Nagahulat nga May “Malangkagon nga Pagpaabot”

“Kay ang malangkagon nga pagpaabot sang tinuga nagahulat sang pagpahayag sang mga anak sang Dios.”​—⁠ROMA 8:⁠19.

1. Ano ang pagkaanggid sang kahimtangan sang mga Cristiano karon kag sang mga Cristiano sang una nga siglo?

ANG kahimtangan sang matuod nga mga Cristiano karon nagaanggid sa kahimtangan anay sang mga Cristiano sang una nga siglo. Ang mga alagad ni Jehova sadtong mga adlaw nabuligan sang isa ka tagna agod mahibaluan nila kon san-o maabot ang Mesias. (Daniel 9:​24-26) Gintagna man sadto gihapon nga tagna ang kalaglagan sang Jerusalem apang wala ini maghatag sa mga Cristiano sadto sing impormasyon agod mahibaluan nila sing abanse kon san-o laglagon yadto nga siudad. (Daniel 9:​26b, 27) Sing kaanggid, ang mga estudyante sang Biblia sang ika-19 nga siglo nagpaabot man bangod sang isa ka tagna nga ginbugay sang Dios. Paagi sa pag-angot sang “pito ka panahon” sang Daniel 4:​25 sa “panag-on sang mga Gentil,” ginpaabot nila nga si Cristo magagahom sa Ginharian sang 1914. (Lucas 21:​24, King James Version; Ezequiel 21:​25-27) Bisan pa ang tulun-an sang Daniel nagaunod sing madamo nga tagna, wala sing bisan isa sini ang makabulig sa mga estudyante sang Biblia karon sa pagkalkular sing eksakto kon san-o pagalaglagon ang bug-os nga sistema sang mga butang ni Satanas. (Daniel 2:​31-44; 8:​23-25; 11:​36, 44, 45) Apang, mahanabo ini sa indi madugay, kay nagakabuhi na kita sa “tion sang katapusan.”​—⁠Daniel 12:⁠4.⁠a

Pagkamabinantayon sa Tion sang Presensia ni Cristo

2, 3. (a) Ano ang daku nga pamatuod nga nagakabuhi na kita sa tion sang presensia ni Cristo nga may gahom subong isa ka hari? (b) Ano ang nagapakita nga ang mga Cristiano dapat magpadayon sa pagbantay sa tion sang presensia ni Jesucristo?

² Matuod, antes ginhatagan si Cristo sing gahom sa Ginharian sang 1914, ang mga Cristiano may ginapaabot na bangod sang tagna. Apang ang “tanda” nga ginhatag ni Cristo tuhoy sa iya presensia kag sang katapusan sang sistema sang mga butang naglakip sing mga hitabo. Kag ang kalabanan sini makita sa tapos magsugod ang iya presensia. Ang mga hitabo subong sang​—⁠mga inaway, kakulang sa kalan-on, mga linog, mga piste, nagdugang nga pagkamalinapason, paghingabot sa mga Cristiano, kag ang bug-os kalibutan nga pagbantala sing maayong balita sang Ginharian​—⁠isa ka daku nga pamatuod nga nagakabuhi na kita karon sa tion sang presensia ni Cristo nga may gahom subong isa ka hari.​—⁠Mateo 24:​3-14; Lucas 21:​10, 11.

³ Apang, ang bug-os nga ideya sang nagapaalam nga laygay ni Jesus sa iya mga disipulo amo: “Padayon nga magtan-aw, padayon nga magmata, . . . padayon nga magbantay.” (Marcos 13:​33, 37; Lucas 21:36) Ang maid-id nga pagbasa sang konteksto sini nga mga laygay nga magbantay nagapakita nga indi ang pagbantay sa tanda sang pamuno sang iya presensia ang una nga ginapatuhuyan ni Cristo. Sa baylo, ginasugo niya ang iya matuod nga mga disipulo nga magpadayon sa pagbantay sa tion sang iya presensia. Ano ang padayon nga bantayan sang matuod nga mga Cristiano?

