Balaan nga mga Pagpakamaayo Para sa “mga May Paghantop”

“Ang mga may paghantop magasidlak subong sang kasiga sang kahawaan; kag ang mga nagaliso sang madamo sa pagkamatarong, subong sang kabituonan tubtob sa tion nga wala sing latid, sa walay katubtuban.”—DANIEL 12:3.

1. Sa tapos ginlaragway ang tion sang kasisit-an sa mga makiawayon, sa ano masunod nga ginpatuhoy sang anghel ang iya igtalupangod?

ANG tagna sang anghel kay Daniel nagdala sa aton kutob sa ikap-at nga siglo B.C.E. tubtob sa Armagedon. Ginpakita sini nga si Miguel magadala sing paghidait sa duta sa isa lamang ka paagi: paglaglag sa mga makiawayon. Karon, sa tapos sinang talalupangdon nga pagsurbe sa maragtas sing abanse, gintagna sang anghel ang pila sang bugana nga mga pagpakamaayo nga ginaagom sang katawhan sang Dios “sa katapusan nga bahin sang mga adlaw.”—Daniel 10:14.

Tion sang mga Pagkabanhaw

2. Paano ang iban nga mga patay ‘nagmata’ sa tion sang ‘katapusan nga bahin sang mga adlaw’?

² Ang anghel nagsiling kay Daniel: “Kag madamo sang mga nagakatulog sa yab-ok sang duta magamata, ini sila sa kabuhi nga walay katapusan kag ina sila sa kahuluy-an kag sa pagkatalamayon nga walay katapusan.” (Daniel 12:2) Maathag nga “ang katapusan nga bahin sang mga adlaw” isa ka tion sang pagkabanhaw, sang pagmata sang “mga nagakatulog sa yab-ok.” Ang isa sina nga pagmata nagsugod sa tapos si Jesus nangin Hari sang 1914. (Mateo 24:3) Nagapaabot sina nga tion, si apostol Pablo nagsulat: “Kita nga mga buhi nga nabilin tubtob sa pag-abot sang Ginuo indi mag-una sa mga nagakatulog sa kamatayon . . . Ang mga napatay kay Cristo mabanhaw sing una.” (1 Tesalonica 4:15, 16; Bugna 6:9-11) Maathag, kon amo, nga pagligad gid sang 1914 ginbanhaw ni Jesus sa espiritu nga kabuhi sa langit ang mga katapo sang “Israel sang Dios” nga napatay na sing matutom. (Galacia 6:16) Ang ila pagmata para sa “kabuhi nga walay katapusan.”

3, 4. Paano ‘napatay’ ang isa ka grupo sang matutom nga mga alagad sang Dios sang 1918?

³ Apang ang mga pulong sang anghel wala sing duhaduha nga nagalakip sing isa pa ka pagkabanhaw. Sa sulod sang mga 40 ka tuig, sa wala pa ang 1914 ang isa ka diutay nga grupo sang mga Cristiano nagpaandam nga yadto nga tuig magatanda sang katapusan sang Panag-on sang mga Gentil nga gintagna ni Jesus. (Lucas 21:24) Ginhimo sining mga Cristiano nga korporasyon sang 1884 ang ­Zion’s ­Watch Tow­er ­Tract So­cie­ty, kag ginbalhag nila ang mga resulta sang ila pagpanalawsaw sa Biblia sa magasin nga gintawag Zion’s Watch Tower and Herald of Christ’s Presence.

⁴ Sang 1914 ang kamatuoran sang ila mensahe dramatiko nga napamatud-an sang magdabdab ang nahauna nga inaway kalibutanon, kag ang “mga kasakit” nga gintagna ni Jesus nagsugod. (Mateo 24:7, 8) Apang, gingamit sang ila relihioso nga mga kaaway ang kahadlok sa inaway sa paghingabot sa ila tubtob sang ulihi, sang 1918, ang ila pagbantala nga hilikuton nagdulog, kag ang nagapanguna nga mga alagad sang ­Watch Tow­er So­cie­ty dimakatarunganon nga ginbilanggo. Nagtuga ini sing daku nga pagkasadya sa iban nga mga bahin. Natuman man sini ang tagna nga narekord sa tolon-an sang Bugna: “Kag sang nakatapos na sila sang ila pagpanaksi, ang sapat nga mapintas nga nagaguwa sa kadadalman magapakig-away sa ila kag magadaug sa ila kag magapatay sa ila.”—Bugna 11:7.

