Pamangkot sang mga Pamatan-on . . .

Paano Ko Mabatas ang Pagyaguta?

ANG mga pamatan-on nga nagahulag ukon nagapanapot sing tuhay sa ila mga katubotubo mahimo nga mangin biktima sang mapintas nga pagyaguta. Matuod ini sa Cristianong mga pamatan-on, nga ang ila pagginawi masunson nga tuhay gid sa iya sang iban nga pamatan-on. Indi bala nagsiling si Cristo sa iya matuod nga mga sumulunod: “Kon ginhingabot nila ako, hingabuton man nila kamo”?—Juan 15:20.

Paano sini naapektuhan ang mga pamatan-on nga mga Saksi ni Jehova? Ang pila sa ila ginyaguta bangod sang indi pagsaulog sing pila ka piesta opisyal; ang iban ginmulay bangod sang indi pagsaludo sa bandera. Ang pila sa ila ginsabad bangod sang indi pag-abuso sa droga, bangod sang pagkabunayag, kag bangod sang pagsakdag sa mga talaksan sa moral sang Biblia.

Ini nga kahimtangan indi bag-o. Sa pagkamatuod, si apostol Pedro nagsiling sa mga Cristiano nga nagkabuhi sang unang siglo: “Bangod wala kamo nagapadayon sa pagdalagan upod [sang katawhan sang mga pungsod] . . . , natingala sila kag padayon nga nagapasipala sa inyo.” (1 Pedro 4:4) Ang iban nga badbad nagasiling, “ginatawag [nila] kamo sing malain nga ngalan” (Knox) ukon, “Ginainsulto nila kamo.”—Today’s English Ver­sion.

Ginyaguta ka na bala bangod sang imo relihioso nga mga pagpati? Kon amo, magpakaisog. Madamo ka sing kaupdanan! Kag malipay ikaw sa paghibalo nga matun-an mo nga batason ang kabudlayan nga ginayaguta bangod sang imo pagtuo.

Kon Ngaa Nagayaguta Sila

Ngaa ginayaoyao sang iban yadtong tuhay sing mga pagpati kag mga paggawi sa ila? Kon kaisa ang mga mayubiton—kaangay sang mga madaugdaugon—wala sing pagsalig sa kaugalingon. Mahimo nila ikaw yagutaon agod pataason ang ila kaugalingon sa atubangan sang ila mga katubotubo. Mahimo nga kon nagaisahanon, pila lamang sining mga mauligyaton ang may interes—ukon may kaisog—nga mulayon ka sing tampad.

Sa pihak nga bahin, ang pila ka manugyubit, subong sang ginsulat ni Pedro, “natingala.” Huo, mahimo nga nagapalibog gid sila sa imo pagginawi. Halimbawa, kon ikaw isa sang mga Saksi ni Jehova, mahimo gid sila matingala nga wala ikaw nagapakigbahin sa mga hilikuton may kaangtanan sa mga piesta opisyal. Mahimo pa gani nga nakabaton sila sing tiko nga impormasyon tuhoy sa mga Saksi gikan sa mapintas nga mga manugpamatok.

Bisan ano man ang rason, kon ginayaguta, mahimo magaugyon ka sa hulubaton sang Biblia: “May isa nga nagapamulong sing maparas kaangay sang mga pagbuno sang espada.” (Hulubaton 12:18) Apang dumduma nga yadtong nagahambal sing subong sini ayhan wala nagahimo sini bangod indi ka nila luyag subong isa ka persona. Ayhan ginahimo nila ang ginasiling gid sang hulubaton sa Biblia—“nagapamulong sing maparas.”

Apang, ang yagutaon masakit, kaangay sang binun-an. Mahimo gani masulay ikaw sa pagkompromiso sang imo pagtuo agod mauntat ang grabe nga pag-insulto. Paano, nian, nimo mabatas ang pagyaguta tungod sang imo pagtuluuhan?

Pagpangapin

Ginlaygayan ni apostol Pedro ang mga Cristiano: Pirme mangin ‘handa sa pagpangapin sa tagsa nga nagapangayo sa inyo sing pangatarungan tuhoy sa paglaum nga yara sa inyo, apang ginahimo ini nga may kalmado nga buot kag daku nga pagtahod.’ (1 Pedro 3:15) Agod mapangapinan ang imo pagtuo kinahanglan nga magkuha ikaw sing sibu nga ihibalo kag mahangpan mo ang mga rason sang imo mga ginapatihan.