4. Ano ang katuyuan sang tanda nga ginhatag ni Jesus?

⁴ Ginhatag ni Jesus ang iya daku nga tagna subong sabat sa pamangkot nga: “San-o mahanabo ining mga butang [mga hitabo nga nagdul-ong sa pagkalaglag sang Judiyong sistema sang mga butang], kag ano ang mangin tanda sang imo presensia kag sang katapusan sang sistema sang mga butang?” (Mateo 24:3) Ang gintagna nga tanda amo ang magapakilala indi lamang sang presensia ni Cristo kundi sang mga hitabo man nga magadul-ong sa katapusan sang malaut nga sistema sang mga butang karon.

5. Paano ginpakita ni Jesus nga bisan pa presente sia sa espirituwal lamang, “magakari” pa sia?

⁵ Ginpakita ni Jesus nga sa tion sang iya “presensia” (Griego, pa·rou·siʹa) magakari sia nga may gahom kag himaya. Tuhoy sa sina nga “pagkari” (nga ginapakita sang mga porma sang Griego nga tinaga erʹkho·mai), sia nagsiling: “Nian magapahayag ang tanda sang Anak sang tawo sa langit, kag nian sakiton sang tanan nga tribo sa duta ang ila kaugalingon sa pagpanangis, kag makita nila nga nagakari ang Anak sang tawo sa ibabaw sang mga panganod sa langit nga may gahom kag daku nga himaya. . . . Tun-i ninyo karon ini nga punto gikan sa kahoy nga higuera subong ilustrasyon: Sa tion nga ang bag-o nga mga sanga sini manglumbay kag manghumlad ang mga dahon sini, mahibaluan ninyo nga malapit na ang tingadlaw. Amo man, kon makita ninyo ini tanan nga butang, mahibaluan ninyo nga malapit na sia [si Cristo] sa mga ganhaan. . . . Magbantay kamo, kay wala kamo makahibalo kon sa ano nga adlaw magakari ang inyo Ginuo. . . . Pamatud-i man ninyo ang inyo kaugalingon nga handa, bangod sa oras nga wala ninyo paghunahunaa, magaabot ang Anak sang tawo.”​—⁠Mateo 24:​30, 32, 33, 42, 44.

Ngaa Magakari si Jesucristo?

6. Paano mahanabo ang kalaglagan sang “Babilonia nga Daku”?

⁶ Bisan pa nagkari na si Jesus subong Hari sugod sang 1914, dapat pa hukman ni Jesucristo ang mga sistema kag ang mga indibiduwal antes niya hukman ang mga malauton. (Ipaanggid ang 2 Corinto 5:⁠10.) Sa indi madugay, ipasulod ni Jehova sa hunahuna sang politikal nga mga manuggahom ang paglaglag sa “Babilonia nga Daku,” ang bug-os kalibutan nga emperyo sang butig nga relihion. (Bugna 17:​4, 5, 16, 17) Espesipiko nga ginsambit ni apostol Pablo nga laglagon ni Jesucristo “ang tawo nga malinapason”​—⁠ang apostata nga klero sang Cristiandad, isa ka kilala nga bahin sang “Babilonia nga Daku.” Si Pablo nagsulat: “Ang malinapason ipahayag, nga pagapatyon ni Ginuong Jesus paagi sa espiritu sang iya baba kag pagadulaon sa pagpahayag sang iya presensia.”​—⁠2 Tesalonica 2:​3, 8.