5, 6. Paano ang mga naeksperiensiahan sining grupo sang 1919 naghatag sing katumanan sa tagna nga ‘madamo sang mga nagakatulog sa yab-ok . . . magamata’?

⁵ Apang, suno sa tagna, indi sila magapabilin nga ‘patay.’ “Kag sa tapos sang tatlo ka adlaw kag tunga ang ginhawa sang kabuhi gikan sa Dios nagsulod sa ila, kag nagtindog sila, kag ginhadlukan sing daku ang mga nakakita sa ila. . . . Kag sa itololok sang ila mga kaaway nagkayab sila sa langit sa panganod.” (Bugna 11:11, 12; Ezequiel 37:1-14) Ang ila pagkabanhaw maathag nga simbuliko, kay ang literal nga pagkabanhaw sa espiritu nga kabuhi sa langit indi makita sang ila mga kaaway. Sa baylo, ginbanhaw sila gikan sa katulad patay nga kahimtangan sang indi paghikot padulong sa mapagsik nga kahimtangan sang makugi nga pagpanghikot nga kitaon gid sa mga nagplano sang ila katapusan. Sang 1919 ang mga tiglawas sang ­Watch Tow­er So­cie­ty ginpaguwa sa bilangguan, ang pagbantala nga hilikuton gin-organisar liwat, kag nakita sang kalibutan ang pagsugod sang labing daku nga kampanya sa pagpanaksi sa Ginharian sa maragtas.—Mateo 24:14.

⁶ Sa sining simbuliko nga kahulugan, ‘madamo sang mga nagkalatulog sa yab-ok ang nagmata.’ Nian, sugod sang 1919, yadtong diutay, nagmata nga hubon sang mga Estudyante sang Biblia nagsugod sa pagpangita kag sa pagtipon sa mga nagkalabilin sang kauturan ni Jesus agod nga mapat-inan ang bug-os nga kadamuon sang 144,000. (Mateo 24:31; Bugna 7:1-3) Samtang nagasabat ang mga indibiduwal, gindedikar nila ang ila kaugalingon sa Dios paagi kay Cristo kag nangin mga katapo sang kitaon nga organisasyon ni Jehova sa duta. Nagabaton sing balaan nga espiritu nga isa ka walay bayad nga dulot, gindeklarar sila nga matarong sa sadsaran sang ila pagtuo sa halad nga gawad ni Jesus kag gin-adoptar subong mga anak sang Dios sa espirituwal nga paagi.—Roma 8:16; Galacia 2:17; 3:8.

7. Para sa madamo sini, paano ini mangin pagmata “sa kabuhi nga walay katapusan”?

⁷ Ang mga magamatutom tubtob sa katapusan sang ila dutan-on nga kabuhi may malig-on nga paglaum nga magalingkod sa ila lugar sa langit upod kay Jesucristo. (1 Corinto 15:50-53) Sa amo, ang ila espirituwal nga pagmata amo ang sa walay katapusan nga kabuhi. Samtang nagakabuhi pa sa duta, nagaeksperiensia sila sing paghidait sa tunga nila bisan pa nagakabuhi sila sa nagainaway nga kalibutan. (Roma 14:19) Apang labing importante, may paghidait sila upod kay Jehova nga Dios, “ang paghidait sang Dios nga nagalabaw sa tanan nga panghunahuna.”—Filipos 4:7.

Pagmata “sa mga Kahuluy-an”

8, 9. Sa anong paagi ining espirituwal nga pagmata mangin “sa kahuluy-an kag sa pagkatalamayon nga walay katapusan”?

