang tion para sa katumanan sang saad” kag inang eksakto nga tion natalana na sang Dios, si Moises kag ang bug-os nga Israel dapat magpakita sing pagtuo. Dapat sila maghulat sa gintangdo nga tion ni Jehova, nga mahimo gid indi nila makalkular sing abanse. Kumbinsido man kita nga nagahilapit na ang aton kahilwayan gikan sa malaut nga sistema sang mga butang karon. Nahibaluan naton nga nagakabuhi kita sa “katapusan nga mga adlaw.” (2 Timoteo 3:​1-5) Gani indi bala kita dapat mangin handa sa pagpakita sang aton pagtuo kag hulaton ang tion nga gintalana ni Jehova para sa iya daku nga adlaw? (2 Pedro 3:​11-13) Nian, kaangay ni Moises kag sang mga Israelinhon, magaamba kita sing mahimayaon nga ambahanon sang kaluwasan, para sa kadayawan ni Jehova.​—⁠Exodo 15:​1-19.

‘Sang Mag-abot ang Tion’

14, 15. Paano naton nahibaluan nga ang Dios nagtalana sing tion para sa pagkari sang iya Anak sa duta, kag ano ang ginbantayan sang mga manalagna kag bisan sang mga anghel?

¹⁴ Nagtalana si Jehova sing indi mabag-o nga tion kon san-o ang iya bugtong nga Anak magakari sa duta subong Mesias. Si Pablo nagsulat: “Sang mag-abot ang kabug-usan sang tion, ginpadala sang Dios ang iya Anak, nga natawo sa isa ka babayi kag natawo sa idalom sang kasuguan.” (Galacia 4:⁠4) Katumanan ini sang saad sang Dios nga magapadala sia sing isa ka Binhi​—⁠‘ang Silo; nga pagatumanon sang katawhan.’​—⁠Genesis 3:​15; 49:⁠10.

¹⁵ Ang mga manalagna sang Dios​—⁠bisan gani ang mga anghel​—⁠nagbantay sang “panahon” kon san-o ang Mesias magaabot sa duta kag sa amo mahimo maluwas ang makasasala nga katawhan. “Tuhoy sa sini mismo nga kaluwasan,” siling ni Pedro, “naghimo sing maukod nga pag-usisa kag mahalungon nga pagpanalawsaw ang mga manalagna nga nagtagna tuhoy sa dibagay nga kaayo nga para sa inyo. Padayon nga gin-usisa nila kon ano nga partikular nga panahon ukon ano nga sahi sang panahon ang ginapakita sang espiritu nga yara sa ila tuhoy kay Cristo sang nagapanaksi ini sing una tuhoy sa mga pag-antos ni Cristo kag tuhoy sa kahimayaan nga magasunod sa sini. . . . Ang mga anghel nagahandum sa pagtan-aw sa sini gid nga mga butang.”​—⁠1 Pedro 1:​1-5, 10-⁠12.

16, 17. (a) Paagi sa ano nga tagna ginbuligan ni Jehova ang mga Judiyo sang una nga siglo nga magpaabot sa Mesias? (b) Paano ang tagna ni Daniel nakaapektar sa pagpaabot sang mga Judiyo sa Mesias?

¹⁶ Paagi sa iya manalagna nga si Daniel​—⁠isa ka tawo nga may dimationg nga pagtuo​—⁠naghatag si Jehova sing tagna tuhoy sa “kapituan ka semana.” Paagi sa sini nga tagna, mahibaluan sang mga Judiyo sang una nga siglo nga malapit na ang pag-abot sang ginsaad nga Mesias. Sa bahin, ang tagna nagsiling: “Kutob sa pagguwa sang sugo nga ipasag-uli kag patindugon liwat ang Jerusalem tubtob sa pagkari sang Mesias nga Lider, mangin kapituan ka semana, subong man kan-uman kag duha ka semana.” (Daniel 9:​24, 25) Ang Judiyo, Katoliko, kag Protestante nga mga iskolar sa kabilugan nagaugyon nga ang “mga semana” nga ginasambit diri nagakahulugan sing mga semana sang mga tuig. Ang 69 ka “semana” (483 ka tuig) sang Daniel 9:​25 nagsugod sang 455 B.⁠C.⁠E., sang gintugutan sang Persianhon nga si Hari Artajerjes si Nehemias nga “ipasag-uli kag patindugon liwat ang Jerusalem.” (Nehemias 2:​1-8) Natapos ini pagligad sang 483 ka tuig​—⁠sang 29 C.⁠E., sang si Jesus ginbawtismuhan kag ginhaplasan sing balaan nga espiritu, sa amo nangin Mesias, ukon Cristo.​—⁠Mateo 3:​13-17.