7. Kon mag-abot na ang Anak sang tawo sa iya himaya, ano nga paghukom ang himuon niya?

⁷ Sa malapit nga palaabuton, hukman ni Cristo ang katawhan sang mga pungsod pasad sa kon ano ang ginhimo nila sa iya kauturan nga yari pa sa duta. Aton mabasa: “Kon ang Anak sang tawo mag-abot sa iya himaya, kag ang tanan nga anghel kaupod niya, nian magalingkod sia sa iya mahimayaon nga trono. Kag tipunon niya sa atubangan niya ang tanan nga pungsod, kag painpainon niya ang katawhan gikan sa isa kag isa, subong sang manugbantay nga nagapain sang mga karnero sa mga kanding. Kag ipahamtang niya ang mga karnero sa iya tuo, apang ang mga kanding sa iya wala. . . . Ang hari magasiling sa [mga karnero], ‘Sa pagkamatuod nagasiling ako sa inyo, Sa bagay nga ginhimo ninyo ini sa isa sang labing kubos sining akon mga utod, ginhimo ninyo ini sa akon.’ . . . Kag [ang mga kanding] magakadto sa silot nga walay katapusan nga kalaglagan, apang ang mga matarong sa kabuhi nga walay katapusan.”​—⁠Mateo 25:​31-46.

8. Paano ginalaragway ni Pablo ang pagkari ni Cristo agod maghukom sa mga didiosnon?

⁸ Subong ginpakita sa parabola sang mga karnero kag mga kanding, si Jesus ang magahimo sing katapusan nga paghukom sa tanan nga didiosnon. Ginpasalig ni Pablo ang mga masigkatumuluo sing “kapahuwayan kaupod namon sa pagpahayag ni Ginuong Jesus gikan sa langit kaupod sang iya gamhanan nga mga anghel sa nagadabdab nga kalayo, samtang ginatimalusan niya ang mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus. Ini gid sila magaantos sing silot nga walay katapusan nga kalaglagan gikan sa atubangan sang Ginuo kag gikan sa himaya sang iya kusog, sa tion nga himayaon sia may kaangtanan sa iya mga balaan.” (2 Tesalonica 1:​7-10) Bangod sining tanan makakulunyag nga mga hitabo nga magaabot pa, indi bala kita dapat magpakita sing pagtuo kag malangkagon nga magbantay sa pagkari ni Cristo?

Malangkagon nga Paghulat sa Pagpahayag ni Cristo

9, 10. Ngaa malangkagon nga ginahulat sang mga hinaplas nga yari pa sa duta ang pagpahayag ni Jesucristo?

⁹ ‘Si Ginuong Jesus magapahayag gikan sa langit’ indi lamang agod laglagon ang mga malauton kundi agod padyaan man ang mga matarong. Ang mga nagkalabilin sa hinaplas nga mga kauturan ni Cristo nga yari pa sa duta mahimo nga magaantos pa antes sang pagpahayag ni Cristo, apang ginakalipay nila ang ila mahimayaon nga paglaum nga mapalangit sila. Para sa hinaplas nga mga Cristiano, si apostol Pedro nagsulat: “Padayon kamo nga magkasadya kay mga umalambit kamo sa mga pag-antos ni Cristo, agod nga magkasadya kamo kag magkalipay man sing labi gid sa tion sang pagpahayag sang iya himaya.”​—⁠1 Pedro 4:⁠13.

¹⁰ Determinado ang mga hinaplas nga magmatutom tubtob ‘tipunon sila [ni Cristo] sa iya’ agod nga “ang natilawan nga kinaiya” sang ila pagtuo “masapwan nga sa kadayawan kag himaya kag kadungganan sa pagpahayag ni Jesucristo.” (2 Tesalonica 2:​1; 1 Pedro 1:7) Tuhoy sa sining matutom ginpanganak sang espiritu nga mga Cristiano, sarang ini masiling: “Ang pagpamatuod nahanungod kay Cristo ginpalig-on sa tunga ninyo, agod nga indi kamo makulangan sang bisan ano nga dulot, samtang malangkagon nga ginahulat ninyo ang pagpahayag sang aton Ginuong Jesucristo.”​—⁠1 Corinto 1:​6, 7.