⁸ Ngaa, nian, ang iban ‘nagamata . . . sa mga kahuluy-an kag sa pagkatalamayon nga walay katapusan’? Ang kamatuoran amo, indi tanan sang mga nagabaton sa imbitasyon nga mangin bahin sang Ginharian nga klase ang nagapabilin nga matutom. Gintugutan sang iban ang ila pagtuo nga magluya kag wala makabatas. (Hebreo 2:1) Ang iban nangin apostata pa gani kag ginpaguwa gikan sa Cristianong kongregasyon. (Mateo 13:41, 42) Ina sila ginlaragway ni Jesus subong “ulipon nga malaut” nga silutan sang Agalon “sing mabaskog gid,” kag paupdon sa mga salimpapaw. “Didto magahibi sia kag magapabagrot sang iya mga ngipon.”—Mateo 24:48-51; Efeso 4:18; 5:6-8.

⁹ Daw ano nga trahedya, nga batunon ang pinakamataas nga pribilehiyo nga gintanyag sa dihimpit nga mga tawo kag dayon sikwayon ini! Tuhoy sa ila nga nagahikot sing subong sini, si apostol Pablo nagsiling: “Kay indi mahimo nga sila nga naiwagan anay, nga nakatilaw sang hiyas nga langitnon, kag nangin umalambit sang balaan nga espiritu, kag nakatilaw sang pagkaayo sang pulong sang Dios kag sang mga gahom sang nagapakari nga sistema sang mga butang, apang nagbiya sila, nga magbag-o liwat sa paghinulsol, kay ginlansang nila ang Anak sang Dios kag ginpakahuy-an sia sing dayag.” (Hebreo 6:4-6) Sa sining paagi, ang ila pagmata amo ang sa “mga kahuluy-an kag sa pagkatalamayon nga walay katapusan.” Wala sila sing paglaum sa kabuhi nga walay katapusan.

“Nagasilak Subong mga Sulo”

10. Sin-o ang “mga may paghantop,” kag paano sila ‘nagasilak subong mga sulu’?

¹⁰ Apang sa mga matutom, ang tagna nagasiling: “Ang mga may paghantop magasidlak subong sang kasiga sang kahawaan; kag ang mga nagaliso sang madamo sa pagkamatarong, subong sang kabituonan tubtob sa tion nga wala sing latid, sa walay katubtuban.” (Daniel 12:3) “Ang mga may paghantop” maathag nga amo ang matutom nga mga nagkalabilin sang hinaplas nga Cristianong kongregasyon, nga ‘napun-an sing sibu nga ihibalo sang iya kabubut-on sa bug-os nga kaalam kag espirituwal nga paghangop.’ Napalig-on ni Jehova, sila ‘nagabatas sing bug-os kag nagaantos nga may kalipay, nga nagapasalamat sa Amay nga nagpakatakus sa ila sa pag-ambit sa panublion sang mga balaan sa kapawa.’ (Colosas 1:9, 11, 12) Kutob sang 1919, bisan pa ‘ang kadudulman nagtabon sa duta, kag ang pitipit nga kadudulman sa katawhan,’ sila “nagasilak subong mga sulu” sa katawhan. (Isaias 60:2; Filipos 2:15; Mateo 5:14-16) Sila ‘nagasidlak subong sang adlaw sa ginharian sang ila Amay.’—Mateo 13:43.