Apang, dapat mo man tun-an kon paano ipabutyag ang imo kaugalingon sa iban upod ang “tudok nga pagtahod” ukon, subong sang pagbadbad sang The Bible in Basic English, “wala sing pagpabugal.” Ang imo ihibalo sa Biblia kag sa mga panudlo sini indi dapat magpabatyag sa imo nga labaw sa iban. Sa kabaliskaran, dapat panikasugan mo nga palambuon ang panimuot ni apostol Pablo, nga nagsulat tuhoy sa iya ministeryo: “Nagpaulipon ako sa tanan, agod madaug ko ang kalabanan nga mga tawo.”—1 Corinto 9:19.

Kon nahuya ikaw sa pagpangapin sa imo pagtuo, indi magkasubo. Madamo nga pamatan-on nga Saksi ang nagbatyag sing amo man sini. “Sang elementarya pa ako,” siling ni Jamal, “indi ako makahibalo magpaathag sa iban kon ngaa wala ako nagasaulog sing mga piesta opisyal ukon nagasaludo sa bandera ukon bisan gani kon ngaa nagapamalaybalay ako sa ministeryo.” Ano ang nakabulig sa iya? “Pirme ako ginbuligan sang akon amay tubtob nga napaathag ko ini nga mga butang, kag importante gid ini.” Kon nabudlayan ikaw sa pagpaathag sang imo pagtuo sa iban, ayhan makapangayo ikaw sing bulig sa imo ginikanan ukon sa isa pa ka hamtong nga katapo sang Cristianong kongregasyon agod buligan ka nga mahangpan sing maayo ang ihibalo sang Dios.—Efeso 3:17-19.

Ang isa ka 16-anyos nga lamharon nga Saksi nagsiling nga ang isa ka programa sang personal nga pagtuon sa Biblia nakabulig sa iya nga matigayon ang kaisog sa pagpanaksi sa eskwelahan. “Sang una, kon sunlugon ako sang akon mga kabutho tuhoy sa akon pagka-Saksi, indi ko mahibaluan ang akon isiling,” baton niya. “Karon, subong bug-os tion nga ebanghelisador, ginatun-an ko pirme ang Biblia, kag makahatag na ako sing sabat. Ang pagbasa sa pinakabag-o nga mga artikulo sa Lalantawan kag Magmata! nga mga magasin nakabulig sa akon nga ipakighambal sa akon mga kabutho ang tuhoy sa akon mga pagtuluuhan.”

Sa pagkamatuod, wala sing duha ka kahimtangan ang magkapareho. Busa ang nagkalainlain nga mga kahimtangan nagakinahanglan sing lainlain nga mga reaksion. Apang, kon naakig ka bangod sang masakit nga hambal, indi gid nagakadapat nga ‘balusan ang malaut sing malaut.’ (Roma 12:17-21) Ang insulto nga sabat, bisan daw lahoglahog lamang, magadabok lamang sa kalayo kag mahimo pa magapukaw sa dugang nga pagyubit. Busa, nasapwan sang iban nga mas maayo nga indi na lang pagsapakon ang insulto.

Sa pila ka kahimtangan, subong sang kon ang ginhambal isa lamang ka lahog, mas maalamon nga kadlawan na lang ang ginhambal sa baylo nga maakig. (Manugwali 7:9) Kon makita sang mayubiton nga diutay ukon wala sing epekto ang iya ginhambal, mahimo niya untaton ang pagpanabad.—Ipaanggid ang Hulubaton 24:29; 1 Pedro 2:23.