¹⁷ Wala mahibalui kon bala ang mga Judiyo sang una nga siglo nakahibalo kon san-o gid nagsugod ang 483 ka tuig. Apang sang ginsugdan ni Juan Bautista ang iya ministeryo, “ang mga tawo may ginapaabot kag ang tanan nagapangatarungan sa ila tagipusuon tuhoy kay Juan: ‘Sia ayhan ang Cristo?’ ” (Lucas 3:15) Ginaangot sang iban nga mga iskolar sa Biblia ini nga pagpaabot sa tagna ni Daniel. Subong komento sa sining bersikulo, si Matthew Henry nagsulat: “Ginasugiran kita diri . . . kon paano ang mga tawo, bangod sang ministeryo kag pagbawtismo ni Juan, naghunahuna sa Mesias, kag naghunahuna nga ang Mesias malapit na mag-abot. . . . Ang kapituan ka semana sang Daniel nagahingapos na karon.” Ang Pranses nga Manuel Biblique, nanday Vigouroux, Bacuez, kag Brassac nagsiling: “Nahibaluan sang mga tawo nga ang kapituan ka semana sang mga tuig nga gintalana sang Daniel nagahingapos na; wala sing bisan sin-o ang nakibot sang mabatian nila si Juan Bautista nga nagapahibalo nga malapit na ang ginharian sang Dios.” Ang Judiyong iskolar nga si Abba Hillel Silver nagsulat nga suno sa “popular nga kronolohiya” sadto nga adlaw, “ang Mesias ginpaabot sa ulot sang ika-25 kag ika-50 nga tuig sang una nga siglo C.⁠E.”

Napasad sa mga Hitabo—Indi sa Pagkalkular sing Tion

18. Samtang ang tagna sang Daniel nakabulig sa mga Judiyo agod mahibaluan nila kon san-o ang tion nga paabuton nila ang Mesias, ano ang labing makakumbinsi nga pamatuod sang pagka-Mesias ni Jesus?

¹⁸ Bisan pa mahimo nga ang kronolohiya nakabulig anay sa mga Judiyo nga mahaumhaum kon san-o maabot ang Mesias, ginapakita sang mga natabo sadto nga wala ini makabulig agod makumbinsi ang kalabanan sa ila tuhoy sa pagka-Mesias ni Jesus. Mga isa ka tuig na lang antes sia mapatay, ginpamangkot ni Jesus ang iya mga disipulo: “Sin-o bala ako suno sa ginasiling sang kadam-an?” Nagsabat sila: “Si Juan Bautista; apang ang iban nagsiling, si Elias, kag ang iban pa gid nagsiling, nga nabanhaw ang isa sang dumaan nga mga manalagna.” (Lucas 9:​18, 19) Wala kita sing rekord nga si Jesus nagkutlo sa tagna tuhoy sa simbuliko nga mga semana agod magpamatuod nga sia ang Mesias. Apang sang isa ka okasyon, sia nagsiling: “May panaksi ako nga daku pa sangsa kay Juan, kay ang mga hilikuton mismo nga ginapatuman sa akon sang akon Amay, ang mga hilikuton mismo nga akon ginahimo, nagapanaksi nahanungod sa akon nga ako ginpadala sang Amay.” (Juan 5:36) Sa baylo sang ginpahayag nga kronolohiya, ang pagbantala ni Jesus, ang iya paghimo sing mga milagro, kag ang mga natabo sang mapatay sia (ang milagruso nga pagdulom, ang pagkapihak sang kurtina sa templo, kag ang linog) nagpamatuod nga sia ang Mesias nga ginpadala sang Dios.​—⁠Mateo 27:​45, 51, 54; Juan 7:​31; Binuhatan 2:⁠22.