11. Sa anong paagi ang “mga may paghantop” ‘nagpaliso sa madamo sa pagkamatarong’?

¹¹ Paano nila ‘ginapaliso ang madamo sa pagkamatarong’? (Daniel 12:3) Bangod sang ila matutom nga pagpanaksi, ang katapusan nga mga katapo sang espirituwal nga Israel natipon kag ginpakamatarong para sa kabuhi sa langit. Dugang pa, ang dakung kadam-an sang “iban nga mga karnero” nagpakita sang ila kaugalingon, nagapanong sa kapawa gikan kay Jehova nga ginpakita sang ‘katawhan ni Daniel.’ (Juan 10:16; Zacarias 8:23) Ining “iban nga mga karnero” kinabubut-on nga nagbuylog sa mga hinaplas sa ila hilikuton sa pagbantala sing “maayong balita.” (Mateo 24:14; Isaias 61:5, 6) Sila, man, nagatuo sa ginpatulo nga dugo ni Jesucristo, amo kon ngaa ginpakamatarong sila sa pagpakig-abyan sa Dios. (Bugna 7:9-15; ipaanggid ang Santiago 2:23.) Kon magmatutom sila tubtob sa katapusan, ang ila mga ngalan magapabilin nga “nasulat sa tolon-an.” Sa amo, makapaabot sila nga luwason sa labing malaglagon nga tion sang kasisit-an nga magabunal sa mga pungsod.—Daniel 12:1; Mateo 24:13, 21, 22.

‘Magasidlak Sila . . . sa Walay Katubtuban’

12, 13. (a) Paano ang “mga may paghantop” ‘nagasidlak . . . sa walay katubtuban’? (b) Paano, sa lain nga paagi, sila ‘magapaliso sa madamo sa pagkamatarong’?

¹² Ang anghel nagsiling kay Daniel: “Ang mga may paghantop magasidlak subong sang kasiga sang kahawaan . . . , subong sang kabituonan tubtob sa tion nga wala sing latid, sa walay katubtuban.” (Daniel 12:3) Paano ang mga hinaplas makasidlak tubtob sa walay katubtuban, sanglit ang tagsatagsa sa ila mapatay sa ulihi? Bangod nga sila magapadayon sa ‘pagsidlak’ bisan sa tapos sila mapatay. Nagalaragway sa ila langitnon nga katungdanan, si Jesus nagasugid sa aton sa tolon-an sang Bugna: “Ang trono sang Dios kag sang Kordero mangin sa siudad, kag ang iya mga ulipon magahalad sa iya sing balaan nga pag-alagad; kag makita nila ang iya nawong, kag ang iya ngalan mangin sa ila mga agtang. Kag wala na sing gab-i, kag wala sila sing kinahanglan sang kapawa sang suga ukon sang adlaw, kay si Jehova nga Dios mangin ila kapawa, kag magahari sila tubtob sa walay katubtuban.”—Bugna 22:3-5.

¹³ Huo, ang mga banhawon magagahom subong mga hari kaangay sang kabituonan sa kalangitan, “sa walay katubtuban.” Ang ila espirituwal nga kasanag magadala sing daku nga mga pagpakamaayo sa katawhan. (Bugna 14:13) Nagalaragway sa ila subong ang “Bag-ong Jerusalem,” ang tolon-an sang Bugna nagareport: “Kag ang siudad wala nagakinahanglan sing adlaw ukon sing bulan nga magsilak sa iya, kay ang himaya sang Dios amo ang iya kasanag, kag ang iya suga amo ang Kordero. Kag ang mga pungsod magalakat sa kasanag sini, kag ang mga hari sang duta magadala sang iya himaya sa sini.” (Bugna 21:2, 9, 23, 24) Ang mga banhawon magabulig sa pag-aplikar sang mga benepisyo sang halad nga gawad nga “bulong sa mga pungsod.” (Bugna 22:2) Kon, sa tapos sang Isa ka Libo ka Tuig nga Paghari, mapasag-uli na ni Jesus kag sang iya 144,000 ka kaupod nga mga hari kag mga saserdote ang katawhan sa kahimpitan, sa pagkamatuod napaliso nila ang “madamo sa pagkamatarong.” Sa tapos sang katapusan nga pagtilaw sa sadto nga tion, ang napasag-uli nga katawhan magahuman sing isa ka himpit nga tawhanon nga katilingban nga nagakabuhi sa paraiso nga duta sing dayon. (Bugna 20:7-10; Salmo 37:29) Sa sining paagi, ang kitaon nga mga resulta sang langitnon nga himaya sang ‘katawhan ni Daniel’ magadugay man “tubtob sa tion nga wala sing latid, sa walay katubtuban.”

