Ano ang Bawtismo?

Ang sabat sang Biblia

Ang bawtismo amo ang pagpasalop sa isa ka tawo sa tubig.a Madamo nga bawtismo ang narekord sa Biblia. (Binuhatan 2:41) Ang isa sa sini amo ang bawtismo ni Jesus. Gintum-oy sia sa Suba Jordan. (Mateo 3:13, 16) Pila ka tuig sang ulihi, ang isa ka Etiopianhon nga lalaki ginbawtismuhan sa “isa ka lugar nga may tubig” malapit sa dalan nga iya ginaagyan.—Binuhatan 8:36-40.

Gintudlo ni Jesus nga ang bawtismo kinahanglan gid himuon sang iya mga sumulunod. (Mateo 28:19, 20) Gintudlo man ni apostol Pedro nga dapat ini himuon.—1 Pedro 3:21.

Sa sini nga artikulo

Ano ang kahulugan sang bawtismo?

Ang bawtismo isa ka makita nga simbulo, ukon pagpakita sa publiko, nga ang isa ka indibiduwal nga ginabawtismuhan naghinulsol na sa iya mga sala kag nagpromisa nga himuon ang kabubut-on sang Dios bisan ano man ang matabo. Nalakip diri ang pagkabuhi nga nagatuman sa Dios kag kay Jesus. Ang mga nagpabawtismo nagakabuhi sa paagi nga gusto sang Dios para mabuhi sila sing wala katapusan.

Ang pagpasalop sa tubig isa gid ka insakto nga simbulo sang pagbag-o nga ginhimo sang tawo sa iya kabuhi. Paano? Ginakumparar sang Biblia ang bawtismo sa paglubong. (Roma 6:4; Colosas 2:12) Paagi sa pagsalop sa tubig, ginapakita sang isa nga napatay sia sa iya daan nga paagi sang pagkabuhi. Pagbutwa niya sa tubig, daw pareho lang nga masugod sia sang iya bag-o nga kabuhi bilang Cristiano nga nakadedikar sa Dios.

Ano ang ginasiling sang Biblia parte sa pagbawtismo sa mga lapsag ukon pagpabunyag?

Wala ginasambit sa Biblia ang mga tinaga nga “bunyag” ukon “pagpabunyag.”b Wala man ini nagatudlo nga dapat bawtismuhan ang mga lapsag.

Pari nga nagabubo sang tubig sa ulo sang lapsag sa seremonya sang pagpabunyag.

Ang pagbawtismo sa mga lapsag wala ginatudlo sa Kasulatan. Ginatudlo sang Biblia nga may mga dapat himuon ang isa nga gusto magpabawtismo. Halimbawa, dapat niya maintiendihan ang pila ka panguna nga ginatudlo sang Pulong sang Dios kag magkabuhi base sa sini nga mga panudlo. Naghinulsol sia sa iya mga sala. Kag paagi sa pangamuyo, gindedikar niya ang iya kabuhi sa Dios. (Binuhatan 2:38, 41; 8:12) Indi ini mahimo sang mga lapsag.

Ano ang kahulugan sang pagpabawtismo sa ngalan sang Amay, sang Anak, kag sang balaan nga espiritu?

Ginsugo ni Jesus ang iya mga sumulunod nga “tudlui ninyo [ang mga tawo] agod mangin disipulo ko. Bawtismuhi ninyo sila sa ngalan sang Amay kag sang Anak kag sang balaan nga espiritu. Tudlui ninyo sila nga tumanon ang tanan nga ginsugo ko sa inyo.” (Mateo 28:19, 20) Ang ekspresyon nga “sa ngalan sang” nagakahulugan nga ang isa nga ginabawtismuhan nakahibalo sang awtoridad kag posisyon sang Amay kag sang Anak, lakip na ang papel sang balaan nga espiritu sang Dios. Para iilustrar: Nagsiling si apostol Pedro sa isa ka lalaki nga lupog halin pa sa iya pagkabun-ag: “Sa ngalan ni Jesucristo nga Nazaretnon, maglakat ka!” (Binuhatan 3:6) Maathag ang buot silingon sini. Nahibaluan ni Pedro kag ginkilala niya ang awtoridad sang Cristo. Ginapakita niya nga ang Cristo ang nagpaayo sa lupog paagi sa milagro.