11. Samtang nagahulat sang pagpahayag ni Jesucristo, ano ang ginahimo sang hinaplas nga mga Cristiano?

¹¹ Ginabatyag man sang hinaplas nga nagkalabilin ang ginabatyag ni Pablo, nga nagsulat: “Busa ginakabig ko nga ang mga pag-antos sa karon nga tion indi takus nga ipaanggid sa himaya nga ipahayag sa aton.” (Roma 8:18) Indi kinahanglan nga pabaskugon ang ila pagtuo paagi sa pagkalkular sing mga tion. Masako sila sa pag-alagad kay Jehova, nga nagahatag sing dalayawon nga huwaran para sa ila mga kaupod, ang “iban nga mga karnero.” (Juan 10:16) Nahibaluan sining mga hinaplas nga malapit na ang katapusan sining malaut nga sistema, kag ginasunod nila ang laygay ni Pedro: “Ihanda ninyo ang inyo hunahuna para sa hilikuton, hupti nga bug-os ang inyo kaligdong; ipahamtang ang inyo paglaum sa dibagay nga kaayo nga dalhon sa inyo sa pagpahayag ni Jesucristo.”​—⁠1 Pedro 1:⁠13.

“Ang Malangkagon nga Pagpaabot sang Tinuga”

12, 13. Paano ang tawhanon nga tinuga “ginpasakop sa pagkawalay pulos,” kag ano ang ginakalangkagan sang iban nga mga karnero?

¹² May yara man bala dapat kalangkagan sa kabuhi ang iban nga mga karnero? May yara sa pagkamatuod. Sa tapos maghambal tuhoy sa mahimayaon nga paglaum sang mga gin-adoptar ni Jehova subong iya ginpanganak sang espiritu nga “mga anak” kag “kaupod nga mga manunubli ni Cristo” sa langitnon nga Ginharian, si Pablo nagsiling: “Ang malangkagon nga pagpaabot sang tinuga nagahulat sang pagpahayag sang mga anak sang Dios. Kay ang tinuga ginpasakop sa pagkawalay pulos, indi sa iya kaugalingon nga kabubut-on kundi paagi sa iya nga nagpasakop sini, pasad sa paglaum nga ang tinuga man mismo hilwayon gikan sa pagkaulipon sa pagkamadinulunton kag magaagom sing mahimayaon nga kahilwayan sang mga anak sang Dios.”​—⁠Roma 8:​14-21; 2 Timoteo 2:​10-12.

¹³ Bangod sang sala ni Adan, ang tanan niya nga kaliwat “ginpasakop sa pagkawalay pulos,” kay natawo sila nga ulipon sang sala kag kamatayon. Indi nila mahilway ang ila kaugalingon gikan sa sina nga pagkaulipon. (Salmo 49:​7; Roma 5:​12, 21) Nagakalangkag gid ang iban nga mga karnero nga ‘mahilway gikan sa pagkaulipon’! Apang antes sina, may pila anay ka butang nga dapat mahanabo suno sa mga tion kag mga panahon ni Jehova.

14. Ano ang madalahig sa “pagpahayag sang mga anak sang Dios,” kag paano ini magaresulta sa ‘kahilwayan [sang katawhan] gikan sa pagkaulipon sa pagkamadinulunton’?