Isa Pa ka Pagkabanhaw

14. Ang tagna nga “madamo sang mga nagakatulog sa yab-ok . . . magamata” magalakip kay sin-o pa?

¹⁴ Sa amo, ang mga pulong sang anghel nagadala sa aton labang sa tion sang ‘pagtindog’ ni Miguel kag sa walay tupong nga “tion sang kasisit-an” padulong sa bag-ong sistema sang mga butang. Dugang pa, ang mga pagpakamaayo nga paagihon sa ila sini nga nagasilak “subong sang kabituonan” indi paglimitehan lamang sa mga makalampuwas sa “tion sang kasisit-an.” Si Jesus, sang tawo pa sia sa duta, nagsiling: “Ang takna magaabot nga ang tanan nga yara sa mga lulubngan magapamati sang iya tingog kag magaguwa, ang mga nakahimo sing maayo, sa pagkabanhaw nga sa kabuhi, ang mga nakahimo sing malaut, sa pagkabanhaw nga sa paghukom.” (Juan 5:28, 29) Ining mga pulong nagatudlo sa literal nga pagkabanhaw sang napatay nga katawhan, kag wala sing duhaduha nga ining pagkabanhaw isa man ka kasugpon nga katumanan sang mga pulong sang anghel: “Madamo sang mga nagakatulog sa yab-ok . . . magamata.”—Daniel 12:2.

15. Para sa mga banhawon sa sadto nga tion, paano ini mangin pagmata “sa kabuhi nga walay katapusan”?

¹⁵ Isa sa mga nalakip sa sining partikular nga pagmata amo si Daniel. Ginsugiran sia sang anghel: “Apang lakat ka sa imo dalanon tubtob sa katapusan; kag magapahuway ka [magakatulog sa kamatayon], apang magatindog ka sa imo kapalaran sa katapusan sang mga adlaw.” (Daniel 12:13) Ang mga tawo nga kaangay ni Daniel banhawon sa sadto nga tion kag nagbaton sang ministeryo ni Jesus kag sang iya kauturan gikan sa langit pagabanhawon padulong sa tawhanon nga kahimpitan. Kon makapasa sila sa katapusan nga pagtilaw, ang ila mga ngalan permanente nga masulat sa tolon-an sang kabuhi. (Bugna 20:5) Para sa ila man, ang pagmata mangin “sa kabuhi nga walay katapusan.”

16. Para kay sin-o ang pagmata sa bag-ong sistema sang mga butang mangin sa “pagkatalamayon sa walay katapusan”?

¹⁶ Apang, indi tanan magahimo sini. Ang iban sa wala sing duhaduha magatinguha sa pagpabalik sang mga buhat nga nagdula sang paghidait gikan sa tawo sa madugay nga tion. Ina sila ginapaandaman sang Biblia: “Tuhoy sa mga matalaw kag mga dimatinuohon kag mga makangilil-ad sa ila kahigkuan kag mga manugpatay kag mga makihilawason kag mga nagabuhat sing espiritismo kag mga nagasimba sa mga idolo kag sa tanan nga butigon, ang ila bahin mangin sa linaw nga nagadabdab sa kalayo kag asupre. Ini amo ang ikaduha nga kamatayon.” (Bugna 21:8) Ining “ikaduha nga kamatayon” isa ka talangkod nga paghukom gikan kay Jehova nga wala sing pagkabanhaw. Isa ini ka dayon kag wala sing katapusan nga kamatayon. Ang mga banhawon nga indi mangin mainapresyahon magaantos sining ikaduha nga kamatayon; busa, ang ila pagmata mangin sa “kahuluy-an kag sa pagkatalamayon nga walay katapusan.”—Daniel 12:2.

“Magabugana ang Matuod nga Ihibalo”

17. Paano naton nahibaluan nga ang tagna nahanungod sa hari sang aminhan kag hari sang bagatnan ginrekord para gid sa aton kaayuhan karon?