“Ang Amay” amo si Jehovac nga Dios. Bilang Manunuga, Manughatag sang Kabuhi, kag Labing Gamhanan nga Dios, si Jehova lamang ang may pinakamataas nga awtoridad.—Genesis 17:1; Bugna 4:11.
“Ang Anak” amo si Jesucristo, nga naghatag sang iya kabuhi para sa aton. (Roma 6:23) Indi kita maluwas kon indi naton pagkilalahon kag batunon ang importante nga papel ni Jesus sa katuyuan sang Dios para sa mga tawo.—Juan 14:6; 20:31; Binuhatan 4:8-12.
“Ang balaan nga espiritu” amo ang aktibo nga puersa sang Dios, ukon ang iya ginagamit nga gahom.d Ginagamit sang Dios ang iya balaan nga espiritu para magtuga, maghatag sang kabuhi, magpadala sang iya mga mensahe sa iya mga manalagna kag sa iban pa, kag para hatagan sila sing kusog nga himuon ang iya kabubut-on. (Genesis 1:2; Job 33:4; Roma 15:18, 19) Gingamit man sang Dios ang balaan nga espiritu para giyahan ang mga manunulat sang Biblia nga isulat ang iya mga panghunahuna.—2 Pedro 1:21.

Sala bala ang pagpabawtismo liwat?

Madamo nga tawo ang nagdesisyon nga mag-ilis sang ila relihion. Pero ano abi kon nabawtismuhan na sila sa ila relihion sang una? Makasala bala sila kon magpabawtismo sila liwat? Ang iban masabat sang huo nga mahimo base sa ila pag-intiende sang Efeso 4:5, nga nagasiling: “Isa ka Ginuo, isa ka pagtuo, isa ka bawtismo.” Pero, ini nga bersikulo wala nagakahulugan nga ang isa indi puede mabawtismuhan liwat. Ngaa?

Konteksto. Ang konteksto sang Efeso 4:5 nagapakita nga ginpadaku ni apostol Pablo nga ang matuod nga mga Cristiano dapat nahiusa sa ila ginapatihan kag pagtuo. (Efeso 4:1-3, 16) Ini nga paghiusa matabo lang kon sundon nila ang isa lang ka Ginuo nga si Jesucristo, may pareho sila nga pagtuo, ukon pag-intiende sang ginatudlo sang Biblia, kag ginasunod ang pareho nga mga pagsulundan base sa Biblia para sa bawtismo.

Ginpalig-on ni apostol Pablo ang pila nga nabawtismuhan na nga magpabawtismo liwat. Ini bangod kay nabawtismuhan sila sang una nga wala gid maintiendihan ang Cristianong mga panudlo.—Binuhatan 19:1-5.

Insakto nga basihan sang bawtismo. Para batunon sang Dios ang bawtismo, dapat nabase ini sa sibu nga ihibalo sa kamatuoran sa Biblia. (1 Timoteo 2:3, 4) Kon ang isa ginbawtismuhan base sa mga panudlo sang relihion nga wala ginatudlo sang Biblia, indi ini pagbatunon sang Dios. (Juan 4:23, 24) Mahimo sinsero man ini nga tawo, pero wala sia ginbawtismuhan “suno sa sibu nga ihibalo.” (Roma 10:2) Para malipay sa iya ang Dios, dapat niya tun-an ang kamatuoran sa Biblia, sundon ang iya natun-an, idedikar ang iya kabuhi sa Dios, kag magpabawtismo liwat. Kon amo ini ang himuon niya, indi sala ang iya pagpabawtismo liwat. Amo gid ini ang dapat niya himuon.