Paghambal

Apang, may mga panahon nga posible ang paghatag sing malip-ot, mataktikanhon nga paathag tuhoy sa imo pagtuluuhan. Gintilawan ini sang isa ka 13-anyos nga dalagita kag nakatigayon sing maayo nga mga resulta. “Manugkadto na ako sa klase,” siling niya, “sang ang pila ka estudyante nagsugod sa pagyaoyao sa mga Saksi ni Jehova. Mahambal na kuntani ako, apang naglakat dayon sila kag nagpadayon sa pagkadlaw sa akon—luwas sa isa.” Ang estudyante nga Saksi nagpaathag: “Ang isa ka bata nga babayi nga si Jaimee nag-atubang sa akon kag nagsiling sa akon nga may libro sia nga Mahimu Ka Mabuhi sing Dayon sa Paraiso sa Duta.a Nagsiling sia nga madamo na ang nabasa niya sa sini kag interesado sia sa pagtigayon sing dugang nga impormasyon tuhoy sa aton pagtuluuhan. Ginsugdan ko ang pagtuon sing Biblia kay Jaimee.” Napalig-on sa iya eksperiensia, ang pamatan-on nga Saksi nagsugod sa pagpakigsugilanon sa iban nga pamatan-on. “Regular ko nga ginasugilanon ang akon apat ka kabutho nga nagpakita sing interes kag napat-od ko nga magatuon sila sa indi madugay,” siling niya.

Sang nagligad nga mga tinuig ang isa ka estudyante sa pungsod sang Liberia sa Aprika may kaanggid man nga eksperiensia. Sa tion sang klase sa sociology, ginpaathag niya sing matinahuron nga subong isa sang mga Saksi ni Jehova, nagapati sia sa pagpanuga sa baylo sang ebolusyon. Sang primero, madamo sang iya mga kabutho ang mamulayon gid. Apang gintugutan sia sang iya manunudlo nga ipaathag ang iya mga pagpati sa klase, nga pagkatapos sadto ginbaton sang manunudlo ang libro nga Life—How Did It Get Here? By Evolution or by Creation?b

Sa tapos mabasa ang libro, ginsilingan sang manunudlo ang klase: “Ini nga libro wala sing tupong. Isa ini sang labing maayo nga libro sa siensia tuhoy sa pagpanuga nga akon nabasa.” Nian ginpaathag sang manunudlo nga luyag niya gamiton ang Creation nga libro upod sa libro nga ginagamit sang klase sa masunod nga duha ka semester, kag ginsilingan niya ang klase nga magkuha sing kopya gikan sa estudyante nga Saksi. Madamo nga libro ang napahamtang, kag madamo nga estudyante ang nagbag-o sang ila pagtamod sa mga Saksi ni Jehova!

Ang Gintilawan nga Pagtuo Isa ka Mabakod nga Pagtuo

Ibutang ta, may tion kon kaisa nga daw matublag ikaw sa kadamuon sadtong wala nagapakig-ambit—ukon nagaapresyar—sang imo tindog pasad sa Biblia. (Ipaanggid ang Salmo 3:1, 2.) Busa, maalamon nga tinguhaan nga makig-upod sa mga may pareho sa imo nga mga pagtamod kag mga pagpati. (Hulubaton 27:17) Apang ano abi kon wala sing mga pamatan-on nga kaangay sang imo pagtuo sa imo eskwelahan ukon sa imo kasilingan?

Kon amo sini, dumduma nga ang imo pinakadaku nga Abyan amo si Jehova nga Dios, kag sarang niya ikaw sapupuhon. Sia ang panguna nga puntariya sang mga hangkat ni Satanas nga Yawa sa linibo na ka tuig. Busa, makapat-od kita nga mapahalipay ang tagipusuon ni Jehova kon magtindog ikaw nga malig-on sa imo pagtuo. Ini nga dalanon nagahatag sa iya sing higayon ‘sa pagsabat kay Satanas, nga nagayaguta sa iya.’—Hulubaton 27:11.

Mapaabot lamang nga sa pulupanag-on, ang imo pagtuo pagatilawan. (2 Timoteo 3:12) Apang, nagapasalig si apostol Pedro nga ang natilawan nga kalidad sang aton pagtuo ‘mas daku sing balor sangsa bulawan nga nagakawala walay sapayan nga gintilawan ini sa kalayo.’ (1 Pedro 1:7) Busa, kon ginapakahuy-an ikaw tungod sa imo pagtuo, tamda ini nga isa ka kahigayunan nga mapalig-on ang imo pagtuo kag mapakita ang imo pagbatas. Si apostol Pablo nagsulat nga ang pagbatas nagadul-ong sa ‘nahamut-an nga kahimtangan.’ (Roma 5:3-5) Huo, ang handum nga matigayon ang kahamuot ni Jehova nagahatag sing makusog nga rason agod makabatas ka kon ginahangkat ang imo pagtuo!

[Mga footnote]

[Laragway sa pahina 13]

Mapangapinan mo bala ang imo pagtuo?