¹⁷ Nian ang anghel nagtanyag sing laygay kay Daniel: “Apang ikaw, O Daniel, takpi ang mga pulong, kag pat-ini ang tolon-an, tubtob gid sa tion sang katapusan. Madamo ang magadalagan pakadto pakari, kag magabugana ang matuod nga ihibalo.” (Daniel 12:4) Ining mga pulong nagabihag sang aton igtalupangod. Bisan pa ang tagna sang anghel nahanungod sa duha ka hari nagsugod nga matuman sang mga 2,300 ka tuig nga nagligad, ang paghangop sa sini nabuksan “sa tion sang katapusan,” labi na kutob sang 1919. Sa sining mga adlaw, “madamo ang magadalagan pakadto pakari” sa Biblia, kag sa pagkamatuod nagbugana gid ang matuod nga ihibalo. Karon na ang tion nga naghatag si Jehova sing ihibalo sa mga mahinangpanon.

18. (a) Anong dalagku nga mga bahin sang tagna ang nagakatuman karon ukon buot na matuman? (b) Anong balanse nga panimuot ang ginahatag sini sa aton?

¹⁸ Ang kamatuoran nga ang pila ka bahin sang tagna natuman sang nagligad nga madamong siglo nagapalig-on sang aton pagtuo sa mga bahin sang tagna nga mahanabo pa. (Josue 23:14) Ang kalibutan sa karon nadalahig sa pagsumpunganay sang hari sang aminhan kag hari sang bagatnan, subong gintagna sang anghel. Dugang pa, ang tagna nagapaandam sang labi pa ka makatalagam nga mga tion sa palaabuton. Gani ginabuligan kita nga huptan ang aton pagkabalanse kag likawan nga madala sang propaganda sang bisan diin sa duha ka hari. Karon ang tion sa pagpalig-on sang aton pagsalig kay Jehova. Indi gid pagkalimti nga “si Miguel . . . ang daku nga prinsipe” “nagatindog” tungod sa katawhan sang Dios. Ang aton pat-od lamang nga kaluwasan yara sa pagpasakop sa Ginharian sang Dios sa idalom ni Cristo Jesus.—Binuhatan 4:12; Filipos 2:9-11.

19. Ano ang kahulugan sang mga pulong sang anghel kay Daniel para sa tagsatagsa sa aton?

¹⁹ Magpabilin, nian, nga suod sa “mga may paghantop,” nga ‘nagasidlak subong nga kasiga sa kahawaan.’ Magpabilin nga aktibo sa pagpanghikot para sa Ginharian sang Dios. (1 Corinto 15:58; Roma 15:5, 6) Padaluma ang imo gugma sa kamatuoran sang Pulong sang Dios, kag pakabahandia gid ang paghidait nga nagaluntad bisan sa karon sa organisasyon sang Dios. (Salmo 119:165; Efeso 4:1-3; Filipos 2:1-5) Nian, kon ‘magtindog’ si Miguel sa pagdugmok sa mga kaaway ni Jehova, kabay nga makaluwas kamo upod sa tanan nga katawhan sang Dios nga ang mga ngalan ‘nasulat sa tolon-an.’

Masabat Mo Bala?

◻ Sa anong paagi nagmata na ang ‘madamo nga nagakatulog sa yab-ok’?

◻ Paano ining ‘pagmata’ mangin “sa kahuluy-an”?

◻ Paano ang “mga may paghantop” nagasidlak subong mga sulo kag nagapaliso sa madamo sa pagkamatarong?

◻ Ano ang palaabuton nga katumanan sang pagmata sang ‘mga nagakatulog sa yab-ok’?

◻ Paano ginatuman ang Daniel 12:4?

[Laragway sa pahina 23]

Kutob sang 1919 ang mga may paghantop nagaiwag sing nagahatag-kabuhi nga kamatuoran

[Ginkuhaan]

Litrato sang NASA