Iban pa nga bawtismo nga mabasa sa Biblia

Ginsambit sa Biblia ang iban pa nga bawtismo nga may lain nga kahulugan sangsa pagpasalop sa tubig sang mga sumulunod sang Cristo. Binagbinaga ang pila ka halimbawa.

Ang bawtismo nga ginhimo ni Juan nga Manugbawtismo.e Ang mga Judiyo kag ang mga Judiyo nga proselita ginbawtismuhan ni Juan bilang simbulo sang ila paghinulsol sa ila mga sala nga nahimo sa Mosaikong Kasuguan, ang Kasuguan nga ginhatag sang Dios sa mga Israelinhon paagi kay Moises. Ang bawtismo nga ginhimo ni Juan naghanda sa mga tawo nga kilalahon kag batunon ang Mesias, si Jesus nga taga-Nazaret.—Lucas 1:13-17; 3:2, 3; Binuhatan 19:4.

Ang bawtismo ni Jesus. Espesyal gid ang bawtismo nga ginhimo ni Juan nga Manugbawtismo kay Jesus. Perpekto nga tawo si Jesus kag wala sing sala. (1 Pedro 2:21, 22) Gani, ang iya bawtismo wala nagakahulugan nga nagahinulsol sia ukon ‘nagapangabay sa Dios sing maayo nga konsiensia.’ (1 Pedro 3:21) Pero, ginpakita sini nga ginhatag niya ang iya kaugalingon sa Dios para himuon ang Iya kabubut-on bilang gintagna nga Mesias, ukon Cristo. Nalakip diri ang paghatag niya sang iya kabuhi para sa aton.—Hebreo 10:7-10.

Si Jesus nga ginabawtismuhan ni Juan nga Manugbawtismo.

Ang bawtismo sa balaan nga espiritu. Si Juan nga Manugbawtismo kag si Jesucristo pareho nga may ginhambal parte sa bawtismo sa balaan nga espiritu. (Mateo 3:11; Lucas 3:16; Binuhatan 1:1-5) Ini nga bawtismo indi pareho sa bawtismo sa ngalan sang balaan nga espiritu. (Mateo 28:19) Ngaa?

May limitado lang nga kadamuon sang mga sumulunod ni Jesus ang ginbawtismuhan sa balaan nga espiritu. Ginhaplasan sila sang balaan nga espiritu bangod ginpili sila nga mag-alagad upod kay Cristo sa langit bilang mga hari kag saserdote nga magagahom sa duta.f (1 Pedro 1:3, 4; Bugna 5:9, 10) Ang ila gamhan amo ang minilyon ka mga sumulunod ni Jesus nga may paglaum nga mabuhi sing wala katapusan sa Paraiso sa duta.—Mateo 5:5; Lucas 23:43.

Ginbawtismuhan kay Cristo Jesus kag sa iya kamatayon. Ang mga indibiduwal nga ginbawtismuhan sa balaan nga espiritu ‘ginbawtismuhan man kay Cristo Jesus.’ (Roma 6:3) Gani, ini nga bawtismo nagakatabo sa mga hinaplas nga sumulunod ni Jesus, nga magagahom upod sa iya sa langit. Paagi sa ila bawtismo kay Jesus, nangin bahin sila sang iya hinaplas nga kongregasyon. Sia ang ila Ulo, kag sila ang lawas.—1 Corinto 12:12, 13, 27; Colosas 1:18.

Ang hinaplas nga mga Cristiano ‘ginbawtismuhan man sa kamatayon’ ni Jesus. (Roma 6:3, 4) Bilang pagsunod kay Jesus, gin-pokus nila ang ila kabuhi sa pagtuman sa Dios imbes sa ila kaugalingon kay kabalo sila nga indi sila magkabuhi sing wala katapusan diri sa duta. Matapos ang ila bawtismo sa kamatayon ni Jesus kon mapatay sila kag mabaton nila ang pagkabanhaw sa langit bilang espiritu nga mga tinuga.—Roma 6:5; 1 Corinto 15:42-44.