¹⁴ Ang nagkalabilin sang hinaplas nga “mga anak sang Dios” dapat anay ‘ipahayag.’ Ano ang madalahig sa sini? Sa tion nga gintalana sang Dios, mangin maathag sa iban nga mga karnero nga natapos na ang ‘pagpat-in’ kag paghimaya sa mga hinaplas agod maghari kaupod ni Cristo. (Bugna 7:​2-4) Ang ginbanhaw nga “mga anak sang Dios” ‘ipahayag’ man kon magbulig sila kay Cristo sa paglaglag sa malaut nga sistema sang mga butang ni Satanas. (Bugna 2:​26, 27; 19:​14, 15) Nian, sa tion sang Isa ka Libo ka Tuig nga Paghari ni Cristo, dugang pa nga ‘ipahayag’ sila subong saserdotenhon nga mga alagyan para sa paghatag sang mga benepisyo sang halad nga gawad ni Jesus sa tawhanon nga “tinuga.” Subong resulta sini, ang katawhan ‘mahilway gikan sa pagkaulipon sa pagkamadinulunton’ kag sa ulihi magasulod sa “mahimayaon nga kahilwayan sang mga anak sang Dios.” (Roma 8:​21; Bugna 20:​5; 22:​1, 2) Bangod sining matahom nga palaabuton, katingalahan bala nga ang iban nga mga karnero “nagahulat sa pagpahayag sang mga anak sang Dios” nga may “malangkagon nga pagpaabot”?​—⁠Roma 8:⁠19.

Ang Pagpailob ni Jehova Nagakahulugan sing Kaluwasan

15. Ano ang indi naton dapat kalipatan tuhoy sa gintalana nga mga tion ni Jehova?

¹⁵ Si Jehova amo ang Daku nga Manugbantay sang Tion. Ang tion nga iya ginatalana para sa mga butang nga mahanabo indi mapaslawan. Mahimo nga ang mga butang indi sa tanan nga tion nagakahanabo suno sa ginapaabot naton. Apang, makatuo kita sing bug-os nga matuman ang tanan nga ginsaad sang Dios. (Josue 23:14) Mahimo nga ginatugutan niya ang mga butang nga magpadayon sing mas malawig sa ginapaabot sang madamo. Apang tinguhaan naton nga mahangpan ang iya mga dalanon kag dayawon ang iya kaalam. Si Pablo nagsulat: “O pagkadalom sang kamanggaran kag kaalam kag ihibalo sang Dios! Pagkadimatungkad sang iya mga paghukom kag pagkadimausoy sang iya mga dalanon! Kay ‘sin-o bala ang nakahibalo sang hunahuna ni Jehova, ukon sin-o bala ang nangin manuglaygay niya?’ ”​—⁠Roma 11:​33, 34.

16. Sin-o ang makabenepisyo sa pagpailob ni Jehova?

¹⁶ Si Pedro nagsulat: “Mga hinigugma, sanglit ginahulat ninyo ining mga butang [ang kalaglagan sang daan nga “mga langit” kag “duta” kag ang ginsaad sang Dios nga “bag-ong mga langit” kag “bag-ong duta” nga ibulos sa sini], himua ninyo ang inyo labing masarangan agod nga sa katapusan masapwan niya kamo nga walay dagta kag walay kasawayan kag sa paghidait. Dugang pa, kabiga ninyo ang pagpailob sang aton Ginuo subong kaluwasan.” Bangod sang pagpailob ni Jehova, minilyon pa ang ginahatagan sing kahigayunan nga maluwas sa “adlaw ni Jehova,” nga magaabot sa hinali “subong isa ka makawat.” (2 Pedro 3:​9-15) Ang iya pagpailob nagatugot sa tagsatagsa sa aton nga ‘panikasugan sing padayon ang aton kaugalingon nga kaluwasan nga may kahadlok kag pagkurog.’ (Filipos 2:12) Si Jesus nagsiling nga dapat naton ‘hatagan sing igtalupangod ang aton kaugalingon’ kag “magpabilin nga nagamata” kon luyag naton nga mahamut-an kita kag magmadinalag-on sa “pagtindog sa atubangan sang Anak sang tawo” sa tion nga magkari sia agod maghukom.​—⁠Lucas 21:​34-36; Mateo 25:​31-33.