19. (a) Paano mahibaluan sang mga Cristiano nga malapit na ang kalaglagan sang Jerusalem? (b) Ngaa nagakinahanglan gihapon sing daku nga pagtuo ang unang mga Cristiano nga nalagyo gikan sa Jerusalem?

¹⁹ Sing kaanggid, sang mapatay si Jesus, ang unang mga Cristiano wala ginhatagan sing paagi kon paano kalkulahon ang nagapakari sadto nga katapusan sang Judiyong sistema sang mga butang. Matuod, ang tagna sang Daniel tuhoy sa simbuliko nga mga semana nagsambit sang kalaglagan sadto nga sistema. (Daniel 9:​26b, 27b) Apang matabo ini kon matapos na ang “kapituan ka semana” (455 B.⁠C.⁠E.⁠–​36 C.⁠E.). Buot silingon, sa tapos mangin mga sumulunod ni Jesus ang unang mga Gentil sang 36 C.⁠E., ang Daniel kapitulo 9 wala na maghatag sa mga Cristiano sing kronolohiko nga impormasyon. Para sa ila, mga hitabo, kag indi kronolohiya, ang magapatimaan nga ang Judiyong sistema malapit na matapos. Yadtong mga hitabo, nga gintagna ni Jesus, nagsugod sa paghingapos sang 66 C.⁠E., sang ginsalakay sang Romano nga mga soldado ang Jerusalem kag pagkatapos nag-isol sila. Naghatag ini sing kahigayunan sa matutom kag nagapamati nga mga Cristiano sa Jerusalem kag sa Judea nga “magpalagyo sa mga bukid.” (Lucas 21:​20-22) Bangod wala sila sing kronolohiya nga magatuytoy sa ila, ang unang mga Cristiano sadto wala makahibalo kon san-o laglagon ang Jerusalem. Daku gid nga pagtuo ang ginpakita nila agod biyaan ang ila mga puluy-an, mga uma, kag mga pandayan kag agod indi magbalik sa Jerusalem sing mga apat ka tuig tubtob nagbalik ang Romano nga hangaway sang 70 C.⁠E. kag ginlaglag ang Judiyong sistema!​—⁠Lucas 19:​41-44.

20. (a) Paano kita makabenepisyo gikan sa mga huwaran nanday Noe, Moises, kag sang unang-siglo nga mga Cristiano sa Judea? (b) Ano ang pagahambalan naton sa masunod nga artikulo?

²⁰ Kaangay nanday Noe, Moises, kag sang unang-siglo nga mga Cristiano sa Judea, makasalig man kita karon nga itugyan kay Jehova ang mga tion kag mga panahon. Ang aton pagtuo nga nagakabuhi kita sa tion sang katapusan kag nga ang kaluwasan malapit na nasandig, indi sa kronolohiko nga kalkulasyon lamang, kundi sa mga butang nga matuod nga nagakatabo subong katumanan sang mga tagna sang Biblia. Dugang pa, bisan pa nagakabuhi kita sa tion sang presensia ni Cristo, kinahanglan gihapon nga magpakita kita sing pagtuo kag padayon nga magbantay. Dapat kita padayon nga magkabuhi nga nagakalangkag sa pagpaabot sa makakulunyag nga mga butang nga gintagna sang Kasulatan. Amo ini ang tema sang masunod nga artikulo.

[Footnote]

Subong Repaso

◻ Tuhoy sa mga tion kag mga panahon ni Jehova, ano ang ginsugid ni Jesus sa iya mga apostoles?

◻ Daw ano ka abanse nga nahibaluan ni Noe kon san-o masugod ang Anaw?

◻ Ano ang nagapakita nga wala mahibalui ni Moises kag sang mga Israelinhon kon san-o gid sila hilwayon gikan sa Egipto?

◻ Paano kita makabenepisyo gikan sa mga huwaran sang Biblia nga nagadalahig sang mga tion kag mga panahon ni Jehova?

[Retrato sa pahina 11]

Bangod sang pagtuo ni Noe, gintugyan niya kay Jehova ang tuhoy sa tion