Ang bawtismo sa kalayo. Nagsiling si Juan nga Manugbawtismo sa iya mga tagpalamati: “Sia [si Jesus] magabawtismo sa inyo sa balaan nga espiritu kag sa kalayo. Nagauyat sia sing pala nga ginagamit sa pagpahangin, kag tinluan niya sing maayo ang iya linasan, kag tipunon ang iya trigo sa bodega, apang sunugon niya ang upa sa kalayo nga indi mapalong.” (Mateo 3:11, 12) Talupangda nga may kinalain ang bawtismo sa kalayo kag ang bawtismo sa balaan nga espiritu. Ano ang buot silingon ni Juan sini nga ilustrasyon?

Ang trigo amo ang mga magapamati kay Jesus kag magatuman sa iya. May paglaum sila nga mabawtismuhan sa balaan nga espiritu. Ang upa nagasimbulo sa mga indi mamati kay Jesus. Bawtismuhan sila sa kalayo, nga nagasimbulo sa ila wala katapusan nga kalaglagan.—Mateo 3:7-12; Lucas 3:16, 17.

Sala nga mga pagpati parte sa Cristiano nga bawtismo

Sala nga pagpati: Ang pagwisik ukon pagbubo sang tubig sa isa ka tawo puede na ibulos sa pagpasalop sa tubig.

Kamatuoran: Ang tanan nga bawtismo nga ginrekord sa Biblia puro tanan ginpasalop sa tubig. (Mateo 3:13, 16; Binuhatan 8:36-39) Wala gid sing may ginwisikan lang.g Ang pagwisik wala nagapakita sang importansia sang pagpasalop sa tubig, nga ang ginbawtismuhan napatay sa iya daan nga paagi sang pagkabuhi kag subong magasugod sia sang iya bag-o nga kabuhi bilang dedikado nga alagad sang Dios.

Sala nga pagpati: Sang nagsiling ang Biblia nga ang manugbilanggo sa Filipos “kag ang iya bug-os nga panimalay ginbawtismuhan,” nalakip man sa ginbawtismuhan ang mga lapsag.—Binuhatan 16:25, 31-34.

Kamatuoran: Una, wala sing may ginsambit nga edad. Ikaduha, antes ginbawtismuhan ang manugbilanggo kag ang iya panimalay, nabatian nila kag ginbaton “ang pulong ni Jehova.” (Binuhatan 16:31, 32, 34) Gani, ang mga ginbawtismuhan ara na sa edad nga maintiendihan kon ano ang ginsiling kag nagpati sa Dios kag kay Ginuong Jesus.

a Ang Griego nga tinaga nga gin-translate “bawtismo” nagakahulugan sang “pagtum-oy, pagpasalop, kag pagbutwa sa tubig,” siling sang Vine’s Complete Expository Dictionary of Old and New Testament Words.

b Ang “pagpabunyag” nagakahulugan sang seremonya nga ginahimo sang pila ka simbahan sa diin ginahatagan sing ngalan ang mga lapsag kag dayon “ginabawtismuhan” paagi sa pagwisik ukon pagbubo sang tubig sa ila ulo.

c Si Jehova ang personal nga ngalan sang Dios. (Salmo 83:18) Tan-awa ang artikulo nga “Sin-o si Jehova?”

d Tan-awa ang artikulo nga “Ano ang Balaan nga Espiritu?”

e Tan-awa ang artikulo nga “Sin-o si Juan nga Manugbawtismo?”

f Tan-awa ang artikulo nga “Sin-o ang Mapalangit?”

g Ginagamit man sang Biblia ang tinaga nga “mga bawtismo” para sa pila ka seremonya sang pagpaninlo, pareho sang pagtum-oy sa tubig sang kagamitan sa templo. (Marcos 7:4; Hebreo 9:10) Lain gid ini sa pagpasalop sa tubig kay Jesus kag sa iya mga sumulunod.