Magpadayon sa Paghulat nga May Pagbatas

17. Ano nga mga pulong ni apostol Pablo ang dapat naton sundon?

¹⁷ Ginpalig-on ni Pablo ang iya espirituwal nga kauturan nga itulok ang ila mga mata, “indi sa mga butang nga makita, kundi sa mga butang nga dimakita.” (2 Corinto 4:​16-18) Luyag niya nga wala sing bisan ano nga butang ang maglipon sa ila ginapanan-aw nga langitnon nga padya. Bahin man kita sang hinaplas nga mga Cristiano ukon sang iban nga mga karnero, tandaan naton ang matahom nga paglaum nga ginapahamtang sa atubangon naton kag indi kita dapat magdulog. ‘Magpadayon [kita] sa paghulat nga may pagpailob,’ nga ginapamatud-an nga “indi kita ang sahi nga nagaisol padulong sa kalaglagan, kundi ang sahi nga may pagtuo padulong sa pagtipig sa kalag.”​—⁠Roma 8:​25; Hebreo 10:⁠39.

18. Ngaa masaligan naton ang mga tion kag mga panahon nga ginabuot ni Jehova?

¹⁸ Masaligan naton ang mga tion kag mga panahon nga ginabuot ni Jehova. Ang katumanan sang iya mga saad “indi magpalantang” suno sa iya iskedyul sang tion. (Habacuc 2:3) Samtang, ang laygay ni Pablo kay Timoteo dugang pa nga may kahulugan para sa aton. Sia nagsiling: “Hanuot nga ginatulinan ko ikaw sa atubangan sang Dios kag ni Cristo Jesus, nga gintangdo sa paghukom sa mga buhi kag sa mga patay, kag paagi sa iya pagpahayag kag sa iya ginharian, ibantala ang pulong, magmadagmit sa sini sa maayo nga panahon, sa magamo nga panahon . . . Himua ang hilikuton sang isa ka ebanghelisador, tumana sing bug-os ang imo ministeryo.”​—⁠2 Timoteo 4:​1-5.

19. Tion pa gihapon karon nga himuon sang katawhan ni Jehova ang ano nga butang, kag ngaa?

¹⁹ Kabuhi ang yara sa katalagman​—⁠ang aton mismo kag ang iya sang aton mga isigkatawo. Si Pablo nagsulat: “Hatagi sing dalayon nga igtalupangod ang imo kaugalingon kag ang imo panudlo. Magpadayon ka sa sining mga butang, kay sa paghimo sini maluwas mo ang imo kaugalingon kag ang mga nagapamati sa imo.” (1 Timoteo 4:⁠16) Malip-ot na lang ang tion sining malaut nga sistema sang mga butang. Samtang ginahulat naton sing malangkagon ang makakulunyag nga mga hitabo nga magaabot, tandaan naton nga tion pa gihapon kag panahon ni Jehova karon nga ibantala sang iya katawhan ang maayong balita sang Ginharian. Ini nga hilikuton dapat tumanon suno sa luyag niya. “Ugaling,” siling ni Jesus, “magaabot ang katapusan.”​—⁠Mateo 24:⁠14.

[Footnote]

Subong Repaso

◻ Tuhoy sa pagkalkular sing tion, paano ang aton kahimtangan kaanggid sa kahimtangan sang mga Cristiano sang una nga siglo?

◻ Ngaa ang mga Cristiano dapat “magpadayon sa pagbantay,” bisan sa tion sang presensia ni Cristo?

◻ Ngaa malangkagon nga ginapaabot sang tawhanon nga tinuga “ang pagpahayag sang mga anak sang Dios”?

◻ Ngaa masaligan naton ang mga tion kag mga panahon nga ginabuot ni Jehova?

[Retrato sa pahina 17]

Dapat magpabilin nga nagamata ang mga Cristiano samtang nagapaabot sang pagkari ni Cristo

[Retrato sa pahina 18]

Ang hinaplas nga mga nagkalabilin masako sa pag-alagad kay Jehova, nga wala nagapasad sang ila pagtuo sa pagkalkular sing tion